Fendedzerani Mulungu Mu Phembero

1, 2. Thangwi yanji tisafunika kuona phembero ninga mwai ukulu, na thangwi yanji tisafunika kudziwa pinapfundzisa Bhibhlya thangwi ya pyenepi?

DZIKO yapantsi ndi ing’ono kakamwe tingailandanisa na pinthu pyonsene pidacitwa. Inde, kwa Yahova, ‘adacita kudzulu na pantsi,’ mbumba zonsene ndi ninga thotho ing’ono ya madzi yakubuluka mu nkhali. (Masalmo 115:15; Izaiya 40:15) Ngakhale tenepa, Bhibhlya isalonga: ‘Yahova ali dhuzi na onsene anancemera, mbaphemba ciphedzo cace na ntima wadidi. Ale anangopa anaapasa pinafuna iwo; anaabvera mikhuwo yawo.’ (Masalmo 145:18, 19) Nyerezerani basi mabvekero a pyenepi! Nciti wa mphambvu zonsene ali dhuzi na ife na anatibvesera ‘tingaphemba ciphedzo cace na ntima wadidi.’ Tiri na mwai ukulu kakamwe wakufendedzera Mulungu mu phembero!

² Khala tisafuna kuti Yahova abvesere maphembero athu, tisafunika kuphembera kwa iye munjira inatawira iye. Tinacita tani pyenepi tingakhonda dziwa pinapfundzisa Bhibhlya thangwi ya phembero? Mphyakufunika kwa ife kudziwa pinalonga Malemba thangwi ya pyenepi, thangwi phembero isatiphedza kufendedzera Yahova.

 3. Ndi ipi thangwi ikulu inaticitisa kuphembera kwa Yahova?

³ Thangwi ikulu inaticitisa kuphembera kwa Yahova ndi yakuti iye asatiphemba toera kucita pyenepi. Mafalace asatiwangisa: ‘Lekani kutsamali nee na cinthu cibodzi, mbwenye pakucita maphembero, pakudembetera, pakucitambo takhuta mudziwise Mulungu pinthu pyanu pyonsene. Ntendere wa Mulungu wakupiringana ndzeru zonsene unadzakoya mitima yanu na ndzeru zanu mwa Kristu Yezu.’ (Afilipi 4:6, 7) Na thangwi ineyi, nee tisafunika kupwaza masasanyiro anewa adidi adacitirwa ife na Ntongi Wankulu Kakamwe wa kudzulu na pantsi!

 4. Kodi kuphembera kwa Yahova mwakukhonda phonya kusawangisa tani uxamwali wathu na iye?

⁴ Thangwi inango inaticitisa kuphembera ndi yakuti kuphembera kwa Yahova mwakukhonda phonya ndi njira yakuwangisa uxamwali wathu na iye. Axamwali andimomwene nkhabe kucedza basi ene angafuna cinthu. M’mbuto mwa pyenepi, axamwali adidi asatsalakanana, pontho uxamwali wawo usawanga kakamwe munalonga iwo manyerezero awo, pinentso pyawo na mabvero awo. Munjira ibodzi ene, uxamwali wathu na Yahova Mulungu usafunika ukhale tenepo. Na ciphedzo ca bukhu ino, mwadziwa pizinji pinapfundzisa Bhibhlya thangwi ya Yahova, uunthu wace na pifuniro pyace. Imwe mwandziwa ninga Munthu wandimomwene. Phembero isakupasani mwai wakulonga manyerezero anu na mabvero anu a muntima kwa Baba wanu wakudzulu. Munacita imwe pyenepi, musafendedzera kakamwe kwa Yahova.​—Tyago 4:8.

 5. Ndi ninji cinapangiza kuti Yahova nkhabe bvesera maphembero onsene?

⁵ Kodi Yahova asabvesera maphembero onsene? Onani pidalonga iye kwa Aisraele akupanduka mu ntsiku za mprofeta Izaiya: ‘Mungathimiza kuphembera, sinakubverani tayu, thangwi manja anu adzala na ciropa.’ (Izaiya 1:15) Natenepa, macitiro anango anacitisa kuti Mulungu akhonde bvesera maphembero athu. Toera maphembero athu abveserwe mwakutawirika kwa Mulungu, tisafunika kukwanirisa pinthu pinango pyakufunika.

