Kwiga Bibiliya ni ngirakamaro, ariko ntivyama vyoroshe. Vyoshika ukibaza nimba uzoshobora kubandanya wiga Bibiliya. Ariko kubera iki bihambaye ko ugira akigoro ko kubandanya? Ni igiki cogufasha kwumirako naho ingorane zitabuze?

1. Kubera iki kwiga Bibiliya bihambaye?

“Ijambo ry’Imana [ni] rizima kandi rigira ububasha.” (Abaheburayo 4:12) Bibiliya iratubwira ukuntu Imana ibona ibintu be n’uko idukunda. Irashobora kugufasha kuronka ubumenyi, ubukerebutsi nyakuri n’icizigiro. N’igihambaye kuruta, Bibiliya irashobora kugufasha kuba umugenzi wa Yehova. Igihe wiga Bibiliya, bituma ikugirako ububasha, gutyo ubuzima bwawe bukarushiriza kumera neza.

2. Kubera iki guha agaciro ukuri kwo muri Bibiliya bihambaye?

Ukuri kwo muri Bibiliya kumeze nk’itunga ry’agaciro. Ni co gituma Bibiliya iduhimiriza ‘kugura ukuri ntitukugurishe.’ (Imigani 23:23) Igihe tugumije ku muzirikanyi agaciro k’ukuri kwo muri Bibiliya, turihatira kuguma tukwiga naho twohura n’intambamyi.—Soma Imigani 2:4, 5.

3. Yehova yogufasha gute kubandanya wiga Bibiliya?

Kubera ko Yehova ari Umuremyi ahambaye akaba n’umugenzi wawe, yipfuza kugufasha kwiga ibimwerekeye. Arashobora kuguha icipfuzo n’ububasha bwo kubikora. (Soma Abafilipi 2:13.) Ku bw’ivyo, bishitse ukumva umengo wohagarika kwiga canke ukabona umengo biragoye gushira mu ngiro ivyo wiga, numusabe agufashe. Nimba ukeneye inkomezi kugira ushobore gutsinda intambamyi canke kwihanganira uruhamo, arashobora kuzikuronsa. Niwame rero usenga Yehova umusaba agufashe kubandanya wiga Bibiliya.—1 Abatesalonika 5:17.

TWINJIRE MU MIZI

4. Nuhe agaciro kwiga Bibiliya

Birashika tukabona umengo nta mwanya wo kwiga Bibiliya dufise. Ni igiki none codufasha? Nimusome Abafilipi 1:10, muce muganira kuri ibi bibazo:

• Wibaza ko bimwebimwe mu bintu “bihambaye kuruta ibindi” mu buzima ari ibiki?

• Wokwerekana gute ko uha agaciro kwiga Bibiliya?

1. Ushize umusenyi mu ndobo hanyuma ugashirayo amabuye, ayo mabuye ntakwirayo

2. Ubanje gushiramwo amabuye, umusenyi nka wose uraronka aho uja. Muri ubwo buryo nyene, ushize imbere “ibihambaye kuruta ibindi” mu buzima bwawe, uzoshobora kubikora vyose, uronke n’umwanya wo gukora ibindi

Kwiga Bibiliya biratuma turonka ibintu vy’impwemu dukeneye, ivyo na vyo akaba ari kumenya Imana no kuyisenga. Nimusome Matayo 5:3, muce muganira kuri iki kibazo:

• Ni ivyiza ibihe biva ku guha agaciro kwiga Bibiliya?

5. Ntutane n’akabando naho bokurwanya

IVIDEWO: Yararonse impera kubera atatanye n’akabando (5:22)

• Muri iyo videwo, igihe Francesco yabwira incuti n’abagenzi ivyo ariko ariga, bavyakiriye gute?

• Ni impera iyihe yaronse kubera yumiyeko?

Nimusome 2 Timoteyo 2:24, 25, muce muganira kuri ibi bibazo:

• Incuti n’abagenzi bawe bakira gute ivyo uriko uriga?

• Wisunze ico canditswe, wovyifatamwo gute hagize uwudahimbarwa n’uko uriko uriga Bibiliya? Kubera iki wishuye gutyo?

6. Niwiheke kuri Yehova kugira agufashe

IVIDEWO: Yehova aradufasha kugira amahinduka (3:56)

• Muri iyo videwo, ni amahinduka ayahe Jim yagize kugira ahimbare Yehova?

• Muri iyo nkuru, ni ibiki vyagukoze ku mutima?

Nimusome Abaheburayo 11:6, muce muganira kuri ibi bibazo:

• Ni ibiki Yehova azokorera abamuronderana ubwira, ni ukuvuga abihata kugira bamumenye kandi bamuhimbare?

• Wisunze ico canditswe, Yehova yoba ahimbarwa igihe abonye utwigoro ugira kugira wige Bibiliya? Kubera iki wishuye gutyo?

