Ikigabane ca 5

Imana Yemera Ugusenga kwa Nde?

1. Umusamariyakazi umwe yashaka kumenya iki ku vyerekeye ugusenga?

WOBA uribaza uti ‘Imana yemera ugusenga kwa nde?’ Umugore umwe ikibazo mwene ico gishobora kuba caramuje mu muzirikanyi igihe yaganira na Yezu Kirisitu hafi y’Umusozi Gerizimu i Samariya. Uwo mugore yarerekeje kw’itandukaniro ryari hagati y’ugusenga kw’Abasamariya n’ukw’Abayuda, avuga ati: “Ba sogokuruza bacu bāsengera kur’uyu musozi, ariko mweho mugira ngw i Yerusalemu ni ho hantu hakwiye gusengerwa.” (Yohana 4:20) Yezu yoba yabwiye uwo Musamariyakazi yuko Imana yemera ugusenga ukwo ari kwo kwose? Canke yoba yavuze yuko hariho ibintu kanaka bisabwa kugira ngo umuntu ahimbare Imana?

2. Mu kwishura nya Musamariyakazi, Yezu yavuze iki?

² Inyishu itangaje Yezu yatanze yari iyi: “Igihe kija kuza, si kur’uyu musozi cank’i Yerusalemu muzosengera Data.” (Yohana 4:21) Abasamariya bari bamaze igihe kirekire batinya Yehova bongera basenga izindi mana ku Musozi Gerizimu. (2 Abami 17:33) Ico gihe Yezu Kirisitu yavuze yuko haba aho hantu canke i Yeruzalemu ata hobaye hahambaye mu vy’ugusenga kw’ukuri.

GUSENGA MU MPWEMU NO MU KURI

3. (a) Ni kuki Abasamariya batari bazi Imana vy’ukuri? (b) Abayuda b’abizigirwa be n’abandi bashoboye gute gushika ku kumenya Imana?

³ Yezu yabandanije abwira uwo Musamariyakazi ati: “Mwebge musenga ico mutazi; tweho dusenga ico tuzi, kukw agakiza gaturuka mu Bayuda.” (Yohana 4:22) Abasamariya bari bafise ivyiyumviro vy’idini vy’ikinyoma, bakaba bemera gusa yuko ngo vya bitabu bitanu vya mbere vya Bibiliya ari vyo gusa vyahumetswe, na vyo vyari gusa ivyo ubwabo bisubiriyemwo, bikaba vyitwa Pentateki y’Abasamariya. Ni co gituma batari bazi Imana vy’ukuri. Ariko rero Abayahudi bari barabikijwe ubumenyi bw’Ivyanditswe. (Abaroma 3:1, 2) Abayuda b’abizigirwa hamwe n’abandi abo ari bo bose bokwumvirije, Ivyanditswe vyarabaronsa ivyo bari bakeneye kugira ngo bamenye Imana.

4. Nk’uko Yezu yabivuze, Abayahudi n’Abasamariya bobwirijwe kugira iki kugira ngo ugusenga kwabo kwemerwe n’Imana?

⁴ Mu vy’ukuri, Yezu yarerekanye yuko Abayahudi n’Abasamariya botegerejwe guhindura uburyo basenga, kugira ngo bahimbare Imana. Yavuze ati: “Igihe kiza, kandi kirashitse, ni ho abasenga b’ukuri bazosengera Data mu mpwemu no mu kuri, kuko Data arondera abamusenga bameze bartyo. Imana ni [I]mpwemu, kand’abayisenga bakwiye kuyisenga mu mpwemu no mu kuri.” (Yohana 4:23, 24) Dukwiye gusenga Imana “mu mpwemu,” tubitumwe n’imitima yuzuye ukwizera n’urukundo. Birashoboka ko dusenga Imana “mu kuri” mu kwiga Ijambo ryayo Bibiliya, no mu kuyisenga dukurikije ukuri kwayo kwahishuwe. Ivyo woba none ufise igishika co kubigira?

5. (a) “Ugusenga” bisigura iki? (b) Dutegerezwa gukora iki nimba dushaka ko Imana yemera ugusenga kwacu?

⁵ Yezu yarashimitse ku vy’uko Imana ishaka ugusenga kw’ukuri. Ivyo vyerekana yuko hariho ubwoko bw’ugusenga Yehova atemera. Gusenga Imana bisigura kuyitera iteka ririmwo icubahiro cinshi, no kuyikorera igikorwa ceranda. Hamwe woba ushaka gutera iteka umutware ahambaye, biboneka ko wogira igishika co kumukorera no kugira ibimuhimbara. Nta nkeka rero yuko dushaka guhimbara Imana. Aho kuvuga gusa ngo ‘Idini yanje irankwiye,’ dukwiye rero kuraba neza yuko ugusenga kwacu guhuye n’ivyo Imana isaba.