 6. Toera Mulungu abvesere maphembero athu, ndi cinthu cipi cakutoma cinafunika na tinacikwanirisa tani?

⁶ Cinthu cakutoma ndi kukhala na cikhulupiro. (Lerini Marko 11:24.) Mpostolo Paulu alemba: ‘Mbwenye nee kum’bvera peno kukhulupira, tinacimwana kukomeresa Mulungu. Thangwi pisafunika kuti munthu wakufendedzera Mulungu akhulupire kuti Mulungu alipo, ndiye anabwezera pyadidi ale ananfuna.’ (Ahebere 11:6) Kukhala na cikhulupiro candimomwene kusapiringana kudziwa basi kuti Mulungu alipo, pontho kuti iye asabva na kutawira maphembero. Cikhulupiro cisapangizwa na macitiro athu. Ntsiku na ntsiku tisafunika kupangiza pakweca kuti tiri na cikhulupiro.​—Tyago 2:26.

 7. (a) Thangwi yanji tisafunika kupangiza cilemedzo munalonga ife na Yahova mu phembero? (b) Tinapangiza tani kuti tikuphembera kwa Mulungu na ntima onsene, pontho mwakucepeseka?

⁷ Yahova asafuna pontho kuti ale anaphembera kwa iye acite pyenepi mwakucepeseka na ntima onsene. Kodi ife nee tiri na thangwi toera kucepeseka munalonga ife na Yahova? Anthu angakhala na mwai wakulonga na mambo peno ntongi wa dziko, kazinji kene asapangiza cilemedzo, mukudzindikira ukulu wace ninga ntongi. Ndiye tani mphapo pakulonga na Yahova? Tisafunika kupangiza cilemedzo cikulu kakamwe. (Masalmo 138:6) Kusiyapo pyonsene, iye ndi “Mulungu wakukwanisa pyonsene.” (Genesi 17:1) Munaphembera ife kwa Mulungu, tisafunika kulonga mwakucepeseka munjira inapangiza kuti tikulonga na munthu wapadzulu kakamwe. Kucepeseka kweneku kunadzatiphedzambo kucita maphembero akubulukira muntima, mbiticalira maphembero mabodzi ene na akubwereza-bwereza.​—Mateo 6:7, 8.

 8. Tinacita tani pinthu mwakubverana na pinaphemba ife mu phembero?

⁸ Cinthu cinango cinafunika toera Mulungu atibvesere ndi kucita pinthu mwakubverana na maphembero athu. Yahova asadikhira kuti ticite pyonsene pinakwanisa ife toera pibverane na pinaphemba ife. Mwacitsandzo, tingaphembera, ‘Tipaseni lero cakudya cathu ca lero,’ tisafunika kuwangisira kuphata basa yonsene inakwanisa ife kucita. (Mateo 6:11; 2 Atesalonika 3:10) Tingaphembera toera tigumane ciphedzo ca kukunda kufewa kwa manungo, tisafunika kucalira makhaliro akuti anakwanisa kutitsogolera ku mayesero. (Akolose 3:5) Kusiyapo pinthu pyenepi pyakufunika, pana mibvundzo thangwi ya phembero yakuti tisafunika kudziwa matawiro wace.

