Phedzani Ananu Athunga Kukula Mwadidi

1, 2. Kodi ndi pinenso pipi na ndi kutsanzaya kupi kunabwera pa uwana?

KUKHALA na mwana wathunga pa nyumba ndi pyakusiyana na kukhala na mwana wa piaka pixanu pyakubalwa peno ngakhale wa piaka khumi. Uwana usabweresa pinenso pabodzi na nyatwa, mbwenye unakwanisambo kubweresa kutsanzaya na nkhombo. Mwacitsanzo Zuze, Davide, Yosiya, na Timoti apangiza kuti ana ang’ono anakwanisa kucita mabasa mwanzeru pabodzi na kukhala na uxamwali wadidi na Yahova. (Genesi 37:2-11; 1 Samwele 16:11-13; 2 Amambo 22:3-7; Machitiro 16:1, 2) Ana athunga azinji lero asatawira ntsonga ineyi. Panango, imwe musadziwa anango mwa iwo.

² Mbwenye, kwa anango piaka pya uwana ndi pyakunensa kakamwe. Uwana usabweresa manyerezero adidi na akuipa. Ana anewa acimuna na acikazi athunga panango angafune kukhala na ufulu wakuinjipa, panango anakwanisa kukhala akuipirwa na midida idaikhwa na anyakubalawo. Mbwenye, aphale na atsikana anewa ndi akukhonda kudziwa pinthu pizinji pontho asafunika kufunwa pabodzi na ciphedzo cadidi ca anyakubalawo akupirira. Inde piaka pya uwana pinakwanisa kukhala pyakukomeresa, mbwenye pinakwanisambo kukhala pyakunensa​—kwa anyakubala na kwa aphale na atsikana. Kodi ana anakwanisa tani kuphedzwa mu ndzidzi wa kukula kwawo?

 3. Kodi ndi mu njira ipi anyakubala anakwanisa kupasa anawo athunga miyai yadidi mu umaso wawo?

³ Anyakubala anatowezera uphungu wa Biblya asapasa anawo athunga miyai yadidi kakamwe towera kuthimbana na mayesero mwakupembera mpaka kukhala akulu a nzeru. M’madziko onsene na m’midzidzi yonsene, anyakubala pabodzi na aphale na atsikana anaphatisira midida ya Biblya pabodzi asatambira nkhombo mwakupembera.​—Masalmo 119:1.

 4. Thangwi yanji kucedza ndi kwakufunika kakamwe makamaka mu piaka pyathunga pya mwana?

⁴ Biblya isalonga: “Munthu angachita pinthu pyache nee kubvundzisa, anabwerera nduli.” (Misangani 15:22) Khala mukhacedza pakhundu na mwana wanu pikhali iye wang’ono, makamaka cincino ndi pyakufunika kakamwe mu piaka pya kukula kwace​—ndzidzi wakuti aphale na atsikana asakhala pang’ono basi panyumba na asamala ndzidzi uzinji na axamwali awo akuxikola peno axamwali anango. Khala pasacitwa pinthu nee kubvunzisa​—khala nkhabepo kucedza kwakulungama na kwaufulu pakati pa ana na anyakubala—​aphale na atsikana anakwanisa kukhala ninga alendo panyumba. Natenepa, kodi munakwanisa tani kucitisa kuti njira ineyi ya kucedza ipitirize kukhala yakufunguka?

 5. Kodi ndi pinthu pipi pya kucedza na anyakubala ana athunga asawangiswa kudzindikira?

⁵ Aphale na atsikana pabodzi na anyakubala asafunika kukwanirisa khundu yawo mu pinthu pyenepi. Mwandimomwene, ana athunga asaona kukhala kwakunensa kakamwe kulonga na anyakubalawo kupiringana mu ndzidzi ukhali iwo ang’ono. Ngakhale tenepa, kumbukani kuti “mbumba yakusowa ntsogoleri inafudzika, mbwenye yakukhala na anyakulanga azinji inapulumuswa.” (Misangani 11:14) Mafala awa asaphatisirwa kwa onsene, aphale na atsikana na akulu. Aphale na atsikana anadziwa pyenepi anadzadzindikira kuti aciri kufuna citsogolero cadidi, nakuti asathimbana na pinthu pyakunensa kakamwe kupiringana kalene. Iwo asafunika kudzindikira kuti anyakubalawo akukhulupira Mulungu ndi akuthema kakamwe ninga aphungu, thangwi iwo asadziwa pinthu pizinji mu umaso wawo na akhala akupangiza kufuna kwawo kupita piaka pizinji. Na thangwi ineyi, m’piaka pyenepi pya umaso wawo, ana athunga anzeru nkhabe kukhala kutali na anyakubalawo.

