Masalmo

Nyimbo Yakukwira Nayo ku Nzinda. Nyimbo ya Salomoni.

127 Yahova angakhonda kumanga nyumba,

Ale anaimanga mwaphinga akuimanga papezi.+

Yahova angakhonda kuonera nzinda,+

Anyakuuonera akuonera papezi.

2 Kubesera kunacita imwe nkhwapezi,

Kugona mwakudembuka kunacita imwe nkhwapezi,

Kuphata basa mwaphinga kunacita imwe toera kugumana cakudya nkhwapezi,

Thangwi Mulungu asatsalakana ale anafuna iye, pontho asaapasa ndzidzi toera kugona.+

3 Onani! Ana ndi muoni wakubuluka kuna Yahova;+

Ana anabalwa ndi muoni wakubuluka kuna Mulungu.*+

4 Ana a baba wakuti ndi mʼphale,

Ndi ninga mapswimo mʼmanja mwa nyankhondo wamphambvu.+

5 Anyakutsandzaya ndi ale anadzadza mabudu awo na mapswimo anewa.+

Iwo nee anadzapasika manyadzo,

Thangwi iwo anadzalonga na anyamalwa pansuwo ukulu wa nzinda.