Ku wa gatanu, 10 Ndamukiza
Ewe kuntu nkunda itegeko ryawe! Ni ryo nzirikana bukarinda bwira.—Zab. 119:97.
Igihe usoma Bibiliya, niwiyemeze ko uronka umwanya wo kwiyumvira ingene woshira mu ngiro ivyo wasomye. Igihe uriko urasoma igice kanaka co mw’Ijambo ry’Imana niwibaze uti: “Ibi nsomye nobishira mu ngiro gute uno musi canke muri kazoza?” Tubitangire akarorero: Dufate ko uriko urasoma mu 1 Abatesalonika 5:17, 18. Umaze gusoma iyo mirongo ibiri, nuce uhagarika maze wiyumvire incuro usenga n’ivyo ushira mw’isengesho. Vyongeye woshobora kwiyumvira ibintu woshimira Yehova. Kumbure woshobora kwiyumvira ibintu bitatu womukengurukira udomako. Naho wofata iminota mikeyi yo kuzirikana ku vyigwa wakuye muri Bibiliya, vyoshobora kugufasha gutahura Ijambo ry’Imana no gushira mu ngiro ivyo rivuga. Vyongeye, niwashira mu ngiro ivyo usoma muri Bibiliya buri musi, uzorushiriza kuba umusavyi wa Yehova ameze neza. w24.09 4-5 ing. 9-10
Ku wa gatandatu, 11 Ndamukiza
Mwiyubare rero kugira ntimutakaze ibintu twabiriye akuya, ahubwo muronke impembo yuzuye.—2 Yoh. 8.
Yehova yaturemanye ubushobozi budasanzwe. Turahimbarwa cane igihe dutanze kuruta iyo duhawe. Biratunezereza igihe dushoboye gufasha abavukanyi bacu. Kandi turahimbarwa igihe badukengurukiye. Ariko naho abo twakoreye iciza batodushimira, turagira umunezero kubera ko tuba twakoze ikibereye. Naho uba watanze ibingana gute, ntiwibagire ko «Yehova [ashoboye] kuguha vyinshi cane kuruta ivyo» uba watanze. (2 Ngo. 25:9) Rero, Yehova azokwama aguhemba ibiruta ivyo uba watanze. Kandi nta coza kidutera umunezero nko kuronka impembo Yehova atanga. Ku bw’ivyo, nimuze twiyemeze kubandanya twigana Umuvyeyi wacu wo mw’ijuru atanga cane. w24.09 30-31 ing. 20-21
Ku wa mungu, 12 Ndamukiza
Ewe Yehova Mana yanje, ndagushemeza n’umutima wanje wose, kandi nzoninahaza izina ryawe ibihe vyose.—Zab. 86:12.
Yehova ni umunyembabazi akaba n’umunyakigongwe. (Zab. 103:13; Yes. 49:15) Iyo tubabaye, ababarana natwe. (Zak. 2:8) Aratuma bitworohera kumwiyegereza, tukaba abagenzi biwe. (Zab. 25:14; Ivyak. 17:27) Aricisha bugufi. «Arunama kugira arabe ijuru n’isi, akaduza umuntu mutoyi amukuye mu mukungugu.» (Zab. 113:6, 7) Ni nde ga yemwe atoninahaza iyo Mana yacu ihambaye? Turaninahaza Yehova kubera ko twipfuza ko abandi bamumenya. Benshi ntibazi ukuri ku vyerekeye Yehova. Kubera iki? Kubera ko Shetani yahumye ubwenge bwabo biciye ku binyoma bikomeye yakwiragije ku vyerekeye Yehova. (2 Kor. 4:4) Shetani yaratumye abantu bemera ko Yehova ari Imana yihora, itatwitwararika, kandi ko ari yo iteza ingorane nyinshi tubona kw’isi. Ariko twebwe turazi ukuri ku vyerekeye Imana yacu. Turafise akaryo rero ko gufasha abandi kumenya ivyerekeye iyo Mana maze bakayininahaza.