Khalani Akukhurudzika Mbamunyindira Yahova

 1. Ninga Mambo Dhavidhi, ndi mbvundzo upi usacita atumiki anango a Yahova?

IFE tonsene tisafuna kakamwe kukhala akutsandzaya. Pontho nee m’bodzi wa ife asakomerwa na kudzudzumika. Mbwenye midzidzi inango tinakwanisa kukhala akudzudzumika kakamwe. Na thangwi ineyi, atumiki anango a Yahova asacitambo mbvundzo ninga udacita Mambo Dhavidhi kuna Yahova kuti: ‘Ndinadzudzumika na nyatwa zanga mpaka lini, mbanditsukwala muntima mwanga ntsiku zonsene?’—Masal. 13:2.

 2. Tinadinganji mu nsolo uno?

² Maseze midzidzi inango ife tisadzudzumika, mbwenye pana pinthu pyakuti tinakwanisa kupicita toera kucalira kudzudzumika. Mu nsolo uno, ife tinadinga pinthu pingasi pyakuti pisaticitisa toera kukhala akudzudzumika. Buluka penepo tinadinga pinthu pitanthatu pyakuti pinatiphedza toera kukhala akukhurudzika mu ndzidzi unathimbana ife na nyatwa.

 3. Ndi pinthu pipi pyakuti pisacitisa anthu kukhala akudzudzumika?

³ Pana pinthu pizinji pyakuti pinaticitisa kukhala akudzudzumika. Pontho ife nee tinakwanisa kupilimirisa toera pikhonde kucitika. Mwacitsandzo, ife nee tinakwanisa kupingiza toera pinthu pikhonde kudhula ninga nguwo, cakudya na nyumba. Kusiyapo pyenepi, ife kazinji kene tisayeserwa na andzathu akubasa peno akuxikola toera ticite pinthu mwakukhonda kukhulupirika peno ticite pinthu pyaulukwali. Pontho ife nee tinakwanisa kupingiza toera uphanga ukhonde kucitika mucisa cathu. Pinthu pyenepi pisacitika thangwi yakuti tikukhala mu dziko yakuti anthu azinji nee asabvera midida ya Bhibhlya. Sathani wakuti ndi ntongi wa dziko ino asadziwa kuti anthu anango angadzudzumika na “pinthu pya dziko ino” anakwanisa kusiya kutumikira Yahova. (Mat. 13:22; 1 Juwau 5:19) Natenepa, nee ndi pyakudzumatirisa kuona kuti anthu azinji asadzudzumika thangwi ya nyatwa zinathimbana na iwo.

 4. Ninji pinafuna kucitika tingadzudzumika kakamwe thangwi ya nyatwa zathu?

⁴ Ife tinakwanisa kudzudzumika kakamwe na nyatwa zinathimbana na ife, mbaticimwana kunyerezera pinthu pinango. Mwacitsandzo, panango ife tinadzudzumika kuti tinagumana kupi dinyero toera kutsalakana umaso wathu peno tinaduwala mbatiluza basa yathu. Pontho tingayeserwa panango tinadzudzumika khala tinakwanisa kupitiriza kubvera Yahova peno nkhabe. Kusiyapo pyenepi, mwakukhonda dembuka ale anaphedzera Sathani anadzapomokera atumiki a Mulungu, natenepa panango pyenepi pinaticitisa kudzudzumika kuti tinadzakhala tani pa ndzidzi unoyu. Thangwi ya pinthu pyenepi pyonsene, panango tinabvundzika ‘kodi ndi pyakudawika kudzudzumika thangwi ya pinthu pyenepi?’

 5. Mafala adalonga Yezu kuti “lekani kudzudzumika” asabvekanji?

⁵ Ife tisadziwa kuti Yezu apanga atowereri ace kuti: “Lekani kudzudzumika.” (Mat. 6:25) Kodi mafala anewa asabveka kuti nee tisafunika kudzudzumika? Nkhabe. Thangwi atumiki anango a Yahova a mu ndzidzi wakale akhadzudzumikambo. Mbwenye Yahova akhapitiriza kuaona ninga atumiki ace.b (1 Ama. 19:4; Masal. 6:3) Yezu akhalonga mafala anewa toera kutibalangaza. Iye nee asafuna kuti tikhale akudzudzumika kakamwe na pinthu pyathu mbaticimwana kutumikira Yahova. Mphapo tisafunika kucitanji tingakhala akudzudzumika?—Onani bokosi yakuti “Munacita Tani Pyenepi?”

