‘Iye Apfunza Kubvera’

1, 2. Thangwi yanji baba wakufuna akomerwa kuona mwanace mbabvera, na mabvero ace asapangiza tani mabvero a Yahova?

BABA ayang’ana pa janela mbaona mwanace wang’ono wamamuna mbakamenya bola na axamwali ace angasi. Bola yawo yanumpha cintalo mbienda m’nseu. Mukhaenda bola mphale akhaiyang’anisa mwakuifuna. Mbodzi wa axamwali ace ankulumiza kuti anumphe nseu kuti akaikwate, mbwenye mphale asukusa nsolo wace. Iye alonga: “Ine nkhabe tawiriswa kucita pyenepi.” Babace akomerwa.

² Thangwi yanji baba akomerwa kakamwe? Thangwi iye apfunzisa mwanace kuti akhonde kuenda m’nseu ekhene. Mudabvera mphale​—maseze akhonde dziwa kuti babace akumuona—​baba adziwa kuti mwanace akupfunza kubvera na anakhala wakukoyeka thangwi yakubvera. Baba unoyu asapibvambo ninga munabvera Babathu wakudzulu, Yahova. Mulungu asadziwa kuti khala tisafuna kukhala akukhulupirika na kukhala maso towera kuona tsogolo yakudzumatirisa inatikoyera iye, tisafunika kupfunza kunnyindira na kumbvera. (Misangani 3:5, 6) Towera kucita pyenepi, iye atipasa mpfunzisi wadidi wakupiringana anthu onsene.

3, 4. Kodi pyacitika tani kuti Yezu ‘apfunze kubvera’ na kucitwa ‘waungwiro’? Pangizani.

³ Biblya isalonga cinthu cinango cakudzumisa thangwi ya Yezu: “Iye, maseze kukhala Mwana wa Mulungu ene, apfundza pyakutawira [peno kubvera] na pyakuona nyatwa. Chinchino, mudakhala iye na mbiri [peno ‘waungwiro,’ NM] kakamwe, ndiye mpulumusi wakupulumusa pa midzidzi yonsene anthu onsene akumbvera.” (Ahebere 5:8, 9) Mwana unoyu akhadakhala kale piaka pyokhonda lengeseka kudzulu. Iye aona Sathani na atowereri ace okhonda bvera aanju akupanduka, mbwenye Mwana wautombo hadapandukambo tayu. Profesiya yakupumirwa yaphatisira mafala anewa kwa iye: “Ine sidapokanya tayu.” (Izaiya 50:5) Thangwi yanji mphapo mafala akuti ‘iye apfunza kubvera’ aphatisirwa kwa Mwana unoyu waungwiro wakubvera? Kodi cakucitwa ceneci caungwiro cacitwa tani kukhala ‘caungwiro’?

⁴ Dingani citsanzo cibodzi. Nyankhondo ali na supada ya utale. Maseze nee ikhadayeserwa ku nkhondo, iyo yacitwa mwadidi na m’njira yakubalika. Natenepa, iye acinja supada ineyi na inango yakucitwa na utale wakuwanga, aço. Supada ineyi ipswa ikhadaphatisirwa mwadidi mwene ku nkhondo. Kodi kweneku si kucinja kwanzeru tayu? M’njira ibodzibodzi, Yezu mwakubvera apangiza mbasati bwera pa dziko yapantsi kuti akhali wakusowa madawo. Mbwenye pakumala kukhala pa dziko, kubvera kwace m’njira zonsene kukhali nkhaliro wakusiyana kakamwe. Cincino tingakwanise kulonga kuti kubvera kwayesiwa, kwasanyiwa, na Yezu apangiza kubulukira m’mayesero kuti cipo mbadagumanikana na pyenepi kudzulu.

