Kronika Wakutoma

29 Mambo Dhavidhi apanga mbumba yonsene: “Mwananga Salomoni adasankhulwa na Mulungu+ ndi m’phale, pontho ndi wakusowa maluso,*+ mbwenye basa inafuna kucitwa ndi ikulu, thangwi templo inafuna kumangwa nee ndi ya munthu, mbwenye ndi ya Yahova Mulungu.+ 2 Natenepa ine ndawangisira kakamwe toera kukhunganya pinthu pyakumanga napyo nyumba ya Mulungu wanga. Ndagumanya ouro toera kucita pinthu pya ouro, parata toera kucita pinthu pya parata, nkuwa toera kucita pinthu pya nkuwa, utale toera kucita pinthu pya utale,+ matabwa+ toera kucita pinthu pya matabwa, kuphatanizambo miyala ya oniksi, miyala ya ntengo ukulu, miyala yakubalikisa nayo, na mitundu yonsene ya miyala ya ntengo ukulu, pabodzi na miyala mizinji ya alabhastro. 3 Mbwenye nakuti ine ndisafuna nyumba ya Mulungu wanga,+ kusiyapo pinthu pidagumanya ine toera kumanga nyumba ineyi yakucena,+ ndiri kuperekambo ouro yanga na parata yanga toera kumanga nyumba ya Mulungu wanga, 4 kuphatanizambo matalento* 3.000 a ouro ya ku Ofire+ na matalento 7.000 a parata yadidi kakamwe toera kukhwaza nayo mapfufu a makwartu akusiyana-siyana, 5 toera kucita pinthu pya ouro, toera kucita pinthu pya parata, pontho toera kusasanya pinthu pyonsene pinacitwa na amesiri aluso. Mphapo mbani anafuna kuperekeka lero toera abwerese muoni kuna Yahova?”+

6 Atsogoleri a mbumba, atsogoleri a madzindza a Izraeli, atsogoleri a anthu 1.000, atsogoleri a anthu 100+ na akulu akuti akhaonera pinthu pya mambo+ aperekeka mwakufuna kwawo. 7 Toera kumanga nyumba ya Mulungu wandimomwene, iwo apereka matalento 5.000 a ouro, madhariko* 10.000, matalento 10.000 a parata, matalento 18.000 a nkuwa na matalento 100.000 a utale. 8 Anthu onsene akhali na miyala ya ntengo ukulu aipereka toera ikhale mpfuma ya panyumba ya Yahova, yakuti ikhaonerwa na Jeiyeli+ wa dzindza ya Jersoni.+ 9 Mbumba yakomerwa thangwi yakupereka miyoni ineyi mwakufuna kwawo, thangwi iwo akhapereka miyoni kuna Yahova na ntima onsene.+ Mambo Dhavidhi akomerwambo kakamwe.

10 Buluka penepo, Dhavidhi asimba Yahova pamaso pa mbumba yonsene.* Iye alonga: “Imwe Yahova Mulungu wa babathu Izraeli, musafunika kusimbwa ndzidzi onsene, kwenda na kwenda. 11 Imwe Yahova, ukulu,+ mphambvu,+ mbiri, kubalika na cilemedzo ndi pyanu;+ thangwi pinthu pyonsene piri kudzulu na pa dziko yapantsi ndi pyanu.+ Umambo ndi wanu imwe Yahova.+ Imwe musakwizika mwekhene mbamukhala nsolo padzulu pa onsene. 12 Mpfuma na mbiri pisabuluka kuna imwe,+ pontho imwe musatonga pinthu pyonsene.+ M’manja mwanu muli na mphambvu,+ pontho djanja yanu+ inakwanisa kukuza munthu+ na kupasa mphambvu anthu onsene.+ 13 Cincino Mulungu wathu, tisapereka takhuta kuna imwe, mbatisimba dzina yanu yadidi.

