NSOLO WA PFUNDZIRO 12
Kodi Imwe Muli Kuona Pidaona Zakariya?
‘Pinthu pyenepi pyonsene nee pinadzacitika na mphambvu ya nsoka wa anyankhondo, nee na mphambvu za anthu, mbwenye na nzimu wanga, alonga Yahova wa anyankhondo.’—ZAK. 4:6.
NYIMBO 73 Tipaseni Cipapo
PINAFUNA IFE KUPFUNDZAa
1. Ndi cinthu cipi cakutsandzayisa cikhafuna kucitikira Ayuda?
AYUDA akhali akutsandzaya kakamwe. Yahova ‘akulumiza ntima wa Siro, Mambo wa ku Persya’ toera asudzule Aizraeli akuti akhali mu ubitcu mu pyaka pizinji ku Bhabhilonya. Mambo adziwisa kuti Ayuda akhafunika kubwerera ku dziko yawo toera ‘amange pontho nyumba ya Yahova Mulungu wa Izraeli.’ (Esd. 1:1, 3) Unoyu ukhali ndzidzi wakutsandzayisa kakamwe! Thangwi ulambiri wa Mulungu wandimomwene mbudakhazikiswa pontho mu dziko idapasa iye mbumba yace.
2. Ndi cinthu cipi cakutoma cidacita Ayuda pidabwerera iwo ku ubitcu?
2 Mu caka 537 Kristu Mbadzati Kubalwa, nsoka wakutoma wa Ayuda akhali ku ubitcu wafika ku Yerusalemu, wakuti ukhali nzinda ukulu kakamwe wa umambo wa Yuda. Mwakukhonda dembuka, iwo atoma basa yakumanga templo. Pontho mu caka 536 Kristu Mbadzati Kubalwa, iwo akhadamala kuikha miyala pantsi.
3. Kodi anyamalwa a Ayuda acitanji?
3 Pidatoma Ayuda kumanga pontho templo, anthu azinji atoma kuatcinga. Lemba ya Esdra 4:4 isalonga: ‘Anthu a madziko acifupi akhapitiriza kufewesa manungo a anthu a ku Yuda, pontho akhaathusa toera asiye basa yakumanga.’ (Esd. 4:4) Pyenepi pikhali pyakunentsa kuna Ayuda, mbwenye pinthu pyadzatekera. Mu caka 522 Kristu Mbadzati Kubalwa, Artaxerxe adzakhala mambo wa ku Persya.b Anyamalwa a Ayuda aona kuti pyenepi mbapidaaphedza toera kulimirisa basa yakumanga templo mu Yerusalemu, ‘mbaphatisira mwambo toera kubweresa nyatwa.’ (Masal. 94:20) Iwo atumiza tsamba kuna Mambo Artaxerxe mbampanga kuti Ayuda akucita masasanyiro toera kusandukira mambo. (Esd. 4:11-16) Mambo atawira uthambi udapangwa iye mbalimirisa basa yakumanga templo. (Esd. 4:17-23) Natenepa, kutsandzaya konsene kwa anyakumanga templo kwamala.—Esd. 4:24.
4. Yahova acitanji toera kuphedza Ayuda kuti apitirize na basa yawo yakumanga templo? (Izaiya 55:11)
4 Anthu akuti nee akhatumikira Yahova akuti akhali mu nzinda wa Yuda na anthu anango a mu utongi wa Persya acita pyonsene pikhakwanisa iwo toera kulimirisa basa yakumanga templo. Mbwenye Yahova akhafuna kuti basa ineyi ipitirize, pontho ndzidzi onsene iye asakwanirisa cifuniro cace. (Lerini Izaiya 55:11.) Iye asankhula mprofeta wacipapo akhacemerwa Zakariya, pontho amuonesa masomphenya masere akutsandzayisa, natenepa Zakariya akhafunika kulonga masomphenya anewa toera kuwangisa cikhulupiro ca Ayuda. Masomphenya anewa aphedza Ayuda toera kuona kuti iwo nee akhafunika kugopa anyamalwa awo, pontho iwo akhafunika kupitiriza kuphata basa ya Yahova. M’masomphenya acixanu, Zakariya aona cakuikhira nyale na miti miwiri ya milivera.
5. Tinapfundzanji mu nsolo uno?
5 Midzidzi inango, ife tonsene tisafewa manungo. Natenepa ife tinakwanisa kuphedzeka na ciwangiso cidapereka Yahova kuna Aizraeli tingapfundza masomphenya acixanu adaoneswa Zakariya. Kubvesesa masomphenya anewa kunakwanisa kutiphedza toera kupitiriza kutumikira Yahova mwakukhulupirika anthu angatitcinga, makhaliro athu angacinja peno tingapaswa pitsogolero pyakuti nee tisapibvesesa mwadidi.