 6. Mwakubverana na Afilipi 4:6, 7, ninji pinafuna kutiphedza toera kukhala akukhurudzika?

⁶ (1) Citani phembero ndzidzi onsene. Mungakhala akudzudzumika thangwi ya nyatwa zinathimbana na imwe, citani phembero kuna Yahova toera akuphedzeni. (1 Ped. 5:7) Yahova anakwanisa kutawira maphembero anu mu kukupasani “ntendere wa Mulungu wakuti usapiringana kubvesesa konsene.” (Lerini Afilipi 4:6, 7.) Yahova anakwanisa kutiphedza toera tikhale akukhurudzika mukuphatisira nzimu wace wakucena.—Agal. 5:22.

 7. Tisafunika kukumbukanji mu ndzidzi unacita ife phembero?

⁷ Mungacita phembero kuna Yahova, mpangeni pinthu pyonsene pinakudzudzumisani. Pontho mpangeni ntundu wa nyatwa inathimbana na imwe na mabvero ali na imwe. Khala ndi pyakukwanisika kumalisa nyatwa ineyi, phembani Yahova toera akupaseni udziwisi na mphambvu toera kucita pyenepi. Khala nee pinakwanisa kumalisa nyatwa inathimbana na imwe, phembani Yahova toera akuphedzeni kuti mukhonde kudzudzumika kakamwe. Thangwi mungalonga nyatwa inathimbana na imwe m’maphembero anu, pinakhala pyakukhonda nentsa kuona ntawiro wa Yahova. Khala Yahova nee atawira maphembero anu mu ndzidzi ubodzi ene udacita imwe, nee musafunika kubwerera nduli. Yahova nee asafuna basi ene kuti mulonge kuna iye ntundu wa nyatwa inathimbana na imwe, mbwenye asafunambo kuti mupitirize kucita maphembero.—Luka 11:8-10.

 8. Tisafunika kulonganji m’maphembero athu?

⁸ Mu ndzidzi unalonga imwe nyatwa zanu kuna Yahova m’phembero, longanimbo mafala akupereka takhuta. Thangwi ndi pyakufunika kakamwe kunyerezera pinthu pyonsene pyadidi piri na ife maseze tithimbane na nyatwa zizinji. Mphapo tisafunika kucitanji khala nee tisadziwa pinthu pinafuna ife kulonga kuna Yahova? Tisafunika kukumbuka kuti Yahova anatawira maphembero athu maseze tiphatisire basi ene mafala akuti ‘Ndaphata miyendo ndiphedzeni.’—2 Pya dziko. 18:31; Aroma 8:26.

 9. Tisafunika kucitanji tingakhala akugopa?

⁹ (2) Nyindirani udziwisi wa Yahova, tayu wanu. Mu ndzidzi wa mprofeta Izaiya, anthu a mu dziko ya Yuda agopa kakamwe pidabva iwo kuti asafuna kufudzwa na anyankhondo a Asirya. Natenepa iwo aphemba ciphedzo ca Aejitu. (Iza. 30:1, 2) Mbwenye Yahova aacenjeza toera akhonde kunyindira Aejitu. (Iza. 30:7, 12, 13) Natenepa mukuphatisira mprofeta Izaiya Yahova apanga Aizraeli kuti: ‘Imwe munadzakhala amphambvu mungakhurudzika mbamundinyindira.’—Iza. 30:15b.

10. Thangwi yanji tisafunika kunyindira Yahova tingathimbana na mayesero?

¹⁰ Tinapangiza tani kuti tisanyindira Yahova? Onani pitsandzo pingasi. Nyerezerani kuti mwapaswa basa yakuti munatambira dinyero izinji kakamwe, mbwenye basa ineyi isakupingizani toera kucita pinthu pyauzimu. Pontho nyerezerani kuti kubasa kwanu kuna munthu wakuti asafuna kubanyirana na imwe, mbwenye iye nee ndi ntumiki wakubatizwa wa Yahova. Kusiyapo pyenepi, munacitanji khala wacibale wanu akupangani kuti mungapitiriza kutumikira Yahova ubale unamala? Dziwani kuti mu pinthu pyenepi pidalonga ife panango pinakhala pyakunentsa toera kucita cisankhulo, mbwenye Yahova anakuphedzani toera kucita cisankhulo cadidi. (Mat. 6:33; 10:37; 1 Akor. 7:39) Natenepa ndi pyakufunika kakamwe kunyindira Yahova na kubvera pitsogolero pyace.

