Uphungu Wanu ndi Wakuwangisa?

1-2. M’bale m’bodzi apfundzanji thangwi ya kupereka uphungu?

PYAKA pingasi nduli, akulu a mpingo awiri aenda kacedzera mulongo wakuti nee akhagumanika pa misonkhano. M’bodzi mwa akulu a mpingo anewa apangiza mulongo malemba analonga thangwi ya kugumanika pa misonkhano. Iye anyerezera kuti awangisa mulongo unoyu, mbwenye mu ndzidzi ukhabuluka iwo, mulongo alonga: “Abale imwe nee musadziwa pinthu pyonsene pinandicitikira.” Abale apereka uphungu mbwenye nee ayesera kudziwa nyatwa zikhathimbana na mulongo unoyu. Na thangwi ineyi uphungu udapereka iwo nee wam’phedza.

² Nkulu wa mpingo adaleri malemba kuna mulongo alonga: “Pakutoma ndanyerezera kuti mulongo unoyu akhali wakusowa cilemedzo, mbwenye pidanyerezera ine mwadidi ndadzindikira kuti ine ndampangiza malemba m’mbuto mwakucita mibvundzo yakufunika, ninga iyi: ‘Ninji pinakunentsani?’ ‘Ndinacitanji toera kukuphedzani?’” Pyenepi pyapfundzisa nkulu wa mpingo unoyu cinthu cakufunika kakamwe. Lero iye ndi nkumbizi wadidi, pontho asaphedza kakamwe abale na alongo.

 3. Mbani anafunika kupereka uphungu mu mpingo?

³ Ninga akumbizi, akulu a mpingo ali na basa yakupereka uphungu pingafunika. Ngakhale tenepo, midzidzi inango abale na alongo anango mu mpingo panango anafunika kupereka uphungu. Mwacitsandzo, m’bale peno mulongo anakwanisa kupereka uphungu wa m’Bhibhlya kuna xamwali wace. (Masal. 141:5; Mis. 25:12) Peno, mulongo wakukalamba anakwanisa ‘kupasa uphungu atsikana’ ninga pinalongwa pa Tito 2:3-5. Pontho anyakubala kazinji kene asafunika kupasa uphungu anawo. Natenepa, ngakhale kuti nsolo uno ndi toera kuphedza makamaka akulu a mpingo, tonsene tinakwanisa kuphedzeka tingapfundza njira zakupereka uphungu wakuphedza, wakuwangisa na ‘wakutsandzayisa ntima.’—Mis. 27:9.

 4. Ndi mibvundzo ipi inafuna ife kutawira mu nsolo uno?

⁴ Mu nsolo uno tinatawira mibvundzo minai thangwi ya kupasa uphungu: (1) Ndi ipi thangwi yadidi inaticitisa kupereka uphungu? (2) Ndi pyakufunikadi kupereka uphungu? (3) Mbani anafunika kupereka uphungu? (4) Munapereka tani uphungu wakuphedza?

 5. Thangwi yanji anthu asatawira mwakukhonda nentsa uphungu unaperekwa mwaufuni na nkulu wa mpingo? (1 Akorinto 13:4, 7)

⁵ Akulu a mpingo asafuna kakamwe abale na alongo awo. Midzidzi inango iwo asapangiza ufuni unoyu angapasa uphungu munthu wakuti atoma kufamba mu njira yakuipa. (Agal. 6:1) Nkulu wa mpingo mbadzati kupasa munthu uphungu, mphyadidi kuti anyerezere pinthu pingasi pidalonga Paulu thangwi ya kupangiza ufuni. Iye alonga: “Ufuni ndi wakupirira na wakukoma ntima. . . . Usaphimbira pinthu pyonsene, usakhulupira pinthu pyonsene, usadikhira pinthu pyonsene, usapirira pinthu pyonsene.” (Lerini 1 Akorinto 13:4, 7.) Nkulu wa mpingo anganyerezera mwadidi mavesi anewa, pinam’phedza toera akhale na cinyindiro cakuti ali kupereka uphungu munjira yadidi. Munthu anapaswa uphungu angaona kuti nkulu wa mpingo asantsalakana, panango anatawira uphungu unapaswa iye.—Aroma 12:10.

