Yoswa

10 Pidabva Adhoni-Zedheki Mambo wa ku Yerusalemu kuti Yoswa akunda nzinda wa Ai, mbaufudza, acita kuna Ai na mambo wace+ ninga pidacita iye kuna Yeriko na mambo wace,+ pontho kuti anthu a ku Jibheyoni akhazikisa ntendere na Izraeli,+ mbakhala pabodzi na iwo, 2 iye agopa kakamwe,+ thangwi Jibheyoni ukhali nzinda ukulu ninga ubodzi mwa mizinda inatongwa na mambo. Iwo ukhali ukulu kakamwe kupiringana nzinda wa Ai,+ pontho amuna onsene a mu nzinda unoyu akhali anyankhondo. 3 Natenepa, Adhoni-Zedheki mambo wa ku Yerusalemu atumiza mphangwa kuna Oamu mambo wa ku Ebhroni,+ Piramu mambo wa ku Yarimuti, Yafiya mambo wa ku Lakisi na kuna Dhebhiri mambo wa ku Egloni+ kuti: 4 “Bwerani kuno mudzandiphedze kumenyana na Jibheyoni thangwi iye akhazikisa ntendere na Yoswa pabodzi na Aizraeli.”+ 5 Na thangwi ineyi, amambo axanu a Aamori+ agumanyikana mbaenda. Amambo anewa akhali: Mambo wa ku Yerusalemu, mambo wa ku Ebhroni, mambo wa ku Yarimuti, mambo wa ku Lakisi na mambo wa ku Egloni. Amambo anewa pabodzi na anyankhondo awo aenda kamanga misasa yawo dhuzi na nzinda wa Jibheyoni toera kumenyana na nzinda unoyu.

6 Amuna a ku Jibheyoni atumiza mphangwa ku misasa ya ku Jiligale+ toera kapanga Yoswa kuti: “Lekani kuduwala atumiki anu.+ Bwerani mwakucimbiza! Tipulumuseni, pontho tiphedzeni! Amambo onsene a Aamori a kucisa ca mapiri agumanyikana toera kumenyana na ife.” 7 Natenepa, Yoswa na anyankhondo onsene pabodzi na anyankhondo aluso kakamwe+ abuluka ku Jiligale, mbaenda.

8 Penepo Yahova apanga Yoswa: “Leka kuagopa,+ thangwi ine ndaapereka mʼmanja mwako.+ Nee mʼbodzi wa iwo anakwanisa kukukunda.”+ 9 Yoswa pabodzi na anyankhondo ace afamba masiku onsene buluka ku Jiligale, mbafika mwakututumusa kuna anyamalwa awo. 10 Natenepa Yahova aabalalisa manyerezero pamaso pa Aizraeli,+ penepo Aizraeli atoma kupha kakamwe anyamalwa awo ku Jibheyoni, iwo aatowerera kunkwiriro wa Bheti-Oroni mbapitiriza kuapha mpaka ku Azeka na ku Makedha. 11 Pikhathawa iwo Aizraeli mbafika ku Bheti-Oroni, Yahova aagwisira miyala mikulu ya matalala buluka kudzulu yakuti yaapha mpaka ku Azeka. Mwandimomwene, ale adaphiwa na matalala akhali azinji kakamwe kupiringana adaphiwa na Aizraeli na supada.

12 Pa ntsiku idakunda Yahova Aamori pamaso pa Aizraeli, Yoswa apanga Yahova pamaso pa Aizraeli:

“Dzuwa, limira padzulu pa Jibheyoni,

Pontho mwezi, limira+ ­padzulu pa Gowa ya Aijaloni!”+

13 Natenepa, dzuwa yalimira, pontho mwezi nee wafamba mpaka pidamala Aizraeli kukunda anyamalwa awo. Kodi pyenepi nee pyalembwa mʼbukhu ya Yasari?+ Dzuwa yapitiriza kulimira pakati pa thambo, pontho nee yacimbiza kudoka mpaka cifupi na ntsiku yamumphu. 14 Cipo yaoneka pontho ntsiku ninga ineyi, nee kale nee pidapita ntsiku ineyi, yakuti Yahova abvesera munthu munjira ineyi,*+ thangwi Yahova akhamenya nkhondo toera kuphedza Aizraeli.+

15 Buluka penepo, Yoswa pabodzi na Aizraeli onsene abwerera ku misasa ya ku Jiligale.+

16 Mbwenye amambo axanu athawa mbabisala mʼmphako ya ku Makedha.+ 17 Natenepa, Yoswa apangwa kuti: “Amambo axanu agumanwa abisala mʼmphako ya ku Makedha.”+ 18 Penepo Yoswa alonga: “Bulumundisani miyala mikulu toera mufunge nsuwo wa mphako, pontho sankhulani amuna toera aaonere. 19 Mbwenye anango a imwe nee asafunika kulimira. Pitirizani kutowera anyamalwa anu, pontho apheni mu ndzidzi unathawa iwo.+ Lekani kuasiya apite mʼmizinda yawo, thangwi Yahova Mulungu wanu aapereka mʼmanja mwanu.”

