Aphale na Atsikana—Pitirizani Kuthambaruka Mwauzimu Pakumala Kubatizwa

 1. Ndi pinthu pipi pyadidi pidacita aphale na atsikana azinji?

PYAKA pyonsene aphale na atsikana azinji kakamwe asabatizwa. Kodi imwe mwacitambo pyenepi? Khala ndi tenepo, abale na alongo anu asakomerwa kakamwe thangwi ya imwe, pontho Yahova asakomerwambo kakamwe! (Mis. 27:11) Nyerezerani pinthu pyonsene pyadidi pidacita imwe. Panango mwapfundza mwaphinga Bhibhlya mu pyaka pizinji. Pontho pyenepi pyakuphedzani toera kukhala na cinyindiro cakuti Bhibhlya ndi Mafala a Mulungu. Kusiyapo pyenepi, imwe mwadziwa, mbamufuna mwanaciro Bhibhlya. Imwe mwatoma kufuna kakamwe Yahova mpaka kuperekeka kuna iye mbamubatizwa. Pyenepi ndi pyakutsandzayisa kakamwe!

 2. Tinapfundzanji mu nsolo uno?

² Mwakukhonda penula, mbamudzati kubatizwa cikhulupiro canu cayeserwa munjira zakusiyana-siyana. Mbwenye mu ndzidzi unakula imwe, munathimbana na mayesero anango. Sathani anakuyeserani toera musiye kufuna Yahova na kuntumikira. (Aef. 4:14) Lekani kutawirisa kuti pyenepi picitike. Ninji cinafuna kukuphedzani toera kukhala wakukhulupirika kuna Yahova mbamupitiriza kuntumikira ninga mudapikira imwe? Imwe musafunika kupitiriza kuthambaruka mpaka kukhala Nkristu wakukola mwauzimu. (Aheb. 6:1) Munacita tani pyenepi? Ndi pyenepi pinafuna ife kupfundza mu nsolo uno.

 3. Akristu onsene asafunika kucitanji angamala kubatizwa?

³ Pakumala kubatizwa, tonsene tisafunika kuphatisira uphungu udapereka mpostolo Paulu kuna Akristu a ku Efeso. Iye aawangisa toera akhale Akristu “akukola” mwauzimu. (Aef. 4:13) Mafala anewa asabveka kuti iwo akhafunika ‘kupitiriza kuthambaruka.’ Paulu alandanisa kuthambaruka mwauzimu na kukula kwa mwana. Mwana angabalwa, anyakubalace asanfuna, pontho asakomerwa naye kakamwe. Mbwenye iye nee anapitiriza kukhala mwana kwenda na kwenda. Mukupita kwa ndzidzi, iye asafunika kusiya “makhaliro auwana.” (1 Akor. 13:11) Pyenepi pisacitikambo kuna Akristu. Pakumala kubatizwa, ife tisafunika kupitiriza kuthambaruka. Tendeni tione pinthu pingasi pinafuna kutiphedza toera kucita pyenepi.

 4. Ninji pinafuna kukuphedzani toera kuthambaruka mwauzimu? Fokotozani. (Afilipi 1:9)

⁴ Funani kakamwe Yahova. Imwe musafuna kakamwe Yahova. Mbwenye ufuni wanu kuna iye unakwanisa kuthimizirika. Munjira ipi? Mpostolo Paulu apangiza njira ibodzi inagumanika pa Afilipi 1:9. (Lerini.) Paulu acita phembero toera ufuni wa Akristu a ku Filipi upitirize ‘kuthimizirika kakamwe.’ Natenepa, ife tinakwanisa kuthimizira ufuni wathu kuna Yahova. Tinacita tani pyenepi? Tinakwanisa kucita pyenepi tingakhala na “cidziwiso candimomwene na luso yadidi yakudzindikira.” Tingadziwa mwadidi Yahova, tinanfuna, pontho tinakomerwa na makhaliro ace na njira inacita iye pinthu. Ife tinafuna kakamwe kuntsandzayisa, mbaticalira pinthu pyonsene pinantsukwalisa. Ife tisawangisira toera kubvesesa pinafuna iye, pontho kuti tinacita tani pyenepi.

5-6. Tinathimizira tani kufuna kwathu Yahova? Fokotozani.