 9. Kodi tisafunika kuphembera kwa ani, na kubulukira mwa ani?

⁹ Kodi tisafunika kuphembera kwa ani? Yezu apfundzisa atowereri ace kuti aphembere kwa ‘Baba wathu wakudzulu.’ (Mateo 6:9) Natenepa, maphembero athu asafunika kuperekwa basi kwa Yahova Mulungu. Mbwenye Yahova asafuna kuti tidziwe cidzo ca Mwanace m’bodzi ekha, Yezu Kristu. Ninga tapfundza mu Nsolo 5, Yezu atumwa kudza pa dziko yapantsi toera kudzatiombola ku madawo na kufa. (Jwau 3:16; Aroma 5:12) Iye aikhwa ninga Nyantsembe Wankulu na Nyakutonga Miseru. (Jwau 5:22; Ahebere 6:20) Na thangwi ineyi, Malemba asatipanga toera kupereka maphembero athu kubulukira mwa Yezu. Iye ene alonga: ‘Ine ndine njira na udidi na umaso. Nkhabepo munthu anafika kuna Baba mbakhonda kupita pana ine.’ (Jwau 14:6) Toera maphembero athu abveserwe, tisafunika kuphembera basi kwa Yahova kubulukira mwa Mwanace.

10. Thangwi yanji nkhabe funika n’khaliro wakupambulika pakuphembera?

¹⁰ Kodi tisafunika kukhala na n’khaliro wakupambulika pakuphembera? Nkhabe. Yahova nkhabe phemba n’khaliro wakupambulika, wa manja peno wa manungo onsene. Bhibhlya isapfundzisa kuti mphyakutawirika kuphembera m’makhaliro akusiyana-siyana. Makhaliro anewa asaphataniza kukhala pantsi, kukotama, kugodama na kukhala dzololo. (1 Amambo 19:4; Nehemiya 8:6; Danyele 6:10; Luka 18:13) Cinthu cakufunika kakamwe, si n’khaliro wakupambulika wakuti unakwanisa kuoniwa na anango tayu, mbwenye n’khaliro wadidi wa muntima. Natenepa, m’mabasa athu a ntsiku na ntsiku peno pakugumanikana na cinthu cakukhonda dikhira, tinakwanisa kucita phembero ya muntima konsene kwene kunagumanika ife. Yahova asabva maphembero anewa ngakhale kuti iwo nkhabe bveka na anthu ali cifupi na ife.​—Nehemiya 2:1-6.

11. Ndi pinthu pipi pingasi pidathema kulongwa mu phembero?

¹¹ Tisafunika kulonganji mu phembero? Bhibhlya isafokotoza: “Iye Mulungu anatibvera, tingam’phemba pinthu ninga munafunira iye.” (1 Jwau 5:14) Natenepa tinakwanisa kulonga pinthu pyonsene pyakubverana na cifuno ca Mulungu. Kodi pyenepi pisaphatanizambo kuphembera thangwi ya pinafuna ife ene? Inde! Kuphembera kwa Yahova kunakwanisa kukhala ninga kulonga na xamwali wapadhuzi. Tinakwanisa kulonga mwaufulu, ‘mbitidziwisa Mulungu pyonsene pinadzudzumisa ntima wathu.’ (Masalmo 62:8) Mphyakuthema kwa ife kuphemba nzimu wakucena, toera utiphedze kucita pinthu pyadidi. (Luka 11:13) Tinaphembambo citsogolero toera kucita pisankhulo pyandzeru. Pontho tinaphemba mphambvu munathimbana ife na pinentso. (Tyago 1:5) Tingadawa, tisafunika kuphemba kulekererwa kubulukira mu ntsembe ya Kristu. (Aefesi 1:3, 7) Nee tisafunika kuphemba pinthu pyathu basi tayu, mbwenye tisafunikambo kuphataniza anthu anango, ninga piwalo pya banja na alambiri andzathu.​—Machitiro 12:5; Akolose 4:12.

12. M’maphembero athu, tinapangiza tani kuti tisaikha pifuno pya Babathu wakudzulu pa mbuto yakutoma?

¹² Pifuno pya Yahova Mulungu pisafunika kukhala pa mbuto yakutoma m’maphembero athu. Mwandimomwene tiri na mathangwi toera kunsimba kubulukira muntima na kupereka takhuta kwa iye thangwi ya udidi wace onsene. (1 Pya dziko ya Israele 29:10-13) Yezu apereka phembero yacipangizo, idalembwa pa Mateo 6:9-13. Mu phembero ineyi iye atipfundzisa kuphembera kuti dzina ya Mulungu iceneswe, peno ipaswe mbiri. (Lerini.) Patsogolo pace alonga pya kudza kwa Umambo wa Mulungu na kucitwa kwa cifuno cace pa dziko yapantsi ninga kudzulu. Pidamala iye kulonga pinthu pyakufunika pinalonga thangwi ya Yahova Mulungu, Yezu aikha manyerezero ku pinthu pyathu. Tingaikha Mulungu pa mbuto yakufunika kakamwe m’maphembero athu, tisapangiza kuti ife nee tisanyerezera basi pifuno pyathu.

