• Izaiya 54:10
    Bhibhlya ya Dziko Ipswa

    • 10 Thangwi mapiri anakwanisa kubuluswa,

      Pontho nthunda zinakwanisa kutekenyeswa,

      Mbwenye ufuni wanga wakukhonda mala kuna iwe nee unadzabuluswa,+

      Pontho cibverano canga cakukhazikisa ntendere na iwe nee cinadzatekenyeswa,”+ alonga Yahova, Ule anakubvera ntsisi.+

  • Yeremiya 31:35-37
    Bhibhlya ya Dziko Ipswa

    • 35 Ipi ndi pidalonga Yahova,

      Ule adacita dzuwa toera imwanikire masikati,

      Ule adakhazikisa mitemo ya mwezi na ya nyenyezi toera kumwanikira masiku,

      Ule anabvundula bara, mbaicitisa kukhala na mabimbi,

      Wakuti dzina yace ndi Yahova wa anyankhondo:+

      36 “‘Mitemo ineyi mbidasiya kuphata basa,’ alonga Yahova,

      ‘Penepo dzindza ya Izraeli mbidasiya kukhala dzindza pamaso panga kwenda na kwenda.’”+

      37 Ipi ndi pidalonga Yahova: “‘Munthu mbadakwanisa kupima kudzulu, pontho mbadakwanisa kudziwa pyonsene pinatsidzikiza dziko yapantsi, penepo ine mbidakwanisa kukhonda dzindza yonsene ya Izraeli thangwi ya pinthu pyonsene pidacita iwo,’ alonga Yahova.”+