Yahova Ndi Wakulekerera Kakamwe

 1. Mwakubverana na Koelete 7:20, ndi undimomwene upi udalonga Mambo Salomoni?

MAMBO Salomoni alemba: ‘Pa dziko yapantsi nkhabepo munthu wakulungama wakuti ndzidzi onsene asacita pinthu pyadidi mbakhonda kudawa.’ (Koel. 7:20) Unoyu ndi undimomwene thangwi ife tonsene tisadawa. (1 Juwau 1:8) Natenepa ife tonsene tisafuna kulekererwa na Mulungu, pontho na anthu anango.

 2. Musapibva tani mungalekererwa na xamwali wanu wapantima?

² Panango imwe musakumbuka ntsiku idatsukwalisa imwe xamwali wanu wapantima. Imwe mukhafuna kucedza naye toera akulekerereni, na thangwi ineyi mwam’phemba toera akulekerereni. Mphapo mwapibva tani pidalekererwa imwe na xamwali wanu? Mwakukhonda penula imwe mwatsandzaya kakamwe.

 3. Tinapfundzanji mu nsolo uno?

³ Ife tisafuna kuti Yahova akhale Xamwali wathu wapantima, mbwenye midzidzi inango tinacita pinthu peno tinalonga pinthu pyakuti pinantsukwalisa. Mu nsolo uno, ife tinapfundza kuti thangwi yanji tiri na cinyindiro cakuti Yahova ali dzololo toera kutilekerera? Ndi munjira ipi kulekerera kwa Yahova ndi kwakusiyana na kulekerera kwa anthu? Pontho ndi anthu api analekererwa na Mulungu?

 4. Thangwi yanji tiri na cinyindiro cakuti Yahova ali dzololo toera kutilekerera?

⁴ Mafala a Mulungu asatipasa cinyindiro cakuti Yahova ali dzololo toera kutilekerera. Pikhafuna Yahova kupanga Mose thangwi ya makhaliro ace pa Phiri ya Sinai, Iye atuma anju toera kulonga: ‘Yahova, Yahova, Mulungu wantsisi na wakukoma ntima, wakupirira, waufuni kakamwe na waundimomwene, iye asapangiza ufuni kuna pikwi na pikwi pya anthu, mbalekerera madodo na madawo.’ (Eks. 34:6, 7) Yahova ndi Mulungu wakukoma ntima na wantsisi, pontho ndzidzi onsene ali dzololo toera kulekerera anyakudawa angatcunyuka.—Neh. 9:17; Masal. 86:15.

 5. Mwakubverana na Masalmo 103:13, 14, kodi Yahova asacitanji thangwi yakudziwa mwadidi anthu?

⁵ Ninga Nciti wathu, Yahova asadziwa pinthu pyonsene thangwi ya ife. Ndi pyakutsandzayisa kakamwe kudziwa kuti Yahova asadziwa anthu onsene pa dziko yapantsi. (Masal. 139:15-17) Natenepa iye asaona madodo onsene anacita ife thangwi yakusowa kwathu ungwiro. Kusiyapo pyenepi, iye asadziwambo pinthu pidaticitikira toera kukhala na umaso uli na ife lero. Kodi Yahova asacitanji thangwi yakudziwa mwadidi anthu? Iye asatibvera ntsisi.—Masal. 78:39; lerini Masalmo 103:13, 14.

 6. Yahova apangiza tani kuti asafuna kakamwe kutilekerera?

⁶ Yahova apangiza kuti asafuna kakamwe kutilekerera. Iye asabvesesa kuti thangwi ya pinthu pidacita munthu wakutoma, Adhamu, ife tonsene tisadawa, pontho tisafa. (Aroma 5:12) Nkhabepo cinthu cikhafuna kucita ife toera kusudzuka ku madawo na kufa peno kucitisa anango toera asudzuke ku madawo na kufa. (Masal. 49:7-9) Mbwenye Mulungu wathu waufuni atibvera ntsisi mbacita masasanyiro toera kutisudzula ku madawo na kufa. Kodi iye acita tani pyenepi? Lemba ya Juwau 3:16 isalonga kuti Yahova atuma Mwanace m’bodzi ekha toera kutifera. (Mat. 20:28; Aroma 5:19) Yezu atifera toera kusudzula anthu onsene anan’khulupira. (Aheb. 2:9) Pikhali pyakutsukwalisa kakamwe kuna Yahova kuona Mwanace wakufunika mbaphiwa munjira yakuipa kakamwe na yakupasa manyadzo. Mwakukhonda penula, khala Yahova nee akhafuna kutilekerera, Iye nee mbadatuma Mwanace toera kudzatifera.