 6. Kodi anyakubala anzeru na akufuna anadzakhala na manyerezero api pa kucedza na anawo athunga?

⁶ Kucedza kwaufulu kusabveka kuti nyakubala asafunika kuwangisira kakamwe kugumana ndzidzi wakucedza, mwana angafuna pyenepi. Khala iwe ndimwe nyakubala, onesesani khala kucedza kwanu ndi kwaufulu, makamaka ku khundu yanu. Pyenepi ndi pyakunensa. Biblya isalonga kuti “ulipo ndzidzi wakumatama na ndzidzi wakulonga.” (Koelete 3:7) Ananu athunga angafuna kulonga na imwe, panango ndi ndzidzi unoyu unafunika imwe kuabvesera. Panango imwe mwakoya ndzidzi unoyu towera kucita pfunziro ya munthu pa ekha, kupuma peno kucita mabasa anango panyumba. Ngakhale tenepa, khala mwana wanu wathunga asafuna kulonga na imwe, yeserani kucinja pinafuna imwe kucita na mbvesereni. Mungakhonda kucita pyenepi, iye panango nkhabe kudzafuna pontho kucedza na imwe. Kumbukani citsanzo ca Yezu. Pa ndzidzi unango, iye akhadacita masasanyiro towera kupuma. Mbwenye mudafika anthu mbanzungulira towera kumbvesera, iye asiya kupuma mbatoma kuapfunzisa. (Marko 6:30-34) Ana azinji athunga asadziwa kuti umaso wa anyakubalawo ndi wakupingika na mabasa, mbwenye iwo asafuna kukhala na cinyindiro cakuti anyakubalawo alipo towera kuaphedza. Na thangwi ineyi, khalani na ndzidzi pabodzi na kubvesesa.

 7. Kodi anyakubala asafunika kucaliranji?

⁷ Yeserani kukumbuka kuti pinthu pikhali tani mu ndzidzi ukhakhala imwe mwana wathunga na lekani kuluza nzimu wanu wakuseka ukhali na imwe! Anyakubala asafunika kukomerwa pakukhala na anawo pabodzi. Anyakubala angakhala na ndzidzi, kodi asauphatisira tani? Khala ndzidzi onsene asafuna kuuphatisira m’mabasa akuti nkhabe phataniza banja yawo, anawo athunga anadzadzindikira pyenepi mwakucimbiza. Khala ana athunga afika pa kudzindikira kuti axamwali awo a ku xikola asaanyerezera kakamwe kupiringana pinacita anyakubalawo, iwo anadzakhala na nyatwa mwakukhonda nensa.

 8. Kodi ana anakwanisa tani kupfunziswa towera kukhala na ntima wadidi, basa yakuwanga na makhaliro adidi?

⁸ Khala anyakubala adzati kukhomera kwa anawo kufunika kwa kukhala wakucena ntima na kuphata basa yakuwanga, asafunika mu njira yonsene kucita pyenepi mu piaka pya kukula kwa anawo. (1 Atesalonika 4:11; 2 Atesalonika 3:10) Ndi pyadidi kudziwambo kuti ana asakhulupira na ntima onsene kufunika kwa kukhala na makhaliro adidi na umaso wakucena. (Misangani 20:11) Na citsanzo cace nyakubala anakwanisa kupfunzisa pizinji ku khundu ineyi. Ninga amuna akukhonda khulupira anakwanisa ‘kukwewiwa na imwe akazi awo nee kupangwa mafala,’ natenepa ana athunga anakwanisa kupfunza midida yadidi kakamwe kubulukira ku makhaliro a anyakubalawo. (1 Pedro 3:1) Ngakhale tenepa, citsanzo nkhabe kwana tayu, nakuti ana asaonambo pitsanzo pizinji pyakuipa na pinthu pizinji pyakunyengerera kunja kwa banja. Anyakubala anatsalakana mwadidi, asafunika kudziwa maonero a anawo athunga m’pinthu pinaona iwo na pinabva iwo, pontho asafunika kucedza mwadidi thangwi ya pyenepi.​—Misangani 20:5.

