2. Kuva mu 1914, ibintu vyifashe gute kw’isi kandi abantu bigenza gute?

Abigishwa ba Yezu bamubajije bati: “Ni igiki kizoba ikimenyetso c’ukuhaba kwawe n’ic’insozero y’ivy’isi?” (Matayo 24:3) Mu kubishura, Yezu yababwiye ibintu vyobaye atanguye kuganza mw’ijuru ari Umwami w’Ubwami bw’Imana. Bimwe muri ivyo ni intambara, amapfa na vya nyamugigima. (Soma Matayo 24:7.) Bibiliya yari yaravuze kandi ko inyifato y’abantu bo mu “misi ya nyuma” yotumye mu buzima haba ibintu “bigoye kwihanganira.” (2 Timoteyo 3:1-5) Ivyo bintu vyose vyararushirije kwibonekeza kuva mu 1914.

3. Kubera iki ibintu vyarushirije kwunyuka kuva Ubwami bw’Imana butanguye kuganza?

Haciye igihe gitoyi Yezu abaye Umwami w’Ubwami bw’Imana, harabaye intambara mw’ijuru hagati yiwe hamwe na Shetani n’amadayimoni yiwe. Ariko Shetani yaratsinzwe. Bibiliya ivuga ko “[yararirijwe] kw’isi, n’abamarayika biwe bararirizanywa na we.” (Ivyahishuwe 12:9, 10, 12) Shetani afise ishavu ryinshi kubera azi yuko agiye gukurwaho. Ni yo mpamvu ariko aratera ingorane n’imibabaro kw’isi yose. Ivyo biradufasha gutahura igituma ibintu vyifashe nabi kw’isi. Ubwami bw’Imana bugiye gukuraho izo ngorane zose.