 5. Kodi ndi ninji cidacitisa kubvera kwa Yezu kukhala kwakufunika kakamwe, na tinadzadinganji m’nsolo uno?

⁵ Kubvera kukhali kwakufunika m’basa ya Yezu ya kubwera pa dziko yapantsi. Ninga “Adamu wakumalisira,” Yezu abwera pa dziko yapantsi towera kudzacita pidacimwana kucita anyakubala athu akutoma​—kukhala akubvera kwa Yahova Mulungu, ngakhale pantsi pa mayesero. (1 Akorinto 15:45) Inde, kubvera kwa Yezu nee kukhali kwaciphamaso tayu. Yezu abvera na nzeru zace zonsene, ntima wace onsene na moyo wace onsene. Iye acita pyenepi na kukomerwa. Kucita cifuno ca Babace kukhali kwakufunika kakamwe kwa iye kupiringana kudya! (Jwau 4:34) Kodi ndi ninji cinafuna kutiphedza kusangizira kubvera kwa Yezu? Pakutoma tendeni tidinge mathangwi adancitisa kubvera. Kukulisa pifuno ninga pyace kunadzatiphedza kupirira mayesero na kucita cifuno ca Mulungu. Buluka penepo tinadzadinga nkhombo zingasi zinabwera thangwi ya kukhala wakubvera ninga Kristu.

6, 7. Kodi ndi api mathangwi mangasi akhacitisa Yezu kubvera?

⁶ Kubvera kwa Yezu kukhabulukira m’makhaliro a m’ntima mwace. Ninga taona m’Nsolo 3, Kristu akhali wakucepeseka m’ntima. Kuzikuza kwakukhonda thema kusacitisa anthu kukhonda bvera, mbwenye kucepeseka kusatiphedza kubvera Mulungu mwakufuna. (Eksodo 5:1, 2; 1 Pedro 5:5, 6) Pontho, kubvera kwa Yezu kukhabulukira ku pinthu pikhafuna iye na pikhaida iye.

⁷ Kupiringana pyonsene, Yezu akhafuna Babace wakudzulu, Yahova. Kufuna kweneku kunadzadingwa m’njira zakusiyana-siyana m’Nsolo 13. Kufuna kweneku kwacitisa Yezu kukulisa kugopa kwaumulungu. Natenepa kufuna kwace Yahova kukhali kukulu kakamwe, pabodzi na kulemedza kwace, mbukuncitisa kucalira kupindisa Babace. Kugopa kwaumulungu kukhali thangwi ibodzi idacitisa maphembero a Yezu kubverwa. (Ahebere 5:7) Pontho kugopa Yahova ndi cidzindikiro cakupambulika ca utongi wa Yezu ninga Mambo Waumesiya.​—Izaiya 11:3.

8, 9. Ninga pikhadalongweretu, kodi Yezu akhapibva tani thangwi ya ulungami na uipi, na iye apangiza tani mabvero anewa?

⁸ Kufuna Yahova kusaphatanizambo kuida pinthu pinaida Iye. Mwacitsanzo, onani profesiya iyi idalemberwa Mambo Waumesiya: “Unafuna chilungamo mbupwaza pyakuipa; ndi thangwi ya ipyo kuti Mulungu akusankhula mbakupasa kutsandzaya kupita amambo andzako.” (Masalmo 45:7) ‘Anzace’ Yezu akhali amambo anango a m’nzera wa Mambo Davide. Kupiringana iwo onsene, Yezu akhali na thangwi ya kutsanzaya, peno kukomerwa kukulu pa kudzodzwa kwace. Thangwi yanji? Nkhombo yace ndi ikulu kakamwe kupiringana yawo, umambo wace wa kwenda na kwenda ndi wakuphindulisa kakamwe. Iye apaswa nkhombo thangwi yakuti kufuna kwace ulungami na kuida uipi kwancitisa kubvera Mulungu m’pinthu pyonsene.

⁹ Kodi Yezu apangiza tani mabvero ace thangwi ya ulungami na uipi? Mwacitsanzo, mudabvera atowereri ace citsogolero cace m’basa ya kumwaza mphangwa na kupaswa nkhombo ninga cakubwereswa, kodi Yezu acita tani? Iye asekera pikulu pyene. (Luka 10:1, 17, 21) M’nzidzi udapangiza anthu a ku Yerusalemu nzimu wakukhonda bvera mwakuphindikiza, mbakhonda kuwangisira kwace kwakufuna kwa kuaphedza, kodi Yezu apibva tani? Iye alira kakamwe thangwi ya makhaliro a upanduki a nzinda. (Luka 19:41, 42) Yezu akhadzudzumika kakamwe thangwi ya makhaliro adidi na akuipa.

