“Chipo Na Chipo Munthu Alonga Ninga Munalonga Munthu Uyu”

1, 2. (a) Thangwi yanji atsacikunda adatumwa kuti akamange Yezu abwerera pezi? (b) Thangwi yanji Yezu akhali mpfunzisi wakupambulika?

AFARISI aipirwa kakamwe. Yezu ali m’templo, mbapfunzisa pya Babace. Anyakubvesera ali akugawika; azinji akhulupira Yezu, mbwenye anango asafuna kuti iye amangwe. M’kucimwana kubweza ukali wawo, atsogoleri auphemberi atuma atsacikunda kuti akamange Yezu. Mbwenye, atsacikunda abwerera pezi. Akulu a anyantsembe na Afarisi abvunza: “Mwakhonderanji kudza naye?” Atsacikunda peno anankati atawira: “Chipo na chipo munthu alonga ninga munalonga munthu uyu.” Iwo adzumatirwa kakamwe na mapfunzisiro a Yezu kwakuti acimwana kummanga.a​—Jwau 7:45, 46.

² Atsacikunda anewa siwo basi adadzumatirwa na pipfunziso pya Yezu tayu. Anthu agumanyikana m’cilengeso cikulu towera kubva basi iye mbakapfunzisa. (Marko 3:7, 9; 4:1; Luka 5:1-3) Thangwi yanji Yezu akhali mpfunzisi wakupambulika? Ninga taona m’Nsolo 8, iye akhafuna pipfunziso pya Biblya pabodzi na anthu akhapfunzisa iye. Pontho iye akhali waluso kakamwe m’njira zakupfunzisa. Tendeni tidinge njira zitatu zadidi zidaphatisira iye na kuti tinakwanisa tani kuzisangizira.

3, 4. (a) Thangwi yanji Yezu aphatisira mafala okhonda nensa mukhapfunzisa iye? (b) Kodi ndi citsanzo cipi ca mapfunzisiro okhonda nensa cidapfunzisa Yezu m’Nkhani ya Paphiri?

³ Kodi mungakwanise kunyerezera kusiyana-siyana kwa mafala akuti Yezu mbadakwanisa kuaphatisira? Mbwenye, mukhapfunzisa iye, cipo iye akhalonga pinthu pyakunensa kubviwa kwa anyakubvesera ace, akuti azinji a iwo akhali anthu akuti “hadapfundibswa tayu pya mabukhu na pya xikola.” (Machitiro 4:13) Iye akhatsalakana kukhonda kwanisa kwawo, mbakhonda kuapfunzisa pinthu pizinji m’nzidzi ubodziene. (Jwau 16:12) Mafalace akhali okhonda nensa, mbwenye undimomwene ukhagumanika mwenemu ukhali wakufunika kakamwe.

⁴ Mwacitsanzo, onani Nkhani ya Paphiri, idalembwa pa Mateo 5:3 mpaka 7:27. Yezu apereka uphungu m’nkhani ineyi wakuti ukhali wakuphedza kakamwe, mbukhuya pinthu piri m’ntima. M’nkhani ineyi nee mukhali manyerezero peno mafala akunensa. Thangwi kazinji kene Yezu akhaphatisira mafala akuti ngakhale mwana wang’ono mbadakwanisa kuabva mokhonda nensa! Natenepa, si pyakudzumisa tayu kuti pidamala Yezu kulonga, mwinji wa anthu​—panango kuphataniza alimi azinji, akumbizi na asodzi a m’madzi “adzuma mapfundisiro ache.”​—Mateo 7:28.

 5. Longani pitsanzo pya mafala adalongwa na Yezu akuti akhali okhonda nensa kuabva mbwenye akukhala na mabvekero mazinji adidi.

⁵ M’kupfunzisa kwace, Yezu kazinji kene akhaphatisira mafala okhonda nensa na acigwagwa mbwenye akukhala na mabvekero mazinji adidi. M’nzidzi uzinji ndulimu mabukhu mbasati kudindwa, iye aphatisira njira ineyi towera kuikha mphangwa mokhonda duwalika m’mitima na m’manyerezero a anyakubvesera ace. Dingani pitsanzo pingasi: “Lekani kutonga, gopa munadzatongwambo.” “Anyakuwanga anafuna ng’anga tayu, mbwenye atenda.” “Nzimu ngwakufuna . . . mbwenye manungo mbakufewa.” “Mumpase Sezari pyache, Mulungu, mumpasembo pyache.” “Kupasa kunakomeresa kupita kutambira.”b (Mateo 7:1; 9:12; 26:41; Marko 12:17; Machitiro 20:35) Pakupita piaka cifupi 2.000 mafala anewa mbadamala kale kulongwa, iwo akupitiriza basi kukumbukirwa.

