Nsolo Wacitanthatu

Nseru Unayang’anisana Na Ife Tonsene

 1, 2. (a) Kodi Sathani asosa nseru upi m’Edeni? (b) Kodi nseru unoyu wapangizwa tani na malongero ace?

¹IMWE mwaphatanizwa m’nseru ukulu kakamwe unayang’anisana na anthu onsene. Khundu inasankhula imwe kuphedza inadzatonga kuti munadzakhala na umaso okhonda mala peno nkhabe. Nseru unoyu watoma mudaoneka upanduki m’Edeni. M’nzidzi unoyu Sathani abvunza Eva: “Ndimo mwene kuti Mulungu akukhondesani kudya nsapo wa muti ubodzi pa tapada?” Eva atawira kuti pya muti ubodzi Mulungu alonga: “Chipo na lini munadzadya nsapo wa muti uyu, . . . mungadzachita, munadzafa.” Buluka penepo Sathani apambizira Yahova m’kulonga uthambi wakuti umaso wa Eva na Adamu nee ukhanyindira kubvera Mulungu tayu. Sathani alonga kuti Mulungu akhakhondesa pinthu pyadidi kwa pyakucitwa pyace—luso yakuikha midida yawo ene m’umaso. Sathani ampasa cibaso: “Mulungu asadziwa kuti, ntsiku inadzadya imwe, maso anu anadzafunguka, na imwe munadzakhala sawa-sawa na Mulungu, munadzadziwa pya udidi na [pyakuipa].”—Genesi 3:1-5.

² Mwandimomwene, Sathani akhalonga kuti anthu mbadakhala mwadidi m’kucita okhene pyakusankhula mbuto mwa kubvera miyambo ya Mulungu. Tenepa iye apokanya njira yakutonga ya Mulungu. Pyenepi pyasosa nseru ukulu kakamwe wa utongi ukulu wa Mulungu wakudzulu na pantsi, pinabveka, kuthema kwace kwa kutonga. Mbvunzo udatomeswa ndi uyu: Kodi pyadidi ndi pipi kwa anthu, njira yakutonga ya Yahova peno kutongeka okhene? M’nzidzi uneule ene, Yahova mbadafudza Adamu na Eva, mbwenye pyenepi nee mbipidamalisa nseru wa utongi ukulu m’njira yakukomeresa. M’kusiya mbumba ya anthu kuthimizirika m’nzidzi uzinji, Mulungu mbadakwanisa kupangizadi pyakubwereswa na kukhonda bvera iye na miyambo yace.

 3. Kodi ndi upi nseru waciwiri udasosa Sathani?

³ Kupomokera kwa Sathani kuthema kwa kutonga kwa Yahova nee kwamala na pidacitika m’Edeni tayu. Iye atomesa mbvunzo wa kukhulupirika kwa anango kwa Yahova. Unoyu wadzakhala nseru waciwiri. Kupomokera kwace kwaphataniza mbeu ya Adamu na Eva na ana onsene auzimu a Mulungu, ngakhale Mwana wautombo wakufunika wa Yahova. Mwacitsanzo, m’ntsiku za Yobe, Sathani alonga kuti anthu anatumikira Yahova nee asacita pyenepi thangwi ya kufuna Mulungu na njira zace zakutonga, mbwenye thangwi yakufuna maphindu. Iye alonga kuti iwo angagwerwa na nyatwa, onsene anadzakhala na pifuno pyakucenama.—Yobe 2:1-6; Apokalipse 12:10.

Pidapangiza Mbiri Ya Anthu

 4, 5. Kodi mbiri yapangizanji pya anthu kuyesera kutsogolera mathanyo awo?

⁴ Ntsonga yakufunika m’nseru wa utongi ukulu ndi iyi: Mulungu hadacita anthu kuti akhale maso mbatongeka okhene na kupembera kunja kwa utongi wace tayu. Kuti iwo aphindule, iye aacita towera kubvera miyambo yace yakulungama. Mprofeta Yeremiya adzindikira: “Mbuya, nee munthu mbodzi asadziwa pya patsogolo pache nee kupitonga. Sandikani anthu a mbumba yanu.” (Yeremiya 10:23, 24) Natenepa Mafala a Mulungu asadembetera: “Khulupira Mulungu na ntima wako wonsene mbuleka kukhulupira nzeru zako.” (Misangani 3:5) Tenepa ninga Mulungu acita anthu kuti angonjere miyambo yace yacibaliro towera akhale maso, iye acitambo miyambo ya makhaliro adidi, yakuti mbidabverwa mbidabweresa mbumba yakubverana.

