Puk ‘on Kạupuer ne Muạ‘ȧk Tē

Se ‘Ạus ‘Otomis Hensạsiạg Hanis ‘Atakoa:

“‘Ạmis noanoa‘ia se ‘Ạitu ‘e te‘ ne av ‘atakoa ‘e rēko te‘ ne ‘ạus ‘atakoa, ka ‘ạmis fa‘ fū‘ȧk ‘ạus ‘e ‘otomis ro‘ạitu: ne ‘ạmis a‘häe, ma kat toak ra, se ‘omus garue ne pilifi, ma ‘omus popot [garue, NW] ne hanisi, ma ‘omus huạg röt‘ȧk tē ne hün se ‘omus ‘ạiröt‘ạkiạg ne ‘os Gagaja Jisu Karisto, ‘e muạ ne ‘os ‘Ạitu ka Ö‘fā.” (1 Tes. 1:2, 3) Fäeag ‘i kel‘ȧk a‘lelei ‘otomis hanisi se ‘ạusa! ‘Ạmis ‘uạ‘uạ‘ȧk se Jihova ‘e rēko ‘ạus, ma garue lelei ne ‘ạus a‘a‘soko. ‘On hün heta?

‘E fạu his ne vȧh se, ‘ạus popot ‘e a‘sokoag ne “‘omus garue ‘e pilifi” ma ‘‘omus garue ne hanisi’ hün ma se Pure‘ag ta. Ma‘oit ‘e ‘ạusa ao sal ma kikia la a‘ofrạu‘ạkia ‘omus garue marag ta. Iris ‘on rereag ‘ut la garue agag ‘e ut ma hanuạ tape‘ma ne pa ‘es ti‘ ‘e iris ne marag‘ạkia Pure‘ag ta. Iris ne tore a‘ofrạu‘ạkia ‘oris garue marag ta ‘e la uetnes ofrạu. Ma‘oit rue‘ȧk ‘oris huga la painia hạiasoag ‘e av ne A‘häe‘ạkiạg ta, ‘e av ȧs ne huȧ‘ ne kạugarueaga ne av ne kȧmpein a‘pumuạ‘ạkit ‘e huạl ne ‘Okosita 2014. Aier ma ne ‘omus fūfū kat tatạu ra, ‘ạmis ‘uạ‘uạ‘ȧk se ‘ạus ‘e rēko ‘omus agaga se Jihova ‘e ‘atakoa ne ‘omus huga. (Kol. 3:23, 24) ‘Omus “garue ne pilifi” ta hün het ne ‘ạmis ‘uạ‘uạ‘ạkia Jihova!

‘Ạmis a‘pumuạ‘ȧk tape‘ma ‘omus “garue ne hanisi” ‘e rēko fū‘ȧk ne rī ma‘oi ‘e rȧn te‘. Ma‘oi ne famör ‘on ‘Ạitu ‘ut ma kikia, ta ‘on‘on pa ‘es la fū‘ȧk rī ma‘oi hoi‘ȧk. (‘Ạis. 60:22) Rē a‘häe se, iris ne hoa‘ maraga ‘e fạut öf se 8,201,545, ka ‘os a‘tatạu‘ȧk ne rak Puk Ha‘a ‘e te‘ ne huạl ‘i 9,499,933. Ta‘ag hün ne ofes ne maj ma‘oi pa ‘es la a‘ti‘. ‘On fuạga ‘is kop la fū‘ȧk Rī ne Pure‘ag hoi‘ȧk! Tape‘ma pa ‘es la fū‘ȧk ofes ne höl‘ȧk tē ‘e ut ma‘oi ‘e rȧn te‘ la pō la iris ne höl‘ȧk tē la noh ka garue ‘e utut ne ‘oris fäeag ta ‘es‘ao‘ȧk fuạmamạu.