 7. Ndi anthu api anango analongwa m’Bhibhlya akuti alekererwa na Yahova?

⁷ M’Bhibhlya muli na pitsandzo pizinji pya anthu adalekererwa na Yahova. (Aef. 4:32) Kodi alipo anakumbuka imwe? Panango musakumbuka Mambo Manase. Iye akhadacita pinthu pizinji pyakuipa kuna Yahova. Iye akhalambira alungu authambi, pontho akhakulumiza anango toera acitembo pibodzi pyene. Iye apha anace mbaapereka ninga ntsembe kuna alungu authambi. Kusiyapo pyenepi, iye acita dzimunthu yakusemwa mbaiikha mu templo ya Yahova. Bhibhlya isalonga kuti Manase ‘acita pinthu pizinji pyakuipa pamaso pa Yahova toera kuntsukwalisa.’ (2 Pya dziko. 33:2-7) Mbwenye pidatcunyuka iye na ntima onsene, Yahova amulekerera mban’khazikisa pontho ninga mambo. (2 Pya dziko. 33:12, 13) Panango imwe musakumbukambo Mambo Dhavidhi wakuti acita madawo mazinji pamaso pa Yahova, kuphatanizambo kucita upombo na kupha munthu. Mbwenye pidatcunyuka iye na ntima onsene mbadzindikira madawo ace, Yahova amulekerera. (2 Sam. 12:9, 10, 13, 14) Natenepa, ife tinakwanisa kukhala na cinyindiro cakuti Yahova asafuna kakamwe kulekerera anthu. Pontho ninga pinafuna kuona ife, kulekerera kwa Yahova kwasiyana kakamwe na kulekerera kunacita anthu.

 8. Thangwi yanji Yahova ndi Ntongi wadidi kakamwe?

⁸ Yahova ndi ‘Ntongi wa dziko yonsene yapantsi.’ (Gen. 18:25) Ntongi wadidi asafunika kudziwa mwadidi mitemo. Yahova ndi Ntongi wathu, pontho iye asadziwa mwadidi mitemo thangwi ndi Nyakukhazikisa Mitemo yathu. (Iza. 33:22) Nkhabe munthu unango anadziwa mwadidi kakamwe pinthu pyadidi na pyakuipa ninga Yahova. Ndi cinthu cipi cinango cakuti ntongi wadidi asafunika kucicita? Pakutonga, iye asafunika kudziwa undimomwene onsene mbadzati kucita cisankhulo. Natenepa, Yahova ndi Ntongi wadidi kakamwe thangwi iye asadziwa undimomwene onsene.

 9. Ndi pinthu pipi pinadziwa Yahova mbadzati kulekerera munthu?

⁹ Mwakusiyana na atongi anango onsene, Yahova ndzidzi onsene asadziwa undimomwene onsene pakutonga. (Gen. 18:20, 21; Masal. 90:8) Iye nee asatonga mwakubverana na pinaona anthu peno pinabva iwo. Yahova asadziwa kuti munthu asacita pinthu mwakubverana na makhaliro ace, njira idakuzwa iye, mbuto idakula iye, manyerezero ace na mabvero ace. Yahova asakwanisambo kudziwa piri muntima mwathu. Iye asadziwa mwadidi mathangwi adacitisa munthu kucita pinthu pyadidi peno pyakuipa. Pontho nkhabe cinthu cakubisika kuna iye. (Aheb. 4:13) Natenepa, Yahova angalekerera munthu ndi thangwi yakuti iye asadziwa undimomwene onsene wa pinthu pidacitika.

10. Thangwi yanji tinakwanisa kukhala na cinyindiro cakuti Yahova ndzidzi onsene asatonga mwadidi na mwaulungami? (Deuteronomyo 32:4)

¹⁰ Yahova ndzidzi onsene asatonga mwadidi na mwakulungama. Iye ndi wakusowa tsankhulo. Yahova nee asalekerera munthu thangwi ya maonekero ace, peno khala ndi wakupfuma, wakubvekera peno thangwi ya maluso ace. (1 Sam. 16:7; Tiya. 2:1-4) Nkhabepo munthu anakwanisa kukakamiza Yahova peno kun’dyekera. (2 Pya dziko. 19:7) Iye nkhabe cita pisankhulo thangwi ya kuipirwa peno mabvero anango. (Eks. 34:7) Mwakukhonda penula, Yahova ndi Ntongi wadidi kakamwe thangwi iye asadziwa pinthu pyonsene thangwi ya ife na makhaliro athu.—Lerini Deuteronomyo 32:4.