GUKORA IVYO DATA AGOMBA

6, 7. Ni kuki Yezu atemera bamwe mu bavuga ko ari abigishwa biwe?

⁶ Reka dusome Matayo 7:21-23 hanyuma turabe ko dushobora gukuramwo ikintu gihambaye cerekana nimba uburyo bwose bw’ugusenga bwoba bwemerwa n’Imana. Yezu yavuze ati: “Umuntu wese amvumereza, ati Mwami, Mwami; si we azokwinjira mu bgami bgo mw ijuru, atar’ūkora ivyo Data wo mw ijuru agomba. Benshi bazombgira kuri wa musi, ngo Mwami, Mwami, ntitwavugishwa n’Imana mw izina ryawe, ntitwasenda abadayimoni [ibiremwa vy’impwemu bikora ikibi] mw izina ryawe, ntitwakora ibitangaza vyinshi mw izina ryawe? Ni ho nzobajinjiburira, nti Nta ho nigeze mbamenya; mviraho, mwa bakora ibizira mwe.”

⁷ Kwemera Yezu Kirisitu yuko ari Umwami ni ntahara mu gusenga kw’ukuri. Mugabo hari ikintu coba kibuze mu gusenga kwa benshi mu bavuga ko ari abigishwa ba Yezu. Yavuze yuko bamwe bokoze “ibitangaza,” nk’ivyitwa ngo ni ugukiza ku gitangaro. Ariko rero, bonaniwe gukora ivyo Yezu yavuze ko ari vyo bihambaye. Ntibobaye ‘bariko bakora ivyo Se agomba.’ Nimba dushaka guhimbara Imana, dutegerezwa kwiga ivyo Se agomba ivyo ari vyo, maze rero tukabikora.

UBUMENYI NYAKURI BURADUKINGIRA

8. Nimba dushaka gukora ivyo Imana igomba, ni ibiki bisabwa, kandi ni ivyiyumviro bitari vyo ibihe dutegerezwa kwirinda?

⁸ Gukora ivyo Imana igomba bisaba kugira ubumenyi nyakuri bwerekeye Yehova Imana na Yezu Kirisitu. Mwene ubwo bumenyi bujana mu buzima budahera. Nta nkeka rero, twese twoshima gufatana uburemere ivyerekeye ukuronka ubumenyi nyakuri bwo mw’Ijambo ry’Imana, ari ryo Bibiliya. Bamwe bavuga yuko bidakenewe guhagarika umutima bugingo tuba turi inziraburyarya tukaba n’abanyamwete mu gusenga kwacu. Abandi bavuga ngo ‘Uzi bike uzobazwa bike.’ Yamara, Bibiliya iraturemesha kwongereza ubumenyi bwerekeye Imana n’imigambi yayo.—Abanyefeso 4:13; Ab’i Filipi 1:9; Ab’i Kolosayi 1:9.

9. Ubumenyi nyakuri budukingira gute, kandi ni kuki dukeneye mwene ukwo gukingirwa?

⁹ Ubumenyi mwene ubwo burakingira ugusenga kwacu ngo ntiguhumane. Intumwa Paulo yaravuze ivyerekeye ikiremwa kimwe c’impwemu ciyita “umumarayika w’umuco.” (2 Ab’i Korinto 11:14) Kubera ko ciyoberanya gutyo, ico kiremwa c’impwemu, ari co Shetani, kiragerageza kutuyobereza mu gukora ibintu bihushanye n’ivyo Imana igomba. Ibindi biremwa vy’impwemu vyifatanije na Shetani na vyo nyene vyarahumanije ugusenga kw’abantu, kuko Paulo yavuze ati: “Ibimazi abanyamahanga batanga, babiha abadayimoni, babiterekereza abadayimoni, ntibabiha Imana.” (1 Ab’i Korinto 10:20) Abantu benshi bashobora kuba bariyumvira yuko bariko basenga mu buryo bwiza, kandi batariko bakora ivyo Imana igomba. Bariko bayoberezwa mu gusenga kw’ikinyoma guhumanye. Turaza kwiga ibindi vyinshi vyerekeye Shetani hamwe n’amadayimoni mu nyuma, mugabo si ivy’imbeshere abo bansi b’Imana barahumanya ugusenga kw’abantu.