10. Kodi tisafunika kukulisa mabvero api thangwi ya makhaliro adidi na makhaliro akuipa, na ndi ninji pinafuna kutiphedza kucita pyenepi?

¹⁰ Kunyerezera mabvero a Yezu kunatiphedza kudinga pifuno pyathu pya kubvera Yahova. Maseze ndife akusowa ungwiro, tingakwanise kukulisa kufuna makhaliro adidi na kuida kakamwe makhaliro akuipa. Tisafunika kuphembera kwa Yahova, mbatimphemba kuti atiphedze kukulisa mabvero ninga ace na ninga a Mwanace. (Masalmo 51:10) M’nzidzi ubodziene, tisafunikambo kucalira pidzoloero pyakuti pinadzacepesa mabvero anewa. Sankhulani mwacidikhodikho masenzekero na uxamwali wadidi. (Misangani 13:20; Afilipi 4:8) Tingakulisa makhaliro ninga a Kristu, kubvera kwathu nee kunadzakhala kwaciphamaso tayu. Ife tinadzacita pinthu pyadidi thangwi tisafuna kucita pyenepi. Tinadzacalira makhaliro akuipa, tayu thangwi ya kugopa kuphatiwa, mbwenye thangwi tisaida makhaliro anewa.

11, 12. (a) Kodi ndi ninji pidacitikira Yezu pakutoma utumiki wace? (b) Pakutoma, kodi Sathani ayesera tani Yezu, na aphatisira njira zipi zakunyengeta?

¹¹ Thangwi ya kuida kwace madawo, Yezu ayeserwa m’kutoma kwa utumiki wace. Pakumala kubatizwa, iye amala masiku na masikati 40 m’nthando nee cakudya. Kunkhomo kwa nzidzi unoyu, Sathani abwera kudzamuyesa. Onani kuti Dyabo akhali wakucenjera tani.​—Mateo 4:1-11.

¹² Pakutoma Sathani alonga: “Ngakhala ndiwe mwana wa Mulungu longa kuti miala iyi isanduke kudza mikate.” (Mateo 4:3) Kodi Yezu apibva tani pakumala nzidzi uzinji nee kudya? Mwapakweca Biblya isalonga: “[Iye] abva njala.” (Mateo 4:2) Natenepa Sathani abanza cifuno cacibaliro ca cakudya, mokhonda penula mwanyakhomo iye adikhira mpaka Yezu kukhala na njala. Onanimbo mafala akusingirira a Sathani: “Ngakhala ndiwe mwana wa Mulungu.” Sathani akhadziwa kuti Yezu akhali “[Wakubalwa] wakutoma, mbachidzati kuchitwa chinthu chibodzi.” (Akolose 1:15) Ngakhale tenepa, Yezu hadatawirisa tayu kuti Sathani ancitise kukhonda bvera. Yezu akhadziwa kuti cikhali cifuno ca Mulungu tayu kuti iye aphatisire mphambvu yace m’njira ya kucenama. Yezu akhonda kucita pyenepi, mbapangiza kuti iye mwakucepeseka asanyindira ciphedzo na citsogolero ca Yahova.​—Mateo 4:4.

13-15. (a) Kodi yesero yaciwiri na yacitatu ya Sathani kwa Yezu ikhali ipi, na Yezu acita tani? (b) Kodi tisadziwa tani kuti Yezu cipo aleka kukhala wakulindira Sathani?