6, 7. (a) Towera kupfunzisa mokhonda nensa, thangwi yanji tisafunika kuphatisira mafala okhonda nensa? (b) Kodi tinakwanisa tani kucalira kupfunzisa nyakupfunza Biblya mphangwa zizinji m’nzidzi ubodziene?

⁶ Kodi tinakwanisa tani kupfunzisa mokhonda nensa? Cinthu cakufunika ndi kuphatisira mafala akuti anthu azinji angakwanise kuabva mokhonda nensa. Pipfunziso pyakutoma pya Mafala a Mulungu si pyakunensa tayu. Yahova apangiza pifuniro pyace kwa akucepeseka na akuona ntima. (1 Akorinto 1:26-28) Mafala okhonda nensa akusankhulwa mwacidikhodikho angakwanise kubvekesa mwadidi undimomwene wa Mafala a Mulungu.

⁷ Towera kupfunzisa mokhonda nensa, tisafunika kukhala acidikhodikho towera ticalire kupfunzisa nyakupfunza Biblya mphangwa zizinji m’nzidzi ubodziene. Natenepa, munacitisa ife pfunziro ya Biblya, nee tisafunika kufokotoza unyomonyomo onsene; pontho si pyakufunika tayu kuthamanga ninga kuti pinafunika ndi kupfunza matsamba mazinji. Mbuto mwace, ndi pyanzeru kusiya kuti pyakufuna na luso ya nyakupfunza itonge kuthamanga kwa pfunziro. Cifuno cathu ndi cakuphedza nyakupfunza kuti akhale ntowereri wa Kristu na mulambiri wa Yahova. Na cifuno ceneci, tisafunika kubvunga nzidzi onsene wakufunika towera kuphedza nyakupfunza kubvesesa pinapfunza iye. M’njira ineyi basi undimomwene wa Biblya unakhuya ntimace na kucitisa nyakupfunza kuphatisira pidapfunza iye.​—Aroma 12:2.

8, 9. (a) Thangwi yanji Yezu acita mabvunzo? (b) Kodi Yezu aphatisira tani mabvunzo towera kuphedza Pedro kufika pa mamalisiro andimomwene m’kulonga pya kulipa nsonkho wa templo?

⁸ Yezu aphatisira mabvunzo m’njira yadidi kakamwe, maseze pyenepi mbipidacitisa kubvunga nzidzi uzinji towera kucitisa anyakubvesera ace kubvesesa ntsonga. Thangwi yanji mphapo iye akhacita mabvunzo? M’midzidzi inango, iye aphatisira mabvunzo akukhuya kakamwe towera kupangiza pifuno pyakuipa pya apingizi ace na towera kuamatamisa. (Mateo 21:23-27; 22:41-46) Mbwenye, m’midzidzi izinji, iye akhaphatisira mabvunzo towera kucitisa anyakupfunzace kulonga pikhanyerezera iwo, kuawangisa na kuapfunzisa kunyerezera. Na thangwi ineyi, iye akhacita mabvunzo ninga awa: ‘Musanyerezeranji?’ na ‘Usatawira [peno usakhulupira] ipi?’ (Mateo 18:12; Jwau 11:26) Na mabvunzo anewa, Yezu akhuya mitima ya anyakupfunzace. Dingani citsanzo cibodzi.

⁹ M’nzidzi unango anyakupimisa misonkho abvunza Pedro khala Yezu apima nsonkho wa templo.c Mokhonda dembuka Pedro atawira, ‘Apima.’ Patsogolo pace, Yezu ambvunza: “[Usanyerezeranji] Simau? Amambo a pantsi pano asatambira kwa ani misonkho, kwa anawo peno kwa alendo?” Pedro atawira: “Kwa alendo.” Yezu alonga: “Mphapo ana ali mu ufulu.” (Mateo 17:24-27) Mokhonda penula ntsonga ya mbvunzo unoyu ikhali pakweca kwa Pedro, thangwi piwalo pya banja ya amambo nee pikhafunika kupima nsonkho. Natenepa, ninga Mwana mbodzi ekha wa Mambo wakudzulu wakuti akhalambirwa pa templo, Yezu nee akhali pantsi pa ukakamizi wa kupima nsonkho tayu. Onani kuti mbuto mwa kupasa Pedro ntawiro wandimomwene, mwaluso Yezu aphatisira mabvunzo towera kuphedza Pedro kufika pa mamalisiro andimomwene na panango towera aone kuti kutsogolo asafunika kunyerezera mwacidikhodikho mbasati kutawira.

