KUKHALA MASO NINGA AKRISTU

Feramentu Ipswa ya Misonkhano ya Pakati pa Sumana

Kutomera mwezi wa Janeiro wa 2018, misonkhano ya pakati pa sumana inadzaphataniza pidzindikiro toera kupiphatisira pakupfundza na mphangwa zinango za mu Tradução do Novo Mundo da Bíblia Sagrada zakuti zisapfundzwa basi ene mu interneti (nwtsty), maseze idzati kugumanika mu cilongero canu. Mwakukhonda penula, khundu ineyi inatiphedza kakamwe kubvesesa mwadidi mphangwa zinakhunganyika ife. Pontho khundu ineyi inatiphedza toera kuwangisa uxamwali wathu na Babathu waufuni, Yahova!

PIDZINDIKIRO TOERA KUPIPHATISIRA PAKUPFUNDZA

Pidzindikiro pyenepi pinatiphedza kubvesesa mphangwa zakusiyana-siyana za m’Bhibhlya.

Mateo 12:20

Nyale yakupucira: Nyale ikhaphatisirwa kakamwe mu ndzidzi wakale ikhali yakucitwa na dongo. Anthu akhaikha mafuta na tursida n’nyale toera igake. Fala Yacigerego yakuti ‘nyale yakupucira’ isafuna kulonga pya nyale yakuti yasala pang’ono kuthima, mbwenye iciri kubuluka utci toera kupangiza kuti idzati kuthima. Profesiya ya Izaiya 42:3 ikhadalonga kale kuti Yezu mbadabvera anthu ntsisi; cipo iye anadzathimisa peno kusiya kuti cidikhiro ca anthu akucepeseka na akupondererwa cimale.

Mateo 26:13

Mwandimomwene: Fala Yacigerego, a·menʹ, yabuluka n’cilongero ca Cihebheri ʼa·menʹ, yakuti isabveka “mbipicitike,” peno “ndimomwene.” Kazinji kene Yezu akhaphatisira fala ineyi mbadzati kulonga mafala akufunika kakamwe, pakulonga mapikiro peno profesiya toera kugomezera kuti pidalonga iye pinakwanirisikadi. Anyakufufudza anango asalonga kuti ndi Yezu basi adaphatisira munjira ineyi fala yakuti “ndimomwene” peno amen, m’mabukhu analonga pya Mulungu. Fala ineyi ingabwerezerwa (a·menʹ a·menʹ), ninga pidacitwa mu Evanjelyu ya Juwau, Yezu akhaphatisira fala yakuti ‘mwandimomwene, ndinakupangani.’—Jwau 1:51.

PYAKUPEREKA MPHANGWA

Mafoto, pithundzithundzi na mavidhyu a pithundzithundzi anatiphedza kubvesesa mwadidi pinalongwa m’Bhibhlya.

Bhetifaji, Phiri ya Milivera na Yerusalemu

Vidhyu iyi yacigwagwa isapangiza njira inabuluka kumabulukiro a dzuwa kuenda ku Yerusalemu. Njira ineyi isabuluka ku mbuto inadziwika lero ninga cisa ca et-Tur, panango ndi cisa ca Bhetifaji cinalongwa m’Bhibhlya, cakuti ciri padzulu kakamwe Paphiri ya Milivera. Bhetanya asakhala kumabulukiro a dzuwa a Bhetifaji kukhundu yakumabulukiro a dzuwa a Phiri ya Milivera. Pikhaenda Yezu ku Yerusalemu, iye na anyakupfundzace kazinji kene akhagona ku Bhetanya, wakuti cincino ndi nzinda wa el-ʽAzariyeh (El ʽEizariya ), dzina Yaciarabhe yakuti isabveka “Cisa ca Lazaro.” Bhibhlya isalonga kuti Yezu akhafikira panyumba pa Marta, Mariya na Lazaro. (Mat. 21:17; Mark. 11:11; Luk. 21:37; Jwau 11:1) Pikhabuluka Yezu panyumba pawo kuenda ku Yerusalemu, panango iye apita na njira idapangizwa mu vidhyu. Pa Nisane 9 ya 33 N.W., pidakwira Yezu buru kubuluka ku Phiri ya Milivera kuenda ku Yerusalemu, panango abuluka ku Bhetifaji mbaenda na nseu wa ku Yerusalemu.

Nseu wakubuluka ku Bhetanya kuenda Bhetifaji
Bhetifaji
Phiri ya Milivera
Gowa ya Sidhroni
Phiri Ikhadamangwa Templo

Perego pa Gogodo ya Citende

Ici ndi cithundzithundzi ca gogodo ya munthu yakupholwa na perego ya utale ya masentimetru 11.5 aulaphi. Gogodo yakutoma yagumanwa mu caka 1968, pikhakumbwa khundu ya kumabulukiro a dzuwa a Yerusalemu mu ndzidzi wa Utongi Waciroma. Gogodo ineyi ikhapereka umboni wakuti maperego akhaphatisirwa toera kukhomera munthu pamuti mpaka kufa. Panango maperego adaphatisira anyankhondo Aciroma toera kukhomera Yezu Kristu pamuti alandana na anewa. Gogodo ineyi yagumanwa m’bokosi yakucitwa na miyala, ikhacemerwa bokosi yakukoyera magogodo a anthu akufa, manungo angamala bvunda. Pyenepi pisapangiza kuti munthu wakuphiwa pamuti akhafunika kuikhwa mu nthumbi.—Mat. 27:35.