None se ni izihe mpamvu zumvikana zituma tujya mu materaniro ya gikristo? Ni gute wowe ubwawe watuma amateraniro akugarurira ubuyanja? Kugira ngo tubone ibisubizo by’ibyo bibazo, nimucyo dusuzume itumira rya Yesu ryuje urukundo riboneka muri Matayo 11:28-30, NW. Yaravuze ati “nimuze munsange, mwese abagoka n’abaremerewe, nanjye nzabaruhura. Mwemere kuba abagaragu banjye kandi munyigireho, kuko nitonda kandi noroheje mu mutima, namwe muzabona ihumure. Kuko umugogo wanjye utaruhije kandi umutwaro wanjye utaremereye.”

“Umugogo wanjye nturuhije kandi umutwaro wanjye nturemereye”

Zirikana ko muri uwo murongo turimo dusuzuma, Yesu yavuze ati “munyigireho.” Iyo twigiye kuri Yesu, duhinduka abigishwa be, kandi twikorera umugogo we iyo twiyeguriye Imana tukabatizwa (Matayo 28:19, 20). Kwifatanya mu materaniro buri gihe ni iby’ingenzi kugira ngo dukomeze kuba abigishwa ba Yesu. Kubera iki? Kubera ko mu materaniro ya gikristo ari ho twigira ibya Yesu, tukahamenyera inyigisho ze, n’uko yakoraga.

Ni uwuhe mutwaro Kristo ashaka ko twikorera? Ni umutwaro nk’uwo na we ubwe yikorera, ni ukuvuga inshingano yo gukora ibyo Imana ishaka (Yohana 4:34; 15:8). Kumvira amategeko y’Imana bisaba imihati, ariko uwo mutwaro nturemereye cyane ku buryo tutawikorera. Ushobora gusa n’aho uremereye turamutse dushatse kuwikorera twenyine. Ariko kandi, nidusenga dusaba umwuka w’Imana kandi tukigaburira ibyokurya byo mu buryo bw’umwuka bitangirwa mu materaniro, tuzabona “imbaraga zisumba byose” zitangwa n’Imana (2 Abakorinto 4:7). Iyo dutegura amateraniro kandi tukayifatanyamo, urukundo dukunda Yehova rugenda rurushaho gukomera. Kandi iyo ibyo dukora biterwa n’urukundo, amategeko y’Imana “ntarushya.”—1 Yohana 5:3.

Muri rusange abantu bahanganye n’ibibazo bikomeye, nko kubura amafaranga abatunga, uburwayi n’ibindi bibazo bya bwite. Icyakora, ntitwishingikiriza ku bwenge bw’umuntu kugira ngo tubikemure. Amateraniro y’itorero adufasha kureka ‘kwiganyira,’ kuko Yehova aduha ibyo dukeneye kandi akadufasha guhangana n’ibibazo (Matayo 6:25-33). Mu by’ukuri, amateraniro ya gikristo ni ikimenyetso cy’uko Imana idukunda.

“Nditonda kandi noroheje mu mutima”

Yesu yari afite akamenyero ko kujya mu isinagogi, aho abantu baganiraga ku Ijambo ry’Imana. Igihe kimwe yagiyeyo, maze afata umuzingo wa Yesaya arasoma ati ‘umwuka w’Uwiteka uri muri jye, ni cyo cyatumye ansigira kugira ngo mbwirize abakene ubutumwa bwiza. Yantumye kumenyesha imbohe ko zibohorwa, n’impumyi ko zihumuka, no kubohora ibisenzegeri, no kumenyesha abantu iby’umwaka Umwami agiriyemo imbabazi’ (Luka 4:16, 18, 19). Mbega ukuntu bishobora kuba byari kudushimisha kumva Yesu agaragaza icyo ayo magambo yerekezagaho agira ati “uyu munsi ibyo byanditswe bisohoye mu matwi yanyu”!—Luka 4:21.

Yesu, “Umutahiza” cyangwa umwungeri mukuru witonda, aracyagenzura uko abigishwa be bitabwaho mu buryo bw’umwuka (1 Petero 5:1-4). ‘Umugaragu ukiranuka w’ubwenge’ ayobowe na Yesu, yagiye aha abagabo inshingano yo kuba abungeri mu matorero y’Abahamya ba Yehova ku isi hose (Matayo 24:45-47; Tito 1:5-9). Abo bagabo ‘baragira itorero ry’Imana’ mu bugwaneza kandi bagatanga urugero rwiza bajya mu materaniro buri gihe. Ushobora kugaragaza ko ushimira ku bw’abo bantu Yehova yatanzeho “impano” ujya mu materaniro, aho ushobora gutera abandi inkunga binyuze mu kuba uhari no kuyifatanyamo.—Ibyakozwe 15:30-33; 20:28; Abefeso 4:8, gereranya na NW, 11, 12.

“Nzabaruhura”

Mu gihe wagiye mu materaniro ya gikristo, ni gute watuma akuruhura by’ukuri? Uburyo bumwe ni ugukurikiza inama ya Yesu igira iti “mwirinde uko mwumva” (Luka 8:18). Abantu babaga bifuza cyane kumenya, bategaga Yesu amatwi bitonze. Bamusabaga kubasobanurira imigani ye kandi ibyo byatumaga bayisobanukirwa mu buryo bwimbitse.—Matayo 13:10-16.

Nawe ushobora kwigana abo bantu bari bafite inzara yo mu buryo bw’umwuka, utega amatwi ushishikaye disikuru zitangwa mu materaniro (Matayo 5:3, 6). Kugira ngo utarangara, gerageza gukurikira uko umuntu utanga disikuru agenda akurikiranya ibitekerezo. Ibaze ibibazo nk’ibi uti ‘ni gute nakoresha ibi bintu numvise mu mibereho yanjye? Ni gute nabikoresha mfasha abandi? Ni gute nasobanura iyi ngingo?’ Nanone, shaka imirongo y’Ibyanditswe utanga disikuru akoresha ashyigikira ingingo z’ingenzi. Uko uzarushaho gutega amatwi, ni ko amateraniro azarushaho kukuruhura.

Nyuma y’amateraniro, jya wungurana n’abandi ibitekerezo ku biganiro byatanzwe. Jya wibanda ku nyigisho wize no ku buryo zashyirwa mu bikorwa. Ibiganiro bitera inkunga bituma amateraniro aruhura abantu rwose.