Intangiriro

19 Nuko abo bamarayika uko ari babiri bagera i Sodomu nimugoroba kandi Loti yari yicaye ku irembo ry’i Sodomu. Loti ababonye arahaguruka ajya kubasanganira maze arapfukama akoza umutwe hasi.+ 2 Arababwira ati: “Ba nyakubahwa, ndabinginze muze iwanjye muharare kandi babakarabye ibirenge, kuko ndi umugaragu wanyu. Hanyuma muze kuzinduka kare mwikomereze urugendo.” Na bo baramusubiza bati: “Oya, ahubwo turi burare hanze.” 3 Ariko arabinginga cyane ku buryo bajyanye na we bakinjira mu nzu ye. Hanyuma abategurira ibyokurya byiza cyane, abokereza n’imigati itarimo umusemburo maze bararya.

4 Batararyama, abagabo bo muri uwo mujyi w’i Sodomu, uhereye ku mwana w’umuhungu ukageza ku musaza, bose baraza bagota iyo nzu. 5 Bahamagara Loti baramubwira bati: “Abagabo baje iwawe iri joro bari he? Basohore ubaduhe turyamane na bo.”+

6 Amaherezo Loti arasohoka abasanga ku muryango, ariko ahita akinga urugi. 7 Nuko arababwira ati: “Bavandimwe, ndabinginze ntimugire ikintu kibi mukora. 8 Dore mfite abakobwa babiri b’amasugi. Reka mbasohore mbabahe hanyuma mubakoze icyo mushaka cyose. Ariko aba bagabo ntimugire icyo mubatwara. Ngomba kubarinda kuko baje gucumbika iwanjye.”+ 9 Na bo baramubwira bati: “Igirayo se!” Bongeraho bati: “Uyu mugabo w’umunyamahanga yaje gutura hano ari wenyine, none arashaka no kwigira umucamanza. Ubu nonaha tugiye kugukorera ibibi biruta ibyo twari kubakorera.” Nuko basunika Loti kandi begera urugi bashaka kurumena. 10 Ba bagabo basohora amaboko bafata Loti bamwinjiza mu nzu maze urugi bararukinga. 11 Bateza ubuhumyi abo bantu bari ku muryango w’inzu, uhereye ku muto muri bo ukageza ku mukuru, ku buryo bagerageje gushakisha aho umuryango uri bakaruha.

12 Nuko ba bagabo babwira Loti bati: “Hari bene wanyu ufite ino aha? Baba abakwe* bawe, abahungu bawe, abakobwa bawe, mbese abawe bose bari muri uyu mujyi. Bakure aha hantu! 13 Tugiye kuharimbura kuko Yehova yumvise abataka bahitotombera.+ None Yehova yadutumye ngo turimbure uyu mujyi.” 14 Nuko Loti arasohoka maze avugana n’abagabo bari kuzashyingiranwa n’abakobwa be, akomeza kubabwira ati: “Nimugire vuba muve aha hantu kuko Yehova agiye kurimbura uyu mujyi.” Ariko abo bagabo babonaga ameze nk’umuntu wikinira.+

15 Icyakora bugiye gucya, abamarayika binginga Loti cyane bamubwira bati: “Gira vuba ufate umugore wawe n’abakobwa bawe bombi bari hano mugende kugira ngo mutarimbuka muzize icyaha cy’uyu mujyi!”+ 16 Akomeje gutinda, abo bamarayika bamufata ukuboko we n’umugore we n’abakobwa be bombi babakura muri uwo mujyi babashyira inyuma yawo+ kuko Yehova yari amugiriye impuhwe.+ 17 Nuko bakimara kubageza ku nkengero z’umujyi, umwe muri bo aramubwira ati: “Muhunge mudapfa! Ntimurebe inyuma+ kandi ntimugire aho muhagarara muri aka karere kose.+ Muhungire mu karere k’imisozi miremire kugira ngo mutarimbuka.”

18 Hanyuma Loti arababwira ati: “Yehova ndakwinginze, ntunyohereze hariya! 19 Dore uranyishimira kandi wangiriye neza cyane, maze urandokora.+ Ariko sinshobora guhungira mu karere k’imisozi miremire kuko ntinya ko nahura n’ibibazo, maze ngapfa.+ 20 None ndakwinginze, reka mpungire muri uriya mujyi uri hafi kandi ni umujyi muto. Ese nywuhungiyemo hari icyo bitwaye? Kandi nakomeza kubaho!” 21 Nuko aramubwira ati: “Ibyo usabye ndabikwemereye.+ Ntabwo ndi burimbure uwo mujyi uvuze.+ 22 Ihute uhungireyo kuko nta cyo nshobora gukora utaragerayo!”+ Ni cyo cyatumye uwo mujyi witwa Sowari.*+

23 Loti yageze i Sowari izuba ryarashe. 24 Hanyuma Yehova agusha imvura y’amazuku* n’umuriro kuri Sodomu na Gomora. Byazaga biturutse mu ijuru kuri Yehova.+ 25 Nuko arimbura iyo mijyi, ndetse n’ako karere kose n’abaturage bose bo muri iyo mijyi n’ibimera byose.+ 26 Ariko umugore we wari umukurikiye areba inyuma maze ahinduka inkingi y’umunyu.+

27 Nuko Aburahamu abyuka kare mu gitondo, ajya ha handi yari yahagaze ari imbere ya Yehova.+ 28 Hanyuma areba i Sodomu n’i Gomora no muri ako karere kose maze abona ibintu biteye ubwoba. Abona umwotsi mwinshi uzamuka muri ako karere umeze nk’umwotsi mwinshi uva mu itanura.+ 29 Igihe Imana yarimburaga imijyi yo muri ako karere harimo n’uwo Loti yari atuyemo,+ yaramurokoye ibigiriye Aburahamu.

30 Nyuma yaho Loti ava i Sowari ajyana n’abakobwa be bombi ajya gutura mu karere k’imisozi miremire+ kuko yatinyaga gutura i Sowari.+ Atura mu buvumo ari kumwe n’abakobwa be bombi. 31 Umukobwa w’imfura abwira murumuna we ati: “Dore papa arashaje kandi muri iki gihugu nta mugabo uhari twashyingiranwa na we nk’uko bigenda ku isi hose. 32 None ngwino duhe papa divayi anywe hanyuma tugirane na we imibonano mpuzabitsina, kugira ngo hatazabura abamukomokaho.”

33 Nuko muri iryo joro baha papa wabo divayi nyinshi, hanyuma umukobwa w’imfura aragenda bagirana imibonano mpuzabitsina, ariko papa we ntiyamenya igihe uwo mukobwa yaryamiye n’igihe yabyukiye. 34 Bukeye bwaho, umukobwa w’imfura abwira murumuna we ati: “Dore muri iri joro ryashize naryamanye na papa. None reka no muri iri joro tumuhe divayi anywe. Hanyuma nawe ugende muryamane kugira ngo hatazabura abamukomokaho.” 35 Nanone muri iryo joro baha papa wabo divayi nyinshi, hanyuma umukobwa muto aragenda bagirana imibonano mpuzabitsina, ariko papa we ntiyamenya igihe uwo mukobwa yaryamiye n’igihe yabyukiye. 36 Nuko abo bakobwa bombi ba Loti batwita inda batewe na papa wabo. 37 Umukobwa w’imfura abyara umwana w’umuhungu amwita Mowabu.+ Ni we Abamowabu bakomotseho.+ 38 Umukobwa muto na we abyara umwana w’umuhungu amwita Beni-ami. Ni we Abamoni+ bakomotseho.