Kodi Anyakufa Ali Kupi?

1-3. Ndi mibvundzo ipi inacita anthu thangwi ya kufa, na ndi matawiro api anapereka mauphemberi akusiyana-siyana?

INEYI ndi mibvundzo yakufunika kakamwe inacita anthu mu pyaka pizinji. Mwakukhonda tsalakana kuti ndife ani peno kunakhala ife, matawiro a mibvundzo ineyi ndi akufunika kwa m’bodzi na m’bodzi wa ife.

² Mu nsolo udamala, tadinga kuti ntsembe ya ciomboli ya Yezu Kristu yafungula tani njira ya ku umaso wakukhonda mala. Tapfundzambo kuti Bhibhlya isalongeratu pya ndzidzi wakuti ‘kufa hakunadzakhalapo pontho tayu.’ (Apokalipse 21:4) Mbwenye mu ndzidzi uno, ife tonsene tisafa. Mambo wa ndzeru Salomoni alonga: ‘Anthu ali maso asapidziwa kuti anafa.’ (Koelete 9:5) Ife tisayesera toera kukhala maso mu ndzidzi wakulapha. Ngakhale tenepa, tisadzudzumika na pire pinafuna kudzacitika kwa ife tingafa.

³ Anyakufunika athu angafa, tisatsukwala. Panango tinabvundza: ‘Kodi ndi ninji pinacitika kwa iwo? Ali kuthabuka? Ali kutiona? Tinakwanisa kuaphedza? Tinadzaaona pontho?’ Mauphemberi adziko asapereka matawiro akusiyana-siyana ku mibvundzo ineyi. Anango asapfundzisa kuti mungacita pinthu pyadidi, munadzaenda kudzulu, mbwenye mungacita pyakuipa, munadzapiswa n’djenje ya moto. Mauphemberi anango asapfundzisa kuti pa kufa, anthu asaenda ku mbuto yauzimu kakhala na makholo awo. Mauphemberi anangombo asapfundzisa kuti anyakufa asaenda ku dziko inango katongwa buluka penepo mbabvala manungo anango, peno kubalwa pontho m’manungo anango.

 4. Ndi api maonero a mauphemberi mazinji thangwi ya kufa?

⁴ Pipfundziso ipi pyonsene piri na maonero mabodzi ene, akuti iripo khundu ibodzi yathu inapulumuka pa kufa kwa manungo. Mauphemberi mazinji akale na acincino, asalonga kuti munjira inango ife tisakhala maso kwenda na kwenda na luso yakuona, kubva na kunyerezera. Mbapidakwanisika tani pyenepi? Ife tisaona, tisabva na tisanyerezera thangwi ongo wathu ukuphata basa. Pa kufa, ongo usasiya kuphata basa. Manyerezero athu, kubva na ndzeru zathu nkhabe phata basa pyokhene munjira inango yakukhonda dziwika. Ipyo nkhabe pitiriza khala maso pa kufa kwa ongo.

5, 6. Bhibhlya isapfundzisanji pya makhaliro a anyakufa?

⁵ Cinacitika pa kufa si cinthu cakubisika kwa Yahova tayu, Nciti wa ongo. Iye asadziwa undimomwene, pontho m’Mafalace, Bhibhlya, iye asafokotoza makhaliro a anyakufa. Bhibhlya isapfundzisa mwakubveka kuti: Munthu angafa, nkhubveka kuti nkhabepobve. Kufa ndi kusiyana na kukhala maso. Nyakufa nkhabe kuona, kubva peno kunyerezera. Nkhabe cinthu m’manungo mwathu cisapulumuka pa kufa. Ife nkhabe moyo peno nzimu wakukhonda kufa.a

⁶ Mudamala Salomoni kulonga kuti ali maso asadziwa kuti anadzafa, iye alemba: ‘Adafa nkhabe cibodzi cinadziwa iwo.’ Buluka penepo iye athimizira undimomwene unoyu mu kulonga kuti akufa nkhabe kwanisa kufuna peno kuida nakuti ‘munthumbi nkhabebve basa, nee pyakunyerezera, nee pyakudziwa, nee pya ndzeru.’ (Lerini Koelete 9:5, 6, 10.) Munjira ibodzi ene, Masalmo 146:4 isalonga kuti munthu angafa, ‘pisamala pyonsene pidatsungira iye.’ Ife tisafa, pontho nkhabe cinthu cinapitiriza kukhala maso pa kufa kwa manungo athu. Umaso uli na ife walandana na malirimi a nyale. Malirimi anewa angathimiswa, iwo nkhabe kuenda ku mbuto inango. Basi ene iwo asamala.

