• Tinapangiza Tani Kuti Tisafuna Yahova?
    Tsandzayani na Umaso Kwenda na Kwenda!​—Kucedza Pabodzi Thangwi Ya Bhibhlya
    • Nsolo 34. Mamuna akuyang’ana kudzulu mbakanyerezera.

      NSOLO 34

      Tinapangiza Tani Kuti Tisafuna Yahova?

      Kodi cincino musafuna kakamwe Mulungu kupiringana mu ndzidzi udatoma imwe kupfundza Bhibhlya? Musafuna kupitiriza kuwangisa uxamwali wanu na iye? Khala ndi tenepo, kumbukani kuti Yahova angaona kuti ufuni wanu kuna iye uli kuthimizirika, anadzakufunani kakamwe, pontho anadzakutsalakanani kakamwe. Mphapo munapangiza tani kuti musafuna Yahova?

      1. Tinapangiza tani kuna Yahova kuti tisanfuna?

      Ife tisapangiza kuti tisafuna Yahova tingambvera. (Lerini 1 Juwau 5:3.) Iye nkhabe kakamiza munthu toera kumbvera. Mbwenye, asatipasa mwai toera kusankhula kumbvera peno nkhabe. Thangwi yanji? Thangwi Yahova asafuna kuti ‘timbvere na ntima onsene.’ (Aroma 6:17) Pyenepi pisabveka kuti iye asafuna kuti timbvere, tayu thangwi yakukakamizwa mbwenye thangwi tisanfuna. Khundu 3 na 4 ya bukhu ino yacitwa toera kukuphedzani kupangiza kuti musafuna Yahova mungacita pinthu pinakomerwa na iye, pontho mungaida pinthu pinaida iye.

      2. Thangwi yanji m’midzidzi inango pinanentsa kupangiza kuti tisafuna Yahova?

      “Nyatwa za munthu wakulungama ndi zizinji.” (Masalmo 34:19) Tonsene tisanentseka toera kucita pinthu pyadidi thangwi ndife anyakudawa. Tisanentsekambo na nyatwa yakusowa kobiri, kusoweka kwa ulungami peno nyatwa zinango. M’midzidzi inatamba ife nyatwa, panango pisakhala pyakunentsa kucita pinthu pinafuna Yahova. Pyenepi pisacitika thangwi m’midzidzi ineyi, panango pinthu pyakuipa pinaoneka ninga pyakukhonda nentsa kucita. Mbwenye mungakhala wakukhulupirika, mbamubvera Yahova, imwe musapangiza kuti musanfuna kakamwe kupiringana pinthu pyonsene. Pontho musapangiza kuti ndimwe wakukhulupirika kuna iye. Natenepa, Yahova anakhalambo wakukhulupirika kuna imwe. Iye cipo anadzakusiyani.—Lerini Masalmo 4:3.

      DZIWANI PIZINJI

      Onani kuti thangwi yanji Yahova asakomerwa imwe mungambvera, pontho onani kuti ninji cinafuna kukuphedzani toera kukhala wakukhulupirika kuna iye.

      3. Sathani asakupambizirani

      Mwakubverana na pinaleri ife m’Bhibhlya m’bukhu ya Yobe, Sathani apambizira Yobe kuphatanizambo anthu onsene akuti asafuna kutumikira Yahova. Lerini Yobe 1:1, 6–2:10, buluka penepo cedzani thangwi ya mibvundzo iyi:

      • Mwakubverana na pidalonga Sathani, thangwi yanji Yobe akhabvera Yahova?—Onani Yobe 1:9-11.

      • Ninji pinapambizira Sathani kuna anthu onsene, kuphatanizambo imwe?—Onani Yobe 2:4.

      Lerini Yobe 27:5b, buluka penepo cedzani thangwi ya mbvundzo uyu:

      • Yobe apangiza tani kuti akhabvera Yahova na ntima wace onsene?

      Sathani akupambizira Yahova. Iye akupambizira kukhulupirika kwa Yobe wakuti manungo ace adzala na pironda, pontho cincino akupambizira mulongo wakuti akutumikira Yahova.

      Yobe apangiza kuti akhafuna Yahova pidapitiriza iye kukhala wakukhulupirika kuna iye

      Ife tinapangiza kuti tisafuna Yahova tingapitiriza kukhala wakukhulupirika kuna iye

      4. Komeresani ntima wa Yahova

      Lerini Misangani 27:11, buluka penepo cedzani thangwi ya mibvundzo iyi:

      • Kodi Yahova asapibva tani mungakhala wandzeru mbamumbvera? Thangwi yanji?

