Hạiasoagan Iris ne Maf Pogi la ‘Inea‘ia Jihova
1. Ka Jisu kel‘ȧk tapen mäeavhanisi se iris ne maf pogi?
1 ‘E avat ne Jisu rou e hanuạ noh ta Jeriko, terȧn his mumuạ la iạ la ala e, fā maf pög ruạ ‘ohō‘ȧk: “Ko Gagaj, . . . a‘hanis ‘äe se ‘ạmira!” Aier ma ne Jisu a‘häe‘ạkia tē ne iạ la agtạu ma, Jisu fu‘ ma he‘ fā rua, ma tä iạ a‘leleia iriạ. (Mat. 20:29-34) Ka ‘is la pō tapen la rakoa mäeavhanis ‘on Jisu se iris ne maf pogi?
2. Ka ‘is la pō tapen la uetnes se ta le‘ maf pogit ne ‘is hạipoaga?
2 ‘Es ‘e Huạg ne pa Hạiasoaga: ‘E avat ne ‘äe la agtạu ma ta le‘ maf pogit, hại‘ineag mumuạ, ma kotä ‘äe la hạiasoagan iạ. Kop ma famör ta la hehne‘, ka ‘ou kokon‘ȧk aier ne iạ, la pō la rē ‘on huga la fürmariạ. A‘häe‘ȧk ne ma ‘on kạinag maf pög ma‘oi, ma tē te‘is täla kel‘ạkia ne kạinag hạiasoag tese täla rē se ia. ‘E vạhiạg ne ‘ou hạiasoag ne iạ, kop ma ‘äe la pō la ‘ea se ia ne ‘äe ‘es väeag ‘e ta garue rak‘ȧk Puk Ha‘a. Hat se ia ta ut ne puk het la fak se Salamo 146:8 ne ‘Ạisea 35:5, 6. Kepoi ka iạ la pō la hat Braille, sạio‘ ne kepoi ka iạ ‘oaf la ‘es ta puk Braille het ne la hạiasoagan iạ la ‘inea‘ia tē hoi‘ȧk hün se Puk Ha‘a. ‘Äe la pō la hạiasoag tape‘ma se iạ la download audio files ‘e jw.org. Kepoi ka ‘on kompiuta ‘es ‘e prokräm ta screen reader ne la pō la hat‘ia fäega ‘e screen heta, kop ma iạ la a‘pumuạ‘ȧk filo‘ hoi‘ȧk ne pȧn ‘e jw.org ma tape‘ma se puk ne la pō la download ‘e RTF ta (Rich Text Format).—‘Io se kes ta “‘E Avat ne ‘Äe Hạiasoagan ta Le‘ Maf Pogit . . .”
3. Ka ‘is la pō tapen la aoa iris ne maf pogi?
3 Aoa Iris ne Maf Pogi: ‘E ‘os garue marag ‘e rīit se rīit, peak pạu la ‘is la agtạu ma famör maf pogi, ‘e rēko ma‘oit ‘e irisa kat fū lelei ra la hạifäegag ma famör ne iris kat ‘inea ra ka leuof se ‘oris hanua. Ta‘ag ‘is kop la fe‘en ma kikia la “aoa” iris la pō la ‘is la uetnes se irisa. (Mat. 10:11) Ka tei ka ‘äe garue ne rak ag‘esea ma ta le‘ maf pogit? ‘Äe la fe‘en la hạifäegag ma iạ. Kepoi ka ma ‘on rakot se iris ne maf pogi ‘e utut ne väe se ‘äe la garue sin, hoa‘ ta puk Braille ma nā la mou se laipri ne rak ta. Ka tei ka ‘äe ‘inea ta le‘et ne ma ‘on le‘ maf pogit ‘e laloag ne ‘on kạunohoag ta? Ka te ka utut ne väe se ‘ou kạurotuạg ta la garue sin ma ‘on kạutạunạ‘iget ne nā hạiasoag se iris ne maf pogi ne hạiasoag vȧh se nohoag ne ma ‘on lelea‘ maf pög? Sui‘ȧk se le‘et ‘e kạunohoag ta, le‘ tȧr telefon ta ne iạ ne pure ne ‘is Uetnes ‘on Jihova ‘oaf la hạiasoag se iris ne maf pogi, ma ‘ea ne ‘äe la pō la ho‘am puk Braille ne tē ne rekoto ‘e jw.org. Kel‘ȧk se ia fäeag porȧk ne Puk Ha‘a ne ‘elemea avat ne ‘Ạitu täla ‘ut‘ȧk ‘atakoan maf pogi. ‘Äe la pō la kel‘ȧk tape‘ma vitio heta “Without It, I Would Feel Lost,” ‘e jw.org ta. Iạ fäeag‘ạkia rogrog ‘on ta fā maf pogit ne pō ‘on ‘es‘ao ne ‘es ‘e Puk Ha‘ Braille ta. ‘Ou sui‘ạkiạg ne ‘amnȧk ne ‘ou ȧs ta, kop ma täla säea sal ta la ‘äe la hạifäegag ma iris ne maf pogi.
4. Ka resön tese tä ‘is la pō la rak ‘e rogrog ‘on Janet?
4 Janet sạsiạg hȧn maf pogit la‘ se ta rīit ne ma ‘on lelea‘ maf pög la ȧs se irisa. Iạ kamat hạifäegag ma ta hȧn haharạgit. Janet ‘ea se ia, “Jisu a‘leleia iris ne maf pogi la kel‘ạkia tē ne iạ la rē se iris ‘atakoa ne maf pogi.” Iriạ sạkior ag‘esea Kel‘ȧk Tē 21:3, 4 ma Janet sui‘ạkia se iạ salat ne Pure‘ag ‘on ‘Ạitu la a‘sokoa fäeag porȧk te‘. Hȧn mo ta totoak se‘ ma kotä iạ ‘ea: “Gou kotä la a‘fại mumuetou se sui‘ȧk hete‘ ka ‘e räe ‘on ta le‘ maf pogit. Iris ma‘oi ne kel tē pilif ne famori maf pög ‘e rēko tē sar ne iris rē ne tē sar ne ‘oris tē mamfua rē.” Janet e-mail se hȧn ta link ne puk ta Puk Ha‘a ‘Ea Aire, ma ‘e ‘on ‘i‘i iriạ rak Puk Ha‘ a‘ruạ gasavat.
5. ‘Is kal pō ra la a‘leleia iris ne maf pogi la fak se Jisu, ka ạlạlum‘ạkiạg tese ta ‘is la pō ‘e avat ne ‘is kel‘ȧk ne ‘is kokon‘ȧk iris ne maf pogi?
5 Aier ma ne ‘is kal pō ra la a‘leleia iris ne maf pogi la fak se Jisu, ka ‘is la pō la hạiasoag iris ne ‘ạit ne av te‘is pög‘ȧk ‘oris a‘häe, laloag‘ȧk tape‘ma iris ne maf pogi la iris la ‘inea‘ia aier ta hün se Fäeag ‘on ‘Ạitu. (2 Kor. 4:4) Jisu a‘leleia fā rua ‘el se Jeriko ‘e rēko ‘on “huga rue ‘e hanisi” se iriạ. (Mat. 20:34) Kepoi ka ‘os kokon‘ȧk ne iris ne maf pogi tape‘, ‘is la ‘oaf la hạiasoag se iris la ‘inea‘ia Jihova, iạ ne täla a‘ofia maf pogi.