Mambo Wakutoma Wa Israyeli Mpaka Ku Ubitcu m’Babiloni

Sauli adzakhala mambo wakutoma wa Israyeli. Mbwenye Yahova ankhonda, na asankhula Davidi kuti akhale mambo mbuto mwace. Tinadzagumana pinthu pizinji pinalonga pya Davidi. Mbaciri mphale, iye amenyana na cimphona Goliati. M’kupita kwa nzidzi athawa Mambo wa ntsanje Sauli. Buluka penepo Abigayeli wakubalika amulimirisa kucita cinthu caupswiru.

Patsogolo pace, tinadzapfunza pinthu pizinji pya mwana wa Davidi, Salomo, ule adapita m’mbuto mwa Davidi ninga mambo wa Israyeli. Mbodzi na mbodzi wa amambo atatu akutoma a Israyeli atonga piaka 40. Pakumala kufa Salomo, Israyeli agawiwa m’maumambo awiri, umambo wakumulolo na wakubangwe.

Umambo wakumulolo wa madzinza 10 wakhala piaka 257 mbusati kufudzwa na Asiria. Buluka penepo piaka 133 patsogolo pace, umambo wa kubangwe wa madzinza mawiri wafudzwambo. M’nzidzi unoyu Aisrayeli akwatiwa mbaenda ku ubitcu m’Babiloni. Natenepa, Khundu YACINAI isaphataniza piaka 510 pya pyakucitwa, na ife tinadzaona pinthu pizinji pyakuphata manyerezero pidacitika nkati mwa nzidzi unoyu.