¹³ Pa yesero yaciwiri, Sathani akwata Yezu mbaenda naye pa cisusu ca templo. Mwakucenjera, Sathani aphatisira mwakuipa Mafala a Mulungu, mbayesera Yezu m’kumpanga kuti anumphe kubulukira pa mbuto ineyi yapadzulu towera aanju ampulumuse. Mwinji pa templo mbudaona cirengo ceneci, kodi mbapadaoneka pontho munthu wakupenula kuti Yezu akhali Mesiya wakupikirwa? Mbidakhala kuti mwinji watawira Yezu ninga Mesiya m’kuphatisira cipangizo ceneci cakudzumisa, kodi Yezu nee mbadacalira nyatwa zizinji? Panango. Mbwenye Yezu akhadziwa kuti ceneci cikhali cifuno ca Mulungu kwa Mesiya kuti akwanirise basa yace m’makhaliro akucepeseka, tayu kuti anthu a pidzo ankhulupire kubulukira m’pipangizo pyakudzumisa. (Izaiya 42:1, 2) Pontho, Yezu akhonda kupandukira Yahova. Iye hadatunduswa na mbiri tayu.

¹⁴ Kodi ndiye tani mphapo pya utongi? M’yesero yace yacitatu, Sathani mbadapasa Yezu maumambo onsene a dziko mbidakhala kuti Yezu acita cinthu cibodzi cakulambira Sathani. Kodi Yezu anyerezera mwacidikhodikho muoni wa Sathani? Mokhonda dembuka iye atawira: “Choka, satani.” Iye athimizira: “Pyalembwa: ‘Mbuya Mulungu wako ekha unadzakotamira mbumulambira.’” (Mateo 4:10) Nkhabepo cinthu cikhafuna citisa Yezu kulambira mulungu unango. Nee utongi peno pidzo pya dziko ino mbipidancitisa kusiya kubvera.

¹⁵ Kodi Sathani asiya kuyesera Yezu? Iye athaukira ntemo wa Yezu. Mbwenye, Mphangwa zadidi za Luka zisalonga kuti Dyabo “amuleka pyache mpaka ndzidzi unango [‘wakuthema,’ NM].” (Luka 4:13) Inde, Sathani mbadagumana nzidzi unango towera kuyesera na kukakamiza Yezu, mpaka kunkhomo. Biblya isatipanga kuti Yezu “ayeserwa mu pyonsene.” (Ahebere 4:15) Natenepa Yezu cipo aleka kukhala wakulindira; ifembo tisafunika kukhala akulindira.

16. Kodi Sathani asayesera tani anzakazi a Mulungu lero, na tinakwanisa tani kukhonda kuwangisira kwace?

¹⁶ Sathani akupitiriza kuyesera anzakazi a Mulungu lero. Cakutsukwalisa ndi cakuti kusowa kwathu ungwiro kazinji kene kusaticitisa kukhala akukhonda nensa kudawa. Mwakucenjera Sathani asabanza cipendamiro cathu ca kucenama, kuzikuza na kufuna utongi. M’kuphatisira ng’ambo ya kufuna mpfuma, Sathani angakwanise kuticitisa kukhala na makhaliro anewa akuipa. M’midzidzi inango, tisafunika kucitika mabvunzo akuona ntima. Mphyadidi kuti tinyerezere mafala anagumanika pa 1 Jwau 2:15-17. Munacita ife pyenepi, tisafunika kubvunzika khala pifuno pyaunyama pya makhaliro ano a pinthu, ninga kufunisisa pinthu pyakumanungo na cifuno ca kusiriza anango cisapingiza kufuna kwathu Babathu wakudzulu. Tisafunika kukumbuka kuti dziko ino inamala, pabodzi na ntongi wayo, Sathani. Tendeni tikhonde kuwangisira kwace m’njira zakucenjera towera kuticitisa kudawa! Tendeni tisangizire Mbuyathu, thangwi “Kristu hadachita madawo tayu.”​—1 Pedro 2:22.

17. Kodi Yezu akhapibva tani thangwi ya kubvera Babace, mbwenye anango angakwanise kunyerezeranji?

¹⁷ Kubvera kusaphataniza pizinji kupiringana kucalira madawo; mwaphinga Kristu akwanirisa matongero onsene a Babace. Iye alonga: “[Ndisachita] kwenda na kwenda pire pinakomerwa na iye.” (Jwau 8:29) Kubvera kweneku kwacitisa Yezu kukhala wakutsanzaya kakamwe. Mwandimomwene, anango angakwanise kulonga kuti kubvera kukhali kokhonda nensa kwa Yezu. Iwo angakwanise kunyerezera kuti iye akhafunika kubvera Yahova basi, wakuti ndi waungwiro, mbwenye ife kazinji kene tisafunika kubvera anthu akusowa ungwiro akuti ali na ciimiriro ca utongi. Mbwenye undimomwene ndi wakuti Yezu akhalimbo wakubvera kwa anthu akusowa ungwiro akuti akhali na ciimiriro ca utongi.