⁵ Kufuna kwathu Yahova kunathimizirika kakamwe tingadziwa mwadidi Mwanace, wakuti asatowezera mwadidi kakamwe makhaliro a Pai wace. (Aheb. 1:3) Toera kudziwa mwadidi Yezu, ife tisafunika kupfundza mphangwa zinagumanika m’bukhu ya Mateu, Marko, Luka na Juwau. Khala imwe mudzati kutoma kuleri Bhibhlya ntsiku zonsene, imwe munakwanisa kutoma na mabukhu anewa analonga pya Yezu. Mu ndzidzi unaleri imwe mabukhu anewa, sakani kubvesesa mwadidi makhaliro ace. Anthu akhakomerwa kukhala na Yezu, kucedza naye, pontho mwaufuni iye akwata anang’ono mbaakhumbatira. (Marko 10:13-16) Yezu akhali wakukoma ntima na wauxamwali, pontho anyakupfundzace nee akhagopa kumpanga pikhanyerezera iwo. (Mat. 16:22) Pyenepi pisapangiza kuti Yezu atowezera mwadidi makhaliro a Pai wace. Ninga Yezu, Yahova ndi wauxamwali kakamwe. Ife tinakwanisa kulonga naye tingacita phembero. Pakucita phembero, ife tinakwanisa kumpanga pyonsene pinatidzudzumisa na pinthu piri muntima mwathu. Tiri na cinyindiro consene cakuti iye nee anatisandika tingacita pyenepi; thangwi iye asatifuna, pontho asatitsalakana.—1 Ped. 5:7.

⁶ Yezu akhabvera ntsisi anthu. Mpostolo Mateu alonga: “Pidaona Yezu mwinji wa anthu, iye aabvera ntsisi, thangwi iwo akhapwazwa na kutsalakanwa mwakuipa ninga mabira akusowa nkumbizi.” (Mat. 9:36) Mphapo ndiye tanimbo Yahova? Yezu alonga: “Babanga wakudzulu nkhabe funa kuti m’bodzi wa anthu awa akucepeseka atayike.” (Mat. 18:14) Mafala anewa asatitsandzayisa, thangwi asapangiza kuti Yahova asatifuna kakamwe! Ife tingadziwa mwadidi Yezu, kufuna kwathu Yahova kunathimizirika.

 7. Munaphedzeka tani mungacedza na Akristu akukola mwauzimu?

⁷ Imwe munakwanisambo kukhala waufuni kakamwe na kuthambaruka mwauzimu mungacedza na abale na alongo a mu mpingo mwanu mbamuadziwa mwadidi. Onani kutsandzaya kwawo! Pontho iwo nee asatsumbikika thangwi yakusankhula kwawo kutumikira Yahova. Aphembeni toera akupangeni pinthu pidaacitikira m’basa ya Yahova. Mungafuna kucita cisankhulo cakufunika kakamwe mu umaso wanu, phembani uphungu wawo. Kumbukani kuti ‘pinthu pisafamba mwadidi pangakhala na mapungu mazinji.’—Mis. 11:14.

 8. Munacitanji khala musapenula pinalonga Bhibhlya?

⁸ Malisani kupenula kwanu. Ninga pidaona ife pa ndima 2, Sathani anayesera kukupingizani toera mukhonde kuwangisa cikhulupiro canu na uxamwali wanu na Yahova. Njira ibodzi inaphatisira iye ndi kukucitisani kupenula pinthu pinango pinapfundza imwe m’Bhibhlya. Panango anthu anango anakuyeserani toera mukhulupire kuti ife nee tacitwa na Mulungu, mbwenye tacita kusanduka. Pikhali imwe mwana, panango nee mukhanyerezera pya cipfundziso ceneci, mbwenye nakuti cincino ndimwe wathunga, panango musapfundziswa pyenepi kuxikola. Pinthu pinalonga apfundzisi anu thangwi yakusanduka kwa pinthu, panango pinaoneka ninga pyandimomwene na pyakubveka mwadidi. Mbwenye panango iwo cipo asaka kubvesesa pinthu pinapangiza kuti alipo Mulungu adacita pinthu pyonsene. Kumbukani mafala anagumanika pa Misangani 18:17: ‘Munthu angatoma kulonga nseru wace asaoneka ninga wakusowa mulando, mpaka angabwera ndzace mbapokanya pidalonga iye.’ Imwe nee musafunika kutawira pyonsene pinapfundziswa imwe kuxikola, mbwenye musafunika kupfundza mwadidi Mafala a Mulungu, Bhibhlya. Fufudzani m’mabukhu athu. Cedzani na abale akuti kale akhatawirambo kuti pinthu pyacita kusanduka. Abvundziseni kuti thangwi yanji asakhulupira kuti ndi Mulungu adacita pyonsene? Kucedza kweneku kunakuphedzani toera kuona pinthu pinapangiza kuti mwandimomwene ndi Mulungu adacita pinthu pyonsene.

