Dhanyeli

5 Mambo Bhelsazari+ acitira phwando ikulu akadamu ace akukwana 1.000, pontho iye akhamwa vinyu pamaso pawo.+ 2 Pidaledzera iye na vinyu, Bhelsazari apereka ntemo toera abwereswe makhomitco a ouro na a parata akuti babace Nabhukodhonozore akhadaakwata mu templo ku Yerusalemu+ toera mambo, akadamu ace, akazace apakhundu na akazace anango amwere vinyu mwenemu. 3 Natenepa iwo abweresa makhomitco a ouro akuti akhadakwatwa mu templo ya nyumba ya Mulungu ku Yerusalemu, pontho mambo, akadamu ace, akazace apakhundu na akazace anango amwera mʼmakhomitco anewa. 4 Iwo amwa vinyu mbatoma kusimba alungu akucitwa na ouro, parata, nkuwa, utale, matabwa na miyala.

5 Pa dzidzi unoyu paoneka pyala pya manja a munthu mbapitoma kulemba pa pfufu ya nyumba ya mambo dhuzi na cakuikhira nyale, pontho mambo akhakwanisa kuona djanja mu ndzidzi ukhalemba iyo. 6 Natenepa nkhope ya mambo yacinja mbatoma kugopa kakamwe, miyendo yace yafewa,+ pontho mabondo ace akhatetemera.

7 Mambo akhuwa toera kucemeresa anyakucita masalapita, Akaldheya* na anyakudziwisa pya nyenyezi.+ Mambo alonga kuna amuna audziwisi a ku Bhabhilonya: “Munthu anafuna kukwanisa kuleri mafala awa mbandipanga mabvekero ace, anadzabvazikwa nguwo zakufuirira, anadzabvazikwa nkufu wa ouro nʼkhosi mwace,+ pontho anadzakhala ntongi wacitatu mu umambo wanga.”+

8 Natenepa amuna onsene audziwisi abwera kuna mambo, mbwenye nee mʼbodzi akwanisa kuleri peno kupanga mambo mabvekero a mafala anewa.+ 9 Mambo Bhelsazari agopa kakamwe, pontho nkhope yace yacinja; akadamu ace nee akhadziwa cakucita.+

10 Thangwi ya mafala adalonga mambo na akadamu ace, nyanyi apita mʼmbuto ikhacitirwa phwando. Nyanyi alonga: “Mambo, khalani na umaso kwenda na kwenda. Lekani kugopa, pontho lekani kucinja nkhope yanu. 11 Mu umambo wanu muli na mamuna wakuti ali na mphambvu za alungu akucena. Mu ntsiku za babanu, anthu adzindikira kuti iye ali na udziwisi, luso yakudzindikira pinthu, pontho ndzeru ninga za alungu.+ Babanu mambo Nabhukodhonozore akhadanʼkhazikisa ninga nkulu wa anyantsembe akulotera, anyakucita masalapita, Akaldheya* na anyakudziwisa pya nyenyezi;+ mambo, babanu acita pyenepi. 12 Thangwi Dhanyeli, ule adapaswa dzina yakuti Bheltisezari+ na mambo, akhali na luso yakudzumisa, udziwisi na luso yakudzindikira toera kufokotoza mabvekero a ndoto, toera kufokotoza misangani, pontho toera kutonga miseru yakunentsa.*+ Cincino cemeresani Dhanyeli, pontho iye anakupangani mabvekero a mafala anewa.”

13 Natenepa Dhanyeli abwereswa pamaso pa mambo. Mambo abvundza Dhanyeli: “Kodi iwe ndiwe Dhanyeli, mʼbodzi wa mabitcu+ adakwatwa na babanga mambo bulukira ku Yuda?+ 14 Ine ndabva kuti iwe uli na mphambvu za alungu,+ pontho kuti iwe uli na udziwisi, luso yakudzindikira, pontho ndzeru zakudzumisa.+ 15 Amuna audziwisi na anyakucita masalapita akhadabwereswa pamaso panga toera adzaleri mafala awa na kundipanga mabvekero ace, mbwenye iwo acimwana kundipanga mabvekero a mafala anewa.+ 16 Mbwenye ine ndabva kuti iwe usakwanisa kufokotoza mabvekero a pinthu,+ pontho usakwanisa kutonga miseru yakunentsa.* Iwe ungakwanisa kuleri mafala awa mbundipanga mabvero awo, unadzabvazikwa nguwo zakufuirira, unadzabvazikwa nkufu wa ouro nʼkhosi mwako, pontho unadzakhala ntongi wacitatu mu umambo wanga.”+

