NSOLO WA PFUNDZIRO 25
NYIMBO 7 Yahova Ndi Mphambvu Yathu
Kumbukani Kuti Yahova “Ndi Mulungu wa m’Maso”
“Yahova ali m’maso!”—MAS. 18:46.
PINAFUNA IFE KUPFUNDZA
Mu nsolo uno tinapfundza kuti thangwi yanji ndzidzi onsene ndi pyakufunika kukumbuka kuti Mulungu anatumikira ife ndi “Mulungu wa m’maso.”
1. Ninji pinaphedza atumiki a Yahova toera apitirize kuntumikira mwakukhonda tsalakana nyatwa zinatamba iwo?
BHIBHLYA isalonga kuti tikukhala m’midzidzi “yakugopswa na yakunentsa kupirira.” (2 Tim. 3:1) Ninga atumiki a Yahova, ife tisathabuka na nyatwa zinatamba anthu onsene mu dziko ino ya Sathani, pontho tisathabukambo na kutcingwa thangwi yakutumikira Yahova. Mphapo ninji pinafuna kutiphedza toera tipitirize kutumikira Yahova mwakukhonda tsalakana nyatwa zenezi? Cibodzi mwa pinthu pinafuna kutiphedza ndi kudziwa kuti Yahova “ndi Mulungu wa m’maso.”—Yer. 10:10; 2 Tim. 1:12.
2. Ndi munjira ipi Yahova ndi Mulungu wa m’maso, pontho pyenepi pisatiwangisa tani?
2 Yahova ndi Munthu wandimomwene wakuti asaona nyatwa zinatamba ife, pontho ndzidzi onsene iye asafuna kutiphedza. (2 Kro. 16:9; Mas. 23:4) Tingadziwa kuti Mulungu anatumikira ife asatitsalakana, pontho ndzidzi onsene asafuna kutiphedza, pisatipasa mphambvu toera kupirira nyatwa zathu. Tendeni tione kuti pyenepi pyaphedza tani Mambo Dhavidhi na atumiki anango a Yahova.
3. Kodi Dhavidhi akhafuna kulonganji pidalonga iye kuti “Yahova ali m’maso”?
3 Dhavidhi akhadziwa mwadidi Yahova, pontho akhan’nyindira. Mu ndzidzi wakuti Mambo Sauli na anango akhasaka Dhavidhi toera kumupha, Dhavidhi acita phembero kuna Yahova mbaphemba ciphedzo. (Mas. 18:6) Mulungu pidatawira iye phembero ya Dhavidhi mbam’phedza, Dhavidhi alonga: “Yahova ali m’maso!” (Mas. 18:46) Kodi Dhavidhi akhafuna kulonganji na mafala anewa? Bukhu inango yalonga kuti Dhavidhi akhagomezera kuti Yahova “ndi Mulungu wandimomwene, wakuti ndzidzi onsene asaphedza atumiki ace.” Pidacitikira Dhavidhi pyam’phedza toera kudziwa kuti ndzidzi onsene Yahova akhadziwa pikhancitikira, pontho akhali dzololo toera kum’phedza. Ndi pyenepi pidaphedza Dhavidhi toera apitirize kutumikira Yahova na kunsimba.—Mas. 18:28, 29, 49.
4. Thangwi yanji tisafunika kukhala na cinyindiro cakuti Yahova ndi Mulungu wa m’maso?
4 Kukhala na cinyindiro cakuti Yahova ndi Mulungu wa m’maso kunatiphedza toera tintumikire mwaphinga. Pyenepi pinatipasa mphambvu toera tipirire nyatwa zinatamba ife na kutiphedza toera tipitirize kucita pyonsene pinakwanisa ife m’basa yace. Pontho pinatiphedza toera tipitirize kukhala na uxamwali wakuwanga na Yahova.