‘Is la pō la sạio‘ se ‘isa, ‘Ka tes tä gou la pō la rē la hạiasoag se fū‘ȧk ne rī ‘i?’ ‘Is ‘on rereag la nā ‘os ava la ‘es väeag ‘e garue fū‘ȧk tē ta. Kop ma ‘is famör majạu ne ‘igkȧ‘, ‘is ‘atakoa la pō la nā ‘os koroa a‘pumuạ‘ạki se garue pumuạ te‘. (FEFuạga 3:9, 10) ‘E fū‘ȧk ne tapernakul ta, lelea‘ ‘Isireli ‘oris huga rue‘ạkia iris la nā tē, ma tä he‘ȧk la mätea famori ‘e la nā tē hoi‘ȧk. (Sại. 36:5-7) Kat araruạ‘ȧk ra ne Ut ne Puk te‘ täe ka rue‘ȧk tape‘ma ‘os huga. ‘Omus ‘garue ne hanisi’ ‘e a‘sokoag ne garue ha‘ te‘, iạ hün hoi‘ȧk het la ‘ạmis la ‘uạ‘uạ‘ạkia Jihova!

‘Ạmis ma ‘on hün leleit la ‘oaf ‘e ‘otomis räe se vahiạ röt‘ȧk tē ne ‘os hensạsiga. Kel‘ạkiạg het, ‘os hensạsiga ‘e Saot Kōrēa, kamata ma ‘e 1950, ‘os hensạsiạg fā haharạgi sur se rī ‘o‘oroga ‘e rēko iris kat hạikạuạg ra. Hensạsiạg fā ma‘oi pạu kel‘ạkia huạg röt‘ạki ma kat araruạ ra. ‘Oris kel‘ạkiạg ne huạg röt‘ạki a‘ne‘ne‘ạkia ‘os mā!

‘E Eritrea, ‘os sạsiạg fā fol ‘o‘or fạu 20. Iris ne tore ne laloag‘ȧk ‘os sạsiạg hạina ma ‘oris lele‘a ‘o‘or karạu. ‘Os hensạsiga nā vahiạ ma ȧs‘ȧk sal ma‘oi pạu la pō la sại‘ạkia iris, ka kat pō ra la la‘ lelei. ‘Os hensạsiga kat pō ra la tạria pā ‘es ‘on irisa. Iris fumou se tē ne iris pilifi, aier ma ne iris hạipoag ma noanoa ti‘ut. ‘Is kat pō ra la mao‘ạkia ‘e ‘os ro‘ạitu iris ‘i ne mā aier pạu.​—Roma 1:8, 9.

Aier, ma‘oit ‘e ‘ạusa kat ‘o‘or ra ‘e reko ‘omus pilifi. Ka, ‘ạus ma‘oi vahiạ ma tạria noanoa ne sok se famör mamfua, ‘af‘afa, agại ne ‘ạus hạipoag ‘e iris ne ‘ạus ‘inos mar ka kat tē ag‘esea ra ma ‘ạus ‘e pilif ta, ne ‘e ‘omus kạinaga, ka tape‘ma se noanoa ‘on‘ou ne ‘äe ‘esea hes ta ‘inea. La fak ma se, ‘ạus la agag ma kikia se Jihova ‘e aire! (Jem. 1:12) ‘Ạmis ‘uạ‘uạ‘ȧk se ‘ạusa. ‘Omus aire ma vahiạ röt‘ạki iạ hün hoi‘ȧk het la ‘ạmis la ‘uạ‘uạ‘ȧk se Jihova.

‘I, ‘omus garue ‘e huạg aire, ‘omus garue maha ‘e hanisi, ma ‘omus vahiạ röt‘ạki kel‘ạkim se ‘ạmisa hün lelei “ la ‘uạ‘uạ‘ȧk se Jihova , ne iạ lelei.” (Sal. 106:1) ‘Ạmis hanis aier ‘e te‘ ne ‘ạus ‘atakoa, ma ‘ạmis ro‘ạit‘ȧk ne Jihova la a‘ne‘ne‘ȧk ‘ạus, matạ‘ se ‘ạusa, ma ạlạlum‘ȧk ‘ạus la pō la ‘ạus la agag se ia se av se ‘es gata‘agat ne tore.

‘Omus Hensạsiga,

Kạupuer ne Muạ‘ȧk Tē ne Uetnes ‘on Jihova