11. Ndi munjira ipi kulekerera kwa Yahova kwasiyana na kulekerera kwa anthu?

¹¹ Anyakulemba Malemba Acihebheri adzindikira kuti kulekerera kwa Yahova ndi kwakusiyana kakamwe na anthu. Midzidzi inango, iwo aphatisira fala Yacihebheri yakuti m’bukhu inango yalongwa kuti “fala ineyi isaphatisirwa basi ene toera kufokotoza njira inalekerera Mulungu anthu akudawa. Iyo nee isaphatisirwa toera kufokotoza njira inalekererana anthu unango na ndzace.” Basi ene ndi Yahova anakwanisa kulekerera munthu mbakhonda kukumbuka pontho madawo ace. Mphapo ninji pinacitika tingalekererwa na Yahova?

12-13. (a) Kodi munthu asapibva tani angalekererwa na Yahova? (b) Kodi Yahova asatilekerera tani?

¹² Ife tingakhulupira kuti Yahova atilekerera tisakhala ‘akubalangazwa,’ tisakhala na ntendere wa m’manyerezero na cikumbuntima cakucena. Ife tinakwanisa kukhala na mabvero anewa basi ene khala talekererwa na Yahova. (Mabasa 3:19) Yahova angatilekerera, iye asatitawirisa toera tikhale pontho axamwali ace mbaduwala madawo athu.

¹³ Yahova angatilekerera, iye nee asatipasabve mulando peno kutitcunyusa thangwi ya madawo anewa. (Iza. 43:25; Yer. 31:34) ‘Ninga kumabulukiro a dzuwa ndi kutali kakamwe na kumadokero a dzuwa,’ munjira ibodzi ene, Yahova angatilekerera asaikha kutali kakamwe madawo athu.b (Masal. 103:12) Ife tinganyerezera kulekerera kwa Yahova, tinapereka takhuta kakamwe, pontho tinamulemedza. (Masal. 130:4) Mphapo ndi anthu api analekererwa na Yahova?

14. Ninga pidapfundza ife, thangwi yanji Yahova asalekerera munthu?

¹⁴ Ninga pidapfundza ife, Yahova nee asalekerera munthu thangwi madawo adacita iye ndi mang’ono peno makulu. Pontho ife tapfundza kuti Yahova asaphatisira maluso ace ninga Nciti, Nyakukhazikisa Mitemo na Ntongi pakucita pisankhulo toera kulekerera munthu. Mphapo ndi pinthu pipi pinanyerezera iye mbadzati kucita cisankhulo cakulekerera munthu?

15. Mwakubverana na Luka 12:47, 48, ndi cinthu cipi cinanyerezera Yahova mbadzati kucita cisankhulo cakulekerera munthu?

¹⁵ Cibodzi mwa pinthu pinanyerezera Yahova mbadzati kucita cisankhulo cakulekerera munthu ndi kuona khala munthu unoyu adacita madawo akhadziwa kuti pikhacita iye ndi pyakuipa peno nkhabe. Yezu afokotoza mwadidi pyenepi pa Luka 12:47, 48. (Lerini.) Munthu ananyerezera kucita pinthu pyakuipa mbadziwa kuti pinthu pyenepi pinatsukwalisa Yahova buluka penepo mbapicita, anewa ndi madawo makulu. Panango Yahova nee analekerera munthu unoyu. (Marko 3:29; Juwau 9:41) Mbwenye midzidzi inango ife tisadzindikira kuti pidacita ife pikhali pyakuipa. Mphapo pyenepi pingacitika, kodi Yahova anatilekerera? Inde! Thangwi pana cinthu cinango cinanyerezera Yahova mbadzati kucita cisankhulo ca kutilekerera.

