Pinthu Piwiri Pinacitisa Banja Kukhala Kwenda Na Kwenda

1, 2. (a) Kodi banja yakhazikiswa towera kumala ndzidzi ungasi? (b) Kodi pyenepi ndi pyakukwanisika tani?

MULUNGU pidacitisa iye banja ya mamuna na nkazi akutoma, nee pakhali cidzindikiro cakuti banja yawo mbidakhala mu ndzidzi wakucepa basi tayu. Adamu na Eva akhafunika kukhala pabodzi mu umaso wawo onsene. (Genesi 2:24) N’dida wa Mulungu ku banja yakulemedzeka ndi kuphatana kwa mamuna m’bodzi na nkazi m’bodzi. Basi ene ulukwali ungacitwa na m’bodzi peno uwiri wawo, Malemba asatawirisa kumwalana na kumanga papswa banja pingakwanisika.​—Mateo 5:32.

² Kodi ndi pyakukwanisika anthu awiri kukhala pabodzi mwakutsanzaya mu umaso onsene? Inde, pontho Biblya isadzindikira pinthu piwiri, peno pifungulo piwiri pyakuti pisaphedza pyenepi kuti pikwanisike. Khala mamuna na nkazi asaphatisira pyenepi, iwo anakwanisa kufungula nsuwo towera kutsanzaya na kukhala na nkhombo zizinji. Kodi pinthu pyenepi ndi ninji?

 3. Kodi ndi mitundu ipi mitatu ya kufunana isafunika kukhala na anthu anamanga banja?

³ Cinthu cakutoma ndi kufuna. Mbwenye, pana mitundu yakusiyana-siyana ya kufuna m’Biblya. Ntundu ubodzi ndi kufunana na munthu unango, makamaka pakati pa axamwali a pa ntima. (Jwau 11:3) Ntundu waciwiri ndi kufunana kunakhala pakati pa piwalo pya banja. (Aroma 12:10) Ntundu wacitatu ndi kufunana kunakhala pakati pa mamuna na nkazi, anthu akusiyana piwalo. (Misangani 5:15-20) Mwandimomwene, mitundu onsene ya kufunana isafunika kusakulirwa na mamuna pabodzi na nkazi. Mbwenye pana ntundu unango wacinai wa kufunana, wakufunika kakamwe kupiringana inango.

 4. Kodi ndi ntundu upi wacinai wa kufuna?

⁴ Mu cilongero cakutoma ca Malemba Acigerego Acikristu, fala ya ntundu unoyu wa kufunana ndi agápe. Fala ineyi yaphatisirwa pa 1 Jwau 4:8, pana pangwa ife kuti “Mulungu ndi kufuna.” Mwakukhonda penula, ‘tisafuna Mulungu, thangwi iye Mulungu atoma kufuna ife pano.’ (1 Jwau 4:19) Nkristu asasakulira kufuna kweneku pakutoma kwa Yahova Mulungu angamala kwa anthu anzace. (Marko 12:29-31) Fala yakuti agápe yaphatisirwambo pa Aefesi 5:2, panalonga tenepa: “Fambani mbamufunana sawasawa ninga mudakufunirani Kristu, mbaperekeka, mbakhala ntsembe yakukoma kakamwe kuli Mulungu thangwi ya ife.” Yezu alonga kuti ntundu unoyu wa kufuna mbudadzindikirisa atowereri ace andimomwene: “Na kufunana [agápe] kwanu anthu onsene anadzadzindikira kuti ndimwe anyakupfundza anga.” (Jwau 13:35) Onani pontho kuphatisirwa kwa agápe pa 1 Akorinto 13:13: “Pinasala mphapo mphitatu: ‘kutawira [peno cikhulupiro], kudikhira na kufuna.’ Kukulu kakamwe ndi kufuna [agápe].”

5, 6. (a) Thangwi yanji kufuna ndi kukulu kakamwe kupiringana cikhulupiro na cidikhiro? (b) Kodi ndi api mathangwi anango anapangiza kuti kufuna kunadzaphedza mabanja kukhalisa?