20 Yoswa na Aizraeli apha anyamalwa awo azinji kakamwe, mbwenye adapulumuka ndi ale adathawa mbapita mʼmizinda yakuti ikhali na mipanda yakuwanga kakamwe. 21 Buluka penepo, anyankhondo onsene abwerera kuna Yoswa ku misasa ya ku Makedha mwakukhonda kuphekeswa. Nee munthu mʼbodzi akhalonga mwakuipa Aizraeli. 22 Adzamale Yoswa alonga: “Fungulani mphako, pontho bulusani amambo axanu ali mwenemo, mbamuabweresa kuna ine.” 23 Penepo, iwo abulusa mʼmphako amambo anewa axanu: Mambo wa ku Yerusalemu, mambo wa ku Ebhroni, mambo wa ku Yarimuti, mambo wa ku Lakisi na mambo wa ku Egloni.+ 24 Pidafika iwo na amambo anewa kuna Yoswa, iye acemeresa amuna onsene a Izraeli pabodzi na akulu a anyankhondo akhadaenda na iye, mbaapanga: “Fendedzani dhuzi. Pondani kuntsi kwa makhosi a amambo awa axanu.” Natenepa iwo afendedza dhuzi, mbaponda kuntsi kwa makhosi awo.+ 25 Penepo Yoswa aapanga: “Lekani kugopa peno kutetemera.+ Khalani acipapo na amphambvu, thangwi ipi ndi pinafuna kucita Yahova kuna anyamalwa onsene anafuna kumenyana na imwe.”+

26 Buluka penepo, Yoswa aapha mbaamanika pa miti mixanu; iwo apitiriza pa miti ineyi mpaka maulo. 27 Pidadoka dzuwa, Yoswa alonga toera abuluswe pa miti,+ mbaaponya mʼmphako ikhadabisala iwo. Buluka penepo, pansuwo wa mphako paikhwa miyala mikulu yakuti isapitiriza penepo mpaka lero.

28 Pa ntsiku ineyi, Yoswa afudza nzinda wa Makedha,+ mbapha anthu a mu nzinda unoyu na supada. Iye apha mambo wa nzinda unoyu pabodzi na anthu onsene akakhala mwenemo, nee mʼbodzi adapulumuka.+ Iye acita kuna mambo wa ku Makedha+ ninga pidacita iye kuna mambo wa ku Yeriko.

29 Buluka penepo, Yoswa pabodzi na Aizraeli onsene abuluka ku Makedha mbaenda mpaka ku Libhina, kweneko iwo amenyana na Libhina.+ 30 Yahova aperekambo nzinda unoyu pabodzi na mambo wace+ mʼmanja mwa Aizraeli, iwo aufudza na supada, mbapha anthu onsene akhali mwenemo, pontho nee mʼbodzi adapulumuka. Natenepa, iwo acita kuna mambo wa nzinda unoyu ninga pidacita iwo kuna mambo wa ku Yeriko.+

31 Buluka penepo, Yoswa pabodzi na Aizraeli onsene abuluka ku Libhina mbaenda ku Lakisi,+ iwo amanga misasa yawo kweneko mbamenyana na nzinda unoyu. 32 Yahova apereka Lakisi mʼmanja mwa Aizraeli, iwo akunda nzinda unoyu pa ntsiku yaciwiri. Iwo afudza nzinda unoyu, mbapha na supada+ onsene akhali mwenemo ninga pidacita iwo na nzinda wa Libhina.

33 Natenepa, Oramu mambo wa ku Jezeri,+ abwera toera kuphedza Lakisi, mbwenye Yoswa apha iye pabodzi na mbumba yace yonsene, pontho nee mʼbodzi adapulumuka.

34 Buluka penepo, Yoswa pabodzi na Aizraeli onsene abuluka ku Lakisi mbaenda ku Egloni,+ iwo amanga misasa yawo kweneko mbamenyana na nzinda unoyu. 35 Iwo aukunda, mbapha na supada anthu akakhala mwenemo. Pa ntsiku ineyi, iwo apha anthu onsene akakhala mwenemo ninga pidacita iwo na nzinda wa Lakisi.+

36 Buluka penepo, Yoswa pabodzi na Aizraeli onsene abuluka ku Egloni, mbaenda ku Ebhroni,+ iwo amenyana na nzinda unoyu. 37 Iwo akunda nzinda unoyu na midzi yace, mbapha na supada anthu akakhala mwenemo pabodzi na mambo wawo, nee mʼbodzi adapulumuka. Yoswa afudza nzinda unoyu pabodzi na onsene akhali mwenemo ninga pidacita iye na nzinda wa Egloni.

38 Pakumalisa, Yoswa pabodzi na Aizraeli onsene aenda ku Dhebhiri,+ mbamenyana na nzinda unoyu. 39 Iye akunda nzinda unoyu, mambo wace na midzi yace yonsene, pontho iwo apha na supada anthu onsene akhali mwenemo,+ nee mʼbodzi adapulumuka.+ Yoswa afudza nzinda wa Dhebhiri na mambo wace ninga pidacita iye na nzinda wa Ebhroni, pontho ninga pidacita iye na nzinda wa Libhina na mambo wace.

40 Yoswa apha anthu a cisa consene ca ku mapiri, anthu a ku Nejebhu, anthu a ku Sefela,+ anthu a kunterero pabodzi na amambo awo onsene, nee mʼbodzi adapulumuka; iye apha pinthu pyonsene pikhali na umaso,+ mwakubverana na pidapangwa iye na Yahova Mulungu wa Aizraeli.+ 41 Yoswa aakunda kutomera ku Kadhesi-Bharneya+ mpaka ku Gaza,+ pontho akunda dziko yonsene ya Gozeni+ mpaka ku Jibheyoni.+ 42 Yoswa aphata amambo anewa onsene, mbakunda madziko awo pa ndzidzi ubodzi ene, thangwi Yahova Mulungu wa Izraeli akhamenyera nkhondo Aizraeli.+ 43 Buluka penepo, Yoswa pabodzi na Aizraeli onsene abwerera ku misasa ya ku Jiligale.+