Kodi Basa Yathu Ya Kumwaza Mphangwa Za Umambo Isacitwa Tani?

Mu ndzidzi wakucepa, Yezu mbadzati kufa adziwisa: ‘Penepo mphangwa zadidi za Umambo zinadzamwazwa pantsi ponsene, toera kupereka umboni kwa anthu a mitundu yonsene. Pingamala ipi, inadzabwera nthawi ya kumalisiratu pyonsene.’ (Mateo 24:14) Mphapo, basa yakumwaza mphangwa pa dziko yonsene mbidakwaniriswa tani? Mukutowezera citsandzo cidakhazikisa Yezu pa ndzidzi ukhali iye pa dziko yapantsi.—Luka 8:1.

Tisayesera kucedza na anthu m’mamidzi mwawo. Yezu apfundzisa anyakupfundzace toera kumwaza mphangwa zadidi nyumba na nyumba. (Mateo 10:11-13; Machitiro 5:42; 20:20) Amwazi mphangwa a pyaka dzana yakutoma akhadapaswa pisa toera kumwaza mphangwa. (Mateo 10:5, 6; 2 Akorinto 10:13) Sawasawa lero, basa yathu yakumwaza mphangwa isacitwa mwadidi, mpingo ubodzi na ubodzi usapaswa cisa toera kumwaza mphangwa. Pyenepi pisaticitisa kukwanirisa matongero a Yezu a ‘kupfundzisa anthu, mbaticita umboni.’—Machitiro 10:42.

Tisawangisira kumwaza mphangwa konsene kwene kunagumanika anthu. Yezu akhazikisambo citsandzo mu kumwaza mphangwa kwa anthu m’mbuto zapakweca, ninga n’gombe mwa bara peno mbuto zikhagumanika anthu. (Marko 4:1; Jwau 4:5-15) Ifembo tisalonga na anthu thangwi ya Bhibhlya konsene kwene kunakwanisa ife kuagumana—m’miseu, mbuto zamalonda, m’maparki, peno mukuphatisira ntokodzi. Pontho tisapereka umboni kwa anyakuendekana athu, andzathu a pabasa, akuxikola, na acibale athu khala tiri na mwai wakucita pyenepi. Kuwangisira kweneku konsene kusacitisa pikwi na pikwi pya anthu kubva “mphangwa zadidi zacipulumuso.”—Masalmo 96:2, Tradução do Novo Mundo.

Alipo ananyerezera imwe toera kum’mwazira mphangwa zadidi za Umambo wa Mulungu, pontho mphangwa zenezi zinakhuya tani tsogolo yawo? Lekani kubisira anango mphangwa zenezi za cidikhiro. Agawireni mphangwa za Mulungu mwakucimbiza!

• Ndi zipi “mphangwa zadidi” zinafunika kumwazwa?

• Mboni za Yahova zisatowezera tani citsandzo ca Yezu pakumwaza mphangwa?