      5. Imwe munakwanisa kukhala wakukhulupirika kuna Yahova

      Kufuna kwathu Yahova kusatikulumiza toera kupanga anango thangwi ya iye. Nakuti ndife akukhulupirika kuna Yahova, ife tisambvera, mbaticita pyenepi maseze ndi pyakunentsa. Onani VIDHYU, buluka penepo cedzani thangwi ya mibvundzo inatowera.

      VIDHYU: Tsidzikizani Cikhulupiro Canu Mungatcingwa (5:09)

      • Kodi pisanentsa kuna imwe kupanga anango pya Yahova?

      • Mwakubverana na pidaona ife mu vidhyu, ninji cidaphedza Grayson toera kukunda kugopa kwace?

      Pisakhala pyakukhonda nentsa kuna ife kukhala akukhulupirika kuna Yahova tingafuna pinthu pinafuna iye mbatiida pinaida iye. Lerini Masalmo 97:10, buluka penepo cedzani thangwi ya mibvundzo iyi:

      • Mwakubverana na pidaleri imwe, ndi pinthu pipi pingasi pyakuti Yahova asapifuna? Ndi pinthu pipi pingasi pyakuti iye asapiida?

      • Musafunika kucitanji toera mutome kufuna pinthu pyadidi mbamuida pinthu pyakuipa?

      6. Kubvera Yahova ndi kwakufunika kakamwe

      Ndzidzi onsene, kubvera Yahova ndi kwakufunika kakamwe. Lerini Izaiya 48:17, 18, buluka penepo cedzani thangwi ya mibvundzo iyi:

      • Thangwi yanji mphyakuthema kukhulupira kuti Yahova angatiphemba toera tibvere mitemo yace, ndzidzi onsene iye asacita pyenepi toera kutiphedza? Thangwi yanji musatawira tenepo?

      • Mpaka pano, kupfundza thangwi ya mphangwa zinagumanika m’Bhibhlya na kupfundza thangwi ya Yahova Mulungu wandimomwene, kwakuphedzani tani?

      ANTHU ANANGO ASALONGA: “Ndinakwanisa kucita pinafuna ine, Mulungu nkhabe napyo basa.”

      • Mbamudaphatisira lemba ipi toera kupangiza kuti pinthu pinacita ife pinakwanisa kutsandzayisa Yahova peno kuntsukwalisa?

      TAPFUNDZANJI

      Imwe munakwanisa kupangiza kuti musafuna Yahova mungambvera na kukhala wakukhulupirika kuna iye, mwakukhonda tsalakana pinentso.

      Mibvundzo yakubwereza

      • Mwapfundzanji na pidacita Yobe?

      • Munapangiza tani kuti musafuna Yahova?

      • Ninji cinafuna kukuphedzani toera kukhala wakukhulupirika kuna Yahova?

      Yeserani kucita ipi

      TOERA KUDZIWA PINANGO

      Onani kuti munacitanji toera kukhala wakukhulupirika kuna Yahova na kuna mpingo.

      “Yahova Ndi Wakukhulupirika Kuna Anthu Akukhulupirika” (16:49)

      Pfundzani mphangwa zakuthimizirika zinapangiza kuti Sathani asapambizira tani anthu.

      “Yobe Apitiriza Kukhala Wakukhulupirika” (A Bíblia—Qual É a Sua Mensagem? khundu 6)

      Onani kuti ngakhale anang’ono anakwanisa kupangiza kuti asafuna Yahova.

      Tsandzayisani Ntima wa Yahova (8:16)

      Kodi m’phale peno ntsikana wakuti asakakamizwa na andzace toera kucita pinthu pyakuipa, anacitanji toera apitirize kukhala wakukhulupirika kuna Mulungu?

      Khondani Mikakamizo ya Andzanu! (3:59)

  • Tinacita Tani Pisankhulo Pyadidi
    Tsandzayani na Umaso Kwenda na Kwenda!​—Kucedza Pabodzi Thangwi Ya Bhibhlya
    • Nsolo 35. Mamuna akusaka mu interneti karu toera kugula, pontho iye ali pabodzi na nkazace na ana.

      NSOLO 35

      Tinacita Tani Pisankhulo Pyadidi

      Ife tonsene tisacita pisankhulo. Pisankhulo pizinji pinacita ife pisakhuya kakamwe umaso wathu na uxamwali wathu na Yahova. Mwacitsandzo, panango tinacita cisankhulo ca mbuto inafuna ife kukhala, njira yakugumana kobiri, peno tinasankhula khala tinamanga banja peno nkhabe. Tingacita pisankhulo pyadidi tisakhala na umaso wakutsandzayisa, pontho tisakomeresa Yahova.