14 “Mphapo ndine ani ine, pontho mbani mbumba yanga toera ife tipereke miyoni iyi? Thangwi pyonsene pisabuluka kuna imwe, basi ene ife tiri kukupasani pinthu pidabuluka m’manja mwanu. 15 Pamaso panu, ife ndife alendo na anthu a dziko inango ninga pidacita ambuyathu onsene.+ Umaso wathu pa dziko yapantsi ndi ninga n’thundzi,+ nkhabe cidikhiro. 16 Yahova Mulungu wathu, mpfuma iyi yonsene idagumanya ife toera kumanga nyumba yakusimba dzina yanu yakucena, yabuluka m’manja mwanu, pontho pyonsene ndi pyanu. 17 Mulungu wanga, ine ndisadziwa mwadidi kuti imwe musadinga ntima wa munthu,+ pontho musakomerwa na kukhulupirika kwa munthu.*+ Na ntima wakucena, ine ndapereka pinthu pyenepi mwakufuna kwanga, pontho ndisatsandzaya kakamwe kuona mbumba yanu pano mbikapereka miyoni kuna imwe. 18 Yahova Mulungu wa ambuyathu Abhrahamu, Izaki na Izraeli, phedzani mbumba yanu toera ndzidzi onsene mitima yawo ipitirize kukhala na cifuno ceneci na manyerezero anewa, ikutumikireni na ntima onsene.*+ 19 Pontho pasani mwananga Salomoni ntima wakukhulupirika*+ toera iye abvere mitemo yanu,+ pitsogolero* pyanu na matongero anu. M’phedzeni toera acite pinthu pyenepi pyonsene, pontho aphatisire pinthu pidagumanya ine toera amange templo.”+

20 Buluka penepo, Dhavidhi apanga mbumba yonsene: “Cincino simbani Yahova Mulungu wanu.” Mbumba yonsene yasimba Yahova Mulungu wa Aizraeli, iwo agodama pamaso pa Yahova na pamaso pa mambo mbakotamisa misolo yawo mpaka pantsi. 21 Mangwana mwace, iwo apereka ntsembe kuna Yahova, mbapereka kuna Yahova ntsembe izi zakupiswa:+ Ng’ombe 1.000, mabira 1.000 na anamabira 1.000, pabodzi na ntsembe zace za pyakumwa.+ Iwo apereka ntsembe zizinji toera kuphedza Aizraeli onsene.+ 22 Pa ntsiku ineyi, iwo apitiriza kudya na kumwa mwakutsandzaya kakamwe pamaso pa Yahova.+ Iwo adziwisa kaciwiri kukhazikiswa kwa Salomoni mwana wa Dhavidhi ninga mambo. Iwo andzodza na mafuta pamaso pa Yahova toera akhale ntongi,+ pontho adzodzambo Zadhoke toera akhale nyantsembe.+ 23 Salomoni akhala pa mpando waumambo wa Yahova+ ninga mambo, pa mbuto ya Dhavidhi wakuti ndi babace. Pinthu pikhafamba mwadidi kuna iye,* pontho Aizraeli onsene akhambvera. 24 Atsogoleri onsene,+ anyankhondo onsene amphambvu+ na ana onsene a Mambo Dhavidhi+ akhabvera mambo Salomoni. 25 Yahova akuza kakamwe Salomoni pamaso pa Aizraeli onsene, mbacitisa kuti apaswe cilemedzo cikulu kakamwe cakuti nee mambo m’bodzi akhala naco Salomoni mbadzati toma kutonga.+

26 Dhavidhi mwana wa Yese atonga Aizraeli onsene, 27 iye atonga Aizraeli mu pyaka 40. Ku Ebhroni iye atonga pyaka pinomwe,+ ku Yerusalemu iye atonga pyaka 33.+ 28 Iye afa mwakutsandzaya mu unkhalamba wace+ pakumala kukhala na umaso mu pyaka pizinji, pontho akhala na mpfuma na mbiri. Mwanace Salomoni apita pa mbuto yace mbakhala mambo.+ 29 Mphangwa zinalonga pya umaso wa mambo Dhavidhi, pakutoma mpaka kunkhomo, zalembwa m’mabukhu a mprofeta Samweli, a mprofeta Natani+ na a Gadhi+ nyakuona masomphenya. 30 Mabukhu anewa asalonga pya utongi wace onsene, mphambvu zace na pinthu pidancitikira mu umaso wace, pidacitikira Aizraeli na maumambo onsene akhali n’khundu mwawo.