INCAMAKE

Naho kwiga Bibiliya bitama vyoroshe, birashobora gutuma wiberaho ibihe bidahera. Niwiheke kuri Yehova, na we azoguha impera.

Wize iki?

• Kubera iki ukuri kwo muri Bibiliya guhambaye kuri wewe?

• Umaze kumenya neza “ibihambaye kuruta ibindi ivyo ari vyo,” ukwiye guca ukora iki?

• Kubera iki bihambaye ko usaba Yehova ngo agufashe kubandanya wiga Bibiliya?

RONDERA N’IBINDI

Raba ibintu bine vyafashije abatari bake gukoresha neza umwanya wabo.

“Ingene wokoresha neza umwanya wawe” (Be maso!, Ruhuhuma 2014)

Raba ingene Yehova yafashije umugore umwe yihata kugira ahimbare Imana, ariko umugabo wiwe akaba atamutahura.

Yehova aradufasha kwikorera imitwaro yacu (5:05)

Raba imihezagiro umugabo umwe yironkeye kubera umugore wiwe atatanye n’akabando.

Narasuzumye ngo ndabe ko kwari ukuri (6:30)

Rimwe na rimwe Ivyabona vya Yehova baragirizwa ko basambura ingo. Ariko none ukwo kwoba ari ukuri?

“Ivyabona vya Yehova boba basambura ingo canke barazikomeza?” (Ikiganiro co kuri jw.org)

Twese turashikirwa n’ibintu bidusaba gufata ingingo. Nyinshi muri zo ziragira ingaruka kuri twebwe no ku bucuti dufitaniye na Yehova. Nk’akarorero, tubwirizwa guhitamwo aho tuzoba, ukuntu tuzokwibeshaho be no kuba tuzokwubaka urwacu canke tutazokwubaka. Igihe dufashe ingingo nziza turahimbarwa mu buzima kandi tukanezereza Yehova.

1. Wokoresha gute Bibiliya kugira ufate ingingo nziza?

Imbere y’uko ufata ingingo, nusabe Yehova agufashe, wongere urabe muri Bibiliya ukuntu abona ibijanye n’ico kintu. (Soma Imigani 2:3-6.) Mu bihe bimwebimwe, Yehova aratanga itegeko ridomako. Mu bihe nk’ivyo, guhitamwo kugamburuka iryo tegeko atanga, ni yo ngingo nziza kuruta izindi wofata.

Bite ho mu gihe ata tegeko ridomako Bibiliya itanga ku bijanye n’ico wokora? No muri ico gihe nyene, Yehova arakuyobora “mu nzira ukwiye kugenderamwo.” (Yesaya 48:17) Uti abigira gute? Abicisha ku ngingo ngenderwako akuronsa. Ingingo ngenderwako zo muri Bibiliya ni ukuri kw’ishimikiro kuri muri Bibiliya kudufasha gutahura ukuntu Imana ibona ibintu bitandukanye hamwe n’ukuntu yiyumva ku bijanye na vyo. Akenshi igihe dusomye inkuru yo muri Bibiliya, turatahura ingene Imana ibona ikintu kanaka. Tumaze gutahura ingene Yehova abona ico kintu, turashobora guca dufata ingingo zimuhimbara.

2. Ni ibiki worimbura imbere yo gufata ingingo?

Bibiliya ivuga iti: “Umunyabwenge ararimbura intambuko ziwe.” (Imigani 14:15) Ivyo bisobanura ko imbere y’uko dufata ingingo, dukwiye gufata akanya tukazirikana ku mahitamwo twogira. Uko urimbura ingingo yose wofata, niwibaze uti: ‘Ni ingingo ngenderwako iyihe yo muri Bibiliya nokwisunga? Ni ingingo iyihe nofata izotuma ngira amahoro mu mutima? Amahitamwo ngira azogira ingaruka izihe ku bandi? N’igihambaye kuruta, yoba azotuma Yehova ahimbarwa?’—Gusubira mu vyagezwe 32:29.

Yehova arafise uburenganzira bwo kutubwira ikibereye n’ikitabereye. Igihe tumenye neza amategeko ya Yehova n’ingingo ngenderwako ziwe kandi tukiyemeza kubikurikiza, tuba turiko turamenyereza ijwi ryacu ryo mu mutima. Ijwi ryo mu mutima ni ubushobozi dufise muri twebwe budufasha kumenya iciza n’ikibi. (Abaroma 2:14, 15) Ijwi ryo mu mutima ryamenyerejwe neza rizodufasha gufata ingingo nziza.

TWINJIRE MU MIZI

3. Nureke Bibiliya ikuyobore

IVIDEWO: Nuyoborwe n’ingingo ngenderwako zo muri Bibiliya (5:54)

• Ni ingabire idasanzwe iyihe Yehova yaduhaye?

