Yezu Asandika Dzindza Yakuuma Ntima

Yezu akhalemedza kakamwe Juwau M’batizi, mphapo anthu akhali na maonero api kuna Juwau? Yezu alonga: ‘Dzindza iyi yalandana na anang’ono adakhala pa misika mbacemera andzawo, mbalonga: Ife takuimbirani citoliro, mbwenye imwe nee mwabvina; ife takuimbirani nyimbo zaciliro, mbwenye imwe nee mwapangiza kutsukwala kwanu.’—Mateu 11:16, 17.

Kodi Yezu akhafuna kulonganji? Iye afokotoza: ‘Juwau abwera mbakhonda kudya nee kumwa, mbwenye anthu asalonga kuti, Iye ali na dimonyo. Mwana wa munthu abwera mbadya na kumwa, mbwenye anthu asalonga, Onani! Munthu wakudyesa na wakumwa kakamwe vinyu, xamwali wa anyakulipisa misonkho na wa anyakudawa.’ (Mateu 11:18, 19) Natenepa, Juwau akhali na umaso wakukhonda funa pizinji ninga Nazireu. Mbwenye dzindza ineyi ikhalonga kuti iye akhali na dimonyo. (Numero 6:2, 3; Luka 1:15) Kukhundu inango, Yezu akhali na umaso wakuti anthu ali nawo. Iye akhadya na kumwa, mbwenye anthu akhampambizira kuti akhapiringana midida. Pisakhala ninga nkhabe kwanisika kukomeresa anthu.

Yezu akhalandanisa anthu anewa ninga ana akukhala pa misika, akuti nkhabe funa kubvina mu ndzidzi wakuti anango akuliza citoliro peno kutsukwala mu ndzidzi wakuti anango akulira. Yezu alonga: ‘Mwandimomwene, udziwisi wa munthu usapangizika na mabasa akulungama anacita iye.’ (Mateu 11:16, 19) Natenepa, ‘mabasa’ a Juwau na a Yezu asapangiza kuti kupambizirwa kwawo kukhali kwauthambi.

Pakumala kulonga kuti dzindza ineyi ndi yakuuma ntima, Yezu asandika mizinda ya Korazini, Bhetisaidha na Kafarnau kukhacita iye pirengo. Yezu alonga kuti mbadacita pirengo pyenepi ku mizinda ya Fenisya yakuti ndi Tiro na Sidhoni, iyo mbidatcunyuka. Iye alongambo pya Kafarnau, kudatoma iye utumiki wace. Ngakhale tenepo anthu nee mbadatawira mphangwa zace. Yezu alonga thangwi ya nzinda: ‘Pa Ntsiku Yakutongwa kwawo, kunapiringana kutcunyuswa kudacitwa nzinda wa Sodhoma.’—Mateu 11:24.

Buluka penepo Yezu asimba Babace, wakuti abisa undimomwene wakufunika kakamwe wauzimu kuna ‘anthu audziwisi na andzeru,’ mbwenye aupangiza kuna anthu akucepeseka ninga anang’ono. (Mateu 11:25) Natenepa, iye asacemera anthu ninga anewa: ‘Bwerani kuna ine imwe monsene adaneta na adalemerwa, ine ndinadzakupumisani. Kwatani ntolo wanga mbamupfundza kubulukira kwa ine, thangwi ndine wakupfulika na wakucepeseka, natenepa munadzagumana ciwangiso. Ntolo wanga ndi wakukhonda nentsa, pontho pinakuphembani ine toera kukwata ndi pyakululupa.’—Mateu 11:28-30.

Kodi Yezu abalangaza tani anthu? Atsogoleri auphemberi akhapasa anthu ntolo wakulemera kubulukira ku misambo yakunentsa kakamwe ninga yakubvera ntemo wa ntsiku ya Sabudu. Mbwenye Yezu abalangaza anthu mu kuapfundzisa undimomwene wa Mulungu, wakuti mbudaasudzula ku misambo ineyi. Iye apangizambo kuti asapibva tani angaona kuti anthu akupondererwa na mautongi andale na kulemerwa thangwi ya madawo. Natenepa, Yezu apangiza kuti analekererwa tani madawo awo na kukhazikisa ntendere na Mulungu.

Onsene anatawira ntolo wa Yezu anakwanisa kuperekeka kwa Mulungu na kutumikira Babathu wakudzulu waufuni na wantsisi. Kucita pyenepi nee pisaphataniza kuthuka ntolo wakulemera, thangwi matongero a Mulungu nee asanentsa toera kuabvera.—1 Juwau 5:3.