RESÖN 1

Aoa ‘Ạitu la Pō‘ia ‘Oaf‘oaf ne ‘Inoso

“Iạ ne fup‘ạkim rȧn te‘ [‘iriạ,’ NW], iạ rē iriạ la fā ma hạni ‘e ‘on mumuạ pạu.”​—Mataio 19:4

‘Ạitu Jihovaa ta a‘lelea ‘inos mumue ta. Puk Ha‘a foar se ‘isa ne iạ ta fup‘ạkia hȧn mumue ta, ma tä iạ “ho‘am hȧn ta se famör ta.” ‘Atama ‘ea ‘e ‘ofa: “Iạ suit ‘e ‘otou sui, ka tikot ‘e ‘otou tiko.” (Kamataga 2:22, 23) Jihova nōnō pa ‘es ma la ‘inoso la noh ‘oaf‘oaf.

‘E avat ne ‘äe ‘inoso, kop ma ‘äe la a‘häe ne te‘ ne tē la la‘ lelei. ‘Inosot ne hạihanisiạg aire, la agtạu tape‘ma ma pefä‘e. (1 Korinita 7:28) Kepoi ka ‘äe la garue‘ȧk muạ‘ạkiạg ne Puk Ha‘a, ‘e laloag ne puk te‘is, ‘ou ‘inos ta ma ‘ou kạunohoag ta la ‘oaf‘oaf.​—Salamo 19:8-11.

1 A‘SOK VÄEGAT NE JIHOVA NĀ SE ‘ÄE

TĒ NE PUK HA‘A ‘EA: Vävän ta, ta filo‘ ne kạunohoag ta.​—Efeso 5:23.

Kepoi ka ‘äe vävänet, Jihova pa ‘es la ‘äe la a‘pumuạ‘ȧk ‘ou hạina la fak ma ne iạ tēet ne parpar sio. (1 Pita 3:7) Jihova fup‘ạkia hȧn ta la hạiasoag se ‘äe, ma iạ pa ‘es la ‘äe la kel‘ȧk se ia hanisi ma e‘ạkiga. (Kamataga 2:18) Hanisi se ‘ou hạina kop la pumuạ se, ma tä ‘äe pa ‘es la nā ‘on pa ‘ese, la muạ ‘e pa ‘es ‘on‘ou.​—Efeso 5:25-29.

Kepoi ka ‘äe hạnit, Jihova pa ‘es la ‘äe la e‘ȧk ‘ou vävän ta ma la hạiasoag se iạ la a‘sokoa ‘on väeag garue ta. (1 Korinita 11:3; Efeso 5:33) Tȧr rē puer ne ‘ou vävän ta a‘soko, ma hạigarueag ma iạ ‘e ‘atakoa ne ‘ou huga. (Kolosa 3:18) ‘E avat ne ‘äe la a‘sok tē ‘i, ‘äe täla hele‘ la tē keleag helavat, ‘e maf ne ‘ou vävän ta ma ‘Ạitu Jihova​—1 Pita 3:1-6.

TĒ NE ‘ÄE LA PŌ LA RĒ:

Sạio‘ se ‘ou sạu ta, ne tes tä ‘äe la rē la pō la ‘äe la vävän leleit ne ta hȧn leleit. A‘fại a‘lelei ma a‘leleia tē ne pa ‘es ‘e ‘äe

‘Äe kop la huạg lal. Iạ la roa avat ‘ạuạr la rak la a‘ofan huạg ‘on le‘et se le‘et