10. Wewe wogira iki hamwe hoba hari umuntu yasutse ishano mw’ikarabo ryawe ry’amazi n’ibigirankana, kandi ubumenyi nyakuri bw’Ijambo ry’Imana budushoboza kugira iki?

¹⁰ Hamwe woba uzi ko hariho uwasutse ishano n’ibigirankana mw’ikarabo ryawe ry’amazi, mbega wobandanya kuyanywako? Nta nkeka, woca urondera buno nyene isoko ririmwo amazi meza, y’umusarara. Ubumenyi nyakuri bw’Ijambo ry’Imana buradushoboza kumenya idini y’ukuri no kwiyamiriza ubuhumane butuma ugusenga kutemerwa n’Imana.

INYIGISHO ZAGEZWE N’ABANTU

11. Ni igiki kitagenda neza mu vy’ugusenga kw’Abayuda benshi?

¹¹ Igihe Yezu yari kw’isi, Abayuda benshi ntibakora ibijanye n’ubumenyi nyakuri bwerekeye Imana. Ivyo vyatumye batakaza akaryo ko kuba abadahumanye mu nyonga za Yehova. Ku biberekeye, Paulo yanditse ati: “Ndabashingira intahe yuko bafise ishaka ry’Imana, ariko si mu buryo bg’[ubumenyi nyakuri].” (Abaroma 10:2) Ni bo bigenera ukungene basenga Imana, aho kwumviriza ico ivuga.

12. Ni ibiki vyanduza ugusenga kwa Isirayeli, hanyuma bivamwo iki?

¹² Abisirayeli mu ntango bakurikira idini ityoroye bari barashingiwe n’Imana, mugabo irahava yanduzwa n’inyigisho be n’amafilozofiya vy’abantu. (Yeremiya 8:8, 9; Malaki 2:8, 9; Luka 11:52) Naho abayobozi b’idini y’Abayuda bitwa Abafarizayo biyumvira yuko ugusenga kwabo kwemerwa n’Imana, Yezu yababwiye ati: “Yesaya yavuze neza ivyo yavugishijwe n’Imana kuri mwebge indyarya, nk’uko handitswe, ngw Aba bantu banyubahisha iminwa yabo, arikw imitima yabo iri kure yanje. Bansengera ubusa, kukw inyigisho bigisha ar’ivyagezwe n’abantu.”—Mariko 7:6, 7.

13. Vyoshoboka gute ko dukora nk’Abafarisayo?

¹³ Mbega birashoboka ko twogira nk’Abafarizayo? Ivyo vyoshika hamwe twokurikira imigenzo y’idini twarazwe aho gutohoza ico Imana yavuze ku vyerekeye ugusenga. Mu kutuburira ku vyerekeye iyo ngeramizi nyakuri, Paulo yanditse ati: “[I]mpwemu [i]vuga [i]vyeruye yuko mu bihe bizoza bamwe bazota [ukwizera], bagashira umutima ku vy’impwemu zizimiza no ku vy’inyigisho z’abadayimoni.” (1 Timoteyo 4:1) Urumva rero ko bidahagije kuvuga gusa yuko idini yacu ihimbara Imana. Nka kumwe kwa wa Musamariyakazi yahwana na Yezu, twoshobora kuba twararazwe n’abavyeyi bacu uburyo bwacu bwo gusenga. Mugabo dukeneye kuraba neza yuko turiko tugira ibintu bishimwa n’Imana.

NIWIRINDE GUCUMURA KU MANA

14, 15. Naho twoba dufise ubumenyi kanaka bw’ivyo Imana igomba, ni kuki dukeneye kuba maso?

¹⁴ Tutabaye maso, twohava dukora ikintu kitemerwa n’Imana. Nk’akarorero, intumwa Yohani yarikubise imbere y’ibirenge vy’umumarayika ‘ngo amusenge.’ Mugabo nya mumarayika yaramuburiye ati: “Oya sigaho; nd’umugurano mugenzawe, kandi ndi mugenzi wa bene So bafise ivyo gushingira intahe Yesu: Imana ba ari yo usenga.” (Ivyahishuriwe 19:10) Wewe none woba ubona ko bikenewe kuraba neza yuko ugusenga kwawe kutandujwe n’ubwoko na bumwe bw’ugusenga ibigirwamana?—1 Ab’i Korinto 10:14.