 6. Thangwi yanji mpostolo Paulu ndi citsandzo cadidi?

⁶ Mpostolo Paulu ndi citsandzo cadidi ninga nkulu wa mpingo. Mwacitsandzo, mu ndzidzi wakuti abale a ku Tesalonika akhafunika kupaswa uphungu, Paulu nee anyinyirika toera kucita pyenepi. Mbwenye pakutoma, Paulu aasimba thangwi ya mabasa akhacita iwo mwakukhulupirika na mwaufuni, pontho thangwi ya kupirira kwawo. Iye aapangambo kuti akhadziwa kuti akuthimbana na pinentso, pontho kuti akupirira pinentso. (1 Ates. 1:3; 2 Ates. 1:4) Kusiyapo pyenepi, Paulu apanga abale anewa kuti iwo akhali citsandzo cadidi kuna Akristu anango. (1 Ates. 1:8, 9) Iwo atsandzaya kakamwe thangwi ya kusimbwa na Paulu. Pyenepi pyapangiza pakweca kuti Paulu akhafuna kakamwe abale na alongo ace. Na thangwi ineyi, iye akwanisa kupereka uphungu wakuphedza m’matsamba mawiri adalembera iye abale a ku Tesalonika.—1 Ates. 4:1, 3-5, 11; 2 Ates. 3:11, 12.

 7. Thangwi yanji anthu anango nee asatawira uphungu?

⁷ Ninji pinafuna kucitika tingakhonda kupereka uphungu munjira yadidi? Nkulu wa mpingo m’bodzi alonga: “Anthu anango nee asatawira uphungu, tayu thangwi ndi wakuipa mbwenye thangwi nee waperekwa mwaufuni.” Kodi pyenepi pisatipfundzisanji? Pisatipfundzisa kuti ndi pyakukhonda nentsa kutawira uphungu unaperekwa mwaufuni, tayu mwakuipirwa.

 8. Nkulu wa mpingo asafunika kubvundzikanji mbadzati kupasa munthu uphungu?

⁸ Akulu a mpingo nee asafunika kucimbiza kupereka uphungu. Mbadzati kupereka uphungu, nkulu wa mpingo asafunika kubvundzika: ‘Kodi ndisafunikadi kupereka? Ndiri na cinyindiro cakuti pinacita munthu unoyu ndi pyakuipa? Kodi Bhibhlya isalonga kuti pinthu pinacita iye ndi pyakuipa? Peno basi ene akucita pinthu pyakusiyana na pinthu pinacita ine?’ Mwandzeru, akulu a mpingo asacalira ‘kulonga mbadzati kunyerezera.’ (Mis. 29:20) Khala nkulu wa mpingo nee ali na cinyindiro cakuti m’bale asafunika kupaswa uphungu, iye anakwanisa kubvundza nkulu wa mpingo unango, khala iye ali kunyerezerambo kuti m’bale ali kucita pinthu pyakuti nee pisabverana na Bhibhlya, pontho khala asafunika kupaswa uphungu.—2 Tim. 3:16, 17.

 9. Tisapfundzanji na mafala adalonga Paulu tingafuna kupereka uphungu thangwi ya kubvala mwadidi? (1 Timoti 2:9, 10)

⁹ Onani citsandzo ici. Nyerezerani kuti nkulu wa mpingo asanentseka thangwi ya mabvaliro a m’bale m’bodzi mu mpingo. Nkulu wa mpingo anakwanisa kubvundzika: ‘Pana mathangwi a m’Bhibhlya toera kupereka uphungu?’ Nakuti nkulu wa mpingo nee asafuna kulonga maonero ace, panango anabvundza nkulu wa mpingo unango peno m’bale, ngakhale mulongo wakuti ali na maonero adidi. Iwo anakwanisa kuona pontho pabodzi uphungu wa Paulu unalonga thangwi ya kubvala mwadidi. (Lerini 1 Timoti 2:9, 10.) Paulu alonga pinthu pingasi pinapangiza kuti Akristu asafunika kubvala nguwo zakuthema. Mbwenye iye nee alonga nguwo zakuti munthu asafunika kuzibvala peno nguwo zakuti nee asafunika kuzibvala. Iye akhadziwa kuti nee ndi pyakuipa kuti abale na alongo asankhule ntundu wa nguwo zinafuna iwo kubvala zakuti nee zisaphonyana na pinalonga Bhibhlya. Natenepa, pakusankhula khala asafunika kupereka uphungu peno nkhabe, akulu a mpingo asafunika kuona khala pisankhulo pya munthu pisapangiza kuti ali na maonero adidi peno nkhabe.

10. Tisafunika kukumbukanji thangwi ya pisankhulo pya anango?

¹⁰ Tisafunika kukumbuka kuti abale awiri anakwanisa kucita pisankhulo piwiri pyakusiyana. Mbwenye pyenepi nee pisabveka kuti m’bodzi ali kucita pinthu pyadidi, pontho unango ali kucita pyakuipa. Nee tisafunika kukakamiza abale athu toera kucita pinthu pinaona ife kukhala pyadidi.—Aroma 14:10.