2 KOKON‘ȦK AIER HUẠG NE ‘OU SẠU TA

TĒ NE PUK HA‘A ‘EA: ‘Äe kop la kokon‘ȧk pa ‘es ne ‘ou sạu ta. (Filipai 2:3, 4) A‘pumuạ‘ȧk ‘ou sạu ta, a‘häe‘ȧk ne Jihova pa ‘es la ‘on lelea‘ e‘a “la ag rạumạhin se te‘ ne famör ‘atakoa.” (2 Timoti 2:24) “Ma ‘oris fäega fak‘ia se kōag ne rē ‘e ser ne pel het. Ka ne alel ‘on le‘et ne huạg poto hö‘ mȧür lelei.” Hil a‘huạg ‘atmại fäeag ne ‘äe la ‘ea. (Fäeag ‘Es Fuạga 12:18) ‘At ‘on Jihova, täla hạiasoagan ‘äe la fäeag ‘e mäeavhanisi, ma hanisi.​—Kalatia 5:22, 23; Kolosa 4:6.

TĒ NE ‘ÄE LA PŌ LA RĒ:

Ro‘ạit la pō‘ia huạg totoka ma la a‘tafan ‘ou a‘häe mumuạ la ‘äe la hạifäegag‘ạkia tē ‘akmam‘oi ma ‘ou sạu ta

Rē a‘häe mumuạ se tē ne ‘äe la ‘ea ma ‘ou la ‘ea‘ea heta

3 HUGAG ‘ESEA ‘E ‘OMUẠR A‘HÄE

TĒ NE PUK HA‘A ‘EA: ‘E avat ne ‘äe la ‘inoso, ‘äe ma ‘ou sạu ta täla “famör ‘esea ma”. (Mataio 19:5) Ka ‘ạuạr nōnō ma se famör tū ruạ, ma ‘omuạr a‘häe kop ma kal tatạu ra. ‘Ạuạr kop la rak la ‘ạuạr la hugag ‘esea ‘e a‘häe ma mäeva. (Filipai 2:2) ‘E a‘sokoag ne rē pure hugag ‘esea iạ tē pumuet. Puk Ha‘a ‘ea: “Tē ne ‘amnạki pō la a‘fūmou‘ȧk ‘e puer‘ạki.” (Fäeag ‘Es Fuạga 20:18) Fue‘ la muạ‘ạkiạg ne Puk Ha‘a la muạ‘ạkia ‘ạuạr ‘e avat ne ‘ạuạr la a‘sok ag‘esea rē pure.​—Fäeag ‘Es Fuạga 8:32, 33.

TĒ NE ‘ÄE LA PŌ LA RĒ:

Hạiväeag ma ‘ou sạu ta a‘häe ne ‘ou huga, ‘eake ‘ou räe ne rogrogo ma tä‘mä‘ie

Hạifäegag ma ‘ou sạu ta, mumuạ la ‘äe la a‘sokoa ta tēet

[Tēet ne Sui‘ȧk ‘e lop heta]

[Kes ‘e rạupeap tä ‘on 5]

A‘SOKOA ‘OU PŌ HETA MA ‘ẠIRÖT‘ẠKIA TĒ NE PUMUA

Se ‘es ‘e räet ne ‘äe, ma ‘ou sạu ta kop la ‘atakoa. (Salamo 103:14; Jemesa 3:2) ‘Io ma kikia se ag lelei ne ‘ou sạu ta. Kel‘ạkia huạg lala, ma tua‘nȧk‘ȧk ne muạ‘ạkiạg ne Puk Ha‘a ‘es‘ao. (2 Timoti 3:16) Jihova täla ạlạlum‘ạkia ‘äe la tạupir se ‘on fas‘ȧk tē, ma ‘ou ‘inos ta la pō se te a‘at ‘on ne‘ne‘i ‘e te‘ ne fạu.​—Kalatia 6:9.

[Kes ‘e rạupeap tä ‘on 5]

SẠIO‘ SE ‘ÄEA . . .

Te‘ ka ‘otou sạu ta la räe ne gou kokon‘ȧk a‘ti‘ pạu ‘on pa ‘ese ‘e ‘otou pa ‘ese?

Tes ta gou rē ‘e terạnit te ‘i la kel‘ȧk ne gou e‘ȧk ka hanis ‘e ‘otou sạu ta?