 7. Kodi Yezu alandanisa kufa nanji?

⁷ Yezu Kristu alonga pya makhaliro a anyakufa. Acita pyenepi mukhalonga iye pya Lazaro, mamuna akhadziwa iye mwadidi, wakuti akhadafa. Yezu apanga anyakupfundzace: “Lazaro xamwali wathu, ali kugona.” Anyakupfundza anyerezera kuti Yezu akhalonga kuti Lazaro akhagonadi, kuti awange utenda wace. Mbwenye si pyenepi tayu pikhalonga Yezu. Iye afokotoza: “Lazaro afa.” (Lerini Jwau 11:11-14.) Onani kuti Yezu alandanisa kufa na kugona peno kupuma. Lazaro nee akhali kudzulu peno n’djenje ya moto. Iye hadaenda kagumanikana na aanju peno makholo akale tayu. Lazaro hadabalwa papswa ninga munthu unango tayu. Iye akhagona mu kufa, ninga pa citulo cikulu cakusowa ndota. Malemba anango asalandanisambo kufa na kugona. Mwacitsandzo, mudaponyerwa miyala nyakupfundza Estevau mpaka kufa, Bhibhlya isalonga kuti iye “apuma.” (Machitiro 7:59) Munjira ibodzi ene, mpostolo Paulu alemba pya anthu anango a ntsiku zace akuti ‘akhagona n’citulo ca kufa.’​—1 Akorinto 15:20.

 8. Tisadziwa tani kuti nee cikhali cifuniro ca Mulungu kuti anthu afe?

⁸ Cikhali cifuniro cakutoma ca Mulungu kuti athu afe? Nkhabe! Yahova acita anthu kuti akhale pa dziko yapantsi kwenda na kwenda. Ninga tapfundza m’bukhu ino, Mulungu aikha banja yakutoma ya anthu mu paradizu yakubalika kakamwe. Iye aapasa ungumi wadidi. Yahova akhafuna udidi basi kwa iwo. Kodi nyakubala waufuni mbadafuna kuti anace anentseke, akalambe na kufa? Nkhabe! Yahova akhafuna anace na akhafuna kuti iwo akhale na kutsandzaya kwakukhonda mala pa dziko yapantsi. Bhibhlya isalonga pya anthu: ‘Mulungu ayikha ndzidzi wakukhonda mala m’mitima mwa anthu.’ (Koelete 3:11, NM) Mulungu aticita na cifuno cakukhala maso kwenda na kwenda. Iye afungula njira toera kukwanirisa cifuno ceneci.

 9. Kodi Yahova akhondesanji Adhamu, na thangwi yanji ntemo unoyu ukhali wakukhonda nentsa kuubvera?

⁹ Mphapo, thangwi yanji anthu asafa? Toera kugumana ntawiro, tisafunika kudinga pidacitika mukhakhala mamuna m’bodzi na nkazi m’bodzi basi pa dziko yapantsi. Bhibhlya isafokotoza: ‘Yahova Mulungu ameresa mitundu yonsene ya miti yakubalika na yadidi toera kudya.’ (Genesi 2:9) Mbwenye, akhadakhondeswa cinthu cibodzi. Yahova apanga Adhamu: ‘Dya misapo yonsene ya m’munda muno. Mbwenye, leka kudya nsapo wa muti wakudziwa pyadidi na pyakuipa, thangwi ntsiku inadzaudya iwe, unadzafa.’ (Genesi 2:16, 17) Ntemo unoyu nee ukhali wakunentsa kuubvera. Mwenemo mukhali miti inango mizinji yakuti Adhamu na Eva mbadadya. Mbwenye ntemo unoyu waapasa mwai wakupambulika toera kupangiza kupereka kwawo takhuta kwa Ule adaapasa pinthu pyonsene, kuphataniza umaso waungwiro. Kubvera kwawo mbukudapangizambo kuti iwo asalemedza utongi wa Babawo wakudzulu, pontho asafuna utsogoleri wace waufuni.

10, 11. (a) Pyacitika tani kuti banja yakutoma ya anthu ikhonde bvera Mulungu? (b) Thangwi yanji kukhonda bvera kwa Adhamu na Eva kukhali nkhani ikulu?