⁵ Mwapakweca, Mulungu akhadziwa kuti cipo banja ya anthu mbidapembera m’kuikha miyambo yawo ene mwakusowa utongi wace. M’kuyesera mwapezi kukhonda bvera utongi wa Mulungu, anthu aikha makhaliro akusiyanasiyana andale, ampfuma na auphemberi. Kusiyana kweneku kwapitisa anthu m’nthonga yokhonda mala inabweresa uphanga, nkhondo na kufa. ‘Munthu asaponderera munthu ndzache mpaka kunfudza.’ (Koelete [Mlaliki] 8:9) Pyenepi ndi pinacitika nkati mwa mbiri ya anthu. Ninga pyalongerwatu m’Mafala a Mulungu, anthu akuipa na akunyengeza anzawo ‘asathimiza kuipa kwawo.’ (2 Timoti 3:13) M’piaka dzana 20 anthu athambaruka kakamwe m’siyensiya na m’mafabirika. M’piaka pyenepi anthu aonambo miliri yakunyanyiratu kupiringana kale. Mafala a Yeremiya 10:23 akhaladi andimomwene—anthu hadacitwa towera kutsogolera mathanyo awo tayu.

 6. Kodi mokhonda dembuka Mulungu anadzamalisa tani kutongeka kwa anthu okhene?

⁶ Maphindu akuipa na akukhonda mala anabwereswa na kukhonda bvera Mulungu apangiziratu kuti cipo utongi wa anthu unakwanisa kupembera. Utongi wa Mulungu ndi njira ibodzi basi yakutsanzaya, kubverana, ungumi wadidi na umaso. Mafala a Mulungu asapangiza kuti kulekerera kwa Yahova anthu kutongeka okhene kuli duzi na kumala. (Mateo 24:3-14; 2 Timoti 3:1-5) Mokhonda dembuka, iye anadzapita m’mautongi a anthu towera kuikha utongi wace pa dziko yonsene yapantsi. Profesiya ya Biblya isalonga: “Pa utongi wenewu wakumalisa [mautongi a anthu anagumanika cincino], Mulungu anadzalamusa utongi unango [kudzulu] wakukhonda kufudzika, na wakukhondambo kungonjeswa. Utongi uyu, unadzakunda [mbupasa] manyadzo utongi unango [wa ntsiku zino], iwo mbukhala pyawo mwa kuwanga mwene.”—Danyele 2:44.

Kupulumuka Towera Kupita M’dziko Ipswa Ya Mulungu

 7. Kodi mbani anafuna pulumuka utongi wa Mulungu ungadzamalisa mautongi a anthu?

⁷ Kodi mbani anafuna pulumuka utongi wa Mulungu ungadzamalisa mautongi a anthu? Biblya isatawira: “Adidi [ale anaphedza kuthema kwa kutonga kwa Mulungu] ndiwo anafuna kudzakhala anachiro a pantsi, anyakulungama ndiwo anafuna kusalikirapo.” (Misangani 2:21) Nyamasalmo alongambo: “Thimize pang’ono anyakuipa [ale anakhonda phedza kuthema kwa kutonga kwa Mulungu] anadzambazika [peno hanadzakhalapobve] . . . Anyakulungama anatambira dziko, mbakhala [mwenemo] kuenda na kuenda.”—Masalmo 37:10, 29.

 8. Kodi Mulungu anadzabwezerwa tani mwakukwana utongi wace ukulu?

⁸ Makhaliro a Sathani angamala kufudzwa, Mulungu anadzatomesa dziko yace ipswa, yakuti inadzapswaira uphanga, nkhondo, ucerengi, kunenseka, utenda na kufa kunathabusa anthu m’piaka pizinji. Biblya isafokotoza mwadidi nkhombo zinadikhira anthu akubvera: “Mulungu anadzakhala pabodzi na anthu, mbapukuta misozi yonsene m’maso mwawo. Kufa hakunadzakhala’po pontho tayu, nee kutsukwala, nee kulira, nee nyatwa thangwi pya kale pyamala.” (Apokalipse 21:3, 4) Kubulukira ku Utongi wace wakudzulu wakutongwa na Kristu, Mulungu anadzabwezerwa (anadzapangiza) mwakukwana kuthema Kwace kukhala Ntongi wathu Wankulu.—Aroma 16:20; 2 Pedro 3:10-13; Apokalipse 20:1-6.

Khundu Idasankhula Iwo M’nseru

 9. (a) Kodi ale adapitiriza kukhala akukhulupirika kwa Yahova akhaona tani mafala ace? (b) Kodi Noa apangiza tani kukhulupirika kwace, na tinakwanisa tani kuphindula na citsanzo cace?