 9. Mwapfundzanji na citsandzo ca Melissa?

⁹ Mulongo unango anacemerwa Melissa asaka mphangwa zinalonga kuti ndi Mulungu adacita pinthu pyonsene, pontho pyenepi pyam’phedza toera kumalisa kupenula kwace.b Iye alonga: “Kuxikola, apfundzisi asapfundzisa pinthu pinalonga thangwi ya kusanduka kwa pinthu mbacitisa anthu kunyerezera kuti cipfundziso ceneci ndi candimomwene. Pakutoma nee ndikhafuna kufufudza thangwi ndikhagopa kukhulupira kuti cipfundziso cinalonga pya kusanduka kwa pinthu ndi candimomwene. Mbwenye ndakumbuka kuti Yahova asafuna kuti tikhale na mathangwi adidi toera kukhulupira pinthu pinapfundza ife. Natenepa, ine ndatoma kusaka mphangwa zinalonga pyenepi. Ine ndaleri bukhu yakuti Existe um Criador Que Se Importa com Você?, bhruxura yakuti A Vida— Teve um Criador? na A Origem da Vida—Cinco Perguntas Que Merecem Resposta. Mabukhu anewa andiphedza kakamwe. Mbapidakhala mwadidi khala ndaaleri kalene.”

10-11. Ninji pinafuna kukuphedzani toera mupitirize na makhaliro adidi? (1 Atesalonika 4:3, 4)

¹⁰ Calirani makhaliro akuipa. Mu ndzidzi unakula aphale na atsikana, pifuno pyakupita m’mabonde pisathimizirika kakamwe, pontho panango iwo anakakamizwa na anango toera kucita ulukwali. Ndi pyenepi pinafuna Sathani toera imwe mucite. Mphapo ninji pinafuna kukuphedzani mungayeserwa toera kucita pinthu pyakuipa? (Lerini 1 Atesalonika 4:3, 4.) Mungacita phembero, dziwisani Yahova pinthu pinakudzudzumisani. Mpangeni pinthu pyonsene piri muntima mwanu, pontho m’phembeni toera akupaseni mphambvu. (Mat. 6:13) Kumbukani kuti Yahova asafuna kukuphedzani, tayu kukutcunyusani. (Masal. 103:13, 14) Bhibhlya inakwanisambo kukuphedzani. Melissa adalongwa pa ndima 9, awangisira kakamwe toera kukunda manyerezero aulukwali. Iye alonga: “Kuleri Bhibhlya ntsiku zonsene kwandiphedza toera kukunda pifuno pyakuipa. Kusiyapo pyenepi, kwandiphedzambo toera kukumbuka kuti ine ndine ntumiki wa Yahova, pontho ndisafuna kuntumikira.”—Masal. 119:9.

¹¹ Lekani kuyesera kumalisa nyatwa zanu mwekhene. Cedzani na anyakubalanu thangwi ya pinthu pinakudzudzumisani. Ndimomwene kuti ndi pyakunentsa kucedza na anyakubalanu pinthu pyenepi, mbwenye kucita pyenepi ndi kwakufunika kakamwe. Melissa alonga: “Ine ndacita phembero toera ndikhale na cipapo, buluka penepo ndacedza na pai wanga thangwi ya pinthu pikhandidzudzumisa. Pidamala ine kucedza nawo, ndakhala wakukhurudzika kakamwe. Ine ndadzindikira kuti Yahova atsandzaya na pidacita ine.”