9, 10. Thangwi yanji anyakubala asafunika kupfunzisa anawo pya nkhani za kupita m’mabonde, na anakwanisa tani kucita pyenepi?

⁹ Pyenepi mphyandimomwene makamaka tingalonga pya nkhani za kupita m’mabonde. Anyakubala, kodi muli na manyadzo a kulonga pya kupita m’mabonde na ananu? Khala muli na manyadzo, wangisirani kucita pyenepi, mungakhonda kucita pyenepi ananu anadzapfunza pinthu pyenepi kwa anthu anango. Khala iwo nkhabe kupfunza kubulukira kwa imwe, mbani anafuna kudziwa mphangwa zakudinganyika zinafuna iwo kudzapfunziswa? Mu Biblya, Yahova nkhabe kucita manyadzo kulonga pinthu pya kupita m’mabonde, anyakubala nkhabe funikambo kucalira kulonga pyenepi.​—Misangani 4:1-4; 5:1-21.

¹⁰ Pyakukomeresa kakamwe ndi pyakuti, Biblya iri na citsogolero cakubveka mwadidi pa nkhani za kupita m’mabonde na Sociedade Torre de Vigia yamwaza mphangwa zizinji zakuphedza kakamwe towera kupangiza kuti citsogolero cisapitiriza kufunika n’dziko ino. Thangwi yanji nkhabe kuphatisira ciphedzo ceneci? Mwacitsanzo, thangwi yanji nkhabe kucedza na mwana wanu wamamuna peno wankazi pya misolo yakuthema mu volume 1 na 2 ya mabukhu, Os Jovens Perguntam​—Respostas Práticas? Imwe munadzakomerwa na maphindu ace.

11. Kodi ndi njira ipi yadidi kakamwe yakuti anyakubala anakwanisa kupfunzisa anawo kutumikira Yahova?

¹¹ Kodi ndi nkhani ipi yakufunika kakamwe yakuti anyakubala na ana asafunika kulonga pakucedza? Mpostolo Paulu alonga pya nkhani ineyi mudalemba iye kuti: “Mualere pyadidi [ananu], mbamuapfundisa, mbamuakuza ninga munafunira Mbuya.” (Aefesi 6:4) Ana asafunika kupitiriza kupfunza pya Yahova. Makamaka, asafunika kupfunza kufuna Yahova na kuntumikira. Pontho mu pinthu pyenepi, iwo anakwanisa kupfunziswa pizinji kubulukira ku citsanzo. Ana athunga angaona kuti anyakubalawo asafuna Mulungu ‘na ntima wawo wonsene, na moyo wawo wonsene, na nzeru zawo zonsene,’ iwo anakwanisambo kucita pibodzi pyene. (Mateo 22:37) Mwakulandana, khala ana ang’ono asaona maonero akulinganira a anyakubalawo thangwi ya mpfuma zakumanungo, kuikha pa mbuto yakutoma Umambo wa Mulungu, iwo anadzaphedzwa towera kukulisa maonero mabodzi ene.​—Koelete 7:12; Mateo 6:31-33.

12, 13. Kodi ndi ntsonga zipi zinafunika kunyerezerwa towera pfunziro ya banja ikhale yakupembera?

¹² Pfunziro ya Biblya ya pabanja ya sumana na sumana isaphedza kakamwe towera kupfunzisa kucedza na ana pya makhaliro adidi auzimu. (Masalmo 119:33, 34; Misangani 4:20-23) Kukhala na pfunziro ineyi mwakukhonda phonya ndi pyakufunika kakamwe. (Masalmo 1:1-3) Anyakubala pabodzi na anawo asafunika kudziwa kuti mabasa anango asafunika kuikhwa pakhundu towera kuikha pfunziro ya banja pa mbuto yakutoma, tayu mwakusiyana. Pontho, pa pfunziro ya banja musafunika kukhala na makhaliro adidi towera ikhale yakuphindulisa. Baba m’bodzi alonga: “Cinthu cakufunika kakamwe ndi cakuti ntsogoleri asafunika kucitisa kuti makhaliro a pfunziro ya banja akhale aufulu na akulemedzeka​—akutsanzayisa tayu towera kusenzeka. Kukoya midida yakulinganira ndi pyakunensa m’midzidzi yonsene na thangwi ineyi ana athunga asafunika kazinji kene kulinganiza nkhaliro wawo. Khala pinthu nee pyafamba mwadidi kabodzi peno kawiri, wangisirani na yang’anirani ndzidzi unango ntsogolo.” Baba m’bodzi ene alonga kuti mu phembero yace mbadzati kucita pfunziro, iye aphemba ciphedzo cakuthonyeka kwa Yahova kuti onsene akhagumanika akhale na maonero adidi.​—Masalmo 119:66.