⁹ M’nzidzi wakale, mukhali amuna na akazi akukhulupira akuti apangiza kukhulupirika kwawo kwa Yahova ninga Ntongi Wankulu. Iwo akhadziwa kuti umaso wawo ukhanyindira kubvesera na kubvera Yahova. Noa akhali mbodzi wa iwo. Natenepa Mulungu alonga kwa Noa: “Ndzidzi wakumala kwa anthu onsene wakwana pa maso pa ine. . . . Sasanya mwadiya ukulu.” Noa angonjera citsogolero ca Yahova. Maseze akhacenjezwa, anthu anango a ntsiku zenezire akakhala ninga kuti cinthu cacilendo mbicidadzacitika tayu. Mbwenye Noa asasanya mwadiya ukulu na apitiriza kumwaza mphangwa kwa anango pya njira zakulungama za Yahova. Mbiri isapitiriza kulonga: “Noa atoma kuphata basa, mbachita pyonsene ninga mudapangirwa iye na Mulungu.”—Genesi 6:13-22; Ahebere 11:7; 2 Pedro 2:5.

10. (a) Kodi Abrahamu na Sara aphedza tani utongi ukulu wa Yahova? (b) Kodi tinakwanisa tani kuphindula na citsanzo ca Abrahamu na Sara?

¹⁰ Abrahamu na Sara akhalimbo pitsanzo pyadidi m’kuphedza utongi ukulu wa Yahova, m’kucita pyonsene pidapangwa iwo na Mulungu. Iwo akhali m’Uri wa ku Kaldea, nzinda wakukhupuka. Mbwenye mudapanga Yahova Abrahamu kuti aende ku dziko yacilendo, Abrahamu “alamuka mbaenda ninga mudampangira Mbuya.” Mwakukhonda penula Sara akhali na umaso wakukhupuka—na mudzi, axamwali na acibale. Ngakhale tenepa, mwakubvera Yahova na mamunace, Sara aenda ku dziko ya Kanani, maseze iye nee akhadziwa makhaliro akhafuna gumana iye kweneko.—Genesi 11:31–12:4; Machitiro 7:2-4.

11. (a) Kodi Mose aphedza utongi ukulu wa Yahova m’makhaliro api? (b) Kodi citsanzo ca Mose cingakwanise kutiphedza tani?

¹¹ Mose akhali munthu unango adaphedza utongi ukulu wa Yahova. Iye acita pyenepi pakati pa makhaliro akunensa kakamwe—m’kulonga nkhope na nkhope na Farao wa Ejito. Si thangwi yakuti Mose akhanyindira mphambvu zace tayu. Mwakusiyana na pyenepi, iye apenula luso yace ya kulonga mwadidi. Mbwenye iye abvera Yahova. Na ciphedzo ca Yahova na ca mbale wace, Aroni, mwakubwerezerabwerezera Mose alonga mafala a Yahova kwa Farao wakuuma ntima. Ngakhale ana anango a Israele asumula Mose mwaukali. Ngakhale tenepa, Mose mwakukhulupirika acita pinthu pyonsene pidampanga Yahova, na kubulukira mwa iye, Israele asudzulwa m’Ejito.—Eksodo 7:6; 12:50, 51; Ahebere 11:24-27.

12. (a) Kodi ndi ninji pinapangiza kuti kukhulupirika kwa Yahova kusaphataniza pizinji kupiringana kucita basi pidalemba Mulungu? (b) Kodi kubvesesa kukhulupirika kwa ntundu unoyu kunatiphedza tani kuphatisira lemba ya 1 Jwau 2:15?

¹² Ale adakhala akukhulupirika kwa Yahova hadanyerezera kuti pikhafunika iwo kubvera ndi pire pidalemba Mulungu basi tayu. Mudayesera nkazi wa Putifare kunyengerera Zuze towera kucita naye upombo, nee pakhali matongero akulembwa akubuluka kwa Mulungu akukhondesa upombo. Mbwenye, Zuze akhadziwa masasanyiro a pya ukwati adaikhwa na Yahova m’Edeni. Iye akhadziwa kuti kupita m’mabonde na nkazi wa mwanaciro mbukudapindisa Mulungu. Zuze nee akhafuna kuyesera towera kudziwa kuti mpaka papi Mulungu mbadansiya kukhala ninga Aejito. Iye aphedza njira za Yahova m’kunyerezera matsalakaniro a Mulungu anthu na kuphatisira mwanzeru pidadzindikira iye kuti ndi cifuno ca Mulungu.—Genesi 39:7-12; Masalmo 77:11, 12.