11-12. Khala ndi pyakufunika kupereka uphungu, ndi mibvundzo ipi yakuti nkulu wa mpingo asafunika kuicita, pontho thangwi yanji?

¹¹ Khala akulu a mpingo aona kuti ndi pyakufunika kupereka uphungu, iwo asafunika kubvundzika: Mbani anafunika kupereka uphungu unoyu? Mbadzati kupereka uphungu kuna mulongo wakumanga banja peno kuna mwana, nkulu wa mpingo asafunika kubvundza nsolo wa banja, thangwi panango anafuna kupereka uphungu unoyu ekhene.b Peno nsolo wa banja panango anaphemba kuti agumanikembo pa ndzidzi wakuti nkulu wa mpingo ali kupereka uphungu. Pontho ninga pidalongwa pa ndima 3, midzidzi inango ndi pyadidi kuti mulongo wakugwesera apase uphungu mulongo wakuti ndi ntsikana.

¹² Pana cinthu cinango cakuti nkulu wa mpingo asafunika kucinyerezera mbadzati kupereka uphungu. Iye asafunika kubvundzika: ‘Ndine wakuthema toera kupereka uphungu, peno ndi pyadidi kuti munthu unango apereke uphungu unoyu?’ Mwacitsandzo, panango nee pinakhala pyakunentsa kuna munthu anapibva kuti nee ndi wakufunika toera kubvera uphungu wa nkulu wa mpingo wakuti akhalambo na mabvero mabodzi ene. Panango nkulu wa mpingo wakuti akhalambo na mabvero mabodzi ene anabvesesa mwadidi mabvero a munthu unoyu, pontho analonga pinthu pyakukhonda nentsa kuna iye toera kupitawira. Mbwenye akulu a mpingo onsene ali na basa yakuwangisa na kuphedza abale na alongo toera acite macinjo mwakubverana na pinalonga Bhibhlya. Natenepa mphyakufunika kuti akulu a mpingo apereke uphungu, ngakhale kuti iwo nee athimbanambo na pinthu pibodzi pyene pinathimbana na munthu anapasa iwo uphungu.

13-14. Thangwi yanji nkulu wa mpingo asafunika kubvesera mbadzati kulonga?

¹³ Khalani dzololo toera kubvesera. Mu ndzidzi unakhunganyika nkulu wa mpingo toera kupereka uphungu asafunika kubvundzika: ‘Ninji pinadziwa ine thangwi ya m’bale peno mulongo anafuna ine kupasa uphungu? Ninji pinancitikira mu umaso wace? Kodi iye ali kuthimbana na nyatwa zakuti ine nee ndisazidziwa? Ndi pinthu pipi pyakufunika kakamwe kuna iye cincino?’

¹⁴ Mafala anagumanika pa Tiyago 1:19 asaphatambo basa kuna ale anapereka uphungu. Tiyago alemba: “Munthu asafunika kukhala wakucimbiza kubva, wakudembuka kulonga, wakudembuka kuipirwa.” Nkulu wa mpingo panango ananyerezera kuti asadziwa pinentso pyonsene pinathimbana na m’bale peno mulongo. Mbwenye iye asapidziwadi? Misangani 18:13 isalonga: ‘Kutawira mbudzati kubvesesa undimomwene wa pinthu, ndi udzemwa, pontho kusapasa manyadzo.’ Mphyadidi kakamwe kubvundza munthu toera alonge ekhene pinthu pidacitika. Natenepa, nkulu wa mpingo asafunika kubvesera mbadzati kulonga. Kumbukani pidapfundza nkulu wa mpingo adalongwa mu ndima zakutoma. Iye adzindikira kuti m’mbuto mwakutoma kulonga pinthu pidakhunganya iye, akhafunika kucita mibvundzo ninga iyi kuna mulongo: “Ninji pinakunentsani?” “Ndinacitanji toera kukuphedzani?” Akulu a mpingo angasaka ndzidzi toera kudziwa pinthu pinacitikira abale na alongo awo, iwo anakhala akukhunganyika toera kuaphedza na kuawangisa.