¹³ Kutsogolera pfunziro ya banja ndi basa ya anyakubala akukhulupira. Mwandimomwene, anyakubala anango panango si apfunzisi aluso tayu na pyenepi pinacitisa kukhala pyakunensa kwa iwo kugumana njira zakucitisa kuti pfunziro yawo ya banja ikhale yakutsanzayisa. Ngakhale tenepa, khala imwe musafuna ananu mu “mabasa a udidi,” munadzaaphedza mu njira ya kucepeseka na yakulungama towera athambaruke mwauzimu. (1 Jwau 3:18) Panango iwo anakwanisa kudungunya ndzidzi na ndzidzi, mbwenye cifuno canu ca kuaphedza ndi cadidi kakamwe.

14. Kodi lemba ya Deuteronomyo 11:18, 19 inakwanisa tani kuphatisirwa pa kucedza pinthu pyauzimu na ana athunga?

¹⁴ Ndzidzi wa kucedza nkhani zakufunika zauzimu si wa pfunziro ya banja basi tayu. Kodi musakumbuka ntemo wa Yahova kwa anyakubala? Iye alonga: “Koyani mwadidi mafala anga mu ntima mwanu na m’manyerezero anu, amangireni pa nkono wanu ninga chidzindikiro, ninga [nthimba] pa nsolo panu. Apfundziseni kuli ananu, alongeni kazinji kene nee kupuma, mungakhala pa nyumba peno pa ulendo, peno pa kugona peno pa kulamuka.” (Deuteronomyo 11:18, 19; onani pontho Deuteronomyo 6:6, 7.) Pyenepi nee pisabveka kuti ndzidzi onsene anyakubala asafunika kumwaza mphangwa kwa anawo tayu. Mbwenye nsolo wa banja wa ufuni anadzakhala maso mu ndzidzi onsene towera kugumana miyai ya kuwangisa banja yace mwauzimu.

15, 16. (a) Kodi cisandiko ndi ninji? (b) Kodi mbani ali na basa ya kusandika, na mbani asafunika kukhala na cibaso cakuti anadzabvesera?

¹⁵ Cisandiko ndi cipfunziso cakuti cisalungamisa na cisaphataniza kucedza. Cisandiko cisabveka makamaka ninga kulungamisa kupiringana kutcinyusa​—ngakhale kuti kutcinyusa ndi kwakufunika. Ananu akhafunika cisandiko mu uwana wawo na cincino ninga athunga, asapitiriza kufuna njira zinango za cisandiko, panango cikulu kupiringana kale. Ana athunga anzeru asadziwa kuti pyenepi ndi pyandimomwene.

¹⁶ Biblya isalonga: “Dzemwa asapwaza malangiro a babache, mbwenye munthu anatawira kusandikwa asapangiza kuti ana nzeru.” (Misangani 15:5) Tisapfunza pinthu pizinji kubulukira pa lemba ineyi. Isapangiza kuti tisafunika kusandika. Mwana wathunga nkhabe ‘kudzatawira kusandikwa’ khala iko nee kusaperekwa. Yahova asapasa basa ya kusandika kwa anyakubala, makamaka kwa baba. Natenepa, basa yakubvesera cisandiko ceneci ndi ya mwana. Iye anadzapfunza pizinji na nee anadzadodoma maningi tayu, khala iye asabvesera cisandiko ca nzeru ca babace na mace. (Misangani 1:8) Biblya isalonga: “Munthu anapwaza kusandikwa, pyache ndi ucherengi na manyadzo, mbwenye anakutawira, yache ndi mbiri.”​—Misangani 13:18.