13. Kodi Sathani apangizwa tani kukhala nyauthambi kwa (a) Yobe? (b) aphale atatu Acihebere?

¹³ Ngakhale ayeserwe mwakuwanga, ale anadziwadi Yahova nkhabe kunsiya. Sathani alonga kuti Yobe mbadaluza mpfuma zace zizinji peno ungumi wace, Yobe—wakuti asimbwa kakamwe na Yahova—mbadasiya Mulungu. Mbwenye Yobe apangiza kuti Dyabo ndi nyauthambi, maseze Yobe nee akhadziwa kuti thangwi yanji iye akhathimbana na miliri. (Yobe 2:9, 10) Mudapita madzana a piaka, m’kukakamira mafala ace, Sathani acitisa kuti mambo wakuipirwa wa Babilonya athuse aphale atatu Acihebere kuti anaapha m’bvuni wa moto angakhonda kugodama mbalambira dzimunthu ikhadaikha mambo. M’kukakamizwa kusankhula pakati pa kubvera ntemo wa mambo na kubvera mwambo wa Yahova wa kukhondesa kulambira dzimunthu, mwadzololo apangiza kuti iwo akhatumikira Yahova na kuti iye akhali Ntongi wawo Wankulu. Kukhulupirika kwa Mulungu kukhali kwakufunika kakamwe kwa iwo kupiringana umaso wawo m’nzidzi uneule!—Danyele 3:14-18.

14. Ninga anthu akusowa ungwiro, kodi pisakwanisika tani kupangiza kukhulupirika kwandimomwene kwa Yahova?

¹⁴ Kodi na pitsanzo pyenepi tisafunika kunyerezera kuti munthu akwanise kukhala wakukhulupirika kwa Yahova asafunika kukhala waungwiro peno kuti iye angadodoma adodomeratu? Nkhabe! Biblya isatipanga kuti m’midzidzi inango Mose akhadodoma. Maseze Yahova akhaipirwa napyo, iye hadakhonda Mose tayu. Apostolo a Yezu Kristu akhalambo na madodo. Kunyerezera unthaka wathu wakusowa ungwiro, Yahova asakomerwa tingakhonda kupwaza mwanyakhomo cifuno cace m’njira zonsene. Tingadawa thangwi ya kufewa, mphyakufunika kuti titcinyuke mwakuona ntima na kukhonda bwerezera kudawa kweneku. M’njira ineyi tisapangiza kuti mwandimomwene tisafuna pinalonga Yahova kukhala pyadidi na tisaida pinapangiza iye kukhala pyakuipa. Kubulukira m’cikhulupiro cathu m’ntsembe yaciomboli ya Yezu, tingakwanise kukhala na nkhaliro wadidi pamaso pa Mulungu.—Amosi 5:15; Machitiro 3:19; Ahebere 9:14.

15. (a) Kodi mbani pakati pa anthu onsene adakoya umumphu waungwiro kwa Mulungu, na pyenepi pyapangizanji? (b) Kodi tisaphedzwa tani na pidacita Yezu?

¹⁵ Kodi tinalonga tenepa kuti kubvera kwaungwiro utongi ukulu wa Yahova ndi kwakucimwanika kwa anthu? Ntawiro wa mbvunzo unoyu ukhali ninga cinthu ‘cakubisika’ cifupi na piaka 4.000. (1 Timoti 3:16, CC) Maseze Adamu acitwa waungwiro, hadapangiza tayu citsanzo cadidi ca kuperekeka kwaumulungu. Kodi mbani adapangiza? Mwandimomwene, nee mbodzi wa mbeu yace yakudawa. Munthu mbodzi basi adacita pyenepi ndi Yezu Kristu. (Ahebere 4:15) Pidacita Yezu pisapangiza kuti Adamu, wakuti akhali na makhaliro adidi kakamwe, iye mbadafuna mbadakwanisa kukoya umumphu waungwiro. Kudodoma nee kukhali m’pyakucitwa pya Mulungu tayu. Natenepa, Yezu Kristu ndi citsanzo cinafunika ife kusangizira tayu m’kupangiza kubvera basi mwambo wa Mulungu mbwenye m’kuperekeka kwathu kwa Yahova, Ntongi Wankulu Wakudzulu na Pantsi.—Deuteronomyo 32:4, 5.

Kodi Ntawiro Wathu Ndi Upi?