18. Ninga mphale, kodi Yezu aikha citsanzo canji cakubvera?

¹⁸ Mukhakula iye, Yezu akhali pantsi pa utongi wa anyakubalace akusowa ungwiro, Zuze na Mariya. Panango, kupiringana anapiana azinji, iye mbadakwanisa kuona madodo mwa anyakubalace. Kodi iye apanduka, mbacita pinthu pyakusiyana na pidapangwa iye na Mulungu mbaapfunzisa kuti anatsogolera tani banja? Onani pinalonga Luka 2:51 thangwi ya Yezu wa piaka 12 pyakubalwa: ‘Iye apitiriza kuabvera.’ Thangwi ya kubvera kweneku, iye aikha citsanzo cadidi kakamwe kwa aphale na atsikana Acikristu, akuti asawangisira towera kubvera anyakubalawo na kuapasa cilemedzo cakuthema.​—Aefesi 6:1, 2.

19, 20. (a) Kodi ndi mayesero api akukhonda dzoloereka adatamba Yezu thangwi ya kubvera anthu akusowa ungwiro? (b) Thangwi yanji Akristu andimomwene lero asafunika kubvera ale anatsogolera pakati pawo?

¹⁹ Thangwi ya kubvera anthu akusowa ungwiro, Yezu athimbana na makhaliro akukhonda dzoloereka akuti Akristu andimomwene lero nee asathimbana nawo. Nyerezerani midzidzi yakunensa idakhala iye. Makhaliro a pinthu a uphemberi Waciyuda, na templo yawo ku Yerusalemu na anyantsembe, pikhatawiriswa na Yahova mbwenye mbipidafudzwa na kupitirwa mbuto na masasanyiro a mpingo Wacikristu. (Mateo 23:33-38) M’nzidzi unoyu, azinji a atsogoleri auphemberi akhapfunzisa unthawatawa wakubuluka ku pipfunziso pya Cigerego. M’templo, makhaliro akuipa akhadadzala kwakuti Yezu aithula “mphako ya matsinsina.” (Marko 11:17) Kodi Yezu akakhonda kuenda ku templo na ku masinagoga? Nkhabe! Yahova akhaphatisira basi masasanyiro anewa. Mpaka nzidzi wakuti Mulungu mbadacitapo pinthu na kucita macinjo, mwakubvera Yezu aenda ku maphwando a templo na a masinagoga.​—Luka 4:16; Jwau 5:1.

²⁰ Khala Yezu akhabvera pantsi pa makhaliro anewa, tisafunika tani ife Akristu andimomwene kupitiriza kubvera lero! Mwandimomwene, ife tisakhala m’midzidzi yakusiyana kakamwe, m’nzidzi udalongerwatu wa kubwezereswa kwa ulambiri wakucena. Mulungu asatipasa cibaso cakuti cipo anadzatawirisa Sathani kufudza mbumba yace ya kubwezereswa. (Izaiya 2:1, 2; 54:17) Inde, ife tinagumanikana na madawo na kusowa ungwiro nkati mwa mpingo Wacikristu. Kodi tisafunika kuphatisira kusowa ungwiro kwa anango ninga thangwi yakukhonda bvera Yahova, panango kusiya kugumanika pa misonkhano Yacikristu peno kukhala akupokanya akulu a mpingo? Nkhabe! Mbuto mwace, tisafunika na ntima onsene kuphedza ale anatsogolera m’mpingo. Mwakubvera, tisafunika kugumanika pa misonkhano Yacikristu na misonkhano yakupambulika na ya cisa na kuphatisira uphungu wa Malemba unatambira ife.​—Ahebere 10:24, 25; 13:17.

