Samweli Wakutoma

7 Natenepa, amuna a ku Kiriyati-Jearimu abwera, akwata Bokosi ya Yahova mbapita nayo nʼnyumba mwa Abhinadhabhi+ yakuti ikhali paphiri. Iwo akhazikisa* mwanace anacemerwa Eleazare toera aonere Bokosi ya Yahova.

2 Bulukira pa ntsiku idafika Bokosi ku Kiriyati-Jearimu, papita pyaka 20. Buluka penepo, Aizraeli onsene atoma kusaka* Yahova.+ 3 Natenepa, Samweli apanga Aizraeli onsene: “Khala mukubwerera kuna Yahova na ntima wanu onsene,+ bulusani pakati panu alungu apezi+ na madzimunthu a Astoreti.+ Bwererani kuna Yahova na ntima wanu onsene, mbamutumikira iye basi,+ natenepa iye anadzakupulumusani mʼmanja mwa Afilisti.”+ 4 Na thangwi ineyi, Aizraeli abulusa Abhaale na madzimunthu a Astoreti pakati pawo, mbatumikira basi ene Yahova.+

5 Buluka penepo, Samweli alonga: “Cemeresani Aizraeli onsene ku Mispa,+ toera ine ndicite phembero kuna Yahova thangwi ya imwe.”+ 6 Natenepa, iwo agumanyikana ku Mispa, atunga madzi mbaatsanula pamaso pa Yahova, pontho iwo acita jejuu pa ntsiku ineyi.+ Kweneko iwo alonga: “Ife tadawira Yahova.”+ Pontho Samweli atoma kutonga+ Aizraeli ku Mispa.

7 Afilisti pidabva iwo kuti Aizraeli agumanyikana ku Mispa, atsogoleri a Afilisti+ aenda toera kamenyana na Aizraeli. Aizraeli pidabva iwo pyenepi, agopa kakamwe. 8 Natenepa, Aizraeli apanga Samweli: “Pitirizani kuphemba Yahova Mulungu wathu toera atiphedze,+ pontho toera atipulumuse mʼmanja mwa Afilisti.” 9 Buluka penepo, Samweli akwata mwanabira wakuyamwa mbampereka ninga ntsembe yakupiswa+ kuna Yahova; pontho Samweli aphemba Yahova toera aphedze Aizraeli, natenepa Yahova antawira.+ 10 Samweli pikhapereka iye ntsembe yakupiswa, Afilisti abwera toera kumenyana na Izraeli. Pa ntsiku ineyi, Yahova acitisa kudzulu kudhima mwamphambvu,+ pontho Iye acitisa Afilisti kudzudzumika,+ mbakundwa na Aizraeli.+ 11 Natenepa, amuna a Izraeli abuluka ku Mispa mbatowerera Afilisti, iwo apitiriza kuapha mpaka kunterero kwa Bheti-Kare. 12 Buluka penepo, Samweli akwata mwala+ mbauikha pakati pa Mispa na Yesana mbauthula Ebhenezeri,* iye alonga: “Yahova asatiphedza mpaka cincino.”+ 13 Natenepa, Afilisti akundwa, mbakhonda kubwera pontho mu dziko ya Izraeli;+ pontho Yahova atsidzikiza Aizraeli kuna Afilisti mu ntsiku zonsene za umaso wa Samweli.+ 14 Aizraeli abwezerwa mizinda ikhadakwatirwa iwo na Afilisti, kutomera ku Ekroni mpaka ku Gati. ­Aizraeli akwata dziko yawo mʼmanja mwa Afilisti.

Pontho Aizraeli na Aamori+ akhala muntendere.

15 Samweli apitiriza kutonga Aizraeli mu umaso wace onsene.+ 16 Pyaka pyonsene iye akhaenda ku Bheteli,+ ku Jiligale+ na ku Mispa,+ pontho iye akhatonga Aizraeli mʼmbuto zenezi. 17 Mbwenye iye akhabwerera ku Rama,+ thangwi nyumba yace ikhali kweneko, pontho akhatonga Aizraeli kweneko. Iye amangira guwa Yahova kweneko.+