Yoswa

20 Natenepa Yahova apanga Yoswa: 2 “Panga Aizraeli kuti: ‘Sankhulani mizinda yakuthawira,+ idakupangani ine kubulukira mwa Mose, 3 toera ule anapha munthu mwakukhonda funa peno mwasusudeu* athawire mwenemu. Pontho mizinda ineyi inadzakhala mbuto yakuthawira pakuthawa mʼbale wace munthu adaphiwa.*+ 4 Iye asafunika kuthawira ku ubodzi mwa mizinda ineyi+ mbalimira pansuwo ukulu wa nzinda,+ pontho iye asafunika kulonga nseru wace kuna akulu a nzinda unoyu. Buluka penepo, akulu asafunika kuntambira mbampasa mbuto mu nzinda toera akhale pabodzi na iwo. 5 Mʼbale wa munthu adaphiwa angatowera nyakupha munthu, akulu nee asafunika kumpereka mʼmanja mwace, thangwi iye apha ndzace mwasusudeu, pontho kale nee akhamuida.+ 6 Nyakupha munthu asafunika kukhala mu nzinda unoyu mpaka nseru wace ungamala kutongwa,+ pontho asafunika kupitiriza mwenemu mpaka kufa kwa nyantsembe wankulu+ anatumikira mu ndzidzi unoyu. Buluka penepo, nyakupha munthu anakwanisa kubwerera ku nzinda udathawa iye mbakhala panyumba pace.’”+

7 Natenepa iwo asankhula mizinda inango toera ikhale yakupambulika. Mizinda ineyi ikhali Kedhesi+ ku Galileya mucisa ca mapiri ca Nafitali, Sikemu+ mucisa ca mapiri ca Efraimu na nzinda wa Kiriyati-Arbha,+ unacemerwa Ebhroni mucisa ca mapiri ca Yuda. 8 Mucisa ca Yordani, kumabulukiro a dzuwa a Yeriko, iwo asankhula Bhezeri+ nʼthando, pa nthunda ya dzindza ya Rubheni; Ramoti+ ku Jiliyadhi mucisa ca dzindza ya Gadhi na Golani+ ku Bhasani mucisa ca dzindza ya Manase.+

9 Ineyi yadzakhala mizinda idasankhulirwa Aizraeli onsene pabodzi na anthu a madziko anango anakhala pabodzi na iwo, toera ule anapha munthu mwasusudeu athawire mʼmizinda ineyi+ kuti akhonde phiwa na mʼbale wace munthu adaphiwa, nseru wace mbudzati kutongwa pamaso pa mbumba.+