21. Kodi Yezu acita tani na cikakamizo ca anthu ca kunkhondesa kubvera Mulungu, na asiya citsanzo canji kwa ife?

²¹ Cipo Yezu atawirisa anthu, ngakhale axamwali a cifuno cadidi, kumulimirisa kubvera Yahova. Mwacitsanzo, mpostolo Pedro, ayesera kucitisa Mbuyace kunyerezera kuti nee pikhali pyakufunika tayu kunenseka na kufa. Mwakuwanga ntima Yezu akhonda uphungu wa cifuno cadidi mbwenye wakupeusa wa Pedro wakuti Yezu akhale na ntsisi na iye ene. (Mateo 16:21-23) Lero, atowereri a Yezu kazinji kene asathimbana na acibale a cifuno cadidi akuti angayesere kuacitisa kukhonda kubvera midida na miyambo ya Mulungu. Ninga atowereri a Yezu a dzana yakutoma, tisakoya nkhaliro wathu wakuti “tinatongwa kutawira [peno kubvera] maka Mulungu, kupita kutawira [peno kubvera] anthu.”​—Machitiro 5:29.

22. Kodi Yezu apereka ntawiro ku mbvunzo upi, na m’njira ipi?

²² Mukhathimbana Yezu na kufa, kubvera kwace kwayesiwa pikulu pyene. Nkati mwa ntsiku ineyi yakutsukwalisa, ‘iye apfunza kubvera’ m’njira yakukwana. Iye acita cifuno ca Babace, tayu cace. (Luka 22:42) M’kucita pyenepi, iye aikha citsanzo caungwiro ca umumphu. (1 Timoti 3:16) Iye apereka ntawiro ku mbvunzo udacitwa m’nzidzi wakale: Kodi munthu waungwiro angakwanise kukhala wakubvera Yahova ngakhale pantsi pa mayesero? Adamu na Eva acimwana. Buluka penepo Yezu abwera, akhala maso, afa, na asiya mbiri yadidi. Wankulu kakamwe wa pyakucitwa pyonsene pya Yahova apereka ntawiro wadidi kakamwe. Iye abvera ngakhale kuti kubvera kweneku kwanthabusa kakamwe.

23-25. (a) Kodi kubvera kusalandaniswa tani na umumphu? Pangizani. (b) Kodi ntsonga ya nsolo wakutowerera ndi ipi?

²³ Umumphu, peno kuperekeka na ntima onsene kwa Yahova, pisapangizwa na kubvera. Nakuti Yezu abvera, iye akoya umumphu wace na aphindulisa anthu onsene. (Aroma 5:19) Yahova apasa Yezu nkhombo zizinji. Tingabvera Mbuyathu, Kristu, Yahova anadzatipasambo nkhombo. Kubvera Kristu kusatsogolera ku ‘upulumusi wa midzidzi yonsene’!​—Ahebere 5:9.

²⁴ Mwakuthimizira, umumphu basi ndi nkhombo. Misangani 10:9, (NM) isalonga: ‘Anafamba m’umumphu anafamba mwakutsidzikizika.’ Khala umumphu ungakwanise kulandaniswa na ndida ukulu wa njerwa zadidi, nkhaliro onsene wakubvera ungakwanise kulandaniswa na njerwa ibodzi na ibodzi. Njerwa ibodzi payokha ingakwanise kupwazwa, mbwenye ibodzi na ibodzi ya iyo isaphata basa, ndi yakufunika. Natenepa njerwa zizinji zingagumanyizwa, cinthu cikulu cakuthema cingakwanise kumangwa. Macitiro akubvera angagumanyizwa, nkhaliro ubodzi usathimizira unzace ntsiku na ntsiku na caka na caka, ife tisamanga nyumba yakubalika ya umumphu wathu.

²⁵ Nkhaliro wakubvera wakuti ungakwanise kuthimizirika m’kupita kwa nzidzi usatikumbusa nkhaliro unango​—kupirira. Nkhundu ineyi ya citsanzo ca Yezu ndi ntsonga ya nsolo wakutowerera.