13. Kodi Malemba asalonganji thangwi yakulapha kwa maphembero akutawirika?

¹³ Kodi maphembero athu asafunika kukwata ndzidzi ungasi? Bhibhlya nkhabe ikha ndzidzi unafuna kwata maphembero athu ene peno apakweca. Iwo anakwanisa kukhala akubvira pakufuna kudya, peno akulapha munalonga ife kwa Yahova pinthu pyathu pyonsene piri muntima. (1 Samwele 1:12, 15) Mbwenye Yezu asumula anthu akhapangizika ninga akulungama mukucita maphembero akulapha toera aoniwe na anthu. (Luka 20:46, 47) Maphembero anewa nkhabe komeresa Yahova. Cinthu cakufunika ndi kucita phembero yakubulukira muntima. Kulapha kwa maphembero akutawirika kusasiyana mwakubverana na makhaliro.

14. Bhibhlya isafuna longanji munatidembetera iyo ‘kukhala mbaticita maphembero,’ na pyenepi pisatibalangaza tani?

¹⁴ Kodi tisafunika kuphembera kangasi pa ntsiku? Bhibhlya isatiwangisa ‘kukhala mbaticita maphembero,’ ‘kuwangisa pa kuphembera’ na ‘kucita maphembero nee kupuma.’ (Mateo 26:41; Aroma 12:12; 1 Atesalonika 5:17) Mwandimomwene, mafala anewa nee asabveka kuti tisafunika kuphembera m’midzidzi yonsene pa ntsiku. M’mbuto mwace, Bhibhlya isatidembetera toera kuphembera mwakukhonda phonya, kupitiriza na kupereka takhuta kwa Yahova thangwi ya kuticitira udidi na kusaka citsogolero cace, cibalangazo na mphambvu. Kodi si kwakubalangaza tayu kudziwa kuti Yahova nee asaikha madire a ulaphi wa ndzidzi peno maulendo anafunika ife kulonga na iye mu phembero? Khala tisakomerwadi na mwai wa kuphembera, tinadzasaka midzidzi izinji kuti tiphembere kwa Babathu wakudzulu.

15. Thangwi yanji tisafunika kucita “Amen” kunkhomo kwa maphembero athu ene na apakweca?

¹⁵ Thangwi yanji tisafunika kucita “Amen” kunkhomo kwa phembero? Fala yakuti “amen” isabveka “ndimomwene,” peno “mbipicitike.” Pitsandzo pya m’Malemba pisapangiza kuti mphyakufunika kucita “Amen” kunkhomo kwa maphembero athu ene na apakweca. (1 Pya dziko ya Israele 16:36; Masalmo 41:13) Tingacita “Amen” kunkhomo kwa phembero yathu ene, tisapangiza kuti pidalonga ife pyabulukadi muntima. Munacita ife “Amen,” mwacipantsipantsi peno mwakugaluza kunkhomo kwa phembero yapakweca yakucitwa na munthu unango, tisapangiza kuti tisabverana na manyerezero adalongwa.​—1 Akorinto 14:16.

16. Kodi tiri na cinyindiro canji thangwi ya phembero?

¹⁶ Kodi Yahova asatawiradi maphembero? Inde! Ife tiri na phata yakuwanga inaticitisa kukhala na cinyindiro cakuti ‘Mbveseri wa maphembero’ asatawira maphembero akubuluka muntima anacitwa na pikwi pya pikwi pya anthu. (Masalmo 65:2) Yahova anakwanisa kutawira maphembero athu munjira zakusiyana-siyana.