10. Kodi tinakwanisa tani kuphatisira mabvunzo m’njira yakuphindulisa munamwaza ife mphangwa ku nyumba na nyumba?

¹⁰ Kodi tinakwanisa tani kuphatisira mabvunzo m’njira yakuphindulisa m’utumiki wathu? Munamwaza ife mphangwa ku nyumba na nyumba, tingakwanise kuphatisira mabvunzo akuti anacitisa anthu kufuna kubva, panango mbatifungulira njira towera kugawana nawo mphangwa zadidi. Mwacitsanzo, nkhalamba ingabwera kudzafungula nsuwo, mwacilemedzo tingakwanise kubvunza: “Kodi dziko ikhali tani m’umaso wanu ndulimu?” Angamala tawira, tingakwanise kubvunza: “Kodi musanyerezera kuti ndi ninji cinafunika towera kucitisa dziko ino kukhala mbuto yadidi yakukhalamo?” (Mateo 6:9, 10) Khala ndi mama wakukhala na ana ang’ono adafungula nsuwo, tingakwanise kubvunza: “Kodi mwatoma kubvunzika kuti dziko ino inadzakhala tani ananu angakula?” (Masalmo 37:10, 11) M’kukhala anthu akudinga mwadidi munafika ife panyumba, tinakwanisa kusankhula mabvunzo akuti anacitisa mombanyumba kufuna pinafuna longa ife.

11. Kodi tinakwanisa tani kuphatisira mabvunzo m’njira yakuphindulisa munacitisa ife pfunziro ya Biblya?

¹¹ Kodi tinakwanisa tani kuphatisira mabvunzo m’njira yakuphindulisa munacitisa ife pfunziro ya Biblya? Mabvunzo akusankhulwa mwacidikhodikho angakwanise kutiphedza kudziwa mabvero a mitima ya anyakupfunza. (Misangani 20:5) Mwacitsanzo, nyerezerani kuti tikupfunza nsolo wakuti “Khalani Maso M’njira Inakomeresa Mulungu” m’bukhu yakuti Kodi Mwandimomwene Biblya Isapfunzisanji?d Nsolo unoyu usalonga pya maonero a Mulungu a pinthu ninga makhaliro aulukwali, kuledzera na uthambi. Matawiro a nyakupfunza angakwanise kupangiza kuti iye abvesesa pinapfunzisa Biblya, kodi iye asakhulupira pinapfunza iye? Tingakwanise kubvunza: “Kodi maonero a Mulungu a pinthu pyenepi asaoneka ninga akulinganira mwa imwe?” Pontho tingakwanise kubvunza: “Kodi munakwanisa tani kuphatisira mphangwa zenezi m’umaso wanu?” Mbwenye, kumbukani kufunika kwa kukhala waluso, mbamupasa nyakupfunza cilemedzo. Ife nkhabe funika kucita mabvunzo akuti anampasa manyadzo.​—Misangani 12:18.

12-14. (a) Kodi Yezu aphatisira luso yace yakulonga ntsonga zakutundusa m’njira zipi? (b) Kodi ndi ntsonga ipi yamphambvu idaphatisira Yezu mudampambizira Afarisi kuti iye akhaphatisira mphambvu ya Sathani?

¹² Na manyerezero ace aungwiro, Yezu akhali waluso kakamwe m’kulonga na anango. M’midzidzi inango, iye akhaphatisira ntsonga zadidi towera kumalisa upambiziri waunthawatawa wa apingizi ace. M’midzidzi izinji, iye akhaphatisira ntsonga zakutundusa towera kupfunzisa atowereri ace pipfunziso pyakufunika. Tendeni tidinge pitsanzo pingasi.