17. Kodi ndi kulinganira kupi anyakubala asafunika kukucita pa kusandika anawo?

¹⁷ Pa kusandika mwana, anyakubala asafunika kukhala akulinganira. Iwo asafunika kucalira kukakamira pinthu pyakuti pinacitisa anawo kukhala akuipirwa, panango ngakhale kufudza kunyindirika kwa anawo. (Akolose 3:21) Ku khundu inango anyakubala nkhabe funika kukhala akulekerera mpaka kucimwana kupereka cipfunziso cakufunika kwa anawo. Kulekerera kweneko kunakwanisa kukhala kwakugopswa. Misangani 29:17 isalonga: “Sandika mwanako, unadzapfulika mbukomerwa pyako.” Natenepa, bvesi 21 isalonga: “Anachita utumbe [bitcu] kutomera uwana wache ananchita pezi nyautumbe.” Maseze vesi ineyi isalonga pya bitcu, isaphatisirwambo mu njira ibodzi ene kwa mwana onsene pa banja.

18. Kodi kusandika kusapangizanji na ndi ninji cinacalira anyakubala angasandika ndzidzi onsene?

¹⁸ Mwandimomwene, kusandika kwadidi kusapangiza kuti anyakubala asafuna anawo. (Ahebere 12:6, 11) Khala ndimwe baba peno mama, musadziwa kuti ndi pyakunensa kupitiriza na kusandika mwadidi na mwanzeru m’midzidzi yonsene. Mungafuna kukoya ntendere, kunakhala kwakukhonda nensa kutawirisa mwana wakupokanya kucita pinafuna iye. Mbwenye, mu kupita kwa ndzidzi, nyakubala anatowezera njira ineyi anadzakolola pyakubwereswa pyace, banja inadzakhala yakukhonda tongeka.​—Misangani 29:15; Agalata 6:9.

19, 20. Kodi ndi mu njira ipi anyakubala anakwanisa kutsalakana mwanzeru ubalangazi wa anawo athunga?

¹⁹ M’midzidzi yakale, pikhali pyakudzolowereka kwa ana kuphedza mabasa a panyumba peno kumunda. Cincino ana azinji athunga asakhala na ndzidzi uzinji wa ubalangazi wakukhonda kuonerwa. Towera kubvunga ndzidzi wawo, dziko ya malonda isapereka pinthu pizinji pyakuti pisaabvungira ndzidzi. Mwakuthimizira ku khundu ineyi, dziko nkhabe kulemedza midida ya Biblya ya makhaliro adidi tayu, pontho imwe munadzathimbana na ngozwi zikulu kakamwe.

²⁰ Na thangwi ineyi, anyakubala mwacidikhodikho asaikha midida ya kucita pisankhulo pya ubalangazi. Lekani kuduwala kuti mwana wathunga ali kukula. Caka cibodzi na cibodzi mwana unoyu wamamuna peno wankazi asadikhira kutsalakanwa ninga nkulu. Natenepa, ndi kwanzeru kwa nyakubala kupereka ufulu wa kusankhula ubalangazi mu ndzidzi unakula mwana​—makamaka pyakusankhula pyenepi pingapangiza kuthambaruka mpaka kukola mwauzimu. M’midzidzi inango, ana athunga anakwanisa kucita pyakusankhula pyakusowa nzeru ninga nyimbo zakukhonda thema, axamwali na pinthu pinango. Pyenepi pingacitika, musafunika kucedza na mwana unoyu towera acite pyakusankhula pyadidi ntsogolo.

21. Kodi kukhala wakulinganira na ndzidzi unabvungwa pa ubalangazi kunadzatsidzikiza tani mwana wathunga?

²¹ Kodi ndi ndzidzi ungasi unafunika kubvungwa pa ubalangazi? M’madziko anango ana athunga asakhulupiriswa kuti anakwanisa kusenzeka mu njira zonsene zinafuna iwo. Na thangwi ineyi, panango ana athunga anakwanisa kucita masasanyiro akugumanika mu “ubalangazi” ubodzi na ubodzi. Anyakubala asafunika kupfunzisa anawo kuti ndzidzi usafunikambo kubvungwa mu pinthu pinango, ninga pabanja, pfunziro ya munthu pa ekha, kufambirana na abale akukola mwauzimu, misonkhano Yacikristu na mabasa a pa nyumba. Pyenepi pinadzakhondesa “pyakukoma pya mu moyo” kuphimbira Mafala a Mulungu.​—Luka 8:11-15.