ANTHU ANGATITCINGA
Zechariah saw a vision of two olive trees supplying oil to a lampstand that had seven lamps (Onani ndima 6)
6. Kodi masomphenya a cakuikhira nyale na miti miwiri ya milivera adalongwa pa Zakariya 4:1-3, aphedza tani Ayuda toera kukhala na cipapo? (Onani foto iri patsamba yakutoma.)
6 Lerini Zakariya 4:1-3. Masomphenya a cakuikhira nyale na miti miwiri ya milivera aphedza Ayuda toera apitirize kucita basa yawo mwakukhonda tsalakana kutcingwa. Munjira ipi? Kodi imwe mwakwanisa kuona kuti cakuikhira nyale cidaoneswa Zakariya m’masomphenya ndzidzi onsene cikhali na mafuta? Mafuta a miti miwiri ya milivera akhawewa mbapita ntijela, buluka penepo mafuta anewa akhali ntijela akhawewa mbapita mu nyale zinomwe zikhali pa cakuikhira nyale. Na thangwi ineyi nyale zenezi nee zikhathima. Zakariya abvundza anju akhamuonesa masomphenya: ‘Pinthu pyenepi pisabvekanji’? Anju unoyu antawira na mafala awa adabuluka kuna Yahova: ‘Nee pinadzacitika na mphambvu za anyankhondo nee na mphambvu za anthu, mbwenye na nzimu wanga, alonga Yahova wa anyankhondo.’ (Zak. 4:4, 6) Mafuta a milivera akhaimira mphambvu ya nzimu wakucena wa Yahova, mphambvu yakuti nkhabe kumala. Anyankhondo onsene amphambvu a Utongi wa Persiya nee akhali na mphambvu tingaalandanisa na mphambvu ya nzimu wakucena wa Mulungu. Na ciphedzo ca Yahova, anyakumanga templo mbadakwanisa kupirira kutcingwa mbamalisa basa yawo yakumanga templo. Mafala anewa akhali akuwangisa kakamwe. Ayuda basi ene akhafunika kunyindira Yahova mbapitiriza na basa yawo yakumanga templo. Iwo acita pyenepi, maseze basa yawo ikhapitiriza kukhondeswa.
7. Ndi pinthu pipi pidacitika pyakuti pyaphedza anyakumanga templo?
7 Paoneka macinjo adaphedza Ayuda toera apitirize na basa yawo yakumanga. Ndi macinjo api anewa? Mu caka 520 Kristu Mbadzati Kubalwa, Dariyo I atoma kutonga ku Persya. Mu caka caciwiri ca utongi wace, adzindikira kuti kukhondesa Ayuda kumanga templo nee pikhabverana na mwambo. Natenepa Dariyo atawirisa Ayuda toera apitirize na basa yawo yakumanga templo mpaka kunkhomo. (Esd. 6:1-3) Mphangwa zenezi zatsandzayisa anthu azinji. Kusiyapo kutawirisa basa yakumanga templo, mambo acita pinthu pinango. Iye apanga anthu a mu pisa pya cifupi toera akhonde kudzudzumisa Ayuda m’basa yawo yakumanga templo, pontho akhafunika kuapasa kobiri na pinthu pinango toera kuphedzera basa yawo yakumanga. (Esd. 6:7-12) Na thangwi ineyi, mu caka 515 Kristu Mbadzati Kubalwa, pakupita pyaka pinai, Ayuda akwanisa kumalisa basa yawo yakumanga templo.—Esd. 6:15.
Nyindirani mphambvu za Yahova mungatcingwa (Onani ndima 8)