MULUNGU WA M’MASO ANAKUPASANI MPHAMBVU
5. Ninji pinafuna kutiphedza toera tinyindire Yahova midzidzi ya nyatwa? (Afilipi 4:13)
5 Tingakumbuka kuti Yahova ndi Mulungu wa m’maso, pontho ndzidzi onsene iye ali dzololo toera kutiphedza, tinakwanisa kupirira nyatwa zathu zonsene. Iye anakwanisa kutiphedza mu nyatwa zathu zonsene, thangwi nkhabe nyatwa yakuti ndi ikulu kakamwe kuna Mulungu wathu. Iye ndi Mulungu Wamphambvu Zonsene, pontho anakwanisa kutipasa mphambvu toera kupirira nyatwa zathu. (Lerini Afilipi 4:13.) Kudziwa pyenepi kunatiphedza m’midzidzi ya nyatwa. Tingaona Yahova mbatiphedza, ngakhale mu nyatwa zathu zing’ono, tisakhala na cinyindiro cakuti iye anadzatiphedzambo mu nyatwa zakunentsa kakamwe.
6. Ninji pidacitikira Dhavidhi pikhali iye m’phale pyakuti pyancitisa kunyindira kakamwe Yahova?
6 Onani pinthu piwiri pidacitika mu umaso wa Dhavidhi pyakuti pyam’phedza toera kunyindira kakamwe Yahova. Pikhali iye m’phale, Dhavidhi akhali nkumbizi. Ntsiku inango, yabwera nkhalamu mbikwata bira ibodzi pa nkumbi wa babace. Paulendo unango, abwera ursu mbacitambo pibodzi pyene. M’maulendo anewa mawiri, mwacipapo Dhavidhi apha pinyama pyenepi mbapulumusa mabira. Mbwenye Dhavidhi nee anyerezera kuti akwanisa kucita pyenepi na mphambvu zace. Iye akhadziwa kuti ndi Yahova adampasa cipapo na mphambvu yakucita pyenepi. (1 Sam. 17:34-37) Dhavidhi cipo aduwala pyenepi. Mu ndzidzi ukhanyerezera iye pyenepi, cinyindiro cace cakuti Mulungu wa m’maso mbadam’phedza ntsogolo, cikhapitiriza kuthimizirika.
7. Dhavidhi akhanyindira ani, pontho pyenepi pyam’phedza tani toera kupha Goliyati?
7 Mukupita kwa ndzidzi, Dhavidhi mbaciri m’phale, aenda ku misasa ya anyankhondo a Aizraeli. Iye adzindikira kuti anyankhondo akhagopa, thangwi nyankhondo wamphambvu kakamwe wa Afilisti akhacemerwa Goliyati ‘akhapwaza anyankhondo a Izraeli.’ (1 Sam. 17:10, 11) Anyankhondo akhagopa thangwi akhaona basi ene cimo ca Goliyati, manungo ace na kuthusa kukhacita iye. (1 Sam. 17:24, 25) Mbwenye Dhavidhi akhaona pinthu munjira yakusiyana. Iye akhadziwa kuti Goliyati nee akhapwaza basi ene anyankhondo a Izraeli, mbwenye akhapwaza “anyankhondo a Mulungu wa m’maso.” (1 Sam. 17:26) Dhavidhi akhanyindira kakamwe Yahova. Iye akhadziwa kuti Mulungu adam’phedza pikhali iye nkumbizi, mbadamphedzambo mu ndzidzi unoyu. Na thangwi ineyi, Dhavidhi amenya Goliyati mbamupha!—1 Sam. 17:45-51.