16. Thangwi yanji nzidzi onsene tisafunika kukhala akulindira m’makhaliro athu thangwi ya utongi ukulu wa Yahova?

¹⁶ Mbodzi na mbodzi wa ife lero asayang’anisana na nseru wa utongi ukulu wakudzulu na pantsi. Tingalonga pakweca kuti tiri kukhundu kwa Yahova, Sathani asatikutira. Iye asabweresa nkakamizo kubulukira m’makhundu onsene na anadzapitiriza kucita pyenepi mpaka kumala kwa makhaliro ano apinthu akuipa. Tisafunika kupitiriza kukhala dzololo peno akulindira. (1 Pedro 5:8) Makhaliro athu asapangiza khundu idasankhula ife m’nseru unoyu ukulu kakamwe wa utongi ukulu wa Yahova na nseru waciwiri wa kukhulupirika kwa Mulungu tingayeserwa. Ife nkhabe funika kuona makhaliro okhonda khulupirika ninga cinthu cadzenda thangwi asagumanika konsene kwene m’dziko. Towera kukoya kukhulupirika tisafunika kuwangisira kuphatisira njira zakulungama za Yahova m’pinthu pyonsene pyaumaso.

17. Kodi kulonga uthambi na kuba pyatoma kupi na thangwi yanji tisafunika kupicalira?

¹⁷ Mwacitsanzo, ife nkhabe funika kusangizira Sathani, “Baba wa uthambi.” (Jwau 8:44) Tisafunika kukhala akukhulupirika m’pinthu pyonsene pinacita ife. M’makhaliro a Sathani, kazinji kene aphale na atsikana nkhabe khulupirika kwa anyakubala awo. Mbwenye aphale na atsikana Acikristu asacalira pyenepi, mbapangiza tenepa kuti mpambiziro wa Sathani wakuti anthu a Mulungu mbadasiya kukhulupirika kwawo angayeserwa ndi uthambi. (Yobe 1:9-11; Misangani 6:16-19) Kusiyapo pyenepi, alipo mabasa amalonda akuti angakwanise kudzindikirisa munthu na “Baba wa uthambi” mbuto mwakundzindikirisa na Mulungu wa undimomwene. Ife tisacalira mabasa anewa. (Mikeya 6:11, 12) Pontho, umbava nkhabe lekererwa thangwi ya utcerengi peno thangwi yakuti nyakuberwa ndi nyampfuma. (Misangani 6:30, 31; 1 Pedro 4:15) Khala umbava ndi wakudzoloereka m’cisa cathu peno cinthu cidabiwa ndi cing’ono, umbava ndi wakuphonyana na miyambo ya Mulungu.—Luka 16:10; Aroma 12:2; Aefesi 4:28.

18. (a) Pakumala kwa Utongi wa Kristu wa Piaka Cikwi, kodi ndi kuyeserwa kwanji kunafuna kukhalapo kwa anthu onsene? (b) Kodi tisafunika kusakulira nkhaliro upi cincino?

¹⁸ Nkati mwa Utongi wa Kristu wa Piaka Cikwi, Sathani na mademonyo ace anadzaikhwa m’dzenje, mbacimwana kutonga anthu. Ndi kusudzuka tani kunafuna kudzakhala na ife! Mbwenye pakumala kwa piaka cikwi pyenepi, iwo anadzasudzulwa m’nzidzi wakucepa. Sathani na ale anantowerera anadzakakamiza anthu adabwezerwa m’ungwiro akuti asakoya kukhulupirika kwawo kwa Mulungu. (Apokalipse 20:7-10) Tingakhala na mwai wakukhala maso pa nzidzi unoyu, kodi tinadzatawira tani nseru wa utongi ukulu wa kudzulu na pantsi? Nakuti anthu onsene anadzakhala aungwiro, munthu angadzakhala okhonda khulupirika ndi kufuna kwace na pyenepi pinadzambweresera kufudzwa kwa kwenda na kwenda. Ndi kwakufunika tani kusakulira cincino cidzoloero cakubvera citsogolero consene cinatipasa Yahova, kubulukira m’Mafala ace peno kubulukira ku gulu yace! M’kucita pyenepi, tisapangiza kuperekeka kwathu na ntima onsene kwa Ntongi Wankulu Wakudzulu na Pantsi.

Kubwerezera Pidapfunzwa

• Kodi ndi nseru upi ukulu unayang’anisana na ife tonsene? Kodi ife taphatanizwa tani m’nseru unoyu?

• Kodi matawiriro a nseru a amuna na akazi a nzidzi wakale apangizanji pya kukhulupirika kwawo kwa Yahova?

• Thangwi yanji tisafunika kulemedza Yahova na makhaliro athu a ntsiku na ntsiku?