Kronika Waciwiri

11 Robhoamu pidafika iye ku Yerusalemu, mwakukhonda dembuka acemeresa anyankhondo a maluso* akukwana 180.000 a dzindza ya Yuda na ya Bhenjamini,+ kuti aende kamenyane na Izraeli toera kubwezera umambo kuna Robhoamu.+ 2 Penepo Semaya+ ntumiki wa Mulungu wandimomwene, atambira mafala a Yahova, mbalonga: 3 “Panga Robhoamu mwana wa Salomoni mambo wa Yuda, kuphatanizambo Aizraeli onsene ali ku Yuda na ku Bhenjamini: 4 ‘Yahova alonga tenepa: “Lekani kuenda kamenyana na abale anu. M’bodzi na m’bodzi wa imwe asafunika kubwerera kunyumba kwace, thangwi ndine adacitisa pyenepi.”’”+ Penepo iwo abvera fala ya Yahova mbabwerera; natenepa iwo nee aenda kamenyana na Yerobhoamu.

5 Robhoamu akhala mu Yerusalemu mbamanga mizinda yakuzungulirwa na mipanda ku Yuda. 6 Natenepa iye amanga mizinda ya Bhetelehemu,+ Etami, Tekoa,+ 7 Bheti-Zuri, Soko,+ Adhulamu,+ 8 Gati,+ Maresa, Zifi,+ 9 Adhoraimu, Lakisi,+ Azeka,+ 10 Zora, Aijaloni+ na Ebhroni.+ Mizinda ineyi yamangwa mu dziko ya Yuda na ya Bhenjamini. 11 Kusiyapo pyenepi, m’mipanda ya mizinda ineyi, iye aikha atsogoleri a anyankhondo, mbaapasa pyakudya, mafuta a azeti na vinyu, 12 m’mizinda ineyi yonsene, iye aikhambo maxango makulu na madipa, mbacitisa mizinda ineyi kukhala yakutsidzikizika kakamwe. Iye apitiriza kutonga dziko ya Yuda na ya Bhenjamini.

13 Anyantsembe na Alevi akhali mu dziko yonsene ya Izraeli asiya pisa pyawo mbaenda kaphedzera Robhoamu. 14 Alevi asiya mbuto zawo zakudyesera pifuyo na pinthu pyawo,+ mbaenda ku Yuda na ku Yerusalemu, thangwi Yerobhoamu na anace nee aatawirisa toera atumikire ninga anyantsembe a Yahova.+ 15 Buluka penepo, Yerobhoamu asankhula anyantsembe ace mbaaikha mu mbuto zaulambiri+ toera atumikire madimonyo+ akulandana na madzimunthu a mbuzi na a anang’ombe adacita iye.+ 16 Mbwenye m’madzindza onsene a Izraeli, anthu akuti muntima mwawo akhadasankhula kutumikira Yahova Mulungu wa Izraeli, atowerera anyantsembe na Alevi. Iwo aenda ku Yerusalemu toera kupereka ntsembe kuna Yahova Mulungu wa ambuyawo.+ 17 Mu pyaka pitatu, iwo awangisa umambo wa ku Yuda mbaphedzera Robhoamu mwana wa Salomoni, thangwi mu pyaka pitatu, iwo afamba munjira za Dhavidhi na za Salomoni.

18 Buluka penepo, Robhoamu asemba Malati mwana wa Yerimoti. Yerimoti akhali mwana wa Dhavidhi. Mai wace Malati akhali Abhiyaili mwana wa Eliabhe. Eliabhe+ akhali mwana wa Yese. 19 Mukupita kwa ndzidzi, iye abala Yeusi, Semariya na Zaamu. 20 Buluka penepo, Robhoamu asemba pontho Maaka ndzukulu wa Abhisaloni.+ Mukupita kwa ndzidzi, iye am’balira ana awa: Abhiya,+ Atai, Ziza na Selomiti. 21 Robhoamu akhafuna kakamwe Maaka ndzukulu wa Abhisaloni kupiringana akazace onsene pabodzi na akazace apakhundu;+ thangwi iye akhadasemba akazi 18 na akazi anango apakhundu akukwana 60, pontho iye abala ana amuna 28 na ana akazi 60. 22 Natenepa, Robhoamu asankhula Abhiya mwana wa Maaka toera akhale nkulu na ntsogoleri wa abale ace, thangwi iye akhafuna kuti Abhiya akhale mambo. 23 Mbwenye Robhoamu acita pinthu mwandzeru, mbatumiza anace anango mupisa pyonsene pya ku Yuda na pya ku Bhenjamini, m’mizinda yakutsidzikizwa na mipanda.+ Iye aapasa pinthu pizinji, mbaasembera akazi azinji.