Ibibazo vy’abasomyi

Kubatizwa mu gishingo c’abapfuye bisobanura iki?

Igihe intumwa Paulo yandika ku vyerekeye ukuzukira ijuru, yaranditse umurongo ukwegera. Muri Bibiliya Yera dusoma duti: “Cank’ababatizwa mu gishingo c’abapfuye bazobamarira iki? Asangw’abapfuye batazurwa na mba, n’iki gituma bababatirizwa?”. Mu Bwuzure Bushasha na ho, uwo murongo hawuhindura uku: “Ahandi ho ababatizwa mu kibanza c’abapfuye bazobamarira iki? Nimba abapfuye batazuka, igituma babatizwa mu kibanza cabo n’iki?”.​—1 Ab’i Korinto 15:29.

Ngaho, Paulo yoba yashaka kuvuga yuko abantu bazima babatiririzwa abantu bapfuye batabatijwe? Bisa n’uko ari ukwo vyokwumvikana ufatiye kuri izo mpinduro za Bibiliya be no ku zindi zimwezimwe. Ariko rero, umuntu asuzumye yitonze ivyo Vyanditswe be n’ikigiriki co mu ntango cakoreshejwe na Paulo, bitanga ikindi ciyumviro. Paulo yashaka kuvuga yuko abakirisu basizwe babatizwa, canke bibizwa, bakinjira mu ngendo y’ubuzima izobashikana ku gupfa ari intadohoka nka kumwe kwa Kirisitu. Mu nyuma, bozuriwe ubuzima bw’impwemu nk’uko vyagenze kuri Kirisitu.

Ivyanditswe birashigikira iyo nsobanuro. Mw’ikete Paulo yandikiye Abaroma, yanditse ati: “Ntimuzi yuko twese abābatirijwe kuba muri Kristo Yesu, twabatirijwe kuba mu rupfu rwiwe?” (Abaroma 6:3). Mw’ikete Paulo yandikiye Abanyafilipi, yivuze ati: ‘Nafatanya na Kirisitu mu mibabaro yiwe, ngashushanywa n’urupfu rwiwe, ngo kumbure nshike ku kuzuka kw’abapfuye’ (Ab’i Filipi 3:10, 11). Paulo yariko yerekana yuko ubuzima bw’umuyoboke wa Kirisitu yasizwe burimwo ingendo yo kuguma ari intadohoka mu gihe c’ikigeragezo, iyo guhangana n’urupfu ku musi ku musi, maze amaherezo agapfa ari intadohoka, hanyuma akazukira mw’ijuru.

Biribonekeza yuko, ivyo vyanditswe, hamwe n’ibindi bivuga bidakikiriza urupfu mu bijanye n’ababatijwe, vyerekeza ku bantu bazima bari baramaze kubatizwa, atari ku bantu bari barapfuye. Paulo kandi yabwiye abakirisu basizwe bagenziwe ati: “Mwahambanywe na we mw ibatizwa, ni ho kandi mwazuranywe na we, kubgo kwizera ubushobozi bg’Imana yamuzuye mu bapfuye”.​—Ab’i Kolosayi 2:12.

Indongorazina y’ikigiriki hy·perʹ, ihindurwa ngo “mu gishingo ca” canke “mu kibanza ca” mu mpinduro za Bibiliya zitandukanye mu 1 Ab’i Korinto 15:29, ishobora kandi gusobanura “ku bw’intumbero ya”. Mu buryo buhuje n’ibindi bisomwa vyo muri Bibiliya, impinduro ya Bibiliya Les Saintes Écritures​—Traduction du monde nouveau ihindura rero uwo murongo gutya: “Bazogira bate abariko babatizwa ku bw’intumbero yo kuba abapfuye? Asangwa abapfuye batari buzurwe namba, ni kubera iki bariko kandi babatizwa ku bw’intumbero yo kuba batyo?”.