**‘Ut‘ạkia se Muạ ‘Os Fạiva ‘e Garue Marag ta—‘Os la Uetnes ‘e Intercom ta**

‘E rēko tese iạ tē pumuet: La Uetnes ‘e intercom ta iạ tē a‘fea huget. Ka tes tä ‘is la rē la noanoa te‘ la se a‘af‘afan ‘os la fe‘eniạg ‘esea la rē garue lelei? A‘häe‘ȧk ne kop ma uetnes ‘e intercom ta, tä‘ma sal het ne famör heuạ la pō e la a‘fại se rog heg ta. (Roma 10:14) Ma ‘on rogrog kel‘ạkia ‘on ‘es‘ao ne la uetnes ‘e intercom ta. (‘Io se Yearbook 2011, rp. 65-66, ma Yearbook 2000, rp. 54, para. 3.) Sạkior se pạin ‘i.

Tē ne la Rē:

Ös ta fäeag luạk het, ma fȧ‘ sio la pō la ‘äe la hat se famör ‘es rī ta ‘e intercom ta. Tē te‘is la pō la a‘ne‘ne‘ạkia ‘ou huga. Sui‘ȧk mumuạ ‘amnȧk ne ‘ou ȧs ta. A‘es‘av‘ȧk as ‘on famör ‘es rī ta kepoi ka fȧ‘ sio. A‘vȧh ‘e ‘ou la nā se iạ (ne la rou se fȧn ne ‘on nu‘suạr ta) tēet ne la sui‘ạkia rogrog hoi‘ȧk se ia.
‘Ou räe kop la noj ma kikia. Maf kakahā ma rē ‘u‘ la fak ma ne ‘ạuạr hạikeleag.
Huạg totoak ma ‘es‘av‘ȧk fäeag vavhiạn. Fäeag la ti‘ ma fäeag la taf. Matạ‘ la se fäefäeag fu‘fu‘, ma la se vȧv sirien.
Rē puer a‘lelei. ‘E rī titi‘u kop ma la ma ‘on intercom, ne ta pel futfuti. Kop ma ‘äe kal pō ra la piliạg se iris ‘atakoa, ‘äe la pō la hil la piliạg se folut ma faki‘oag utut ne ‘äe vạhi. Famör ne noh ‘e rī te‘ kop ma täla kokon ne la fea kepoi ka ‘os fū ta roa‘ia ‘e ut la tȧr ta.

Ȧs‘ȧk ‘e Huạl Te‘:

Ȧs‘ȧk tē ‘i ‘e ‘omus titi‘ȧk ne kạunohoga, iris ne ‘es väega la fäeag ka la fạ‘ ke.