15. Akulu a mpingo anaphatisira tani uphungu unagumanika pa Misangani 27:23?

¹⁵ Dziwani mabira. Ninga pidalongwa pakutoma, kupasa uphungu wadidi pisaphataniza pizinji kupiringana basi ene kuleri malemba a m’Bhibhlya na kupereka maonero. Abale na alongo athu asafuna kupibva kuti tisaatsalakana, tisabvesesa mabvero awo, pontho tisafuna kuaphedza. (Lerini Misangani 27:23.) Akulu a mpingo asafunika kuwangisira toera kukhala na uxamwali wakuwanga na abale na alongo awo.

16. Ninji pinafuna kuphedza akulu a mpingo toera apereke uphungu wakuphedza?

¹⁶ Akulu a mpingo nee asafuna kuti abale na alongo anyerezere kuti iwo asafuna kucedza nawo basi ene angafuna kuapasa uphungu. M’mbuto mwace iwo asafunika kucedza na abale na alongo ndzidzi onsene, mbapangiza kuti asaatsalakana angathimbana na pinentso. Nkulu wa mpingo m’bodzi alonga: “Mungacita pyenepi, munakhala xamwali wawo, pontho mungafuna kuapasa uphungu pinakhala pyakukhonda nentsa kucita pyenepi.” Kusiyapo pyenepi, pinakhala pyakukhonda nentsa kuna munthu anapasa imwe uphungu kuti autawire.

17. Ndi ndzidzi upi wakuti nkulu wa mpingo asafunika kakamwe kukhala wakupirira na wakukoma ntima?

¹⁷ Khalani wakupirira na wakukoma ntima. Kupirira na kukoma ntima ndi kwakufunika makamaka khala munthu pakutoma nee atawira kuphatisira uphungu wa Bhibhlya. Nkulu wa mpingo nee asafunika kuipirwa khala m’bale peno mulongo anapasa iye uphungu nee akutawira kuuphatisira. Bhibhlya isalonga tenepa thangwi ya Yezu: “Iye nee anadzagwanda phesi yakugongonyeka, pontho nee anadzathimisa nyale yakupucira.” (Mat. 12:20) Natenepa pakucita phembero paekha, nkulu wa mpingo anakwanisa kuphemba Yahova toera aphedze munthu anafuna kupaswa uphungu, kuti abvesese mathangwi a uphungu unapaswa iye na kuuphatisira. M’bale anapaswa uphungu, panango anafuna ndzidzi toera kunyerezera. Khala nkulu wa mpingo asalonga mwakupirira na mwakukoma ntima, pinakhala pyakukhonda nentsa toera m’bale peno mulongo aphatisire uphungu. Mwandimomwene, ndzidzi onsene uphungu usafunika kubuluswa m’Bhibhlya.

18. (a) Mu ndzidzi unapasa ife anango uphungu, ninji pinafunika ife kukumbuka? (b) Mwakubverana na foto na bokosi, ninji pinacedza anyakubala?

¹⁸ Pfundzani na madodo anu. Nakuti ndife akusowa ungwiro, nee tinakwanisa kuphatisira mwakukwana maonero anapfundza ife mu nsolo uno. (Tiya. 3:2) Ife tinacita madodo, mbwenye tingacita, tisafunika kupfundza kubulukira m’madodo anewa. Abale na alongo athu angapibva kuti tisaafuna, pinakhala pyakukhonda nentsa kuna iwo toera kutilekerera tingalonga peno tingacita pinthu pyakuti pinaatsukwalisa.—Onani bokosi ya nsolo wakuti “Pinthu Pyakuti Anyakubala Asafunika Kupikumbuka.”

19. Tinacitanji toera titsandzayise ntima wa abale na alongo athu?

¹⁹ Ife tapfundza kuti ndi pyakunentsa kupereka uphungu wakuti ndi wakuphedza, thangwi ndife akusowa ungwiro, pontho anthu anapasa ife uphungu ndi akusowambo ungwiro. Kumbukani pidapfundza ife mu nsolo uno. Khalani na cinyindiro cakuti muli kupereka uphungu na mathangwi adidi. Khalanimbo na cinyindiro cakuti uphungu unoyu usafunikadi, pontho kuti imwe anaupereka ndimwe munthu wakuthema toera kuupereka. Mbamudzati kupereka uphungu citani mibvundzo, pontho bveserani mwadidi toera mukwanise kubvesesa pinthu pinacitika kuna munthu anafuna imwe kupasa uphungu. Wangisirani toera kuona pinthu ninga munapionera munthu anapasa imwe uphungu. Khalani wakudzolowereka, pontho citani uxamwali na abale na alongo. Kumbukani kuti cifuno cathu nee ndi kupereka uphungu wakuphedza basi, mbwenye tisafunikambo ‘kutsandzayisa ntima.’—Mis. 27:9.