      1. Munaphatisira tani Bhibhlya toera kucita pisankhulo pyadidi?

      Mbamudzati kucita cisankhulo, citani phembero toera Yahova akuphedzeni, pontho sakani kudziwa kuti Bhibhlya isalonganji thangwi ya pyenepi. (Lerini Misangani 2:3-6.) Midzidzi inango Yahova asapereka ntemo wakubveka mwadidi. Natenepa mungabvera ntemo unoyu musapangiza kuti mwacita cisankhulo cadidi kakamwe.

      Mphapo munacitanji khala m’Bhibhlya nkhabemo ntemo wakubveka mwadidi unalonga thangwi ya pinafunika imwe kucita? Yahova anadzakutsogolerani ‘munjira inafunika imwe kufamba nayo.’ (Izaiya 48:17) Munjira ipi? Bhibhlya iri na midida yakuti inakwanisa kukuphedzani. Midida ndi undimomwene wa m’Bhibhlya wakuti usatipfundzisa pinanyerezera Yahova. Midzidzi inango tisadzindikira pinanyerezera Mulungu tingaleri mphangwa za anthu analongwa m’Bhibhlya. Tingabvesesa mabvero a Yahova tinakwanisa kucita pisankhulo pyakuti pinankomeresa.

      2. Musafunika kunyerezeranji mbamudzati kucita cisankhulo?

      Bhibhlya isalonga: “Munthu wandzeru asanyerezera mwadidi mbadzati kucita cinthu.” (Misangani 14:15) Pyenepi pisabveka kuti mbatidzati kucita cisankhulo tisafunika kunyerezera pinthu pyonsene pinaphataniza cisankhulo cinafuna ife kucita. Buluka penepo bvundzikani: ‘Ndi midida ipi ya m’Bhibhlya yakuti ndinakwanisa kuiphatisira? Kodi cisankhulo ceneci cinandiphedza toera kukhala na ntendere wa m’manyerezero? Cisankhulo canga cinakhuya tani anthu anango? Kusiyapo pyenepi, kodi cisankhulo ceneci cinatsandzayisa Yahova?’—Dheuteronomyo 32:29.

      Yahova ndiye adathema toera kutipanga pinthu pyadidi na pyakuipa. Tingadziwa mwadidi mitemo na midida ya Mulungu mbatiibvera, tinakhala na cikumbuntima cakupfundziswa mwadidi. Cikumbuntima ndi luso yakuti isatiphedza kudziwa cadidi na cakuipa. (Aroma 2:14, 15) Cikumbuntima cakupfundziswa mwadidi cinatiphedza toera kucita pisankhulo pyadidi.

      DZIWANI PIZINJI

      Onani kuti midida ya m’Bhibhlya na cikumbuntima cathu pinatiphedza tani toera kucita pisankhulo pyadidi.

      3. Tawirisani kuti Bhibhlya ikutsogolereni

      Midida ya m’Bhibhlya inatiphedza tani pakucita pisankhulo? Onani VIDHYU, buluka penepo cedzani thangwi ya mibvundzo inatowera.

      VIDHYU: Tsogolerwani na Midida ya m’Bhibhlya (5:54)

      • Ndi muoni upi wadidi kakamwe udatipasa Yahova?

      • Thangwi yanji Yahova atipasa luso yakucita pisankhulo?

      • Kodi Yahova atipasanji toera tikwanise kuphatisira mwadidi luso yakucita pisankhulo?

      Toera kuona citsandzo cibodzi ca n’dida wa m’Bhibhlya, lerini Aefesi 5:15, 16. Buluka penepo cedzani kuti munaphatisira tani “mwadidi kakamwe ndzidzi wanu” toera . . .

      • kuleri Bhibhlya ntsiku zonsene.

      • kukhala mamuna peno nkazi wadidi, nyakubala, peno mwana wadidi.

      • kugumanika pa misonkhano ya mpingo.

      4. Pfundzisani cikumbuntima canu toera kucita pisankhulo pyadidi

      Mphyakukhonda nentsa kucita cisankhulo khala Bhibhlya isapereka ntemo wakubveka mwadidi. Mphapo tinacitanji khala nkhabepo ntemo wakubveka? Onani VIDHYU, buluka penepo cedzani thangwi ya mbvundzo unatowera.

      VIDHYU: “Pitirizani Kukhala na Cikumbuntima Cadidi” (5:13)

      • Mwakubverana na vidhyu, mulongo acitanji toera kupfundzisa cikumbuntima cace, pontho toera acite cisankhulo cakuti mbacidakomeresa Yahova?

      Thangwi yanji nee tisafunika kuphemba anango toera aticitire pisankhulo? Lerini Ahebheri 5:14, buluka penepo cedzani thangwi ya mibvundzo iyi:

      • Kuphemba anango kuti aticitire pisankhulo panango ndi pyakukhonda nentsa. Mphapo m’bodzi na m’bodzi wa ife asafunika kudziwanji?