⁵ Kodi ndi ninji cinacitisa ntundu unoyu wa kufuna agápe kukhala ukulu kakamwe kupiringana cikhulupiro na cidikhiro? Iko kusatongwa na midida​—midida yakulungama​—inagumanika m’Mafala a Mulungu. (Masalmo 119:105) Kufuna kweneku ndi nyerezero yakusowa umbirimi ya kucita pyakulungama na pyadidi kwa anthu anango kubulukira ku maonero a Mulungu, mwakukhonda tsalakana munthu anacitirwa khala athema peno nkhabe. Kufunana kweneku kusacitisa anyakusembana kutowezera uphungu wa m’Biblya: “Pa kukhala na nthonga piriranani, lekereranimbo. Lekeranani sawasawa ninga mudakulekererani Mbuya.” (Akolose 3:13) Anyakusembana ali, na asasakulira ‘makamaka kufunana [unango na nzace] ntsiku zonsene, thangwi kufunana [agápe] kusaphimbira mwinji wa madawo.’ (1 Pedro 4:8) Onani kuti kufuna kusaphimbira madawo. Kufunana nkhabe kumalisa madawo, nakuti munthu wakusowa ungwiro nkhabe kwanisa kusudzuka ku madawo.​—Masalmo 130:3, 4; Tyago 3:2.

⁶ Kufuna Mulungu kweneku na kufunana unango na nzace kungasakulirwa pabanja, munaona kuti banja yanu inakhalisa na inatsanzaya, thangwi “kufuna kunamala tayu.” (1 Akorinto 13:8) Kufuna ndi ‘kuphatana pyadidi ninga akumangiwa na nkhambala.’ (Akolose 3:14) Khala imwe muli pabanja, munakwanisa tani kukulisa ntundu unoyu wa kufunana pabodzi na nzanu? Lerini Mafala a Mulungu pabodzi, na cedzani thangwi ya pyenepi. Pfunzani citsanzo ca Yezu ca ufuni na wangisirani kuntowezera, towera munyerezere na kucita pinthu ninga iye acitira. Mwakuthimizira, gumanikani ku misonkhano Yacikristu, kunapfunziswa Mafala a Mulungu. Na phemberani kwa Mulungu towera akuphedzeni kukulisa ntundu unoyu wa ufuni, wakuti ndi nsapo wa nzimu wakucena wa Mulungu.​—Misangani 3:5, 6; Jwau 17:3; Agalata 5:22; Ahebere 10:24, 25.

 7. Kodi cilemedzo ndi ninji, na mbani asafunika kupangiza cilemedzo m’banja?

⁷ Khala anyakusembana asafunanadi unango na nzace, anadzalemedzanambo, pontho kulemedzana ndi cinthu caciwiri cinacitisa banja kukhala yakutsanzaya. Cilemedzo cisafokotozwa ninga “kutsalakana anango, kuapasa mbiri.” Mafala a Mulungu asapereka uphungu kwa Akristu onsene, kuphataniza mamuna na nkazi: “Lemedzanani mwonsene.” (Aroma 12:10) Mpostolo Pedro alemba: “Imwembo amuna khalani pyadidi pabodzi na akazi anu, mbamualemedza, thangwi iwo ndi anthu akufewa.” (1 Pedro 3:7) Akazi asapaswa uphungu wakuti ‘alemedze [‘pikulu kakamwe,’ NM] amunawo.’ (Aefesi 5:33) Khala imwe musafuna kupasa mbiri munthu, imwe musakhala wakukoma ntima kwa munthu unoyu, kulemedza ukulu wace na maonero ace, na kukhala wakufuna kukwanirisa pyonsene pinaphemba iye kwa imwe.

8-10. Kodi ndi njira zipi zinango zakuti cilemedzo cinadzaphedza banja kukhala na ubodzi wakukhalisa na wakutsanzaya?

