Thangwi Yanji Anyakupfundza A Yezu nee Akhacita Jeju?

Juwau M’batizi aikhwa n’kaidi pakupita ndzidzi ungasi pidamala Yezu kucita Paskwa mu caka 30 N.W. Juwau akhafuna kuti anyakupfundzace akhale atowereri a Yezu, mbwenye nee onsene adakwanisa kucita pyenepi thangwi m’miyezi mingasi kutsogolo kwace iye akhali n’kaidi.

Dhuzi na Paskwa ya caka 31 N.W., anyakupfundza angasi a Juwau aenda kuna Yezu mbambvundza: ‘Thangwi yanji ife na Afarisi tisacita jeju, mbwenye anyakupfundza anu nkhabe kucita jeju?’ (Mateu 9:14) Afarisi akhacita jeju ninga nsambo wauphemberi. Buluka penepo, Yezu alonga pya nsangani wa Nfarisi wakudzikuza adacita phembero, mbalonga: ‘Mulungu wanga, ndisapereka takhuta kuna imwe thangwi ndasiyana na anthu anango onsene. Ndisacita jeju kawiri pa sumana.’ (Luka 18:11, 12) Panango anyakupfundza a Juwau akhalimbo na nsambo wakucita jeju. Peno akhacita jeju toera kutsukwala thangwi yakuikhwa kwa Juwau n’kaidi. Iwo akhabvundzika kuti thangwi yanji anyakupfundza a Yezu nee asacita jeju, panango mbatsukwalambo na iwo thangwi yakuikhwa kwa Juwau n’kaidi.

Yezu atawira mukuphatisira citsandzo: ‘Kodi axamwali a mankhadzi wamamuna asatsukwala mu ndzidzi unakhala iwo pabodzi na mankhadzi? Mbwenye unafika ndzidzi wakuti mankhadzi anadzabuluswa pakati pawo, pa ndzidzi unoyu iwo anadzacita jeju.’—Mateu 9:15.

Juwau akhadalonga kuti Yezu ndi mankhadzi. (Juwau 3:28, 29) Natenepa, mu ndzidzi ukhali Yezu na anyakupfundza, iwo nee acita jeju. Mbwenye mukupita kwa ndzidzi, pakumala kufa kwa Yezu, anyakupfundzace mbadatsukwala mpaka kusowa cifuno cakudya. Natenepa pakulamuswa kwace muli akufa, mbapadaoneka macinjo makulu thangwi iwo nee mbadafunika pontho kucita jeju thangwi yakutsukwala.

Buluka penepo, Yezu aapanga misangani miwiri: ‘Nkhabe munthu anasonera cigamba ca nguwo ipswa pa nguwo yakale, thangwi cigamba ca nguwo ipswa cinakwewa nguwo yakale, benga mbithimizirika kakamwe. Pontho, anthu nkhabe kuikha vinyu ipswa m’mabudu a nthembe zakale, thangwi angacita pyenepi, mabudu anapanduka, vinyu inatayika, pontho mabudu anabvungika. Mbwenye anthu asaikha vinyu ipswa m’mabudu a nthembe zipswa.’ (Mateu 9:16, 17) Kodi Yezu akhafuna kulonganji na misangani ineyi?

Yezu akhafuna kuphedza anyakupfundza a Juwau M’batizi kubvesesa kuti nee akhafunika kudikhira kuti atowereri a Yezu acite misambo yakale Yaciyuda ninga yakucita jeju. Iye nee abwera dzaikha cigamba ku ulambiri wakale nee toera kucitwa pontho. Yezu nee akhawangisa anthu toera kucita ulambiri Waciyuda m’midzidzi yakuti kukhadadzala na misambo ya anthu. Iye nee akhayesera kuikha cigamba pa nguwo yakale peno kuikha vinyu ipswa m’mabudu a nthembe zakale.