• Kubera iki Yehova yaduhaye umwidegemvyo wo kwihitiramwo?

• Ni ibiki Yehova yaduhaye kugira ngo dushobore gukoresha neza umwidegemvyo wacu wo kwihitiramwo?

Kugira ubone akarorero kamwe k’ingingo ngenderwako yo muri Bibiliya, nimusome Abanyefeso 5:15, 16. Nimuce muganira ku kuntu ‘wokwicungurira umwanya ubereye’ kugira . . .

• usome Bibiliya buri musi.

• wimenyereze kuba umugabo canke umukenyezi mwiza, umuvyeyi mwiza canke umwana ameze neza.

• witabe amakoraniro.

4. Numenyereze ijwi ryawe ryo mu mutima kugira ufate ingingo nziza

IVIDEWO: ‘Mugumane ijwi ryo mu mutima ryiza’ (5:13)

• Muri iyo videwo, ni intambwe izihe uwo mushiki wacu yateye kugira ashobore kumenyereza ijwi ryiwe ryo mu mutima no gufata ingingo ihimbara Yehova?

Kubera iki tudakwiye gusaba abandi ngo batubwire ingingo twofata? Nimusome Abaheburayo 5:14, muce muganira kuri ibi bibazo:

• Naho vyoba bisa n’ivyoroshe kubaza abandi ingingo twofata, ni ibiki ubwacu dukwiye kumenya gutandukanya?

• Ni igiki cogufasha kumenyereza ijwi ryawe ryo mu mutima no gufata ingingo nziza?

5. Niwubahirize ijwi ryo mu mutima ry’abandi

Kubera ko abantu batandukanye, bafata n’ingingo zitandukanye. Twokwerekana gute ko twubahiriza ijwi ryo mu mutima ry’abandi? Reka turimbure ibintu bibiri vyoshika:

Ikintu ca 1: Umudada akunda kwipodora yimukiye mw’ishengero aho benshi mu badada baririmwo bibatsitaza babonye umuntu yipodoye.

Nimusome Abaroma 15:1 na 1 Abakorinto 10:23, 24, muce muganira kuri ibi bibazo:

• Wisunze iyo mirongo, uwo mudada yokora iki? Wokora iki hamwe woba uri kumwe n’umuntu afise ijwi ryo mu mutima rimubuza gukora ikintu, ariko wewe rikaba rikwemerera kugikora?

Ikintu ca 2: Umuvukanyi arazi ko Bibiliya itabuza kunywa inzoga, ariko ahisemwo kuziheba. Atumiwe ahantu maze abonye abandi bavukanyi bariko baranywa inzoga.

Nimusome Umusiguzi 7:16 n’Abaroma 14:1, 10, muce muganira kuri ibi bibazo:

• Wisunze iyo mirongo, uwo muvukanyi yokora iki? Wokora iki ubonye umuntu ariko akora ikintu ijwi ryawe ryo mu mutima ritakwemerera gukora?

Ni intambwe izihe twotera kugira dufate ingingo nziza?

1. Nusabe Yehova agufashe guhitamwo ico wokora.—Yakobo 1:5.

2. Nugire ubushakashatsi muri Bibiliya no mu bitabu bishingiye kuri yo kugira ubone ingingo ngenderwako wokwisunga. Woshobora no kwitura abakirisu bazi utuntu n’utundi.

3. Nuzirikane ku ngaruka ingingo ufata izogira kw’ijwi ryawe ryo mu mutima n’iry’abandi.

INCAMAKE

Turafata ingingo nziza igihe turimbuye ukuntu Yehova abona ibintu maze tukazirikana nimba ivyo duhisemwo gukora bizofasha abandi canke nimba bizotuma bababara.

Wize iki?

• Wofata gute ingingo zihimbara Yehova?

• Womenyereza gute ijwi ryawe ryo mu mutima?

• Wokwerekana gute ko wubahiriza ijwi ryo mu mutima ry’abandi?

RONDERA N’IBINDI

Ni gute wofata ingingo zigufasha gukomeza ubucuti ufitaniye n’Imana?

“Nufate ingingo zitera iteka Imana” (Umunara w’Inderetsi, 15 Ndamukiza 2011)

Numenye vyinshi ku kuntu Yehova atuyobora.

Yehova arayobora abasavyi biwe (9:50)

Nurabe icafashije umugabo umwe gufata ingingo itoroshe.

Kwa Yehova ntawigera ataha zirayoye (5:46)

Nurabe ukuntu wohimbara Yehova n’igihe ata tegeko ridomako ryoba rihari.

“Woba wama ukenera itegeko rya Bibiliya?” (Umunara w’Inderetsi, 1 Kigarama 2003)