⁸ Ale anafuna kukomerwa na banja yakutsanzaya asafunika kupangiza cilemedzo kwa anzawo a m’banja ‘mbaleka kunyerezera pyawo pyokha basi, mbwenye anyerezere pya nzawombo.’ (Afilipi 2:4) Iwo nkhabe kutsalakana pyadidi pya iwo okha​—pyakuti mbipidakhala umbirimi. Mbuto mwa pyenepi asatsalakana udidi wa anzawo a pabanja. Mwakukhonda penula, iwo asatsalakana cakutoma pifuno pya anzawo a m’banja.

⁹ Cilemedzo cinadzaphedza anyakusembana kudzindikira kusiyana kwa maonero. Si pyanzeru tayu kudikhira kuti anthu awiri akhale na maonero mabodzi ene mu pinthu pyonsene. Pinaona mamuna kuti ndi pyakufunika panango kwa nkazi si pyakufunika tayu na pinafuna nkazi panango ndi pyakusiyana na pinafuna mamuna. Mbwenye m’bodzi na m’bodzi asafunika kulemedza maonero na pisankhulo pya munthu unango, khala ipyo piri nkati mwa madire a mwambo na matongero a Yahova. (1 Pedro 2:16; landanisani Filimoni 14.) Kusiyapo pyenepi, m’bodzi na m’bodzi asafunika kulemedza ukulu wa nzace mu kukhonda kucitisa nzace ninga cinthu cakusekesa pa mwinji peno pakhundu.

¹⁰ Inde, kufuna Mulungu na kufunana unango na nzace na kulemedzana ndi pinthu piwiri pinacitisa banja kukhala yakupembera. Kodi ipyo pinakwanisa tani kuphatisirwa m’makhundu anango akufunika kakamwe a umaso wa banja?

11. Mwakubverana na Malemba, kodi mbani nsolo wa banja?

¹¹ Biblya isatipanga kuti mamuna acitwa na makhaliro akuti mbadancitisa kupembera pa kutsogolera banja. Natenepa, mamuna mbadakhala na pyakutawirira kwa Yahova thangwi ya kutsalakana kwace nkazi na ana ku pinthu pyauzimu na pyakumanungo. Iye mbadakhala wakucita pisankhulo pyakulinganira mwakubverana na cifuno ca Yahova na kukhala citsanzo cadidi ca makhaliro aumulungu. “Akazi abvere amuna awo ninga Mbuya. Thangwi mamuna ndi nsolo wa nkazache sawasawa ninga Kristu ndi nsolo wa anthu a mu igreja [‘mpingo,’ NM]. Anthu a mu igreja [peno mpingo] ndiwombo manungo ache a Kristu.” (Aefesi 5:22, 23) Mu njira ibodzi ene, Biblya isalonga kuti mamuna alimbo na nsolo, M’bodzi wakuti ali na utongi padzulu pa iye. Mpostolo Paulu alemba: “Mbwenye ndinafuna kuti mupivesese kuti Khristu ndi msolo wa mamuna onsene, mamuna ndi msolo wa mkazache, Mulungumbo ndi msolo wa Khristu.” (1 Akorinto 11:3, Chiverano Chachinchino) Mamuna wanzeru asapfunza kuti anatsogolera tani mu kusangizira nsolo wace, Kristu Yezu.

