‘E Avat ne ‘Es‘ao‘ạkia Tē Nāag Puk Toktoko la Uetnes

La uetnes ‘e la ‘es‘ao‘ȧk tē nāag puk toktoko ne tepeli iạ hele‘ la sal leleit la futia iris ne huạg vạivại se aier ta. (Jone 6:44) Ta‘ag, fā mamfuạ ne kạurotuga a‘ne‘ne‘ȧk la fūfū‘ȧk av la uetnes ofrạu ‘e utut ne la pō famör ‘e laloag ne utut ne väe se kạurotuạg ta la garue sin. Tē nāag puk toktoko kat fū a‘mou ra se ta utut, iạ kat a‘noa ra la far se iris ne pure la ‘es‘ao‘ȧk ut ta. Ka sei tä la ‘es väega? Iris ne hoa‘ maraga ne la pō la rē puer lelei, ag fakeanean, ka potsusun se fäega. Te‘is tē he his ne la rē ma tē ne la se rē ne la hạiasoagan iris ne hoa‘ maraga la ‘oris garue ta la la‘ lelei.

Tē ne la rē:

‘Äe la maf kakahā, ‘uạ‘uạ‘ȧk ma hạiasoag se iris ne sirsiri. Iris ‘on rereag mạlum se‘ ma tä iris ‘ea ta fäeag ‘uạ‘uạ‘ạkit. Kepoi ka ta le‘et la ‘io se tē nāag puk ta ‘e avat ne iạ la siri, ‘äe la pō la ‘ea, “Kepoi ka ‘äe ‘oaf ‘äe la pō la teak ta puk het.”
Fū la se rēag sousou ‘e tē nāag puk heta. ‘E ut ‘on rereag iris ne hoa‘ maraga räe ne iạ hue lelei ‘e av ne la fū la rēag kā‘ȧk se‘ ‘e tē nāag puk heta. Iris ‘on rereag ‘ea ne sal te‘is rē ma famori rēag araruạ la fu‘, ma tä iris fū la rēag sousou mea‘mea‘ se ma tȧr se avat ne le‘et la fu‘ ‘e tē nāag puk heta. ‘E avat ne le‘et la leuof se tē nāag puk heta, ȧs‘ȧk la hạifäegag ma iạ, ‘äe la pō la sạio‘, “Ka tes ta ‘ou räe se sạio‘ heta?”
A‘es‘ao‘ȧk Puk Ha‘ heta.
Kepoi ka ta le‘et tekại puk het ne ‘es‘av‘ȧk se rak Puk Ha‘a la fak se puk ta Puk Ha‘a ‘Ea Aire, ‘äe la pō la sui‘ạkia rērē ne rak Puk Ha‘a. Kel‘ȧk vitio heta Rakoa Puk Ha‘a, Pō ‘e Tese? ‘e ‘ou telefon ta ne tablet.
Kepoi ka le‘et ‘oaf, fȧ‘ utut ne famör ta noho ma ‘on nampa ne telefon ta. Kepoi ka famör ta noh ‘e utut ne mou se ta kạurotuạg hoi‘ạkit, a‘vȧh fom heta Please Follow Up (S-43) ma nā se sạsiạg fāat ne matạ‘ se puk ne kạurotuạg ta ‘e av mij pạu heta.