Relijiau ya Undimomwene Inakwanisa Kukubwereserani Maphindu Akukhonda Mala!

 1. Kodi ndi ninji cinadzacitika “tingafendedzera kwa Mulungu”?

YAHOVA ali na kufuna kwa anantumikira. Mungalambira Yahova, iye anadzakupasani nkhombo cincino na m’ntsogolo. Bibilya isati: “Fendedzerani kwa Mulungu, na iye anadzafendedzera kwa imwe.”—Yakobo 4:8.

 2. Kodi tinakwanisa tani kufendedzera kwa Mulungu, na pyenepi pinacitisa maphembero athu kukhala tani?

² Towera mufendedzere kwa Mulungu, musafunika kupfunza na kuphatisira basa Mafala ace. Mungaphembera mwakubverana na cifuno ca Yahova, anadzabvesera maphembero anu na kuwatawira. Juwau mpostolo wacikristu alemba: “Ici ndi cikhulupiro cinaife [kwa Mulungu], kuti, mwakukhonda tsalakana consene cinaphembefe tingaphemba mwakubverana na cifuno cace, iye asatibva. Pontho, tingadziwa kuti iye asabvesera consene cinaphembefe, tisadziwa kuti tinadzatambira pinthu pinaphembefe, nakuti tisaphemba iye.”—1 Juwau 5:14, 15.

3-7. Kodi tinakwanisa tani kugumana nzeru yaumulungu, na inatiphedza tani?

³ Pontho, m’kufendedzera kwa Mulungu, iye anadzakupasani nzeru towera mukwanise kuthimbana na pinthu pya ntsiku na ntsiku. Bibilya isati: “Mbodzi wa imwe angasowa nzeru, aphembe kwa Mulungu.”—Yakobo 1:5.

⁴ Kodi nzeru yaumulungu inakwanisa kukuphedzani tani? Pakutoma, ingakwanise kukuphedzani kudziwa pinthu pinaipirwa na Yahova. Imwe munakwanisambo kupfunza thangwi yanji pinthu pyenepi mphyakuipa na munakwanisa kucitanji towera kupithunda. Cidziwiso ceneci cinakwanisa kukutsidzikizani m’nyatwa zinanensa anthu azinji. Mwacitsanzo, kubvera mauphungu a Mulungu akuti anthu ace asafunika kukhala na makhaliro akucena pisaphedza kutsidzikiza anzakazi a Mulungu ku mimba yakukhonda funa, utenda wakupasirana pabonde, na maukwati akukhonda khala akutsanzaya peno akufudzika.

⁵ Kodi ndi ninji pontho cakuti nzeru yaumulungu ingakwanise kukucitirani? Ingacitise kuti mukwanise kuphindula kakamwe m’umaso. Ingakwanise kukuphedzani kucita pisankhulo pya nzeru m’pinthu pyakuphata basa, ninga matsalakaniro a kobiri yanu. Munadzakwanisa kufikira pyakufuna pyadidi na kukhonda pyakufuna pyakusowa basa.

⁶ Nzeru yaumulungu ingakwanisembo kukuphedzani ku uxamwali wanu na anthu anango. Imwe munakwanisa kukhala na umaso wa banja wakutsanzaya kakamwe. Munakwanisa kucita uxamwali wandimomwene na anthu anango, pontho munakwanisa kulemedzwa ngakhale na ale anakhonda tumikira Mulungu.

⁷ Pontho, kukhala kwanu na nzeru yaumulungu kunadzacinja maonero anu thangwi ya umaso. Iyo inakhuphedzani kukunda pinenso na pyakudzidzida pinango m’umaso. Pontho, munakhala na maonero akulinganira na akutawirika thangwi ya ntsogolo. Maonero anewa akutawirika, anadzaphedzera ungumi wanu wa manungo na manyerezero.—Misanje 14:30; Yesaya 48:17.

 8. Kodi mungatumikira Mulungu, nee munadzagopanji?

⁸ Mukatumikira Mulungu wa undimomwene, munadzasudzuka m’kugopa kuli na akukhonda kuntumikira. Nakuti musadziwa kuti akufa ali akusowa umaso m’nthumbi, nee munadzaagopa tayu. Na kukhala na cikhulupiro m’pikiro ya Mulungu ya kulamuswa muli akufa, nee munadzagopa kufa. Pina, na kudziwa kuti Mulungu ndi wa mphambvu yonsene nee munadzagopa ufiti tayu.—Juwau 8:32.

9-11. Kodi anadzakhala m’paradizu mbani na mbani anadzakhonda khalamo?

