Mariko yarahimbarwa no gukorera abandi. Mu bihe bimwebimwe yarajana n’intumwa Paulo ahandi na ho akajana n’intumwa Petero, kumbure akaza arabafasha mu vyo baba bakeneye ku mubiri igihe baba bariko bararangura ibikorwa bashinzwe. (Ivyak. 13:2-5; 1 Pet. 5:13) Paulo yavuze ko Mariko yari ‘umukozi mugenziwe ku bw’ubwami bw’Imana,’ kandi ko yamubereye “imfashanyo ikomeza.” (Kol. 4:11) Mariko yarabaye umwe mu bagenzi somambike ba Paulo. Nk’akarorero, nko mu 65 igihe Paulo yari apfungiwe i Roma ari bwo bwa nyuma, yarandikiye Timoteyo ikete rigira kabiri. Muri iryo kete, yasavye Timoteyo kumusanga i Roma ajanye na Mariko. (2 Tim. 4:11) Nta nkeka ko Paulo yakenguruka igikorwa Mariko yari yararanguye adahemuka, akaba ari co gituma yasavye ko yoja kumuraba muri ivyo bihe bitoroshe. Mariko yarafashije Paulo mu buryo buboneka, kumbure mu kumuronsa ibifungurwa canke ivyo yakoresha mu kwandika. Indemesho be n’ugushigikirwa Paulo yaronse, bishobora kuba vyaratumye yihanganira imisi y’imbere yuko yicwa. w20.01 11 ing. 12-13

Twahisemwo kubaho twitanga no gukora cane. Yezu yaratuburiye ko twohamwe. Naho ari ukwo, turizigira ko Yehova azoturonsa inkomezi zo kwihanganira ikigeragezo ico ari co cose. Uko turushiriza kwihangana, ni ko turushiriza gushikama. (Yak. 1:2-4) Turizigira kandi ko Yehova azoguma aturonsa ivyo dukeneye, ko Yezu azoguma atuyobora be n’uko abavukanyi bacu bazoguma baturemesha. (Mat. 6:31-33; Yoh. 10:14; 1 Tes. 5:11) Wa mugore Yezu yakiza indwara yo ‘kuva amaraso,’ yaciye aruhurirwa kuri urya musi nyene. (Luka 8:43-48) Ariko rero, yobandanije kuruhurirwa ibihe bidahera ari uko gusa acitse umwigishwa adahemuka wa Kristu. Wibaza none ko yahisemwo iki? Nimba yarahisemwo kwemera ingogo ya Yezu, iyumvire impera yironkeye, na yo akaba ari ugukorana na Yezu mw’ijuru. Ivyo yoba yarahevye vyose kugira ngo akurikire Kristu, nta ho bihuriye n’uwo muhezagiro. Twaba rero dufise icizigiro co kubaho ibihe bidahera mw’ijuru canke kw’isi, turakenguruka cane kuba twaremeye akamo Yezu yaduteye ati: “Nimuze kuri jewe!” w19.09 25 ing. 21-22

Igihe ingabo za Dawidi zari zikeneye imfashanyo, zarasavye Umwisirayeli umwe w’umutunzi yitwa Nabali ibifungurwa naho vyari kuba bikeyi. Babona ko bibereye kuko bari barakingiye ubusho bwiwe mu gahinga. Ariko uwo mugabo w’ingumyi Nabali yaranse kubaha ikintu na kimwe. Dawidi yarashavuye cane, aca afata ingingo yo guhonya Nabali n’ab’igitsina gabo bose bo mu rugo rwiwe. (1 Sam. 25:3-13, 22) Abigayili muka Nabali wewe, yari umugore w’akaranga kandi abona kure. Abigiranye umutima rugabo udasanzwe, yarikubise imbere ya Dawidi, aramwinginga ngo ntiyihore kugira ntiyagirwe n’amaraso. Yaramuhoyahoye, amusaba kurekera ibintu mu maboko ya Yehova. Dawidi yarakozwe ku mutima n’ukwicisha bugufi kwa Abigayili be n’ubukerebutsi bwiwe, aca atahura ko uwo mukenyezi yari yarungitswe na Yehova. (1 Sam. 25:23-28, 32-34) Abigayili yari yaratsimbataje kamere zatumye Yehova amukoresha. Muri ubwo buryo nyene, bashiki bacu batsimbataza kamere y’ukwiyubara n’ukubona kure, Yehova arashobora kubakoresha mu gukomeza imiryango yabo be n’abagize ishengero.​—Tito 2:3-5. w19.10 23 ing. 10