12. Munakwanisa tani kucita pisankhulo pyadidi?

¹² Tsogolerwani na midida ya Bhibhlya. Mu ndzidzi unakula imwe, anyakubalanu anakutawirisani toera mucite mwekhene pisankhulo pinango. Mbwenye pali na pinthu pizinji pyakuti imwe mudzati kupidziwa. Munacalira tani madodo akuti anamalisa uxamwali wanu na Yahova? (Mis. 22:3) Mulongo unango anacemerwa Kari alonga pinthu pidam’phedza toera kucita pisankhulo pyadidi kakamwe. Iye adzindikira kuti Akristu akukola mwauzimu nee asafuna mitemo toera kuatsogolera mu pinthu pyonsene pinacita iwo. Iye alonga: “Ine ndikhafunika kubvesesa midida ya Bhibhlya, tayu kusaka mitemo toera kunditsogolera.” Mungaleri Bhibhlya, bvundzikani: ‘Kodi mphangwa zenezi zisandipfundzisanji thangwi ya pinanyerezera Yahova? Mphangwa zenezi ziri na uphungu wakuti unandiphedza toera kucita pinthu pyadidi? Khala ulipo, ndinaphedzeka tani ndingaubvera?’ (Masal. 19:7; Iza. 48:17, 18) Mungaleri Bhibhlya mbamunyerezera mwadidi pinaleri imwe, nee munanentseka kucita pisankhulo pinakomeresa Yahova. Mu ndzidzi unapitiriza imwe kuthambaruka, munaona kuti nee musafuna mitemo mu pinthu pyonsene pinacita imwe, thangwi munadziwa kuti ndi pinthu pipi pinakomerwa na Yahova.

13. Kodi axamwali adidi anakuphedzani tani? (Misangani 13:20)

¹³ Sankhulani axamwali anafuna Yahova. Ninga pidaona ife, imwe mungasankhula axamwali adidi anakuphedzani toera mukhale na uxamwali wakuwanga na Mulungu. (Lerini Misangani 13:20.) Mulongo unango anacemerwa Sara nee akhali wakutsandzaya. Mbwenye pali na cinthu cidam’phedza toera kukhala wakutsandzaya kakamwe. Sara alonga: “Ine ndagumana axamwali adidi pa ndzidzi wakuthema. Ine na mulongo unango wantsikana tikhapfundza pabodzi Ncenjezi masumana onsene. Xamwali wanga unango andiphedza toera nditomembo kutawira pa misonkhano. Thangwi ya ciphedzo ca axamwali anga, ine ndatoma kuona kuti pfundziro ya munthu paekha na kucita phembero ndi pyakufunika kakamwe. Kusiyapo pyenepi, ine ndatoma kukhala na uxamwali wakuwanga na Yahova mbandikhala pontho wakutsandzaya.”

14. Julien akwanisa tani kukhala na axamwali adidi?

¹⁴ Munacita tani uxamwali na anthu akuti anakwanisa kukuphedzani? Julien, wakuti cincino asatumikira ninga nkulu wa mpingo alonga: “Pikhali ine m’phale, ndacita uxamwali na abale mu ndzidzi ukhamwaza ine mphangwa na iwo. Axamwali anewa akhali aphinga m’basa yakumwaza mphangwa, pontho iwo andiphedza kuona kuti kumwaza mphangwa kusatsandzayisa kakamwe. Natenepa ndatoma kukhala na cifuno cakutumikira m’basa ya ndzidzi onsene. Ine ndadzindikirambo kuti nee ndikhali na axamwali azinji adidi, basi ene ndikhacita uxamwali na anthu a thunga yanga. Mukupita kwa ndzidzi ndadzakhalambo na axamwali adidi pa Bheteli. Makhaliro awo adidi andiphedza toera kusankhula mwadidi ubalangazi, pontho pyenepi pyandiphedza toera kukhala na uxamwali wakuwanga na Yahova.”

15. Ndi cenjezo ipi idapereka Paulu kuna Timoti? (2 Timoti 2:20-22)

¹⁵ Ndiye tani mungadzindikira kuti mu mpingo mwanu muli na m’bale peno mulongo wakuti nee ali na makhaliro adidi toera kucita naye uxamwali? Paulu akhadziwa kuti anthu anango a mu mpingo nee akhacita pinthu ninga Akristu, na thangwi ineyi iye apanga Timoti toera akhale kutali na anthu anewa. (Lerini 2 Timoti 2:20-22.) Uxamwali wathu na Yahova ndi wakufunika kakamwe. Ife tisawangisira kakamwe toera kukhala na uxamwali wakuwanga na Yahova, na thangwi ineyi nee tisafunika kukhala na axamwali akuti anafudza uxamwali unoyu.—Masal. 26:4.