16. Kodi kutcunyuka kusabvekanji, pontho thangwi yanji ndi kwakufunika?

¹⁶ Cinthu cinango cinanyerezera Yahova ndi kuona khala munthu adacita madawo atcunyuka na ntima onsene. Kodi pyenepi pisabvekanji? Pisabveka ‘kucinja manyerezero, makhaliro peno cifuniro.’ Kusiyapo pyenepi, kutcunyuka kusaphataniza kusandikika kunacita munthu, mbakhala wakutsukwala kakamwe thangwi ya pinthu pyakuipa pidacita iye, peno thangwi yakukhonda kucita pinthu pyadidi pyakuti iye akhafunika kupicita. Ngakhale tenepo, munthu wakutcunyuka nee asatsukwala basi ene thangwi ya pyakuipa pidacita iye, mbwenye asatsukwalambo thangwi yakuluza uxamwali wace na Yahova. Kumbukani kuti Mambo Manase na Mambo Dhavidhi akhadacita madawo makulu; mbwenye Yahova aalekerera thangwi iwo atcunyuka na ntima onsene. (1 Ama. 14:8) Mwandimomwene, Yahova anatilekerera basi ene angaona pinthu pinapangiza kuti tatcunyuka. Mbwenye nee pyakwana kutsukwala basi ene thangwi ya madawo adacita ife. Kusiyapo pyenepi, ife tisafunika kucita pinthu.c Ceneci ndi cinthu cinango cinanyerezera Yahova mbadzati kucita cisankhulo ca kutilekerera.

17. Kodi kucinja ninji, pontho thangwi yanji ndi kwakufunika toera ticalire kucita pontho madawo? (Izaiya 55:7)

¹⁷ Cinthu cinango cinanyerezera Yahova mbadzati kucita cisankhulo cakulekerera ndi kuona khala munthu unoyu acinja makhaliro ace. Pyenepi pisabveka kuti munthu asafunika kusiya pyakuipa pikhacita iye mbatoma kucita pinthu pinakomeresa Yahova. (Lerini Izaiya 55:7.) Munthu unoyu adacita madawo asafunika kucinja manyerezero ace mbatsogolerwa na manyerezero a Yahova. (Aroma 12:2; Aef. 4:23) Iye asafunikambo kukhala wakutonga toera kusiya kucita pinthu pyakuipa na kunyerezera pinthu pyakuipa. (Akol. 3:7-10) Mwandimomwene Yahova asatilekerera, pontho asaticenesa ku madawo athu thangwi ya kukhulupira kwathu ntsembe ya Kristu. Mbwenye iye anaphatisira ntsembe ineyi toera kutilekerera angaona kuti tisawangisira toera kucinja makhaliro athu.—1 Juwau 1:7.

18. Ninji pidapfundza ife thangwi ya kulekerera kwa Yahova?

¹⁸ Tendeni tione pontho mwacigwagwa pinthu pingasi pyakufunika pidapfundza ife mu nsolo uno. Yahova ndi wakulekerera kakamwe kupiringana anthu onsene. Thangwi yanji tisalonga tenepo? Thangwi yakutoma ndi yakuti iye ndzidzi onsene ali dzololo toera kulekerera. Yaciwiri, iye asatidziwa mwadidi kakamwe. Iye asadziwa pyonsene thangwi ya ife, pontho ndi wakuthema kakamwe toera kuona khala mwandimomwene tatcunyuka peno nkhabe. Thangwi yacitatu, Yahova angatilekerera, iye asaduwala madawo onsene adacita ife. Pyenepi pisaticitisa kukhala na cikumbuntima cakucena na akutawirika kuna iye.

19. Maseze ndife anthu akusowa ungwiro, pontho tinapitiriza kucita madawo, thangwi yanji tinakwanisa kukhala akutsandzaya?

¹⁹ Nakuti ndife anthu akusowa ungwiro, ife tinapitiriza kucita madawo. Ngakhale tenepo, ife tinakwanisa kubalangazwa na mafala anagumanika m’bukhu Estudo Perspicaz das Escrituras, Volume 1, tsamba 210: “Yahova ndi wantsisi kakamwe, pontho asadziwa kuti atumiki ace ndi akufewa. Natenepa iwo nee asafunika kutsukwala ndzidzi onsene thangwi yakusowa kwawo ungwiro peno angadodoma. (Masal. 103:8-14; 130:3) Iwo angawangisira kucita pinthu pinakomeresa Mulungu, anakwanisa kukhala akutsandzaya. (Afil. 4:4-6; 1 Juwau 3:19-22).” Mafala anewa ndi akubalangaza kakamwe!

20. Ndi mibvundzo ipi inafuna kutawirwa mu nsolo unatowera?

²⁰ Ife tisapereka takhuta kakamwe kuna Yahova thangwi iye ndzidzi onsene ali dzololo toera kutilekerera madawo athu tingatcunyuka na ntima onsene. Mphapo tinatowezera tani kulekerera kwa Yahova? Ndi munjira ipi kulekerera kwathu kwalandana na kulekerera kwa Yahova, pontho ndi munjira ipi kulekerera kwathu kwasiyana na kwa Yahova? Thangwi yanji ndi pyakufunika kudziwa kusiyana kweneku? Nsolo unatowera unadzatawira mibvundzo ineyi.