Woba uvyibuka?

Woba warinovoye ugusoma inomero z’Umunara w’Inderetsi za vuba? Emwe, raba nimba ushobora kwishura ibibazo bikurikira:

• Dushobora gute kwungukira ku kumenya ivy’umuryango wa Shafani?

Shafani yari umwanditsi be n’umunyamabanga w’Umwami Yosiya w’Ubuyuda. Kubera ko Shafani yari umugabo akomakomeye muri ubwo bwami, yarashigikiye isekeza umwami yagize ryo gusubizaho ugusenga kw’ukuri. Babiri mu bahungu biwe baragiye ku ruhande rw’umuhanuzi Yeremiya. Uwundi muhungu wiwe na we be n’abuzukuru biwe babiri, barakoresheje ibibanza bikomakomeye barimwo kugira bashigikire ugusenga kw’ukuri. Mu buryo nk’ubwo nyene, dukwiye gukoresha ubutunzi bwacu be n’ikibanza turimwo kugira dushigikire ugusenga kw’ukuri.​—15/12, urupapuro 19-22.

• Irene Hochstenbach yihanganiye gute ubumuga bwiwe hanyuma arashobora gusukurira Yehova?

Amaze imyaka indwi y’amavuka, ntiyabaye acumva. Naho yari igipfamatwi, yarize kuganira n’abandi, ubu akaba ajana n’umunega wiwe (umucungezi w’ingenzi) igihe agendera amashengero yo muri Holande.​—1/1, urupapuro 23-26.

• Ni ibitabu bibiri bishasha ibihe vyo kwiga vyasohotse kw’ihwaniro ry’intara ryataziriwe ngo “Abamamaji b’Ubwami b’Abanyamwete”?

Abakirisu bo hirya no hino ku mubumbe baranezerewe no kuronka igitabu Senga Imana Yonyene y’Ukuri, kigenewe kwigwa n’abashasha bamaze kurangiza igitabu Ubumenyi Bujana mu Buzima Budahera; ikindi gitabu gishasha ni ikivuga ngo Niwiyegereze Yehova, kikaba gishimika kuri kamere za Yehova no ku bikorwa vyiwe. Kirerekana kandi ukuntu dushobora kumwigana mu kugaragaza izo kamere.​—15/1, urupapuro 23-24.

• Amajambo avugwa mu Migani 12:5 ngo “Ivyiyumviro vy’abagororotsi biraroranye”, ashaka kuvuga iki?

Ivyiyumviro bwite vy’abantu bagororotse usanga biroranye uravye ivyemerwa mu bantu, ugasanga kandi vyerekezwa ku kutagira nkunzi no ku kugororoka. Kubera yuko abagororotsi basunikwa n’urukundo bakunda Imana be n’abantu nka bo, imigabo yabo usanga ari myiza.​— 15/1, urupapuro 30.

• Ni igiki gishobora gufasha umuntu gutsimbataza uburimbane mu vy’akazi?

Ni ivy’ingirakamaro kumenyerezwa kuva mu bwana guha agaciro akazi. Bibiliya iduhimiriza kugira inyifato nziza mu kazi, tukirinda ubunebwe (Imigani 20:4). Iraremesha kandi abakirisu kudatwarwa n’akazi. Dukwiye gutahura yuko umurimo turangurira Imana ufise ikibanza gihambaye mu buzima bwacu (1 Ab’i Korinto 7:29-31). Ikigeretseko, abakirisu b’ukuri barizigira badakeka yuko Imana itazobaheba.​—1/2, urupapuro 4-6.

• Ni hehe igicaniro kivugwa ari bwo bwa mbere muri Bibiliya?

Ni mw’⁠Itanguriro 8:20, ahavuga igicaniro Nowa yubatse igihe yava mu bwato inyuma y’umwuzure. Ariko rero, birashoboka ko Kayini na Abeli bakoresheje ibicaniro mu gushikana amashikanwa yabo (Itanguriro 4:3, 4).​—15/2, urupapuro 28.

• Igihe hari ibihindutse, abakirisu bamwebamwe bavyungukiyeko gute?

Bamwebamwe baremeye amahinduka, canke barayagira mu bijanye n’akazi kabo, ayo mahinduka akaba yatumye baronka umwanya mwinshi wo gukora mu busuku. Abandi barongereje umwanya wabo be n’uduteka twabo mu murimo w’Imana mu gihe amabanga yabo yo mu rugo yagabanuka, nk’akarorero igihe abana babo bagera mu bigero hanyuma bakubaka izabo.​—1/3, urupapuro 19-22.

• Akarorero ka Yona n’ak’intumwa Petero, kadufasha gute kubona abandi nk’uko Yehova ababona?

Yona na Petero bompi bari bafise amakosa azwi cane mu vyo biyumvira hamwe no mu buryo bifashe mu kigeragezo c’ukwizera be n’ic’ukugamburuka. Naho ari ukwo, biribonekeza ko Yehova yababonyemwo kamere nziza, arabandanya kubakoresha mu murimo wiwe. Igihe abandi batubabaje canke ntibashitse ivyo twari tubitezeko, turashobora kwibanda kuri kamere zabo nziza twoshobora kuba kera twabona ko zikwegera be no ku ciza Imana ibabonamwo.​—15/3, urupapuro 16-19.

• Ni kubera iki impinduro za Bibiliya zerekana mu buryo butandukanye ibigabane n’imirongo vyo mu gitabu ca Zaburi?

Ukuntu ibigabane n’imirongo biharurwa mu gitabu co mu rurimi rw’intango rw’igiheburayo be n’ukuntu biharurwa mu mpinduro y’ico gitabu yo mu kigiriki muri ya Bibiliya yitwa Septante, biratandukanye. Impinduro nyinshi za vuba zishobora kuba zitandukanye, bivanye n’uko zishobora kuba zari zishingiye ku gisomwa c’igiheburayo canke kuri iyo mpinduro yitwa Septante.​—1/4, urupapuro 31.