¹⁵ Igihe Abakirisu bamwebamwe batangura gukurikira imigenzo y’idini idahimbara Imana, Paulo yabajije ati: “N’iki catumye musubira inyuma mugahindukirira ivya mbere vya goyigoyi, bitagira ikimazi, mukagomba kubijakarira ukundi gusha? Muziririza imisi n’amezi n’ibihe n’imyaka. Munteye akōba, yuko kumbure ivyo nabakoreye natamijwe n’ubusa.” (Ab’i Galatiya 4:8-11) Abo bantu bari bararonse ubumenyi bwerekeye Imana, mugabo mu nyuma bakora amakosa mu gukurikiza imigenzo hamwe n’imisi mikuru vy’idini bitemerwa na Yehova. Nk’uko Paulo yabivuze, dukeneye ‘kuguma tumenya neza ibihimbara Umwami wacu.’—Abanyefeso 5:10.

16. Muri Yohana 17:16 no muri 1 Petero 4:3 hadufasha gute kumenya ko imisi mikuru n’imigenzo vyoba bihimbara Imana?

¹⁶ Dutegerezwa kuraba neza yuko twirinda imisi mikuru y’idini hamwe n’imigenzo yindi irenga ku ngingo z’Imana. (1 Ab’i Tesalonike 5:21) Nk’akarorero, Yezu yavuze ku vyerekeye abigishwa biwe ati: “S’ab’isi, nk’uko nanje ntar’uw’isi.” (Yohana 17:16) Idini urimwo yoba igira ibirori n’imisi mikuru birenga ku ngingo y’ukutaja mu vy’isi? Canke abanywanyi b’idini urimwo boba rimwe na rimwe baja mu migenzo no mu misi mikuru bishobora kuba birimwo ingeso nka zimwe zavugwa n’intumwa Petero? Uno yanditse ati: “Igihe cashize [kira]hāgije gukora ivy’abanyamahanga bakunda gukora, no kugendera mu ngeso z’isoni nke, n’izo kwifuza, no kunohorwa na vino, no kudandahirwa, no kurundāna aho bateretse, n’ibizira vyo gusenga ibigirwamana.”—1 Petero 4:3.

17. Ni kuki dukwiye kwirinda ikintu cose kigaragaza agatima k’isi?

¹⁷ Intumwa Yohani yarashimitse ku vy’uko dukeneye kwirinda imigenzo iyo ari yo yose igaragaza agatima k’isi idukikije itibanga Imana. Yohani yanditse ati: “Ntimugakunde isi, cank’ibiri mw isi. Umuntu ni yakunda isi, ugukunda Data wa twese ntikuzoba kuri muri we. Kukw ikiri mw isi cose ar’ivyifuzo vy’umubiri, n’ivyifuzo vy’amaso, n’ubgibone bg’ubu bugingo, bitanduruka kuri Data wa twese, ariko vyanduruka mw isi. Kand’isi irikw irashirana n’ivyifuzo vyayo, arik’ūkora ivy’Imana igomba yamah’ibihe bidashira.” (1 Yohana 2:15-17) Woba wabonye yuko ‘abakora ivyo Imana igomba’ bazokwamaho ibihe bidahera? Egome, dukoze ivyo Imana igomba kandi tukirinda ibikorwa bigaragaza agatima k’iyi si, turashobora kugira icizigiro c’ubuzima budahera!

NUGUME KU NGINGO NGENDERWAKO Z’IMANA ZIRI HEJURU

18. Abanyakorinto bamwebamwe bihenda gute ku vyerekeye ukuntu bigenza, kandi ni ibiki dukwiye kwigira kuri ivyo?

¹⁸ Imana ishaka yuko abayisenga baba abantu bagamburuka ingingo ngenderwako zayo ziri hejuru. I Korinto ha kera, bamwe wasanga biyumvira bihenda ngo Imana yorekerana inyifato y’ubushegabo. Turashobora kubona ukuntu bari bihenze dusomye muri 1 Ab’i Korinto 6:9, 10. Nimba dushaka gusenga Imana mu buryo yemera, dutegerezwa kuyihimbara mu mvugo no mu ngiro. Idini yawe yoba igushoboza gukora ivyo?—Matayo 15:8; 23:1-3.

