Nuhitemwo neza abagenzi

Abagenzi beza baratuma umunezero wacu wongerekana kandi bakaduserukako turi mu ngorane. Ariko Bibiliya iratugabisha yuko abantu bose atari abagenzi beza. None wohitamwo gute abagenzi beza? Rimbura ibibazo bikurikira.

1. Ni gute abagenzi uhitamwo bagira ico bakoze kuri wewe?

Igihe tumarana umwanya munini n’abantu, biroroha ko tumera nka bo. Bashobora kuduhindura tukamera neza canke nabi, kandi ukwo ni kwo biri twaba twifatanya amaso mu yandi canke ku buhinga bwa none. Nk’uko Bibiliya ibivuga, “uwugendana n’inkerebutsi azocika inkerebutsi, mugabo uwugirana imigenderanire n’ibijuju [ni ukuvuga abadakunda Yehova] azokwibonerako.” (Imigani 13:20) Abagenzi bakunda Yehova kandi bakamusenga barashobora kugufasha kumwiyegereza no gufata ingingo nziza. Ariko igihe abagenzi somambike bacu badakunda Yehova barashobora gutuma tutamwiyegereza. Ni co gituma Bibiliya iduhimiriza guhitamwo neza abagenzi. Igihe abagenzi bacu bakunda Yehova twese turahungukira. Gutyo, birashoboka ko ‘tuguma duhozanya kandi tukubaka bagenzi bacu.’—1 Abatesalonika 5:11.

2. Abagenzi uhitamwo bazotuma Yehova yiyumva gute?

Yehova arahitamwo abagenzi biwe yitonze. “Kugirana ubugenzi somambike na We ni ivy’abagororotse.” (Imigani 3:32) Yehova yokwiyumva gute duhisemwo abagenzi batamukunda? Emwe vyomubabaza cane. (Soma Yakobo 4:4.) Ku rundi ruhande, nitwamirira kure abagenzi babi, tukifatanya n’abamukunda kandi tukamwiyegereza, azohimbarwa yongere atugire abagenzi biwe.—Zaburi 15:1-4.

TWINJIRE MU MIZI

3. Nube maso ku bo mwifatanya

Abantu badakunda Yehova hamwe n’amategeko yiwe si abagenzi beza. Nimurabe iyo VIDEWO, muce muganira kuri iki kibazo:

IVIDEWO: Niwirinde abagenzi babi (6:17)

• Dushobora gute kwifatanya n’abagenzi babi tutabiciye n’ikanda?

Nimusome 1 Abakorinto 15:33, muce muganira kuri ibi bibazo:

• Abantu ubona ko bokubera abagenzi babi bameze gute? Kubera iki?

Nimusome Zaburi 119:63, muce muganira kuri iki kibazo:

• Umugenzi mwiza akwiye kuba ameze gute?

4. Abantu dufise ivyo dutandukaniyeko barashobora kutubera abagenzi

Bibiliya iratwiganira inkuru ya Dawidi na Yonatani, bakaba bari abo muri Isirayeli ya kera. Yonatani yarasumvya imyaka myinshi Dawidi, akaba yari n’umwana w’umwami. Naho vyari ukwo, bari abagenzi somambike. Nimusome 1 Samweli 18:1, muce muganira kuri iki kibazo:

• Kubera iki abagenzi bacu badakwiye kuba gusa abo tunganya imyaka canke abo dufise ikibanza kimwe mu kibano?

Nimusome Abaroma 1:11, 12, muce muganira kuri iki kibazo:

• Abagenzi bakunda Yehova bashobora gute kuremeshanya?

Muri iyo videwo, nurabe ukuntu uwukiri muto umwe aronkera abagenzi aho atari yiteze. Nimurabe iyo VIDEWO, muce muganira kuri ibi bibazo:

IVIDEWO: Urashobora kuronka abagenzi aho utari witeze (5:06)

• Muri iyo videwo, kubera iki abavyeyi ba Akil bari barajwe ishinga n’abo bifatanya kw’ishure?

• Mu ntango, ni ibiki vyatuma abakunda?

• Ni igiki camufashije gutsinda irungu?

5. Ingene twokomeza ubucuti dufitaniye n’abagenzi beza

IVIDEWO: Umugenzi nyakuri ameze gute? (4:14)

Nimusome Imigani 18:24 na 27:17, muce muganira kuri ibi bibazo:

• Abagenzi nyakuri bafashanya gute?

• Woba ufise umugenzi nk’uwo? Nimba utamufise, womurondera gute?

Nimusome Abafilipi 2:4, muce muganira kuri iki kibazo

• Kugira uronke abagenzi beza, urakeneye kubera abandi umugenzi mwiza. Ivyo wobigira gute?

INCAMAKE

Igihe duhisemwo neza abagenzi, birahimbara Yehova kandi bikatugirira akamaro.

Wize iki?

• Kubera iki Yehova yitwararika ukuntu duhitamwo abagenzi?

• Dukwiye kwirinda abagenzi bameze gute?

• Wokomeza gute ubucuti ufitaniye n’abagenzi beza?

RONDERA N’IBINDI

Nurabe ukuntu abagenzi beza bashobora kudufasha mu bihe bigoye.

“Dukomeze ubugenzi dufitaniye imbere y’uko iherezo rishika” (Umunara w’Inderetsi, Munyonyo 2019)

Raba ibintu ngirakamaro wokora kugira ngo uronke abagenzi beza.

“Noronka gute abagenzi beza?” (Ibibazo urwaruka rwibaza—Inyishu ngirakamaro, Igitabu ca 1, ikigabane ca 8)

Ni igiki ukwiye kumenya ku bucuti bwo kuri internet?

Nukoreshe neza ubuhinga bwa none (4:12)

Mu nkuru ivuga ngo “Nari nshashaye kuronka uwombera dawe,” nurabe icatumye umugabo umwe asubira gusuzuma abagenzi yari afise.

“Bibiliya irahindura ubuzima bw’abantu” (Umunara w’Inderetsi, 1 Ndamukiza 2012)

1. Ni ibiki dukwiye kwibuka igihe duhitamwo uburyo bwo kwinezereza?

Ushima gukora iki igihe uba uruhutse? Bamwe bashima kumara akanya muhira basoma ibitabu, bumviriza umuziki, baraba isinema canke bakoresha internet. Abandi bashima kumarana akanya n’abagenzi batembera canke binonora imitsi. Uburyo bwo kwinezereza ubwo ari bwo bwose duhitamwo, turakwiye kwiyemeza ko ‘bwemerwa ku Mukama.’ (Abanyefeso 5:10) Birahambaye ko ivyo tubitahura kubera ko uburyo bwo kwinezereza abantu benshi bahitamwo usanga burimwo ibintu Yehova yanka, nk’ubukazi, ubusambanyi canke ivy’amashetani. (Soma Zaburi 11:5.) Ni igiki none codufasha guhitamwo neza uburyo bwo kwinezereza?

Nitwahitamwo abagenzi bakunda Yehova, bazodufasha guhitamwo uburyo bwiza bwo kwisamaza. Nk’uko twabibonye mu cigwa giheze, “uwugendana n’inkerebutsi azocika inkerebutsi.” Ku rundi ruhande, igihe tumarana umwanya n’abantu batitaho amategeko y’Imana ‘tuzokwibonerako.’—Imigani 13:20.