16. Ndi pifuno pipi pyakuti munakwanisa kupikhazikisa?

¹⁶ Khazikisani pifuno pyakuti pinakuphedzani. Khazikisani pifuno pyakuti pinawangisa cikhulupiro canu mbamukhala Nkristu wakukola mwauzimu. (Aef. 3:16) Mwacitsandzo, imwe munakwanisa kukhazikisa cifuno cakucita pfundziro ya munthu paekha mwakukhonda phonya na kuleri Bhibhlya ntsiku zonsene. (Masal. 1:2, 3) Peno munawangisira kucita phembero ndzidzi onsene mbamulonga mafala akubuluka muntima. Panango munadzindikira kuti musafunika kucita mphole-mphole kakamwe pakusankhula ubalangazi na pakuphatisira ndzidzi wanu. (Aef. 5:15, 16) Yahova anatsandzaya angaona kuti musawangisira kakamwe toera kuthambaruka.

17. Munaphedzeka tani mungaphedza anango?

¹⁷ Imwe mungaphedza anango pinakuphedzanimbo toera mukhale Nkristu wakukola mwauzimu. Yezu alonga: “Kupasa kusatsandzayisa kakamwe kupiringana kutambira.” (Mabasa 20:35) Imwe munaphedzeka kakamwe mungaphatisira ndzidzi wanu na mphambvu zanu toera kuphedza anango. Mwacitsandzo, imwe munakwanisa kukhazikisa cifuno cakuphedza abale na alongo akukalamba na ale akuduwala mu mpingo mwanu. Panango imwe munakwanisa kuaphedza toera kugula pinthu peno kuaphedza toera adziwe kuphatisira telefoni, thabhuleti peno komputadhori. Khala ndimwe m’bale, khazikisani cifuno cakukhala ntumiki wakutumikira toera mukwanise kuphedza kakamwe abale na alongo. (Afil. 2:4) Imwe munakwanisambo kupangiza ufuni kuna anthu akuti nee ndi Mboni za Yahova mu kuamwazira mphangwa zadidi. (Mat. 9:36, 37) Pingakwanisika, khazikisani cifuno cakutumikira m’basa ya ndzidzi onsene.

18. Kutumikira m’basa ya ndzidzi onsene kunakuphedzani tani toera kuthambaruka mwauzimu?

¹⁸ Kutumikira m’basa ya ndzidzi onsene kunakuphedzani kakamwe toera kuthambaruka mwauzimu. Kutumikira ninga mpainiya kunakuphedzani toera mukwanise kukurusari Xikola ya Amwazi Mphangwa a Umambo, kutumikira ku Bheteli peno kuphedzera basa yakumanga Nyumba za Umambo na nyumba zinango zinaphatisirwa na gulu ya Yahova. Mulongo unango wantsikana anacemerwa Kaitlyn alonga: “Kumwaza mphangwa pabodzi na abale na alongo a maluso kwandiphedza toera kuthambaruka mwauzimu pidamala ine kubatizwa. Makhaliro awo andikulumiza toera kupfundza kakamwe Bhibhlya na kuthimizira maluso anga akupfundzisa.”

19. Ndi nkhombo zipi zinafuna kukhala na imwe mungapitiriza kuthambaruka mwauzimu?

¹⁹ Mu ndzidzi unapitiriza imwe kuthambaruka mwauzimu, Yahova anakupasani nkhombo zizinji. Imwe nee munabvunga mphambvu zanu toera kucita pinthu pyakusowa basa. (1 Juwau 2:17) Imwe munacalira kutsukwala thangwi yakucita pisankhulo pyakuipa. Mungacita pyenepi, pinthu pinakufambirani mwadidi mu umaso wanu mbamukhala wakutsandzaya. (Mis. 16:3) Citsandzo canu cadidi cinawangisa abale na alongo anu onsene. (1 Tim. 4:12) Pontho cinthu cakufunika kakamwe ndi cakuti mungacita pyenepi, imwe munakhala na ntendere mbamutsandzaya thangwi yakukomeresa Yahova na kukhala na uxamwali wakuwanga na iye.—Mis. 23:15, 16.