19. Ni mu buryo ki ugusenga kw’ukuri kugira ico gukora ku migenderanire yacu n’abandi?

¹⁹ Imigenderanire yacu n’abandi bantu ikwiye kandi kugaragaza ingingo ngenderwako z’Imana. Yezu Kirisitu yaturemesheje kugirira abandi nk’uko twoshima ko na bo batugirira, kuko ivyo biri mu bigize ugusenga kw’ukuri. (Matayo 7:12) Raba kandi ico yavuze ku vyerekeye ukugaragaza urukundo rwa kivukanyi: “Ni mwagiriranira urukundo, ni ho bose bazomenya ko mur’abigishwa banje.” (Yohana 13:35) Abigishwa ba Yezu bategerezwa gukundana, kandi bakagirira ineza abo basangiye ukwemera, bakayigirira n’abandi bantu.—Ab’i Galatiya 6:10.

UGUSENGA N’UBUGINGO BWACU BWOSE

20, 21. (a) Imana isaba ugusenga kumeze gute? (b) Ni kuki Yehova yanse ugusenga kwa Isirayeli mu gihe ca Malaki?

²⁰ Mu mutima wawe woshobora kuba ushaka gusenga Imana mu buryo yemera. Nimba ari ukwo, utegerezwa kumenya uko Yehova abona ivy’ugusenga. Umwigishwa Yakobo yarashimitse ku vy’uko uburyo Imana ibona ibintu ari bwo buhambaye, si ukuntu twebwe tubibona. Yakobo yavuze ati: “Idini itunganye itagira agasembga imbere y’Imana Data wa twese, n’ukurāba impfuvyi n’abapfakazi mu marushwa yabo, no kwirinda ngo ntiwanduzwe n’ivy’isi.” (Yakobo 1:27)  Umuntu wese muri twebwe akwiye gusuzuma ugusenga kwiwe afise icipfuzo co guhimbara Imana, kugira ngo amenye neza yuko kutandujwe n’imigenzo itaranga ukwibanga Imana, canke yuko atoba ariko ariyobagiza ikintu ibona ko gihambaye.—Yakobo 1:26.

²¹ Ugusenga kudahumanye tugiranye ubugingo bwacu bwose, ni kwo gusa guhimbara Yehova. (Matayo 22:37; Ab’i Kolosayi 3:23) Igihe ihanga rya Isirayeli ryagira ibiri munsi y’ivyo, Imana yavuze iti: “Umwana arubaha se, n’umushumba akubaha shebuja; non’asangwa ndi So, kunyubaha kwanyu kuri hehe? Cank’asangwa ndi Shobuja, igitinyiro canje kiri hehe”? Bariko baracumura ku Mana mu kuyishikanira ibimazi vy’ibitungwa bihumye, bicumbagira, n’ibirwaye, na yo iranka ibikorwa mwene ivyo vy’ugusenga. (Malaki 1:6-8) Yehova arabereye ugusengwa gutyoroye bimwe biherejeko, kandi akemera gusa gusengwa ata kindi bamubangikanije.—Kuvayo 20:5; Imigani 3:9; Ivyahishuriwe 4:11.

22. Nimba dushaka ko Imana yemera ugusenga kwacu, ni ibiki tuzokwirinda, kandi ni ibiki tuzokora?

²² Wa Musamariyakazi yaganira na Yezu bisa n’uko yashimishwa n’ugusenga Imana mu buryo yemera. Nimba natwe ivyo ari vyo dushaka, tuzokwirinda inyigisho zose n’imigenzo yose vyanduza. (2 Ab’i Korinto 6:14-18) Ahubwo, tuzokwihata kugira ngo turonke ubumenyi nyakuri bwerekeye Imana n’ivyo igomba. Tuzokurikira neza ivyo isaba kugira ngo yemere ugusenga kwacu. (1 Timoteyo 2:3, 4) Ico ni co nyene Ivyabona vya Yehova bihatira gukora, kandi baraguteye akamo ngo wifatanye na bo mu gusenga Imana “mu mpwemu no mu kuri.” (Yohana 4:24) Yezu yavuze ati: “Data arondera abamusenga bameze bartyo.” (Yohana 4:23) Twizigiye yuko uri mwene uwo muntu. Nka kumwe kwa wa Musamariyakazi, nta nkeka woshima kuronka ubuzima budahera. (Yohana 4:13-15) Ariko urabona abantu basaza kandi bagapfa. Ikigabane gikurikira kirasigura igituma.

SUZUMA UBUMENYI BWAWE

Nk’uko vyerekanwa muri Yohana 4:23, 24, Imana yemera ugusenga ukuhe?

Dushobora gute kumenya ko Imana ihimbarwa canke idahimbarwa n’imigenzo be n’imisi mikuru imwimwe?

Ibisabwa bimwebimwe kugira ngo umuntu asenge mu buryo bwemerwa ni ibihe?

[Ifoto yuzuye urupapuro rwose, rup. 44]