17. Thangwi yanji tinakwanisa kulonga kuti Mulungu asaphatisira aanju ace na atumiki ace a pa dziko yapantsi toera kutawira maphembero athu?

¹⁷ Yahova asaphatisira aanju na atumiki ace a pa dziko yapantsi toera kutawira maphembero. (Ahebere 1:13, 14) Piripo pyakugumana napyo pizinji pya anthu adaphembera kwa Mulungu toera aphedzwe kubvesesa Bhibhlya, na mwakukhonda dembuka afikirwa na m’bodzi wa atumiki a Yahova. Pyakugumana napyo pyenepi pisapangiza citsogolero ca aanju m’basa ya kumwaza mphangwa za Umambo. (Apokalipse 14:6) Toera kutawira maphembero anacita ife mu ndzidzi wakuti tisafuna kakamwe ciphedzo, Yahova anakwanisa kuphatisira Nkristu toera kutiphedza.​—Misangani 12:25; Tyago 2:16.

18. Kodi Yahova asaphatisira tani nzimu wace wakucena na Mafalace toera kutawira maphembero a atumiki ace?

¹⁸ Yahova Mulungu asaphatisirambo nzimu wace wakucena na Mafalace, Bhibhlya, toera kutawira maphembero a atumiki ace. Tingaphemba ciphedzo toera kuthimbana na mayesero, iye anakwanisa kutawira maphembero athu mbatipasa citsogolero na mphambvu kubulukira ku nzimu wace wakucena. (2 Akorinto 4:7) Kazinji kene ntawiro wa maphembero athu akufuna citsogolero usabuluka m’Bhibhlya, munatipasa Yahova ciphedzo ca kucita pisankhulo pyandzeru. Ife tinakwanisa kugumana malemba akuti anatiphedza mu ndzidzi unacita ife pfundziro yathu ya Bhibhlya na kuleri mabukhu Acikristu, ninga bukhu ino. Pinthu pinalongwa m’misonkhano Yacikristu peno pinalongwa na nkulu wa mpingo wacitsalakano pinakwanisa kutipangiza ntsonga za m’Malemba zinafuna ife kudinga.​—Agalata 6:1.

19. M’midzidzi inango, tingaona kuti maphembero athu asadembuka kutawirwa, kodi tisafunika kukumbukanji?

¹⁹ Khala Yahova asaoneka ninga akudembuka kutawira maphembero athu, pyenepi nee pisabveka kuti akucimwana kuatawira. M’mbuto mwace, tisafunika kukumbuka kuti Yahova asatawira maphembero mwakubverana na cifuno cace na mu ndzidzi wace wakuthema. Iye asadziwa pinafuna ife na njira yakupitsalakana mwadidi kupiringana ife. Kazinji kene iye asasiya kuti tipitirize ‘kuphemba, kusaka na kudhima.’ (Luka 11:5-10) Kupirira kweneku kusapangiza kuna Mulungu kuti cifuno cathu ndi cikulu kakamwe na cikhulupiro cathu ndi candimomwene. Pontho, Yahova anakwanisa kutawira maphembero athu munjira yakuti nee tinaibvesesa mwadidi. Mwacitsandzo, iye anakwanisa kutawira phembero inacita ife thangwi ya mayesero, tayu mukubulusa mayesero anewa, mbwenye mukutipasa mphambvu toera kuapirira.​—Lerini Afilipi 4:13.

20. Thangwi yanji tisafunika kuphindula mwakukwana na mwai wakufunika wa phembero?

²⁰ Tisapereka takhuta wankulu kuna Nciti wa kudzulu na pantsi wakuti ali dhuzi na anthu onsene anancemera mwakuthema mu phembero! (Lerini Masalmo 145:18.) Tendeni tiphindule mwakukwana na mwai wakufunika wa phembero. Tingacita pyenepi, tinadzapangiza kuti tisatsandzaya mukufendedzera dhuzi Yahova, Mbveseri wa maphembero.