⁹ Mungafendedzera kwa Mulungu, nee munadzagopa ntsogolo. Ninga taona, Bibilya yaprofetizari nyatwa zizinji zinaonefe lero m’dziko yapantsi. Yahova asatipanga kuti pinthu pyenepi ndi pya nzidzi wakucepa; mwakukhonda dembuka, Umambo wa Mulungu unadzasanduza dziko yapantsi ino kukhala paradizu.—Luka 21:10, 11, 31; 23:43.

¹⁰ Ale anafendedzera kwa Yahova na kuntumikira anadzakhala m’paradizu. Bibilya isati: “Wasala nzidzi wakucepa, wakuipa nee anadzakhalapo; ande, munadzakhala wakuyang’ana pa mbuto yace, iye nee anadzakhalapo. Mbwenye akukhurudzika anadzatambira dziko yapantsi, na anadzakomerwa na ntendere uzinji.”—Masalimo 37:10, 11.

¹¹ Anthu akuuma makhosi anakhonda kubvera miyambo yakulugama ya Mulungu anadzaluza umaso kwenda na kwenda. (2 Atesalonika 1:8, 9) Nee anadzakhalapo. Iwo anadzafa pabodzi na Satana na madimoni ace m’kufa kwa kwenda na kwenda. (Chidziwiso 20:10, 14) Mbwenye anafika pakudziwa Yahova na kuntumikira anadzakhala na kutsanzaya m’paradizu m’dziko yapantsi.

12. Kodi Bibilya isalonganji pya m’ntsogolo?

¹² Yahova akoya pinthu pyadidi kakamwe kwa anthu anamfuna! Onani basi pinalonga Mafala ace pya umaso m’paradizu m’dziko yapantsi:

• Kuinjipa kwa pyakudya: “Munadzakhala mbeu yakuinjipa [peno cakudya] m’dziko yapantsi; padzulu pa maphiri panadzakhala misapo mizinji.”—Masalimo 72:16.

• Nyumba zadidi: “Anadzamanga nyumba mbadzakhalamo.”—Yesaya 65:21.

• Basa yakukomeresa: “Akusankhulwa anga anadzakomerwa nzidzi ukulu na basa ya manja awo. Nkhabe dzaphata basa mwapezi.”—Yesaya 65:22, 23.

• Nkhabe dzakhalapo utenda: “Nee nyakukhala mbodzi adzati: ‘Ndiri kuduwala.’”—Yesaya 33:24.

• Nkhabe dzakhalapo kulamala: “Panzidzi unoyo anadzafunguka maso a maboliboli na makutu a madrodro anadzafunguka. Panzidzi unoyo anyamfutete anadzanumpha ninga nsego na lirime ya bewewe inadzakhuwa na kukomerwa.”—Yesaya 35:5, 6.

• Nkhabe dzakhalapo kubva kupha, nee kutsukwala, nee kufa: “[Mulungu] anadzapukuta m’maso mwawo misozi yonsene, nkhabe dzakhalapobve kufa, peno kulira, peno kubululira, peno kubva kupha tayu. Pinthu pyakutoma pyamala.”—Chidziwiso 21:4.

• Nkhabe dzakhalapo nkhondo: “[Mulungu] anadzamalisa nkhondo mpaka kumadromero a dziko yapantsi.”—Masalimo 46:9.

• Umaso okhonda mala: “Anthu akulungama anadzatambira dziko yapantsi, na kukhalamo kwenda na kwenda.”—Masalimo 37:29.

13. Kodi bani basi angakwanise kusanduza dziko yapantsi kukhala paradizu na thangwi yanji?

¹³ Anthu nkhabe kwanisa kucita pinthu pyenepi, mbwenye Yahova ali na mphambvu za kucita consene cidalongeye kuti anadzacicita. Nkhabe cakufuna kumpingiza kucita cinafuneye kucita. Bibilya isati: “Nkhabe mafala na mabodzi ene akucimwanika kuli Mulungu tayu.”—Luka 1:37.

14. Kodi munakwanisa tani kugumana njira ya ku umaso okhonda mala?

¹⁴ Kubulukira kwa Mboni zace, Yahova asapasa anthu konsene kwene mwai wa “pitani na pa nsuwo wakupapanula” na kufamba m’njira inatsogolera ku umaso okhonda mala. Khalani pakati pa anthu anatawira kucemerwa kweneku. Citani relijiau ya undimomwene na khalani na nkhombo za Yahova kwenda na kwenda!—Mateyu 7:13, 14.