12. Kodi ndi citsanzo cipi cadidi cidakhazikisa Yezu ca kungonjera na kutsogolera?

¹² Yezu alimbo na nsolo, Yahova, na asakhala wakubvera kakamwe kwa Iye. Yezu alonga: “Ine sinasaka tayu kuchita pinafuna ine mbwenye pire pinafuna uyu adandituma.” (Jwau 5:30) Ndi citsanzo tani cadidi! Yezu “ndiyembo adabalwa wakutoma, mbachidzati kuchitwa chinthu chibodzi.” (Akolose 1:15) Iye adzakhala Mesiya. Iye mbadadzakhala Nsolo wa mpingo wa Akristu akudzodzwa na Mambo wakusankhulwa wa Umambo wa Mulungu, padzulu pa aanju onsene. (Afilipi 2:9-11; Ahebere 1:4) Mwakukhonda tsalakana mbuto ineyi yapadzulu na pidikhiro pyakulemedzeka, mamuna unoyu Yezu nee akhali waukali, nee wakukakamira pinthu peno wakutonga mwakupiringana n’dida tayu. Iye nee akhali wakuponderera, wakuti ndzidzi onsene akhaphemba atowereri ace kuti ambvere tayu. Yezu akhali wakufuna na wa siphanje, makamaka kwa ale akhapondererwa. Iye alonga: “Bwerani kuna ine, imwe mwonsene akuneta na anyakulemerwa, inembo ndinadzakupumisani. Kwatani ntolo wanga, mbamupfundza kwa ine thangwi ndinawo ntima wadidi na wakukhurudzika, mbamudzagumana ntendere mu mitima mwanu, thangwi ntolo wanga ngwakusemiwa, nsekete wanga ngwakululupa.” (Mateo 11:28-30) Pikhali pyakukomeresa kukhala pabodzi na iye.

13, 14. Kodi mamuna wakufuna anakwanisa tani kucita utsogoleri wace, mu kusangizira Yezu?

¹³ Mamuna anafuna kukhala na umaso wa banja wakutsanzaya, mbipidakhala pyadidi kudinga makhaliro adidi a Yezu. Mamuna wadidi nkhabe khala na haxa peno kuponderera, nkhabe kuphatisira mwakuipa utsogoleri wace towera kuthusa nawo nkazi. Mbuto mwa pyenepi, iye asafuna nkazi wace mbamulemedza. Khala Yezu akhali na “ntima wadidi na wakukhurudzika,” mamuna ali na mathangwi mazinji kakamwe a kucita pyenepi, thangwi mwakusiyana na Yezu, iye asadodomeka. Iye angadodomeka, asafuna kuti nkazi wace adziwe pyenepi. Na thangwi ineyi mamuna wakucepeseka asatawira pidadodomesa iye, ngakhale ndi pyakunensa kulonga mafala akuti, “Ndaphata mwendo ndilekerereni; ine ndadawisa.” Pisakhala pyakukhonda nentsa kwa nkazi kulemedza utsogoleri wa mamuna wakukhurudzika na wakucepeseka kupiringana mamuna waumbirimi na wakuuma ntima. Mu njira ibodzibodzi, nkazi wakulemedzeka asaphembambo kulekererwa angadawisa.

¹⁴ Mulungu acita nkazi na makhaliro adidi kakamwe akuti anakwanisa kuaphatisira towera kukhala na banja yakutsanzaya. Mamuna wanzeru anadzadzindikira pyenepi na nkhabe kudzankhondesa. Akazi azinji ali na ntsisi maningi pontho ndi akukhurudzika, makhaliro akuti asafunika kakamwe pa kutsalakana banja na kuphedzera uxamwali waumunthu. Mphyakudzolowereka, nkazi kukwanisa kutsalakana panyumba, mbapakhala mbuto yakukomeresa kukhalapo. “Nkazi wadidi kakamwe” adafokotozwa pa Misangani kapitulu 31 akhali na makhaliro na luso yadidi kakamwe, na banja yace yaphindula kakamwe thangwi ya iye. Thangwi yanji? Ndi thangwi yakuti mamuna wace ‘akhankhulupira.’​—Misangani 31:10, 11.