¹⁰ Mwakutsukwalisa, banja yakutoma ya anthu yasankhula kukhonda bvera Yahova. Mukuphatisira nyoka, Sathani abvundza Eva: ‘Ndimomwene kuti Mulungu akukhondesani kudya misapo ya miti yonsene ya m’munda?’ Eva atawira: ‘Tinadya misapo ya miti yonsene ya m’munda. Mbwenye nsapo wa muti uli pakati pa munda, Mulungu alonga: ‘Cipo na lini munadzadya nsapo wa muti uyu, nee kuukhuya, na tenepa mungapicita, munadzafa.’​—Genesi 3:1-3.

¹¹ Sathani alonga: ‘Nkhabe nee munadzafa bi. Mulungu asadziwa kuti, ntsiku inadzadya imwe, maso anu anadzafunguka, na imwe munadzakhala sawasawa na Mulungu, munadzadziwa pyadidi na pyakuipa.’ (Genesi 3:4, 5) Sathani akhafuna kuti Eva akhulupire kuti iye mbadaphindula angadya nsapo wakukhondeswa. Mwakubverana na mafala a Sathani, Eva mbadakhala na ufulu wakusankhula ekhene cinthu cadidi na cakuipa; Eva mbadakwanisa kucita pikhafuna iye. Sathani alongambo kuti Yahova alonga uthambi wa nyatwa zikhafuna kuoneka thangwi ya kudya nsapo unoyu. Eva akhulupira Sathani. Natenepa Eva akwata nsapo mbadya. Buluka penepo iye apasambo mamunace, na mamuna adyambo. Iwo nee acita pinthu pyenepi mwakukhonda dziwa. Iwo akhadziwadi kuti ali kucita pinthu pidaapanga Mulungu kuti akhonde kucita. Mu kudya nsapo unoyu, mwakufuna iwo akhonda bvera ntemo wakukhonda nentsa na wakubveka mwadidi. Iwo apwaza Babawo wakudzulu na utongi wace. Nee pakhali mathangwi toera kupwaza Nciti wawo waufuni!

12. Ndi ninji cinafuna kutiphedza toera kubvesesa kuti Yahova apibva tani mudasankhula Adhamu na Eva kukhonda kum’bvera?

¹² Mwacitsandzo: Mbamudapibva tani khala mwakuza mwana wakuti adzakhonda kukubverani mbapangiza kusowa cilemedzo peno ufuni kwa imwe? Pyenepi mbipidakuphani ntima kakamwe. Cincino nyerezerani kuti Yahova abva kupha tani mudasankhula Adhamu na Eva kukhonda kum’bvera.

13. Ndi ninji pidalonga Yahova kuti mbapidacitikira Adhamu pa kufa, na pyenepi pisabvekanji?

¹³ Yahova nee akhali na mathangwi akusiya Adhamu na Eva kukhala kwenda na kwenda. Iwo afa, ninga mudalonga iye kuti mbipidacitika. Adhamu na Eva nkhabepobve. Iwo hadaenda ku mbuto yauzimu tayu. Tisadziwa pyenepi thangwi ya pidalonga Yahova mudatonga iye Adhamu thangwi yakukhonda bvera kwace. Mulungu alonga: “[Unadzabwerera] pontho ku mataka kudabuluka iwe, thangwi iwe ndiwe pfumbi, mbubwerera pontho ku pfumbi.” (Genesi 3:19) Mulungu acita Adhamu na pfumbi ya mataka. (Genesi 2:7) Mbadzati kuncita, Adhamu nee akhalipo tayu. Natenepa, mudalonga Yahova kuti Adhamu mbadabwerera ku pfumbi, Iye akhafuna longa kuti Adhamu nee mbadakhalapobve. Adhamu mbadakhala wakusowa umaso ninga pfumbi idacitwa na iye.

14. Thangwi yanji tisafa?

¹⁴ Adhamu na Eva mbadakhala maso mpaka lero, mbwenye iwo afa thangwi asankhula kukhonda bvera Mulungu, natenepa adawa. Ife tisafa thangwi kudawa kwa Adhamu pabodzi na kufa pyaperekwa kwa mbeu yace yonsene. (Lerini Aroma 5:12.) Madawo anewa akhala ninga utenda wakugopswa wakubalwa nawo wakuti nkhabe munthu anakwanisa kuucalira. Mamalisiro ace ndi kufa, kwakuti ndi dzedze. Kufa ndi nyamalwa, tayu xamwali. (1 Akorinto 15:26) Tisapereka takhuta kakamwe thangwi Yahova apereka ciomboli toera kutipulumusa kwa nyamalwa unoyu wakugopswa.