17 Penepo Dhanyeli atawira mambo: “Khalani na miyoni yanu, pontho pasani anango miyoni ineyi. Mbwenye ine ndinakuleririni mafala awa, pontho ndinakupangani mabvekero awo. 18 Imwe mambo, Mulungu Wankulu Kakamwe, apasa babanu Nabhukodhonozore umambo, ukulu, kubvekera na cilemedzo.+ 19 Thangwi ya ukulu udampasa Iye, mbumba zonsene, madzindza na misoka ya pilongero ikhagopa pamaso pace.+ Ule akhafuna iye kupha, iye akhamupha; ule akhafuna iye kusiya na umaso, akhansiya mʼmaso; ule akhafuna iye kulemedza akhamulemedza, mbwenye ule akhafuna iye kupwaza, akhampwaza.+ 20 Mbwenye pidatoma iye kugaya, mbaumisa ntima wace, atoma kucita pinthu mwakudzikuza,+ natenepa iye atcitiswa pa mpando wace waumambo, pontho abulusirwa cilemedzo cikhali na iye. 21 Iye athamangiswa pakati pa anthu, ntima wace mbukhala ninga cinyama, pontho iye adzaenda kakhala na maburu a ntsanga. Iye akhadya tsanga ninga pinacita ngʼombe, pontho manungo ace akhadatoteswa na bume yakudzulu, mpaka pidadzindikira iye kuti Mulungu Wankulu Kakamwe ndi Ntongi wa maumambo a anthu, pontho iye asaupasa ule anafuna iye.+

22 Mbwenye imwe mbuya Bhelsazari wakuti ndimwe mwanace, nee mwacepeseka muntima mwanu, maseze mukhadziwa pyenepi pyonsene. 23 Mʼmbuto mwace, imwe mwakhala wakudzikuza pamaso pa Mbuya wakudzulu,+ pontho imwe mwapanga anthu toera akubweresereni makhomitco a nʼnyumba mwace.+ Buluka penepo, imwe, akadamu anu, akazanu apakhundu na akazanu anango mwamwera vinyu mwenemu mbamusimba alungu akucitwa na parata, ouro, nkuwa, utale, matabwa na miyala, alungu akuti nkhabe kwanisa kuona, nee kubva, pontho nkhabe dziwa cinthu.+ Mbwenye imwe nee mwapasa mbiri Mulungu wakuti umaso wanu+ na njira zanu zonsene zisanyindira iye. 24 Natenepa, Mulungu atumiza djanja, pontho iye acitisa kuti mafala anewa alembwe.+ 25 Mafala adalembwa ndi awa: MENE, MENE, TEKELI, na PARSINI.

26 “Mabvekero a mafala anewa ndi awa: MENE, Mulungu alengesa ntsiku za umambo wanu, pontho aumalisa.+

27 “TEKELI, imwe mwaikhwa pa bhalansa mbamuoniwa kuti mudzati kwana.

28 “PERESI,* umambo wanu wagawiwa mbupaswa Amedhi na Apersya.”+

29 Penepo Bhelsazari apereka ntemo toera Dhanyeli abvazikwe nguwo zakufuirira na nkufu wa ouro nʼkhosi mwace; pontho iwo adziwisa anthu kuti Dhanyeli anakhala ntongi wacitatu mu umambo unoyu.+

30 Namasiku a ntsiku ineyi mambo Bhelsazari wa Akaldheya aphiwa.+ 31 Pontho Dhariyo+ wa ku Medhya, akhazikiswa ninga mambo,* iye akhali cifupi na pyaka 62 pyakubalwa.