8. Thangwi yanji musafunika kukhala acipapo mu ndzidzi unatcingwa imwe?
8 Lero, anthu azinji analambira Yahova asatcingwa. Mwacitsandzo, abale anango asakhala m’madziko akuti mautongi asakhondesa basa yathu. M’madziko anewa abale asamangwa mbaendeswa “kuna atongi na amambo” toera atongwe, pontho pyenepi pisapereka umboni kuna iwo. (Mat. 10:17, 18) Midzidzi inango, mautongi asacinja matongero awo, pyenepi pisaphedza abale na alongo athu toera kutumikira Yahova mwaufulu. Panango nyakutonga miseru wa ntima wadidi anacita cisankhulo cakuti cinatitawirisa kutumikira Yahova mwaufulu. Mboni za Yahova zinango zisatcingwa munjira zakusiyana. Iwo asakhala mu dziko yakuti nee asakhondeswa kulambira Yahova, mbwenye asapitiriza kutcingwa na anthu a panyumba pawo akuti asafuna kuti iwo asiye kutumikira Mulungu. (Mat. 10:32-36) Kazinji kene, anyamalwa a atumiki a Mulungu angaona kuti kuwangisira kwawo toera kufewesa atumiki a Mulungu nee kuli kuphata basa, iwo nee asaatcingabve. Kusiyapo pyenepi, anango akuti akhatcinga atumiki a Yahova, mukupita kwa ndzidzi adzakhala Mboni za Yahova zaphinga. Natenepa khala muli kutcingwa, lekani kubwerera nduli. Khalani acipapo. Imwe muli na ciphedzo ca Yahova na mphambvu ya nzimu wace wakucena, na thangwi ineyi nee musafunika kugopa cinthu!
MAKHALIRO ATHU ANGACINJA
9. Thangwi yanji Ayuda anango atsukwala pidamala kuikhwa miyala ya templo?
9 Pidamala kuikhwa miyala ya templo, Ayuda anango akuti akhali akukalamba alira. (Esd. 3:12) Iwo akhadaona templo yakubalika kakamwe idamanga Salomoni. Iwo aona kuti templo ineyi ipswa mbidakhala ‘yakusowa basa ingalandaniswa’ na ikhadamanga Salomoni. (Ageu 2:2, 3) Kusiyana kwa templo yakale na ipswa, kwatsukwalisa amuna anewa. Mbwenye masomphenya adaoneswa Zakariya mbadaphedza amuna anewa toera kukhala pontho akutsandzaya. Munjira ipi?
10. Kodi mafala adalonga anju anagumanika pa Zakariya 4:8-10, aphedza tani Ayuda toera kumalisa kutsukwala kwawo?
10 Lerini Zakariya 4:8-10, Tradução do Novo Mundo da Bíblia Sagrada. Kodi anju akhafuna kulonganji pidalonga iye kuti Ayuda ‘anadzatsandzaya, pontho anadzaona nkhambala yakundendemeza nayo m’manja mwa Zorobhabhele, ntongi Waciyuda’? Nkhambala yakundendemeza nayo isaphatisirwa toera kuona khala cinthu ciri mwadidi peno khala candendemera. Mafala a anju apangiza mbumba ya Mulungu kuti maseze templo ineyi nee ikhali yakubalika ninga yakutoma, iyo mbidamaliswa kumangwa mbikhala ninga mukhafunira Yahova. Nakuti Yahova mbadatsandzaya thangwi ya templo ineyi, Ayuda akhafunikambo kukhala akutsandzaya. Cinthu cakufunika kuna Yahova cikhali kuti iwo amulambire mu templo ineyi ipswa munjira ikhafuna iye. Ayuda mbadaikha manyerezero awo toera kulambira Yahova munjira yadidi mbakhala akutawirika kuna iye, iwo mbadakhala pontho akutsandzaya.
Khalani na maonero adidi makhaliro anu angacinja (Onani ndima 11-12)c
11. Ndi pinentso pipi pinathimbana na alambiri anango a Yahova lero?
11 Makhaliro athu angacinja pisakhala pyakunentsa kakamwe kuna azinji a ife. Abale na alongo anango akuti akhatumikira m’basa ya ndzidzi onsene mu pyaka pizinji acinjwa. Anango akulumizika toera kusiya basa yakupambulika ikhacita iwo thangwi ya kukalamba, maseze akhaifuna kakamwe. Kazinji kene, pyenepi pingaticitikira tinakhala akutsukwala. Panango pakutoma nee tinabvesesa mwadidi peno kuphedzera cisankhulo cidacitwa. Panango tinaona kuti pinthu pikhali mwadidi mu ndzidzi wakale. Pontho tinafewa manungo mbatinyerezera kuti nee tiri kucitabve pizinji m’basa ya Yahova ninga pikhacita ife kale. (Mis. 24:10) Kodi masomphenya a Zakariya anatiphedza tani toera tipitirize kucita pizinji m’basa ya Mulungu?