8. Ninji pinafuna kuwangisa cinyindiro cathu cakuti Yahova anatiphedza m’midzidzi ya nyatwa? (Onanimbo foto.)
8 Ifembo tinakwanisa kupirira nyatwa zathu, tingakumbuka kuti Mulungu wa m’maso ndzidzi onsene anatiphedza. (Mas. 118:6) Ife tinakwanisa kunyindira Yahova tingakumbuka pinthu pidaticitira iye. Natenepa, lerini mbiri za m’Bhibhlya zinapangiza kuti Yahova aphedza tani atumiki ace. (Iza. 37:17, 33-37) Imwe munakwanisambo kuleri mu saiti yathu jw.org mphangwa zinalonga pinthu pidacitikira abale na alongo athu. Mphangwa zenezi zisapangiza pakweca kuti Yahova asaphedza atumiki ace lero. Kusiyapo pyenepi, imwe munakwanisa kukumbuka midzidzi idakuphedzani Yahova. Maseze njira idakuphedzani Yahova nee ndi yakudzumatirisa kakamwe ninga kupha ursu peno nkhalamu, undimomwene ndi wakuti ndzidzi onsene Yahova akhali dzololo toera kukuphedzani. Ndiye akusankhulani toera mukhale xamwali wace. (Juw. 6:44) Pontho imwe musapitiriza kuntumikira thangwi ya ciphedzo cace. Musaona tani kuphemba Yahova toera akuphedzeni kukumbuka midzidzi idatawira iye maphembero anu, peno pidakhala iye kukhundu yanu mu ndzidzi wakunentsa? Kunyerezera pyenepi kunakupasani cinyindiro cakuti ndzidzi onsene Yahova anakuphedzani.
Njira inacita ife pinthu tingayeserwa isakhuya kakamwe Yahova (Onani ndima 8-9)
9. Tisafunika kukumbukanji mu ndzidzi unatamba ife nyatwa? (Misangani 27:11)
9 Kuona Yahova ninga Munthu wandimomwene kunatiphedza toera kukhala na maonero akulinganira tingathimbana na nyatwa. Tinacita tani pyenepi? Tingatamba nyatwa, tisafunika kukumbuka kuti ndi pinthu pipi pyakufunika kakamwe. Sathani asalonga kuti tingathabuka tinasiya kutumikira Yahova. Natenepa, njira inacita ife pinthu tingayeserwa isakhuya kakamwe Yahova. (Yobe 1:10, 11; lerini Misangani 27:11.) Tingapitiriza kukhala akukhulupirika kuna Yahova, mwakukhonda tsalakana nyatwa zathu, tisapangiza kuti tisanfuna, pontho tisapangiza kuti Sathani ndi nyauthambi. Kodi imwe muli kutcingwa na mautongi, musanentseka toera kugumana kobiri, anthu nee asabvesera mphangwa zinamwaza imwe peno musathabuka na ntundu unango wa mayesero? Khala ndi tenepo, kumbukani kuti nyatwa zanu zisakupasani mwai toera kutsandzayisa Yahova. Pontho lekani kuduwala kuti Yahova cipo anatawirisa kuti muthimbane na mayesero akuti nee munakwanisa kuapirira. (1 Akor. 10:13) Iye anakupasani mphambvu toera mukwanise kupirira.
MULUNGU WA M’MASO ANAKUPASANI NKHOMBO
10. Yahova asapikiranji kuna ale anantumikira mwakukhulupirika?
10 Ndzidzi onsene Yahova asapasa nkhombo ale anantumikira mwakukhulupirika. (Aheb. 11:6) Iye asatiphedza toera tikhale na ntendere na akutsandzaya cincino, pontho ntsogolo anadzatipasa umaso wakukhonda mala. Ife tiri na cinyindiro cakuti Yahova asafuna kutipasa nkhombo, pontho iye ali na mphambvu yakucita pyenepi. Natenepa, tendeni ticite pyonsene pinakwanisa ife toera kuntumikira ninga pidacita atumiki ace a mu ndzidzi wakale. M’bodzi wa iwo akhali Timoti.—Aheb. 6:10-12.