15. Kodi mamuna anakwanisa tani kupangiza kufuna na cilemedzo cakulandana na ca Kristu kwa nkazi wace?

¹⁵ M’madziko anango, utongi wa mamuna usacitwa mwakupiringana midida, kwakuti ngakhale kuncita mbvunzo kusaoniwa ninga kusowa cilemedzo. Panango kutsalakana nkazi wace ninga bitcu. Utsogoleri unoyu wakuipa usabweresa uxamwali wakucerenga basi tayu na nkazi wace mbwenyembo na Mulungu. (Landanisani 1 Jwau 4:20, 21.) Ku khundu inango, amuna anango asakhonda kutsogolera, mbasiya natenepa akazi awo kutonga pamudzi. Mamuna wakuti mwakuthema asangonjera Kristu nkhabe kutapata nkazi wace peno kuba cilemedzo cace. Mbuto mwa pyenepi, iye asasangizira kufuna kwakusowa umbirimi kwa Yezu na kucita ninga mudacinjeza Paulu: “Imwe amuna funani akazanu sawasawa ninga mudafunira Kristu anthu a mu igreja [peno mpingo] yache, mbaperekeka thangwi ya igreja [peno mpingo].” (Aefesi 5:25) Kristu Yezu afuna atowereri ace pikulu kakamwe mpaka iye kuafera. Mamuna wadidi anadzacita mwadidi angawangisira kusangizira manyerezero anewa akusowa umbirimi, mbasaka pyadidi kwa nkazi wace, kusiyana na kuphemba pinthu pizinji kwa nkazi. Mamuna angangonjera Kristu na kupangiza kufuna na cilemedzo cakulandana na ca Kristu, nkazi wace anadzakulumizika ekhene kubvera mamunace.​—Aefesi 5:28, 29, 33.

16. Kodi ndi makhaliro api anafunika nkazi kupangiza mu uxamwali wawo na mamunace?

¹⁶ Mu ndzidzi unango Adamu mbadamala kale kucitwa, “Mbuya Mulungu alonga: ‘Si pyadidi tayu kuti mamuna akhale ekhene, ndinampasa ndzache wakumphedza mbalandana na iye.’” (Genesi 2:18) Mulungu acita Eva ninga “ndzache” tayu ninga nyakupikisana naye. Banja nee yathema kukhala ninga stima ya m’madzi mbiendeswa na anthu awiri akupikisana tayu. Mamuna athema kutsogolera mwadidi na nkazi mbapangiza kufuna, cilemedzo na kubvera mwaufulu.

17, 18. Kodi ndi njira zipi zinango zakuti nkazi anakwanisa kukhala mphedzi wadidi kakamwe kwa mamunace?

¹⁷ Natenepa, nkazi wadidi asacita pinthu pizinji kupiringana kungonjera basi. Iye asawangisira kukhala mphedzi wadidi, mbaphedzera pisankhulo pinacita mamunace. Mwandimomwene, nkazi angatawirira pinasankhula mamuna, pinakhala pyakukhonda nensa kakamwe kwa iye. Ngakhale iye nkhabe kupitawirira, ciphedzo cace cinakwanisa kucitisa kuti pidasankhula mamuna pikhale pyakupembera kakamwe.

¹⁸ Nkazi anakwanisa kuphedza mamunace kukhala nsolo wadidi mu njira inango. Nkazi asafunika kupereka takhuta thangwi ya kuwangisira kwa mamuna pa kutsogolera, mbuto mwa kumpwekera peno kuncitisa kupibva ninga nkhabe kwanisa kutsanzayisa nkazi. Pa kutsalakana mamunace mu njira yadidi, iye asafunika kukumbuka kuti “ntima wakuchena na wakupfulika, wa nzimu wakubverana na andzanu, [ndi] wakupfuma pa maso pa Mulungu,” tayu basi ene pamaso pa mamunace. (1 Pedro 3:3, 4; Akolose 3:12) Kodi ndiye tani khala mamuna si nkristu tayu? Khala iye ndi nkristu peno nkhabe, Malemba asawangisa akazi kuti “afune amuna awo na ana awo, akhale na nzeru, akhale na mbiri, aonere pyadidi pya ku nyumba, abvere ntsisi anthu onsene, atawire amuna awo, gopa mafala a Mulungu anadzapwaziwa thangwi ya iwo.” (Tito 2:4, 5) Khala paoneka nkhani a cikumbuntima, ndi pyadidi kuti mamuna wakukhonda khala nkristu alemedze pikulu kakamwe manyerezero a nkazi khala aapangiza na ‘ntima wakucena na cilemedzo cikulu.’ Amuna anango akukhonda khala akristu anakwanisa kuwinwa “na imwe akazi awo nee kupangwa mafala, pa kuona makhaliro anu a maso na kugopa kwanu.”​—1 Pedro 3:1, 2, [15, NM]; 1 Akorinto 7:13-16.