¹³ Yezu pakumala kuwangisa mamuna akhadaphatwa na demonyo wakuti akhali boliboli na okhonda kwanisa kulonga, Afarisi ampambizira: “Iye asathamangisa mademonyo na mphambvu [za] Beelzebu [Sathani], nkadamu wa demonyo.” Mafala awo akhapangiza kuti iwo akhapokanya kufunika kwa mphambvu yakupiringana ya anthu towera kuthamangisa mademonyo. Natenepa, iwo apasa Sathani mphambvu ya Yezu. Kupambizira nee kukhali kwaunthawatawa basi tayu mbwenyembo kwakusowa phata. M’kutculula kudodoma kwa manyerezero awo, Yezu alonga: “Dziko [peno umambo] yakumwazika inadzafudziwa; midzinda na dzindza yonsene inagawikana, hinadzawangabve tayu. Mphapo, [Sathani] angathamangisa [Sathani] ndzache, anamwazana okhene. Na ipyo inawanga tani dziko yache?” (Mateo 12:22-26) Mwandimomwene Yezu akhalonga: “Khala ndine muimiriri wa Sathani, kufudza pidacita Sathani, natenepa Sathani mbadakhala wakumenyana na pifuno pyace pyene na mokhonda dembuka mbadagwa.” Kodi iwo mbadakhonda tani ntsonga ineyi yakubveka?

¹⁴ Yezu nee akhadamala kulonga nawo tayu. M’kudziwa kuti anyakupfunzace anango akuti akhali Afarisi akhadathamangisa mademonyo, iye acita mbvunzo okhonda nensa mbwenye wamphambvu: “Ngakhala ine ndinathamangisa mademonyo na mphambvu za Beelzebu, ana anu [peno, anyakupfunza] anaathamangisa nanji?” (Mateo 12:27) Mwandimomwene nyerezero ya Yezu ikhali iyi: “Khala ine ndisathamangisa mademonyo m’kuphatisira mphambvu ya Sathani, natenepa anyakupfunza anu ene asaphatisirambo mphambvu ibodzibodzi.” Kodi Afarisi mbadalonganji? Cipo iwo mbadatawira kuti anyakupfunza awo asaphatisira mphambvu ya Sathani. Natenepa Yezu aphatisira manyerezero awo akudodomeka towera kufika pa mamalisiro akutsukwalisa kakamwe. Kodi si pyakukomeresa tayu kuleri luso idaphatisira Yezu m’kulonga nawo? Nyerezerani mphapo pya mwinji udabva Yezu ene mbakalonga, thangwi umunthu wace na dungu ya falace mokhonda penula ikhathimizira mphambvu ya mafalace.

15-17. Longani citsanzo cakuti Yezu aphatisira tani ‘ndiye tani mphapo’ towera kupfunzisa undimomwene wakukomeresa ntima wakulonga pya Babace.

¹⁵ Yezu aphatisirambo ntsonga zadidi na zakutundusa towera kupfunzisa undimomwene wakukomeresa ntima wakulonga pya Babace. Kazinji kene iye acita pyenepi m’kuphatisira mafala akuti ‘ndiye tani mphapo’​—mbathimizira tenepa cidziwiso ca anyakubvesera ace kubulukira ku undimomwene wakuti akhaudziwa kale. M’kuphatisira kulandanisa, ntundu unoyu wa kulonga ungakwanise kukhuya kakamwe mitima ya anthu. Tendeni tidinge pitsanzo piwiri basi.

¹⁶ Mukhatawira iye phembo ya anyakupfunzace ya kuapfunzisa kuti anaphembera tani, Yezu afokotoza kufunisisa kwa anyakubala aunyama akusowa ungwiro “kupasa myoni yakukoma” kwa anawo. Buluka penepo iye amalisa: “Ngakhala imwe anthu akuipa munadziwadi kupasa myoni yakukoma ananu, [‘ndiye tani mphapo,’ NM] Baba wanu wa kudzulu anadzaapasa kakamwe Nzimu Wakuchena ale anauphemba.” (Luka 11:1-13) Yezu alonga ntsonga m’kuphatisira kulandanisa. Khala anyakubala aunyama akusowa ungwiro asatsalakana pyakufuna pya anawo, ndiye tani mphapo Babathu wakudzulu, wakuti ndi waungwiro na waulungami m’njira zonsene, anadzapasa nzimu wakucena kwa alambiri ace akukhulupirika akuti mwakucepeseka asafika kwa iye m’phembero!