11. Thangwi yanji Timoti akhali waphinga mu mpingo? (1 Timoti 4:10)
11 Lerini 1 Timoti 4:10. Timoti akhakhulupira kuti Mulungu mbadampasa nkhombo. Na thangwi ineyi, iye akhali waphinga m’basa ya Yahova na mu ndzidzi ukhaphedza iye anango. Kodi iye acita tani pyenepi? Mpostolo Paulu ampanga toera awangisire kuti akhale mpfundzisi wadidi pakumwaza mphangwa na mu mpingo. Pontho mpostolo Paulu apanga Timoti toera akhale citsandzo cadidi kuna abale, mwakukhonda tsalakana khala ndi aphale peno amuna akulu. Kusiyapo pyenepi, Timoti apaswa mabasa anango akunentsa, akuti akhaphataniza kupasa uphungu wamphambvu, mbwenye akhafunika kucita pyenepi mwaufuni. (1 Tim. 4:11-16; 2 Tim. 4:1-5) Maseze anthu anango nee akhaona mabasa akhacita Timoti, peno nee akhapereka takhuta thangwi ya mabasa anewa, iye akhadziwa kuti Yahova akhaona pyonsene pikhacita iye, pontho mbadampasa nkhombo thangwi ya pyenepi.—Aroma 2:6, 7.
12. Thangwi yanji akulu a mpingo asawangisira toera kuphedza mpingo? (Onanimbo foto.)
12 Lero, akulu a mpingo asafunikambo kukhala na cinyindiro cakuti Yahova asaona mabasa adidi anacita iwo, pontho asakomerwa nawo. Kusiyapo kukumbiza mabira a Yahova, kupfundzisa na kumwaza mphangwa, akulu a mpingo azinji asaphedzerambo mabasa akumanga na pangaoneka cidengwa. Anango asatumikira m’Misoka Yakucedzera Atenda, peno mu Komiti Yakupita Ncibverano na Nyumba za Ungumi. Akulu a mpingo anaperekeka toera kucita mabasa anewa, asadziwa kuti mpingo ndi wa Yahova, tayu wa anthu. Ndi thangwi yace, iwo asacita pyonsene pinakwanisa iwo, pontho ali na cinyindiro cakuti Yahova anaapasa nkhombo thangwi ya pinacita iwo.—Akol. 3:23, 24.
Mulungu wa m’maso anakupasani nkhombo mungacita pyonsene pinakwanisa imwe toera kuphedza mpingo (Onani ndima 12-13)
13. Yahova asapibva tani angaona kuwangisira kunacita ife toera kuntumikira?
13 Nee ndi abale onsene anakwanisa kutumikira ninga akulu a mpingo, mbwenye tonsene tinakwanisa kupasa cinthu Yahova. Mulungu wathu asakomerwa kakamwe tingacita pyonsene pinakwanisa ife toera kuntumikira. Iye asaona pyakupereka pinacita ife toera kuphedzera basa inacitwa pa dziko yonsene yapantsi, maseze pikhale pyakucepa. Iye asakomerwa tingawangisira toera kutawira pa misonkhano ya mpingo maseze ndife amanyadzo, pontho iye asakomerwa kakamwe tingalekerera anango. Maseze munyerezere kuti nee musacita pizinji m’basa ya Yahova ninga pinafuna imwe, khalani na cinyindiro cakuti iye asakomerwa kakamwe na pyonsene pinacita imwe. Iye asakufunani kakamwe, pontho anadzakupasani nkhombo.—Luka 21:1-4.
KHALANI NA UXAMWALI WAKUWANGA NA MULUNGU WA M’MASO
14. Kukhala na uxamwali wakuwanga na Yahova kunatiphedza tani toera kukhala akukhulupirika? (Onanimbo foto.)
14 Pinakhala pyakukhonda nentsa kupitiriza kukhala wakukhulupirika kuna Yahova, tingamuona ninga munthu wandimomwene. Ndi pyenepi pidacita Zuze. Iye akhonda kucita ulukwali thangwi akhadziwa kuti pyenepi mbapidatsukwalisa Yahova. (Gen. 39:9) Toera tikhale na uxamwali wakuwanga na Yahova, tisafunikambo kusaka ndzidzi wakucita phembero toera kucedza naye na kupfundza Mafalace. Tingakhala na uxamwali wakuwanga kakamwe na Yahova, tinacalira kucita pinthu pinantsukwalisa.—Tiya. 4:8.