12. Kodi masomphenya a Zakariya anatiphedza tani toera tipitirize kukhala akutsandzaya makhaliro athu angacinja?
12 Pisakhala pyakukhonda nentsa kudzolowera macinjo tingaona pinthu ninga munapiona Yahova. Iye ali kucita pinthu pizinji kakamwe lero, pontho ife tiri na mwai wakuphata basa pabodzi na iye. (1 Akor. 3:9) Miyai iri na ife yakutumikira Yahova panango inacinja, mbwenye ufuni wace kuna ife nkhabe kucinja. Mungatambira macinjo mu gulu ya Yahova, calirani kubvunga ndzidzi uzinji mbamukanyerezera kuti thangwi yanji macinjo anewa acitwa. M’mbuto mwakunyerezera kuti ‘pinthu pikhali tani kale,’ phembani Yahova toera akuphedzeni kudzolowera makhaliro mapswa. (Koel. 7:10) Lekani kunyerezera pinthu pyakuti nee munakwanisabve kupicita, mbwenye nyerezerani pinthu pyonsene pyakuti munakwanisa kupicita. Masomphenya a Zakariya asatipfundzisa kuti mphyadidi kupitiriza kuona pinthu munjira yadidi. Tingacita pyenepi, tinapitiriza kukhala akutsandzaya na akukhulupirika, maseze makhaliro athu acinje.
TINGAPASWA PITSOGOLERO PYAKUTI NEE TISAPIBVESESA
13. Thangwi yanji Ayuda anango nee akomerwa na basa yakupitiriza kumanga pontho templo?
13 Basa yakumanga templo ikhapitiriza kukhondeswa. Ngakhale tenepo, Nyantsembe Wankulu Yoswa pabodzi na Ntongi Zorobhabhele, akuti akhali atsogoleri ‘atoma pontho kumanga nyumba ya Mulungu.’ (Esd. 5:1, 2) Panango Ayuda anango akhanyerezera kuti ceneci nee cikhali cisankhulo cadidi. Ayuda nee mbadakwanisa kubisalira anyamalwa awo mu ndzidzi ukhaphata iwo basa yakumanga templo. Pontho iwo akhadziwa kuti anyamalwa awo mbadacita pyonsene pikhakwanisa iwo toera kupingiza basa ineyi yakumanga templo. Natenepa, Yoswa na Zorobhabhele akhafunika kukhala na cinyindiro cakuti Yahova akhaaphedza. Iwo akhala na cinyindiro ceneci. Munjira ipi?
14. Mwakubverana na Zakariya 4:12, 14, Nyantsembe Wankulu Yoswa na Ntongi Zorobhabhele apaswa cinyindiro cipi na Yahova?
14 Lerini Zakariya 4:12, 14. M’masomphenya anewa, anju apanga mprofeta Zakariya kuti miti miwiri ya milivera isaimirira ‘amuna awiri akudzodzwa,’ akuti akhali Yoswa na Zorobhabhele. Pikhali ninga kuti amuna anewa awiri ‘alimira n’khundu mwa Mbuya wa pa dziko yonsene yapantsi,’ Yahova. Unoyu ukhali mwai ukulu kakamwe. Yahova akhanyindira kakamwe amuna anewa. Na thangwi ineyi, Aizraeli mbadakwanisa kunyindira mafala onsene akhalonga amuna anewa, thangwi iwo akhatsogolerwa na Yahova.
15. Tinapangiza tani kuti tisalemedza pitsogolero pinatipasa Yahova kubulukira m’Bhibhlya?
15 Ibodzi mwa njira zinaphatisira Yahova toera kutsogolera atumiki ace lero, ndi Bhibhlya. Iyo isatipanga kuti tinamulambira tani munjira yakutawirika. Tinapangiza tani kuti tisalemedza citsogolero cinapaswa ife kubulukira m’Bhibhlya? Tisafunika kukhala na ndzidzi toera kuleri Bhibhlya mbatinyerezera mwadidi pinaleri ife. Bvundzikani: ‘Kodi mu ndzidzi unaleri ine Bhibhlya peno mabukhu athu, ndisalimira mbanditoma kunyerezera mwadidi pinaleri ine? Kodi ine ndisawangisira toera kubvesesa pinthu pya m’Bhibhlya pyakuti ‘mphyakunentsa kupibvesesa’? Peno ndisaleri pyanga mwakuthamanga?’ (2 Ped. 3:16) Ife tinganyerezera mwadidi pinatipfundzisa Yahova, tinakwanisa kutowezera citsogolero cace mbaticita mwadidi basa yathu yakumwaza mphangwa.—1 Tim. 4:15, 16.
Nyindirani pitsogolero pinapaswa ife na “m’bandazi wakukhulupirika na wandzeru” (Onani ndima 16)d
16. Tingakhonda kubvesesa mwadidi pitsogolero pinapaswa ife na “m’bandazi wakukhulupirika na wandzeru,” ninji cinafuna kutiphedza toera kupitowezera?
