Yehova araronsa abasavyi biwe bose ibifungurwa vyo mu vy’impwemu, akabayobora kandi akabakingira. Akarorero kerekana ko Yehova atagira nkunzi ni uko aronsa Bibiliya abantu bose kw’isi. Mu ntango, Bibiliya yanditswe mu ndimi zitatu: igiheburayo, igiharameya n’ikigiriki. None vyoba bisigura ko abashobora gusoma izo ndimi Bibiliya yanditswemwo mu ntango ari bo bashobora kwiyegereza cane Yehova kurusha abadashobora kuzisoma? Habe namba. (Mat. 11:25) Kugira Yehova adutumire ngo tube abashitsi biwe, ntaraba ko twize amashure menshi canke ko tuzi indimi nyinshi. Yehova aratuma abantu bose bashobora kuronka ubukerebutsi bwiwe ataravye amashure bize. Ijambo ryiwe Bibiliya ryarahinduwe mu ndimi ibihumbi. Gutyo abantu bo hirya no hino kw’isi barashobora kwungukira ku nyigisho Yehova atanga, bakiga n’ingene boba abagenzi biwe.—2 Tim. 3:​16, 17. w24.06 6-7 ing. 13-15

Ugutikizwa kwa Yeruzalemu Yezu yari yaravuze kwari kwegereje. Abakirisu bari gukoresha umwanya wari usigaye mu gutsimbataza kamere nk’ukwizera be n’ukwihangana kugira bitegurire ico gihe. (Heb. 10:25; 12:​1, 2) Vuba tugiye gushikirwa n’amakuba akomeye kuruta ayashikiye abakirisu b’Abaheburayo. (Mat. 24:21; Ivyah. 16:​14, 16) Rimbura impanuro zimwezimwe Yehova yaronkeje abo bakirisu zotugirira akamaro. Intumwa Pawulo yararemesheje abakirisu bagenziwe kwiga Ijambo ry’Imana no kurizirikanako. (Heb. 5:14–6:1) Pawulo yarasubiyemwo amajambo yo mu Vyanditswe vy’igiheburayo kugira asigure ukuntu uburyo abakirisu bakoresha mu gusenga Yehova ari bwo bwari bubereye kuruta ubwo Abayuda bakoresha. Pawulo yararemesheje abakirisu kwihatira kumenya no gutahura neza ukuri kwo mu Vyanditswe kugira bibafashe gutahura inyigisho z’ikinyoma no kuzirinda. w24.09 8-9 ing. 2-3; 10 ing. 6

Abigishwa ba Yezu bari bakeneye indemesho. Uti kubera iki? Bamwe muri bo bari barahevye amazu yabo, imiryango yabo n’ubuzi bakora, kugira ngo bagume bakurikira Yezu. (Mat. 19:27) Abandi bari basigaye babonwa ko ari ibicibwa mu kibano, kubera ko bari bemeye kuba abigishwa ba Yezu. (Yoh. 9:22) Ivyo vyose babihevye kubera ko bemera ko Yezu ari we Mesiya yari yarasezeranywe. (Mat. 16:16) Ariko igihe Yezu yicwa, baracitse intege babona ko ivyo bari bizigiye bibaye impfagusa. Yezu yaratahura intuntu abigishwa biwe bari bafise, aho kubona ko yaterwa n’ukubura ukwizera. Ni co gituma amaze kuzuka yaciye atangura kubaremesha. Nk’akarorero, yariyeretse Mariya Magadalena igihe yariko araririra ku mva yiwe. (Yoh. 20:​11, 16) Yariyeretse kandi abigishwa babiri bariko baraja mu gasagara kitwa Emawusi. Vyongeye, yariyeretse intumwa Petero. w24.10 13 ing. 5-6