19. What if a husband asks his wife to break God’s law?

¹⁹ Kodi ndiye tani khala mamuna asakakamiza nkazi kucita cinthu cakuti Mulungu asacikhondesa? Pyenepi pingacitika, nkazi asafunika kukumbuka kuti Mulungu ndiye Ntongi wace wakutoma. Nkazi asatowezera citsanzo cidacita apostolo pikhabvunzwa iwo na atongi kuti aswe mwambo wa Mulungu. Machitiro 5:29 isalonga: “Pedro na apostolo anango atawira, mbati: ‘Ife pano tinatongwa kutawira maka Mulungu, kupita kutawira anthu.’”

20. Kodi ndi khundu ipi yadidi yakuti kufuna na cilemedzo ndi pyakufunika?

²⁰ Kufuna na cilemedzo ndi pyakufunika m’makhundu anango m’banja​—pakucedza. Mamuna wakufuna asacedza na nkazi wace pya mabasa adacita nkazi, nyatwa zace na maonero ace mu pinthu pyakusiyana-siyana. Nkazi asafuna pyenepi. Mamuna anakhala na ndzidzi wakucedza na nkazi wace na kubvesera pinalonga iye asapangiza kufuna kwace na cilemedzo cace kwa nkazi. (Tyago 1:19) Akazi anango asadungunya thangwi amunawo asamala ndzidzi wakucepa basi angacedza nawo. Pyenepi ndi pyakutsukwalisa. Mwandimomwene, mu ndzidzi uno wakupingika, mamuna panango asaphata basa ndzidzi wakuinjipa kutali na panyumba, pontho na thangwi ya makhaliro a nyatwa ya kobiri akazi anango asakakamizika kupitambo m’mabasa. Mbwenye banja isafunika kusaka ndzidzi towera icedze. Pyenepi pingakhonda kucitika, banja inakwanisa kukhala yakusiyana maonero unango na nzace. Pyenepi pinatsogolera ku nyatwa zikulu khala m’bodzi mwa iwo asapibva ninga nkhabe kufunwa pabanja mpaka kusaka munthu unango wakukoma ntima kunja kwa banja.

21. Kodi ndi mu njira ipi malongero adidi asaphedza banja kukhala yakutsanzaya?

²¹ Macedzero anacita mamuna na nkazi ndi akufunika kakamwe. ‘Mafala adidi ndi akutapira pa kholongo mbawangisa manungo.’ (Misangani 16:24) Khala nzanu wa m’banja ndi nkristu peno nkhabe, Biblya isapereka uphungu uyu: “Mafala anu adzipe ninga munyu ntsiku zonsene,” nkhubveka kuti, akhale adidi. (Akolose 4:6) Khala m’bodzi ntsiku hidamuyendera pyadidi tayu, pinakhala pyadidi kakamwe unango kulonga mafala mangasi adidi mwakufuna na mwakukoma ntima towera kubalangazana. “Kulonga mwadidi pa ndzidzi unafunikira ipyo nkhupereka masau a ndalama [m’mbale] ya prata.” (Misangani 25:11) Magaluziro a fala na kusankhula mafala akulonga ndi pyakufunika kakamwe. Mwacitsanzo, munthu wakupinda na waukali anakwanisa kulonga: “Funga nsuwo!” Mbwenye ‘mafala akudzipa ninga munyu’ asalongwa mwakupfulika na fala yakubveka, “Ndaphata mwendo fungirenimbo nsuwo?”

22. Kodi ndi makhaliro api anafunika pabanja towera kupitiriza na kucedza kwadidi?

²² Kucedza kwadidi kusapitiriza ngakhala mafala analongwa ndi adidi, kuyang’anana na kulonga na manja kwadidi, kukoma ntima, kubvesesa na udidi. Mungawangisira towera kupitiriza na kucedza mwadidi, mamuna peno nkazi anadzakhala waufulu kudziwisa pyakufuna pyace, na anadzakhala ncera wakutontholesa na kuphedzana m’midzidzi yakukhonda bverana peno pa nyatwa. Mafala a Mulungu asadembetera: “Balangazani ale anafewa mu mitima yawo.” (1 Atesalonika 5:14) Panadzaoneka midzidzi yakuti mamuna anakhala wakupinda na panadzaoneka midzidzi yakuti nkazi anakhalambo wakupinda. Iwo anakwanisa ‘kubalangazana’ unango na nzace towera kuwangisana.​—Aroma 15:2.

