Samweli Wakutoma

17 Afilisti+ agumanya anyankhondo awo* toera kumenya nkhondo. Iwo agumanyikana ku Soko+ wa ku Yuda, mbamanga misasa yawo pakati pa Soko na Azeka+ ku Efesi-Dhamimu.+ 2 Sauli na amuna a Izraeli agumanyikana, mbamanga misasa yawo ku Gowa ya Elaa,+ pontho iwo apakana mwadidi toera kumenyana na Afilisti. 3 Afilisti akhali paphiri ibodzi, pontho Aizraeli akhali paphiri inango, pakati pawo pakhali na gowa.

4 Natenepa, nyankhondo mʼbodzi abuluka ku misasa ya Afilisti; dzina yace ikhali Goliyati,+ wa ku Gati,+ cimo cace cikhali cifupi na makhono matatu.* 5 Iye akhabvala capeu ca nkuwa, pontho akhabvala cakutsidzikiza naco diti cakuti cikhali na makoko* a nkuwa. Cakutsidzikiza naco diti ceneci cikhalemera masiklo 5.000.*+ 6 Iye akhadabvala pyakutsidzikiza napyo miyendo pya nkuwa, pontho akhali na momba+ wa nkuwa kunsana kwace. 7 Dipa yace ikhali ikulu kakamwe,+ khundu ya utale ya dipa yace ikhalemera masiklo 600;* pontho nyakunʼthukulira xango akhaenda kutsogolo kwace. 8 Buluka penepo, Goliyati alimira mbakhuwira anyankhondo a Izraeli:+ “Thangwi yanji mwapakana toera kumenya nkhondo? Kodi nee ndine Nfilisti, pontho imwe nee ndimwe anyabasa a Sauli? Sankhulani munthu toera abwere kudzamenyana na ine. 9 Iye angakwanisa kumenyana na ine, mbandipha, ife tinadzakhala mabitcu anu. Mbwenye ndingankunda, mbandimupha, imwe munadzakhala mabitcu athu.” 10 Nfilisti unoyu alonga pontho kuti: “Lero ine ndiri kutikana* anyankhondo a Izraeli.+ Ndipaseni munthu toera ndimenyane naye!”

11 Sauli na Aizraeli onsene pidabva iwo mafala a Nfilisti unoyu, agopa kakamwe.

12 Dhavidhi akhali mwana wa Yese, wakuti akakhala ku Efrata,+ wa ku Bhetelehemu+ wa Yuda. Yese+ akhali na ana asere amuna,+ pontho mu ndzidzi ukhatonga Sauli, iye akhadakalamba. 13 Ana akulu atatu a Yese, akhadatowera Sauli kunkhondo.+ Mwa anace anewa atatu adaenda kunkhondo, wakutoma kubalwa akhacemerwa Eliabhe,+ waciwiri akhacemerwa Abhinadhabhi,+ pontho wacitatu akhacemerwa Sama.+ 14 Dhavidhi akhali wangʼono kakamwe;+ abale ace atatu akuti akhali akulu akhadatowera Sauli.

15 Dhavidhi akhaenda kuna Sauli mbabwerera ku Bhetelehemu toera kukumbiza mabira+ a babace. 16 Mu ntsiku 40 Nfilisti akhaenda kaasosa camacibese na cakumaulo.

17 Buluka penepo, Yese apanga mwanace anacemerwa Dhavidhi: “Ndaphata miyendo, kwata efa* iyi ya tirigu yakukazinga na mikate khumi, mbuenda mwakucimbiza kapasa abale ako ku misasa. 18 Kwata mapindi awa khumi a kejo* toera ukapase ntsogoleri wa anyankhondo;* usafunikambo kuona kuti abale ako ali tani, ungamala bweresa cidzindikiro cinapangiza kuti iwo ali mwadidi.” 19 Iwo akhali na Sauli pabodzi na amuna anango onsene a Izraeli ku Gowa ya Elaa+ toera kumenyana na Afilisti.+

20 Natenepa, Dhavidhi alamuka namacibese kakamwe, mbasiya mabira ace na munthu unango. Buluka penepo, iye apaka mitolo mbaenda ninga mudapangwa iye na babace, Yese. Iye afika ku misasa pa ndzidzi wakuti anyankhondo akhaenda kamenya nkhondo mbakakhuwa. 21 Aizraeli na Afilisti akhadapakana mwakuyangʼanisana toera kumenya nkhondo. 22 Mwakukhonda dembuka, Dhavidhi asiya ntolo wace na nyakuonera mitolo, mbathamanga kuenda ku mbuto idapakana anthu toera kumenya nkhondo. Pidafika iye, asaka kudziwa kuti abale ace ali tani.+