      • Ninji pinafuna kukuphedzani kupfundzisa cikumbuntima canu mbamucita pisankhulo pyadidi?

      Munthu akutekenya karu mu nseu. GPS iri kutsogolo kwace isam’phedza toera akhonde tayika.

      Ninga mapa, cikumbuntima cathu cinakwanisa kutiphedza kudziwa pinthu pinafunika ife kucita mu umaso wathu

      5. Lemedzani cikumbuntima ca anango

      Anthu ndi akusiyana, natenepa asacita pisankhulo pyakusiyana. Tinapangiza tani kuti tisalemedza cikumbuntima ca anango? Onani pitsandzo piwiri:

      Citsandzo 1: Mulongo m’bodzi wakuti asakomerwa kucinga tsisi afuluka mbaenda ku mpingo wakuti alongo azinji nee asakomerwa angaona alongo mbakacinga tsisi.

      Lerini Aroma 15:1 na 1 Akorinto 10:23, 24, buluka penepo cedzani thangwi ya mibvundzo iyi:

      • Mwakubverana na mavesi anewa, mulongo unoyu anasankhula kucitanji? Munacitanji khala muli na munthu wakuti cikumbuntima cace cisan’khondesa kucita cinthu cakuti cikumbuntima canu cisatawirisa kucita?

      Citsandzo 2: M’bale m’bodzi asadziwa kuti Bhibhlya nkhabe kukhondesa kumwa mbukhonda piringana midida, mbwenye asasankhula kukhonda kumwa pyakumwa pyakuledzeresa. Iye asacemerwa toera kuenda kadya kunyumba ya m’bale unango. Kweneko, iye asaona kuti abale anango ali kumwa pyakumwa pyakuledzeresa.

      Lerini Ekleziaste 7:16 na Aroma 14:1, 10, buluka penepo cedzani thangwi ya mibvundzo iyi:

      • Mwakubverana na mavesi anewa, m’bale unoyu anasankhula kucitanji? Munacitanji mungaona munthu unango mbakacita cinthu cakuti cikumbuntima canu nee cisatawirisa kucita?

      Ninji pinafuna kutiphedza toera ticite pisankhulo pyadidi?

      Nkazi akucita phembero.

      1. Citani phembero kuna Yahova toera akuphedzeni kusankhula cinafuna imwe kucita.—Tiyago 1:5.

      Nkazi m’bodzi ene akuphatisira Bhibhlya, mabukhu anthu akubuluswa m’Bhibhlya na ntcini wa ndzeru toera kufufudza.

      2. Fufudzani m’Bhibhlya na m’mabukhu athu akubuluswa m’Bhibhlya toera mugumane midida yakuti inakwanisa kukuphedzani. Munakwanisambo kuphemba ciphedzo kuna Akristu akukola mwauzimu.

      Nkazi m’bodzi ene akunyerezera.

      3. Nyerezerani kuti cisankhulo canu cinakhuya tani cikumbuntima canu na ca anango.

      ANTHU ANANGO ASALONGA: “Ndinacita pinafuna ine. Nkhabe napyo basa pinthu pinanyerezera anthu anango.”

      • Thangwi yanji tisafunika kunyerezera maonero a Mulungu na a anthu anango?

      TAPFUNDZANJI

      Toera kucita pisankhulo pyadidi tisafunika kudziwa pinanyerezera Yahova thangwi ya pisankhulo pyathu, pontho tisafunika kuona kuti pisankhulo pyathu pinakhuya tani anthu anango.

      Mibvundzo yakubwereza

      • Munacita tani pisankhulo pyakuti pinakomeresa Yahova?

      • Munapfundzisa tani cikumbuntima canu?

      • Munapangiza tani kuti musalemedza cikumbuntima ca anango?

      Yeserani kucita ipi

      TOERA KUDZIWA PINANGO

      Munacita tani pisankhulo pyakuti pinawangisa uxamwali wanu na Mulungu?

      “Citani Pisankhulo Pyakuti Pinapasa Mbiri Mulungu” (Ncenjezi, 15 ya Abril 2011)

      Pfundzani mphangwa zakuthimizirika zinalonga kuti Yahova asatipasa tani uphungu.

      Yahova Asatsogolera Mbumba Yace (9:50)

      Onani pidaphedza mamuna m’bodzi toera kucita cisankhulo cakunentsa.

      Pyonsene Pisafamba Mwadidi na Ciphedzo ca Yahova (5:46)

      Tinacitanji khala Yahova nee apereka ntemo wakubveka thangwi ya cisankhulo cinafuna ife kucita.

      “Kodi Ndzidzi Onsene Tisafunika Kukhala na Ntemo wa m’Bhibhlya?” (Ncenjezi, 1 ya Dezembro 2003)