11. Ndi pitsandzo pipi pya m’Bhibhlya pyakuti pinatiphedza toera kukhala akukhurudzika tingatcingwa?

¹¹ (3) Pfundzani kubulukira mu pitsandzo pyadidi na pyakuipa. M’Bhibhlya muli na pitsandzo pizinji pinapangiza kuti ndi pyakufunika kakamwe kukhala akukhurudzika na kunyindira Yahova. Mu ndzidzi unapfundza imwe pitsandzo pyenepi, onani kuti ninji pidaphedza atumiki anewa a Mulungu toera kukhala akukhurudzika m’midzidzi ikhatcingwa iwo. Mwacitsandzo, mu ndzidzi udalonga thando ikulu yakutongera miseru ya Ayuda toera apostolo asiye kumwaza mphangwa, iwo nee agopa. M’mbuto mwace, iwo alonga: ‘Ife tisafunika kubvera Mulungu ninga ntongi kupiringana anthu.’ (Mabasa 5:29) Ngakhale mu ndzidzi udamenywa apostolo, iwo nee agopa. Thangwi yanji? Thangwi iwo akhadziwa kuti Yahova akhaaphedza. Iye akhakomerwa na basa ikhacita iwo. Natenepa iwo apitiriza kumwaza mphangwa zadidi. (Mabasa 5:40-42) Munjira ibodzi ene, mu ndzidzi ukhali Estevau cifupi na kuphiwa, iye apitiriza kukhala wakukhurudzika, pontho “nkhope yace ikhali ninga ya anju.” (Mabasa 6:12-15) Thangwi yanji? Thangwi iye akhakhulupira kuti Yahova ali na iye.

12. Mwakubverana na 1 Pedhru 3:14 na 4:14, thangwi yanji tinakwanisa kukhala akutsandzaya tingatcingwa?

¹² Thangwi yanji apostolo akhali na cinyindiro consene cakuti Yahova akhali na iwo? Thangwi iye akhadaapasa mphambvu toera kucita pirengo. (Mabasa 5:12-16; 6:8) Mbwenye lero Yahova nee asatipasa mphambvu toera kucita pirengo. Ngakhale tenepo, kubulukira m’Bhibhlya Yahova asatipanga kuti tingatcingwa thangwi ya ulungami, ife tinakwanisa kukhala akutsandzaya thangwi tisadziwa kuti iye ali na ife, pontho nzimu wace uli na ife. (Lerini 1 Pedhru 3:14; 4:14.) Natenepa ife nee tisafunika kudzudzumika kakamwe na pinthu pinafuna kuticitikira ntsogolo. M’mbuto mwace, tisafunika kucita pyonsene pinakwanisa ife toera kunyindira Yahova wakuti anakwanisa kutiphedza na kutipulumusa. Ninga anyakupfundza a mu ndzidzi wa apostolo, ife tisafunika kunyindira mafala adalonga Yezu kuti: “Ine ndinadzakupasani mafala na udziwisi wakuti anyamalwa anu onsene anacimwana kukupokanyani peno kukukundani.” Kusiyapo pyenepi, Yezu alonga kuti: “Mungapirira mpaka kunkhomo, munadzapulumusa umaso wanu.” (Luka 21:12-19) Pontho dziwani kuti Yahova asakumbuka atumiki ace onsene akukhulupirika adafa, natenepa iye anadzaalamusa muli akufa.

13. Thangwi yanji ndi pyakufunika kupfundza kubulukira mu pitsandzo pya anthu adacimwana kukhala akukhurudzika na kunyindira Yahova?

¹³ Mphapo thangwi yanji tisafunika kupfundza kubulukira mu pitsandzo pya ale adacimwana kukhala akukhurudzika na kunyindira Yahova? Thangwi tingapfundza kubulukira ku pitsandzo pyawo, pinatiphedza toera kucalira kucitambo madodo mabodzi ene. Mwacitsandzo, mu ndzidzi udatoma Mambo Aza kutonga dziko ya Ayuda, anyankhondo azinji abwera toera kumenyana naye, mbwenye iye anyindira Yahova, pontho Yahova amphedza mbawina. (2 Pya dziko. 14:9-12) Mbwenye mukupita kwa ndzidzi, pidabwera anyankhondo akucepa a Mambo Bhaasa wa ku Izraeli toera kumenyana na Aza, iye alipa anyankhondo a Asirya toera kumphedza m’mbuto mwakunyindira Yahova ninga pidacita iye pakutoma. (2 Pya dziko. 16:1-3) Pontho mu ndzidzi ukhaduwala iye kakamwe, iye nee anyindira ciphedzo ca Yahova.—2 Pya dziko. 16:12.