16 Yahova asaphatisirambo “m’bandazi wakukhulupirika na wandzeru” toera kutitsogolera. (Mat. 24:45) Midzidzi inango, panango m’bandazi unoyu anapereka pitsogolero pyakuti ife nee tisapibvesesa mwadidi. Mwacitsandzo, panango tinapaswa pitsogolero kuti tikhale akukhunganyika toera tikhonde kuphekeswa na cidengwa cacibaliro, cakuti ife tisaona kuti nee cinacitika mu cisa cinakhala ife. Panango tinaona kuti pitsogolero pinapaswa ife toera kutsidzikizika ku utenda wa Koronaviru pyatekera. Mphapo tisafunika kucitanji tinganyerezera kuti pitsogolero pidapaswa ife ndi pyakusowa basa? Ife tinakwanisa kunyerezera nkhombo zidakhala na Aizraeli thangwi yakubvera pitsogolero pidapaswa iwo na Yoswa pabodzi na Zorobhabhele. Pontho tinakwanisa kunyerezera thangwi ya anthu anango analongwa m’Bhibhlya. Midzidzi inango, atumiki a Mulungu apaswa pitsogolero pyakuti pikhaoneka ninga pyakusowa basa, mbwenye pyaphedza anthu toera kupulumuka.—Aton. 7:7; 8:10.
ONANI PIDAONA ZAKARIYA
17. Kodi masomphenya a cakuikhira nyale na miti miwiri ya milivera aphedza tani Ayuda?
17 Masomphenya acixanu adaona Zakariya akhali acigwagwa, mbwenye aphedza Ayuda toera kukhala amphambvu mbapitiriza kucita basa yawo mwaphinga na kulambira Yahova. Pidacita iwo pinthu mwakubverana na pidapfundza iwo m’masomphenya a Zakariya, Ayuda akwanisa kuona ciphedzo ca Yahova na citsogolero cace. Yahova aphatisira nzimu wace wakucena, toera aphedze Aizraeli kuti apitirize na basa yawo, mbakhala pontho akutsandzaya.—Esd. 6:16.
18. Masomphenya a Zakariya anakuphedzani tani?
18 Masomphenya a Zakariya a cakuikhira nyale na miti miwiri ya milivera anakuphedzani kakamwe mu umaso wanu. Masomphenya anewa anakwanisa kukupasani mphambvu inafuna imwe toera kupirira mungatcingwa, anakuphedzani toera kukhala akutsandzaya makhaliro angacinja mu umaso wanu, pontho anakuphedzani toera kunyindira mbamubvera pitsogolero pyakuti nee musapibvesesa mwadidi. Mphapo munacitanji mungathimbana na nyatwa mu umaso wanu? Pakutoma, onani pidaona Zakariya—cipangizo cakuti Yahova asatsalakana mbumba yace. Buluka penepo, citani pinthu mwakubverana na pinaona imwe mbamunyindira Yahova, pontho mbamupitiriza kuntumikira na ntimanu onsene. (Mat. 22:37) Mungacita pyenepi, Yahova anakuphedzani toera muntumikire mwakutsandzaya kwenda na kwenda.—Akol. 1:10, 11.
NYIMBO 7 Yahova Ndi Mphambvu Yathu
a Yahova aonesa mprofeta Zakariya masomphenya akudzumatirisa kakamwe. Masomphenya adaona Zakariya aphedza iye pabodzi na atumiki anango a Yahova toera kukunda mipingizo mu ndzidzi ukhawangisira iwo toera kukhazikisa pontho ulambiri wandimomwene. Masomphenya anewa anakwanisambo kutiphedza toera kutumikira Yahova mwakukhulupirika, ngakhale tithimbane na pinentso. Mu nsolo uno tinaona pinthu pyakufunika kakamwe pyakuti tinapipfundza kubulukira m’masomphenya adaoneswa Zakariya akuti ndi cakuikhira nyale na miti ya milivera.
b Mukupita kwa ndzidzi, mu ntsiku za Ntongi Neemiya, mambo unango wakuti akhacemerwambo Artaxerxe akhakomerwa kakamwe na Ayuda.
c FOTO TSAMBA: M’bale ali kuona kuti asafunika kudzolowera macinjo anacitika mu umaso wace thangwi ya kukalamba, pontho thangwi ya nyatwa za ungumi.
d FOTO TSAMBA: Mulongo ali kunyerezera kuti Yahova ali kuphedzera “m’bandazi wakukhulupirika na wandzeru,” ninga pidaphedzera iye Yoswa na Zorobhabhele.