22. Kodi ubalangazi usafunika kubveraniswa nanji mu umaso wa mwana wathunga?

²² Mambo Salomoni alonga: “Penepale ndadzindikira kuti kuna munthu nkhabe chadidi kupita kuchita pya udidi na kuphata basa yache. Na kuti ndi mwoni wa Mulungu munthu kuona chakudya na chakumwa na basa ya manja ache.” (Koelete 3:12, 13) Inde, kutsanzaya ndi khundu ya umaso wakulinganira. Mbwenye pisaphatanizambo kuphata basa yakuwanga. Ana athunga azinji lero nkhabe kudziwa kutsanzaya kunabwera thangwi ya kucita basa yakuwanga peno kubva ntsisi kunabwera mu kuthimbana na nyatwa na kuzikunda. Anango nkhabe kusaka miyai towera kukulisa maluso awo peno kupfunza basa yakuti inakwanisa kuaphedza ntsogolo mu umaso wawo. Ineyi ndi nyatwa ikulu kakamwe kwa anyakubala. Kodi munadzakhala na cinyindiro cakuti mwana wanu ali nayo miyai ineyi? Khala imwe musakwanisa kupfunzisa mwana wanu mwakupembera mbalemedza na mbatsanzaya mu kuphata basa yakuwanga, mwana wanu wamamuna peno wankazi anadzakhala na maonero adidi akuti anadzabweresa nkhombo mu umaso wace onsene.

23. Kodi anyakubala anakwanisa tani kuwangisa anawo athunga?

²³ Maseze mukhale na miseru na mwana wanu wathunga, pinalonga lemba iyi pikupitiriza kuphata basa: “Kufuna kunamala tayu.” (1 Akorinto 13:8) Cipo lekani kusiya kupangiza kufuna kunabva imwe. Bvunzikani: ‘Kodi ine ndisasimba mwana m’bodzi na m’bodzi mu kuwangisira kwace kuthimbana na nyatwa peno kukunda kwace mipingizo? Kodi ndisabanza miyai towera kupangiza kufuna kwanga na kupereka takhuta kwa ananga, miyai ineyi mbidzati kumala?’ Ngakhale kuti m’midzidzi inango paoneke kukhonda bverana, khala ana athunga asapibva kuti imwe musaafunadi, mwandimomwene iwombo anadzakufunanimbo.

24. Kodi ndi n’dida upi wa m’Biblya usapitiriza kuphata basa pa kukuza ana, mbwenye ndi ninji cinafunika kukumbukirwa?

²⁴ Mwandimomwene, mu ndzidzi unakula ana kukhala akulu, asamalisira na kucita okhene pyakusankhula pyawo pikulu kakamwe. M’midzidzi inango pyakusankhula pyenepi nkhabe kukomeresa anyakubala. Kodi ndiye tani khala mwana asankhula kukhonda kupitiriza kutumikira Yahova? Pyenepi pinakwanisa kucitika. Ngakhale ana auzimu a Yahova akhonda kubvera uphungu wace na ansandukira. (Genesi 6:2; Yuda 6) Ana si mitcini yanzeru tayu, yakuti inakwanisa kucita pinthu ninga munafunira ife. Iwo acitwa towera kukhala na ufulu wakusankhula na kupitawirira pamaso pa Yahova thangwi ya pyakusankhula pyawo. Ngakhale tenepa, lemba ya Misangani 22:6 isapitiriza kuphata basa m’midzidzi mizinji: “Pfundzisa munthu njira zadidi mbali mwana, iye anadzafamba nazo mpaka unkhalamba wache.”

25. Kodi ndi njira ipi yadidi kakamwe yakuti anyakubala anakwanisa kupangiza kupereka takhuta kwa Yahova thangwi ya mwai wa kukhala na ana?

²⁵ Natenepa, tsalakanani ananu na ufuni ukulu kakamwe. Citani pyonsene pinakwanisa imwe kuti muphatisire midida ya Biblya pa kukuza ananu. Khazikisani citsanzo cadidi ca makhaliro aumulungu. Mu njira ineyi munadzapasa ananu mwai wadidi kakamwe towera kukula mbakhala na mabasa ninga anthu akulu akugopa Mulungu. Ineyi ndi njira yadidi kakamwe kwa anyakubala towera kupangiza kupereka takhuta kwa Yahova thangwi ya mwai wa kukhala na ana.