Abigayeli Na Davidi

KODI musanziwa nkazi wakubalika anaenda kagumanikana na Davidi? Dzinace ndi Abigayeli. Iye ndi wa manyerezero adidi, na akhondesa Davidi kucita cinthu cakuipa. Mbwenye mbitisati kupfunza pyenepi, tendeni tione cidacitikira Davidi.

Mudamala Davidi kuthawa Sauli, iye abisala m’mphako. Abale ace na anango a banjace aenda kagumanikana na iye kweneko. Amuna cifupi na 400 abwera kuna iye, na Davidi adzakhala ntsogoleri wawo. Buluka penepo Davidi aenda kwa mambo wa Moabi mbalonga: ‘Ndaphata mwendo siyani mama na babanga akhale na imwe mpaka ndione cinafuna kudzandicitikira.’ M’kupita kwa nzidzi Davidi na amunace atoma kubisala m’zinthunda.

Nduli mwa pyenepi Davidi agumanikana na Abigayeli. Mamunace Nabali akhali wampfuma wakukhala na minda. Akhali na mabira 3.000 na mbuzi 1.000. Nabali akhali mamuna wakuipa. Mbwenye nkazace Abigayeli akhali wakubalika kakamwe. Iye akadziwambo kucita pinthu pyakulinganira. Ntsiku inango apulumusambo banjace. Tendeni tione kuti pyacitika tani.

Davidi na amunace akhala akukoma ntima kwa Nabali. Iwo aphedza kutsidzikiza mabirace. Natenepa, ntsiku inango Davidi atuma amunace angasi kuti akaphembe ciphedzo kwa Nabali. Mudafika amuna a Davidi kwa Nabali iye na aphedzi ace akasasula mabira. Ikhali ntsiku ya phwando, na Nabali akhali na pyakudya pizinji pyadidi. Natenepa ipi ndipyo pidalonga amuna a Davidi: ‘Takhala akukoma ntima kwa imwe. Ife tidaba na bira ibodzi ene yanu tayu, mbwenye taphedza kuwayang’anira. Natenepa, taphata mwendo, tipasenimbo pyakudya.’

Nabali alonga: ‘Nee sinadzapasa pyakudya pyanga amuna ninga imwe.’ Iye alonga m’njira yakuipa kakamwe, mbalonga pinthu pyakuipa kwa Davidi. Mudabwerera amuna kapanga Davidi pyenepi, Davidi aipirwa kakamwe. Iye apanga amunace: ‘Kwatani masupada anu!’ Iwo alamuka mbaenda kapha Nabali na amunace.

Mbodzi wa amuna a Nabali, adabva mafala akuipa a Nabali, apanga Abigayeli pidacitika. Mwakukhonda dembuka Abigayeli asasanya pyakudya. Apipakiza pa maburu mbaenda napyo. Mudagumanikana iye na Davidi, atcita pa buru yace, agodama pantsi mbalonga: ‘Ndaphata mwendo, mbuya, lekani kuyang’ana pidacita mamunanga Nabali. Iye ndi pswiru, na asacita pinthu pyaupswiru. Ndabweresa muoni. Ndaphata mwendo, utambireni, mbumutilekerera thangwi ya pidacitika.’

Davidi atawira: ‘Iwe ndiwe nkazi wanzeru. Wandikhondesa kupha Nabali towera kumbwezera kuipa kwace. Natenepa ndoko kunyumba m’ntendere.’ M’kupita kwa nzidzi, mudafa Nabali, Abigayeli adzakhala mbodzi wa akazi a Davidi.