23, 24. Kodi ufuni na cilemedzo pinadzaphedza tani pangaoneka kukhonda bverana? Perekani citsanzo.

²³ Mamuna na nkazi angafunana na kulemedzana nkhabe kudzaona kukhonda bverana konsene ninga nyatwa tayu. Iwo anadzawangisira kakamwe towera akhonde ‘kunensana-nensana.’ (Akolose 3:19) Uwiri wawo asafunika kukumbuka kuti “kutawira mphole-mphole [kusatontholesa] ukali.” (Misangani 15:1) Citani mphole-mphole towera mukhonde kupwaza peno kutcinyusa nzanu wa m’banja angalonga pyace pya mu ntima. Mbuto mwa pyenepi, onani malongero anewa ninga mwai wa kudziwa maonero a munthu unango. Pabodzi pene, wangisirani kumalisa kukhonda bverana na bveranani cinthu cibodzi.

²⁴ Kumbukani ndzidzi udapereka Sara maonero ace kwa mamunace, Abrahamu, towera kumalisa nyatwa inango, mbwenye nee pikhabverana na maonero a mamunace tayu. Natenepa, Mulungu apanga Abrahamu: “Chita pyonsene pinakuphemba Sara.” (Genesi 21:9-12) Abrahamu apicita na apaswa nkhombo. Mwakulandana, khala nkazi apereka maonero ace akusiyana na pinanyerezera mamunace, iye asafunika kubvesera nkazi wace angalonga. Mu ndzidzi ubodzi ene, nkazi nkhabe funika kulongesa maningi mbwenye asafunika kubvesera pinafuna kulonga mamunace. (Misangani 25:24) Kukulumiza mamuna peno nkazi towera kucita maonero anu ndzidzi onsene ndi pyakusowa ufuni na cilemedzo.

25. Kodi kucedza kwadidi kunadzaphedza tani kukhala wakutsanzaya m’makhundu anango a umaso wa banja?

²⁵ Kucedza kwadidi ndi kwakufunikambo kakamwe pa nkhani ya kupita m’mabonde kwa anyakumanga banja. Kucenama na kukhonda tongeka kunakwanisa kufudza uxamwali wanu wa ponda apa ndipondembo m’banja. Kucedza mwaufulu pabodzi na kupirira ndi pyakufunika kakamwe. Khala m’bodzi na m’bodzi asasaka udidi kwa nzace m’banja, kupita m’mabonde nkhabe kudzakhala nyatwa ikulu. Mu pinthu pyenepi na pinango, “lekani kunyerezera pya udidi wanu basi tayu; nyerezerani makamaka pya udidi wa andzanu.”​—1 Akorinto 7:3-5; 10:24, Mphangwa Zadidi.

26. Maseze mabanja onsene anadzakhala na pyakugumana napyo pyadidi na pyakuipa, kodi ndi mu njira ipi kubvesera Mafala a Mulungu kunadzaphedza anyakusembana kugumana kutsanzaya?

²⁶ Ndi uphungu tani wadidi unapereka Mafala a Mulungu! Mwandimomwene, mabanja onsene anadzakhala na pyakugumana napyo pyadidi na pyakuipa. Mbwenye anyakusembana angangonjera manyerezero a Yahova, ninga adapangizwa m’Biblya, uxamwali wawo mbukhala wa kufunana na wakulemedzana, iwo anakwanisa kunyindira kuti banja yawo inadzakhala kwenda na kwenda na yakutsanzaya. Natenepa, iwo anadzapasa mbiri tayu basi ene unango na nzace mbwenyembo Ntomesi wa banja, Yahova Mulungu.