Utumiki Wa Yezu Ku Pereya

Yezu akhapfundzisa na kuwangisa anthu ku Yudeya na Yerusalemu. Buluka penepo, iye aenda ku Nkulo wa Yordani toera kupfundzisa mbuto zonsene za cisa ca Pereya. Mwakukhonda dembuka, iye abwerera ku Yerusalemu.

Pikhali Yezu ku Pereya, mamuna unango abvundza: ‘Mbuya, ndimodi kuti anthu anafuna kupulumuswa ndi pang’ono?’ Panango mamuna unoyu akhaona kuti pakhali na atsogoleri auphemberi akhaketesana kuti anafuna kupulumuka ndi azinji peno akucepa. M’mbuto mwakutawira kuti ndi angasi anafuna kupulumuka, Yezu alonga pinafunika iwo kucita toera kupulumuka. Iye alonga: ‘Wangisirani kakamwe toera kupita na pa nsuwo ung’ono.’ Inde kuwangisira kusafunika kakamwe. Thangwi yanji? Yezu afokotoza: ‘azinji anadzayesera kupita, mbwenye nee anadzakwanisa.’—Luka 13:23, 24.

Toera kulonga kufunika kwa kuwangisira, Yezu alonga nsangani uyu: ‘Mwanaciro nyumba angalamuka mbafunga nsuwo, imwe munadzakhala kunja, munagogodza nsuwo mbamulonga: Mbuya, tifungulirenimbo. Mbwenye iye anadzakupangani: Ine nkhabe kukudziwani. Bulukani pamaso panga, monsene imwe anyakucita pyakuipa!’—Luka 13:25-27.

Pyenepi pisalandaniswa na munthu anafika panyumba mwakudembuka, khala mphyadidi kwa iye, asagumana nsuwo wafungwa. Iye akhafunika kufika nakweru. Pyenepi pisacitika na azinji akuti mbadaphindula na pipfundziso pya Yezu. Iwo nee asabandza mwai toera kuona ulambiri wandimomwene ninga cinthu cakufunika kakamwe mu umaso wawo. Mwa anthu azinji adatumirwa Yezu toera kuapfundzisa, si azinji tayu adatawira njira ya Mulungu toera kupulumuka. Yezu alonga kuti iwo ‘anadzalira mbakukuta mano awo’ mu ndzidzi unafuna iwo kudzaponywa kunja. Ngakhale tenepo, anthu a madzindza onsene a ‘kumabulukiro a dzuwa na a kumadokero a dzuwa, a kunkwiriro na a kunterero anadzabwera mbakhala pa meza mu Umambo wa Mulungu.’—Luka 13:28, 29.

Yezu afokotoza: ‘Anthu akumalisira [ale akuti nee ndi Ayuda peno Ayuda akupondererwa] anadzakhala akutoma [atsogoleri auphemberi akuti asadzikuza thangwi yakukhala dzindza ya Abhrahamu] akuti anadzakhala akumalisa.’ (Luka 13:30) Pakulonga pya ale akuti anadzakhala ‘akumalisa,’ pisapangiza kuti anthu anewa akukhonda pereka takhuta nee anadzapita mu Umambo wa Mulungu.

Afarisi anango aenda kuna Yezu mban’cenjeza: ‘Buluka kuno, thangwi Herodhi [Antipa] asafuna kukupha.’ Panango ndi Mambo Herodhi adatomesa pyenepi toera Yezu abuluke mu cisa ceneci. Panango Herodhi akhagopa kucita khundu ya kufa kwa mprofeta unango ninga pikhadacitikira pa kufa kwa Juwau M’batizi. Mbwenye Yezu apanga Afarisi: ‘Ndokoni kapange nyenga ule kuti: Lero na mangwana ndinabulusa madimonyo na kuwangisa anthu, pa ntsiku yacitatu ndinamalisa basa yanga.’ (Luka 13:31, 32) Pidacemera iye Herodhi kuti ‘nyenga,’ panango iye akhafuna kulonga pya kucenjera kwa anambwa antsanga. Mbwenye Yezu nee anyengezwa, kukakamizwa na Herodhi peno na munthu onsene. Yezu akwanirisa basa yace idapaswa iye na Babace, mwakubverana na ndzidzi udakhazikisa Mulungu, tayu ndzidzi wa anthu.

Yezu apitiriza na ulendo wace wa kuenda ku Yerusalemu, thangwi iye alonga kuti ‘nkhabe funika kuti mprofeta aphiwe kunja kwa Yerusalemu.’ (Luka 13:33) Nkhabepo profesiya ya Bhibhlya isalonga kuti Mesiya asafunika kuphiwa mu nzinda unoyu, mphapo thangwi yanji Yezu alonga kuti iye anaphiwa kweneko? Thangwi Yerusalemu ndi nzinda ukulu, ndi kweneko kusakhala Thando yakutongera miseru Yaciyuda yakuti isakhala na anyakucita khundu 71, pontho ndi mbuto yakuti isatongwa anthu anapambizirwa kuti ndi aprofeta authambi. Kusiyapo pyenepi, ndi kweneko kukhaperekwa ntsembe ya pinyama. Ndi thangwi yace, Yezu alonga kuti nee pinakwanisika kuti iye aphiwe ku nzinda unango.

Yezu alonga mwakutsukwala: ‘Yerusalemu, Yerusalemu, nyakupha aprofeta na nyakuponyera miyala ale anatumwa kuna iwe! Kazinji kene ine ndikhafuna kugumanya anako ninga munagumanya nkhuku anapiye ace pantsi pa maphapido ace! Mbwenye imwe mwakhonda. Onani! Mulungu anadzasiya nyumba yanu.’ (Luka 13:34, 35) Dzindza yakhonda Mwana wa Mulungu, natenepa anadzathimbana na nyatwa thangwi ya pyenepi.

Yezu mbadzati kufika ku Yerusalemu, ntsogoleri wa Afarisi ancemera toera aende kadya panyumba pace pa ntsiku ya Sabudu. Anyakucemerwa akhayang’ana Yezu toera kuona kuti anacitanji kuna munthu wa utenda wa mpfutete (kubzwimba kwa miyendo na manyalo). Yezu abvundza Afarisi na anyakudziwisa Mwambo: ‘Pisatawiriswa kuwangisa munthu pa ntsiku ya Sabudu?’—Luka 14:3.

Nkhabepo adatawira. Yezu awangisa mamuna unoyu, buluka penepo aabvundza: ‘Mbani mwa imwe khala mwanace peno ng’ombe yace yagwera mu ncera pa ntsiku ya Sabudu nkhabe kuibulusa mwakucimbiza?’ (Luka 14:5) Nakuti Yezu akhali na mathangwi adidi, iwo nee akwanisa pontho kuntawira.