23 Mu ndzidzi ukhalonga iye, afika Goliyati+ nyankhondo ule wa Afilisti, wa ku Gati. Iye abuluka pakati pa anyankhondo a Afilisti, mbalonga mafala mabodzi ene ninga akhadalonga iye pakutoma,+ penepo Dhavidhi abva pikhalonga iye. 24 Amuna onsene a Izraeli pidamuona iwo, anʼgopa kakamwe, mbathawa.+ 25 Amuna a Izraeli akhalonga: “Mukuona mamuna ule anabwera? Iye akubwera kudzatikana* Izraeli.+ Munthu anafuna kwanisa kupha mamuna unoyu, mambo anadzampasa mpfuma zizinji, anadzampasambo mwanace wankazi,+ pontho anthu a panyumba pa babace nee anadzalipabve nsonkho.”

26 Dhavidhi abvundza amuna akhadalimira dhuzi na iye: “Anapaswanji munthu anafuna kupha Nfilisti unoyu, mbamalisa kutikanwa kwa Izraeli? Kodi Nfilisti unoyu wakukhonda kusidzwa ndi ani toera kupwaza* anyankhondo a Mulungu wa mʼmaso?”+ 27 Natenepa anthu ampanga pontho pinthu pikhadapangwa iye pakutoma kuti: “Munthu anafuna kumupha anadzacitirwa ipi na ipi.” 28 Mʼbale wace wankulu anacemerwa Eliabhe+ pidabva iye Dhavidhi mbakalonga na amuna, aipirwa mbampanga: “Wadzeranji kuno? Mabira akucepa waasiya na ani nʼthando?+ Ine ndisadziwa mwadidi kudzikuza kwako na pifuno pyakuipa piri muntima mwako; basi ene wabwera kudzaona nkhondo.” 29 Dhavidhi atawira: “Ndacitanji ine? Basi ene ndabvundza!” 30 Natenepa iye aenda kuna munthu unango, mbambvundza pibodzi pyene,+ mbwenye anthu akhampanga mafala mabodzi ene.+

31 Anthu anango abva mafala akhalonga Dhavidhi, mbaenda kapanga Sauli. Natenepa Sauli ancemeresa. 32 Dhavidhi apanga Sauli: “Nee mʼbodzi asafunika kuluza cipapo* thangwi ya Nfilisti unoyu.+ Ine ntumiki wanu ndinaenda kamenyana naye.” 33 Mbwenye Sauli apanga Dhavidhi: “Iwe nee unakwanisa kumenyana na Nfilisti unoyu, thangwi ndiwe mwana,+ pontho iye ndi nyankhondo kutomera uwana wace.” 34 Buluka penepo Dhavidhi apanga Sauli: “Ine ntumiki wanu ndikhakumbiza mabira a babanga, yabwera nkhalamu+ mbikwata bira ibodzi pa nkumbi. Ntsiku inango, yabwera ursu* mbicitambo pibodzi pyene. 35 Ndaithamangisa, ndaimenya mbandipulumusa bira ikhali pamulomo pace. Pidandipomokera iyo, ine ndaphata ntsaya* zayo, ndaimenya mbandiipha. 36 Ine ntumiki wanu ndapha nkhalamu na ursu,* Nfilisti unoyu wakukhonda kusidzwa anadzakhala ninga cibodzi mwa pinyama pyenepi, thangwi iye atikana* anyankhondo a Mulungu wa mʼmaso.”+ 37 Dhavidhi athimiza: “Yahova, ule adandipulumusa nʼngole mwa nkhalamu na mwa ursu,* ndiye anafuna kundipulumusa mʼmanja mwa Nfilisti unoyu.”+ Penepo Sauli apanga Dhavidhi: “Ndoko, Yahova mbakhale na iwe.”

38 Sauli abvazika Dhavidhi nguwo zace za nkhondo. Iye ambvazika capeu ca nkuwa, buluka penepo ambvazikambo cakutsidzikiza naco diti. 39 Penepo Dhavidhi aikha supada yace, mbayesera kufamba, mbwenye nee akhakwanisa, thangwi nee akhadadzolowera kucita pyenepi. Dhavidhi apanga Sauli: “Nee ndinakwanisa kufamba napyo, thangwi nee ndapidzolowera.” Natenepa Dhavidhi apidula. 40 Buluka penepo, iye akwata ndodo yace, alokota miyala mixanu yakubulungika mu nkulo,* mbaiikha mʼbudu mwace, pontho mʼmanja mwace mukhali na funda.*+ Penepo iye atoma kufendedzera Nfilisti.