14. Tisapfundzanji na madodo adacita Aza?

¹⁴ Pakutoma, Aza anyindira Yahova mu ndzidzi ukhathimbana iye na nyatwa. Mbwenye mukupita kwa ndzidzi, iye asiya kunyindira Yahova mbanyindira mphambvu zace. Aza akhanyerezera kuti angaphemba ciphedzo ca Asirya pinthu mbapidanfambira mwadidi. Mbwenye pyenepi nee pyamphedza. Thangwi Yahova ampanga mukuphatisira mprofeta Anani: ‘Nakuti wanyindira mambo wa ku Sirya mbukhonda kunyindira Yahova Mulungu wako, anyankhondo a mambo wa ku Sirya apulumuka m’manja mwako.’ (2 Pya dziko. 16:7) Natenepa tisafunika kucita mphole-mphole toera tikhonde kunyindira mphambvu zathu m’mbuto mwakunyindira pitsogolero pya Yahova pinagumanika m’Bhibhlya. Ngakhale mu ndzidzi wakuti tisafunika kucita cisankhulo mwakucimbiza, tisafunika kukhala akukhurudzika mbatinyindira Yahova, pontho iye anatiphedza.

15. Tisafunika kucitanji mu ndzidzi unaleri ife Bhibhlya?

¹⁵ (4) Koyani m’manyerezero mavesi a Bhibhlya. Mu ndzidzi unaleri imwe Bhibhlya, mungagumana mavesi akuti anakuphedzani toera kukhala akukhurudzika na kunyindira Yahova, yeserani kuakoya m’manyerezero. Toera mukwanise kucita pyenepi musafunika kualeri mwakugaluza peno kualemba na kuadinga mwakubwereza-bwereza. Mwacitsandzo, Yahova apanga Yoswa toera ndzidzi onsene aleri bukhu ya Mwambo mwacidikhodikho kuti akwanise kucita pinthu mwandzeru. Pontho pinthu pyenepi pikhaleri iye mbapidamphedza toera kukhala wacipapo mbatsogolera mwadidi mbumba ya Mulungu. (Yos. 1:8, 9) Mavesi mazinji a Bhibhlya anakwanisa kukuphedzani toera kukhala wakukhurudzika mu ndzidzi unadzudzumika imwe peno kugopa.—Masal. 27:1-3; Mis. 3:25, 26.

16. Yahova asaphatisira tani abale na alongo toera kutiphedza kukhala akukhurudzika mbatinyindira iye?

¹⁶ (5) Cedzani na abale na alongo anu. Yahova asaphatisira abale na alongo anewa toera kutiphedza kukhala akukhurudzika mbatinyindira iye. Pa misonkhano yathu ya mpingo ife tisawangiswa kakamwe tingacedza na abale na alongo athu, pontho tisawangiswa na nkhani zinacita abale na matawiro anapereka abale na alongo athu. (Aheb. 10:24, 25) Kusiyapo pyenepi, ife tingalonga kuna abale na alongo athu pinthu pinatidzudzumisa iwo anakwanisa kutiphedza. Pontho ‘mafala adidi’ a axamwali anakwanisa kutiphedza toera tikhonde kukhala akudzudzumika kakamwe.—Mis. 12:25.

17. Mwakubverana na Ahebheri 6:19, cidikhiro cathu cinatiphedza tani toera kukhala akukhurudzika mu ndzidzi unathimbana ife na nyatwa?

¹⁷ (6) Pitirizani kuwangisa cidikhiro canu. Cidikhiro cathu ndi ninga “nangula ya umaso wathu,” cakuti cisatipasa mphambvu mu ndzidzi unakhala ife akudzudzumika. (Lerini Ahebheri 6:19.) Natenepa nyerezerani mwacidikhodikho mapikiro a Yahova a ntsogolo toera mukwanise kukunda manyerezero akuipa. (Iza. 65:17) Nyerezerani dziko ipswa yakuti nee munadzagumanikabve pinthu pyakuipa. (Mik. 4:4) Imwe munakwanisambo kuwangisa cidikhiro canu mukupanga anango pya umaso unafuna kukhala na anthu mu dziko ipswa. Natenepa citani pyonsene pinakwanisa imwe toera kumwaza mphangwa na kucita anyakupfundza. Mungacita pyenepi, munakwanisa ‘kukhala na cidikhiro cakuwanga mpaka kunkhomo.’—Aheb. 6:11.

18. Ndi pinthu pipi pinafuna kucitika ntsogolo, pontho ife tisafunika kucitanji toera tipitirize kukhala akukhurudzika?

¹⁸ Nakuti kumala kwa dziko ino kuli cifupi kakamwe, ife tinathimbana na nyatwa zizinji zakuti zinaticitisa kukhala akudzudzumika kakamwe. Mbwenye lemba yathu ya caka ca 2021 inakwanisa kutiphedza toera kukhala akukhurudzika mbatinyindira Yahova. Natenepa, tendeni ticite pyonsene pinakwanisa ife toera kukhulupira pikiro ya Yahova yakuti: ‘Imwe munadzakhala amphambvu mungakhurudzika mbamundinyindira.’—Iza. 30:15.