¹⁷ Yezu aphatisira ntsonga ibodzibodzi mukhapereka iye uphungu wa pya kusanyika-sanyika. Iye alonga: “Makhungubwe hanabzwala tayu, hanakhala tayu na chete nee na chikwa mbwenye Mulungu asaadyesa. Imwe muna ntengo ukulu kakamwe kupita mbalame zonsene. Yang’anani maluwa akugaza, awa hanaphata mabasa tayu, hanapfuma tayu . . . Ngakhala Mulungu abvazika tenepa tsanga inakhala ku munda lero mbiponyiwa mangwana pa moto: mphapo makamaka iye anakubvazikani imwe akukhulupira pang’ono.” (Luka 12:24, 27, 28) Khala Yahova asatsalakana mbalame na maluwa, iye anadzatsalakana pikulu tani mphapo anthu ananfuna na anamulambira! Na manyerezero anewa, mokhonda penula Yezu akhuya mitima ya anyakubvesera ace.

18, 19. Kodi tinakwanisa tani kutawira munthu analonga kuti nkhabe khulupira Mulungu wakuti iye nkhabe kumuona?

¹⁸ M’utumiki wathu, tisafunika kuphatisira mafala adidi towera tikhonde pikhulupiro pyaunthawatawa. Pontho tisafunika kuphatisira ntsonga zakutundusa towera kupfunzisa undimomwene wadidi wa pya Yahova. (Machitiro 19:8; 28:23, 24) Kodi tisafunika kupfunza kuphatisira ntsonga zakunensa? Nkhabe. Pfunziro idapfunza ife kwa Yezu ndi yakuti ntsonga zadidi zakulongwa m’njira yokhonda nensa ndi zakuphata ntima kakamwe.

¹⁹ Mwacitsanzo, kodi tinatawira tani munthu angalonga kuti iye nkhabe khulupira Mulungu wakuti nkhabe kumuona? Tingakwanise kulonga pya mwambo wacibaliro wakuti cinthu consene ciri na nciti waco. Tingaona cakucitwa, tisadziwa kuti alipo adacicita. Tingakwanise kulonga: “Khala imwe muli ku cisa cakutali na mwagumana nyumba yakumangwa mwadidi yakuti yadzala na pyakudya (cakucitwa), kodi nee mbumudadzindikira mwakucimbiza kuti alipo munthu (adapicita)? Natenepa, tingaonambo macitiro a makhaliro acibaliro na kuinjipa kwa cakudya cidadzadza nyumba ya dziko yapantsi (cakucitwa), kodi si pyakuthema tayu kulonga kuti alipo Munthu unango (Adapicita)? Biblya isafokotoza tenepa: ‘Nyumba inamangiwa na mesire wache, mbwenye adamanga pyonsene ndi Mulungu.’” (Ahebere 3:4) Inde, mokhonda tsalakana mafala athu adidi, si anthu onsene tayu anadzafuna kukhulupira.​—2 Atesalonika 3:2.

20, 21. (a) Kodi tinakwanisa tani kuphatisira mafala akuti ‘ndiye tani mphapo’ towera kugomezera makhaliro na njira za Yahova? (b) Kodi tinadzadinganji m’nsolo wakutowerera?

²⁰ M’kupfunzisa kwathu, m’utumiki wa mmunda peno m’mpingo, tingakwanisembo kuphatisira mafala akuti ‘ndiye tani mphapo’ towera kugomezera makhaliro na njira za Yahova. Mwacitsanzo, towera kupangiza kuti cipfunziso ca kuthabuswa kwenda na kwenda m’infernu ya moto nee cisalemedza Yahova, tingakwanise kulonga: “Kodi ndi baba upi wakufuna wakuti mbadatcinyusa mwanace m’kuikha manjace pa moto? Ndiye tani mphapo nyerezero ya infernu ya moto inakhala yakunyanyasa tani kwa Babathu wakufuna wakudzulu!” (Yeremiya 7:31) Towera kupasa cibaso nyakukhulupira nzathu kuti Yahova asanfuna, tingakwanise kulonga: “Khala Yahova asaona maxoxo mang’ono peno pimbalame kukhala pya ntengo ukulu, iye anadzatsalakana na kufuna tani mphapo mbodzi na mbodzi wa alambiri ace a pa dziko yapantsi, kuphataniza imwe!” (Mateo 10:29-31) Manyerezero anewa angakwanise kutiphedza kukhuya mitima ya anango.

²¹ Pakumala kudinga njira izi zitatu basi zidaphatisira Yezu pakupfunzisa, mokhonda nensa tingakwanise kuona kuti atsacikunda adacimwana kumanga Yezu hadadzipisira tayu mudalonga iwo kuti: “Chipo na chipo munthu alonga ninga munalonga munthu uyu.” M’nsolo wakutowerera, tinadzadinga njira ya Yezu yakuphatisira misangani pakupfunzisa yakuti panango asadziwika nayo mwadidi.