Kukhala na uxamwali wakuwanga na Mulungu wa m’maso kunakuphedzani toera kukhala wakukhulupirika (Onani ndima 14-15)
15. Tisapfundzanji na pidacitikira Aizraeli pikhali iwo n’nthando? (Ahebheri 3:12)
15 Ale anasiya kunyindira Yahova, asasiya kuntumikira mwakukhonda nentsa. Onani pidacitikira Aizraeli mu ndzidzi ukhali iwo n’nthando. Iwo akhadziwa kuti Yahova alipo, mbwenye akhatoma kupenula khala mwandimomwene iye mbadaatsalakana. Natenepa iwo abvundza: “Kodi Yahova ali pakati pathu peno nkhabe?” (Eks. 17:2, 7) Thangwi yakupenula kweneku, iwo asiya kutumikira Mulungu. Natenepa, ife nee tisafunika kukhala ninga iwo mbatikhonda kubvera Yahova.—Lerini Ahebheri 3:12.
16. Cikhulupiro cathu cinayeserwa tani?
16 Ndi pyakunentsa kupitiriza kukhala na uxamwali wakuwanga na Yahova mu dziko ino. Thangwi anthu azinji asalonga kuti Mulungu nee alipo. Pontho ale anapwaza Mulungu asaoneka ninga ali na umaso wadidi. Tingaona pyenepi, panango cikhulupiro cathu cinayeserwa. Ndimomwene kuti nee tinapenula khala Mulungu alipo, mbwenye panango tinatoma kupenula khala iye anatiphedzadi. Mwacitsandzo, pyenepi pyacitikambo kuna nyamasalmo adalemba Masalmo 73. Iye akhaona anthu mbakapwaza mitemo ya Mulungu, pontho mbakacita pinthu pikhakomerwa na iwo. Na thangwi ineyi, iye atoma kupenula khala mphyakuphedza kupitiriza kutumikira Mulungu peno nkhabe.—Mas. 73:11-13.
17. Ninji pinafuna kutiphedza toera tipitirize kukhala axamwali a Yahova?
17 Ninji pidaphedza nyamasalmo unoyu toera kucinja maonero ace? Iye anyerezera pinafuna kudzacitikira ale anasiya kutumikira Yahova. (Mas. 73:18, 19, 27) Iye anyerezerambo nkhombo zikhafuna kukhala na iye thangwi yakutumikira Mulungu. (Mas. 73:24) Ife tinakwanisambo kunyerezera nkhombo zonsene zinatipasa Yahova. Nyerezerani kuti umaso wanu mbudakhala tani mbamudakhonda kutumikira Yahova. Kunyerezera pyenepi kunatiphedza toera tipitirize kukhala akukhulupirika kuna iye. Natenepa, ife tinakwanisa kulonga ninga nyamasalmo kuti: “Kwa ine, kufendedzera Mulungu ndi cinthu cadidi kakamwe.”—Mas. 73:28.
18. Thangwi yanji nee tisafunika kugopa pinafuna kucitika ntsogolo?
18 Ife tinakwanisa kupirira nyatwa zonsene zinatamba ife mu ntsiku zino zakumalisa, thangwi ndife “mabitcu a Mulungu wa m’maso na wandimomwene.” (1 Ates. 1:9) Yahova Mulungu wathu ndi Munthu wandimomwene wakuti ndzidzi onsene ali dzololo toera kuphedza atumiki ace. Iye aphedza atumiki ace a mu ndzidzi wakale, pontho asacitambo pibodzi pyene lero. Mwakukhonda dembuka, nyatwa ikulu inatoma. Mbwenye ife nee tinakhala tekhene, Yahova anakhala kukhundu yathu. (Iza. 41:10) Natenepa, tendeni tonsene “tikhale na cipapo kakamwe, mbatilonga kuti: ‘Yahova ndiye anandiphedza; nee ndinadzagopa.’”—Aheb. 13:5, 6.
NYIMBO 3 Yahova Asatipasa Mphambvu, Cidikhiro na Cinyindiro