41 Nfilisti akhafendedzera dhuzi kakamwe Dhavidhi, pontho patsogolo pace pakhali nyakunʼthukulira xango. 42 Nfilisti unoyu pidaona iye Dhavidhi, ampwaza, thangwi akhali mʼphale wa ungumi wadidi na wakubalika.+ 43 Natenepa Nfilisti apanga Dhavidhi: “Kodi ndine mwanambwa+ toera ubwere kuna ine na ndodo?” Penepo Nfilisti apasa dzedze Dhavidhi mu dzina ya alungu ace. 44 Nfilisti apanga Dhavidhi: “Bwera kuno, ine ndinadzapereka manungo ako kuna mbalame zakudzulu na kuna pinyama pya ntsanga.”

45 Dhavidhi antawira: “Iwe ukubwera kuna ine na supada, dipa na momba,+ mbwenye ine ndikubwera kuna iwe mu dzina ya Yahova wa anyankhondo,+ Mulungu wa anyankhondo a Izraeli, ule adatikana* iwe.+ 46 Lero, Yahova anakupereka mʼmanja mwanga,+ ine ndinakupha, mbandikugwanda nsolo; pontho lero ndinakwata manungo a anyankhondo a Afilisti mbandiapereka kuna mbalame zakudzulu na kuna pikala pya pa dziko yapantsi; pontho anthu onsene pa dziko yapantsi anadzadziwa kuti mu Izraeli muli na Mulungu.+ 47 Natenepa, onsene adagumanyikana pano anadzadziwa* kuti Yahova nkhabe kupulumusa+ na supada peno na dipa, thangwi nkhondo ndi ya Yahova,+ pontho iye anadzapereka imwe monsene mʼmanja mwathu.”+

48 Buluka penepo, Nfilisti atoma kufendedzera dhuzi Dhavidhi, mbwenye Dhavidhi athamanga mwakucimbiza mbaenda pa mbuto yakumenyera nkhondo toera agumanikane na Nfilisti. 49 Dhavidhi apitisa manja mʼbudu yace, abulusa mwala, mbauponya na funda. Mwala wamenya Nfilisti unoyu pa nkhope mbupitiratu, iye agwa pantsi na pfufu ya mimba.+ 50 Natenepa Dhavidhi aphatisira funda na mwala toera kukunda Nfilisti; iye amenya Nfilisti, mbamupha, maseze Dhavidhi nee akhali na supada mʼmanja mwace.+ 51 Dhavidhi athamanga mbalimira dhuzi na iye. Buluka penepo, Dhavidhi asolola supada ya Nfilisti+ unoyu pa mbuto yakuikhira supada, mbanʼgwanda nsolo toera kumʼpheratu. Afilisti pidaona iwo kuti nyankhondo wawo wamphambvu afa, iwo athawa.+

52 Natenepa, amuna a Izraeli na a Yuda atoma kukhuwa, iwo athamangisa Afilisti kutomera ku gowa+ mpaka ku misuwo mikulu ya ku Ekroni,+ pontho manungo a Afilisti akhali nadza-nadza mu nseu kutomera ku Saraimu+ mpaka ku Gati na ku Ekroni. 53 Pidabwerera iwo buluka kathamangisa Afilisti, Aizraeli atoma kukwata pinthu mʼmisasa ya Afilisti.

54 Buluka penepo, Dhavidhi akwata nsolo wa Nfilisti mbaenda nawo ku Yerusalemu, mbwenye pida pya nkhondo pya Nfilisti unoyu, iye apiikha mu nsasa mwace.+

55 Sauli pidaona iye Dhavidhi ali kubuluka toera kuenda kuna Nfilisti, abvundza Abhineri,+ nkulu wa anyankhondo kuti: “Abhineri, mʼphale+ unoyu babace mbani?” Abhineri atawira: “Mambo, mwandimomwene ine nkhabe kundziwa!” 56 Mambo alonga: “Saka kudziwa kuti mʼphale unoyu ndi mwana wa ani.” 57 Natenepa, Dhavidhi pidafika iye kwene buluka kapha Nfilisti, Abhineri aenda naye kuna Sauli, pontho Dhavidhi akhali na nsolo wa Nfilisti+ mʼmanja mwace. 58 Sauli ambvundza: “Ndiwe mwana wa ani?” Penepo Dhavidhi atawira: “Ndine mwana wa ntumiki wanu Yese+ wa ku Bhetelehemu.”+