15. Thangwi yanji kudziwa undimomwene thangwi ya anyakufa kusabalangaza?

¹⁵ Pinapfundzisa Bhibhlya thangwi ya makhaliro a anyakufa pisabalangaza. Ninga taona, anyakufa nkhabe kubva kupha peno kutsukwala. Nkhabe mathangwi toera kuagopa, thangwi iwo nkhabe kuticita pyakuipa. Iwo nkhabe funa ciphedzo cathu, pontho iwo nkhabe kwanisa kutiphedza. Ife nkhabe kwanisa longa nawo, iwombo nkhabe kwanisa longa na ife. Atsogoleri azinji auphemberi asalonga mwaunthawatawa kuti anakwanisa kuphedza anyakufa, na anthu anakhulupira atsogoleri anewa asaapasa kobiri. Mbwenye kudziwa undimomwene kusatitsidzikiza kuti tikhonde kunyengetwa na ale anapfundzisa uthambi unoyu.

16. Mbani anatsogolera pipfundziso pya mauphemberi mazinji, na munjira ipi?

¹⁶ Kodi uphemberi wanu usabverana na pinapfundzisa Bhibhlya thangwi ya anyakufa? Mauphemberi mazinji nkhabe. Thangwi yanji? Thangwi pipfundziso pyawo pisatsogolerwa na Sathani. Iye asaphatisira uphemberi waunthawatawa toera kucitisa anthu kukhulupira kuti pakumala kufa kwa manungo awo, iwo anadzapitiriza kukhala maso ku mbuto yauzimu. Uyu ndi uthambi wakuti Sathani asaubveranisa na mauthambi anango toera kupeusa anthu kuti akhonde kubvera Yahova Mulungu. Munjira ipi?

17. Thangwi yanji cipfundziso ca kuthabuswa kwenda na kwenda nkhabe lemedza Yahova?

¹⁷ Ninga taona ndulimu, mauphemberi anango asapfundzisa kuti munthu anacita pinthu pyakuipa, angafa anadzaenda ku djenje ya moto toera kuthabuswa kwenda na kwenda. Cipfundziso ceneci nkhabe lemedza Mulungu. Yahova ndi Mulungu waufuni, cipo mbadacitisa kuti anthu anentseke munjira ineyi. (Lerini 1 Jwau 4:8.) Mbamudapibva tani thangwi ya munthu anatcinyusa mwana wakukhonda bvera mu kupisa manjace pa moto? Kodi mbamudalemedza munthu unoyu? Mbamudafuna kudziwa munthu unoyu? Mwakukhonda penula nkhabe! Panango mbamudanyerezera kuti iye ndi nsumankha kakamwe. Inde, Sathani asafuna tikhulupire kuti Yahova asathabusa anthu pa moto kwenda na kwenda!

18. Kodi kulambira anyakufa kusabulukira pa uthambi upi wa mauphemberi?

¹⁸ Sathani asaphatisirambo mauphemberi anango toera kupfundzisa kuti anthu angafa asakhala mizimu yakuti isafunika kulemedzwa na kupaswa mbiri na ale ali maso. Mwakubverana na cipfundziso ceneci, mizimu ya anyakufa inakwanisa kukhala axamwali amphambvu peno anyamalwa akugopswa. Anthu azinji asakhulupira uthambi unoyu. Iwo asagopa anyakufa mbaalemedza na kualambira. Mwakusiyana, Bhibhlya isapfundzisa kuti anyakufa ali kugona, pontho ife tisafunika kulambira Mulungu wandimomwene basi, Yahova, Nciti na Mpasi wathu.​—Apokalipse 4:11.

19. Kudziwa undimomwene unalonga pya anyakufa kusatiphedza kubvesesa cipfundziso cipi cinango ca Bhibhlya?

¹⁹ Kudziwa undimomwene unalonga pya anyakufa kusatitsidzikiza toera tikhonde kunyengetwa na uthambi wa mauphemberi. Kusatiphedzambo kubvesesa pipfundziso pinango pya Bhibhlya. Mwacitsandzo, munadziwa ife kuti pa kufa anthu nkhabe kuenda ku mbuto yauzimu, pikiro ya umaso wakukhonda mala mu paradizu pa dziko yapantsi inabveka mwadidi kwa ife.

20. Tinadzadinga mbvundzo upi mu nsolo unatowera?

²⁰ Kale kakamwe, mamuna wakulungama Yobe abvundza tenepa: ‘Munthu angafa, anakwanisa kukhala pontho maso?’ (Yobe 14:14) Kodi munthu wakusowa umaso anagona mu kufa analamuswa toera kukhala pontho maso? Pinapfundzisa Bhibhlya thangwi ya pyenepi ndi cibalangazo cikulu, ninga pinadzapangizwa mu nsolo unatowera.