Kodi ‘Musabvesesa Mabvekero’?

“Adzamale, iye afungula manyerezero awo toera kubvesesa mabvekero a Malemba.”​—LUKA 24:45, Tradução do Novo Mundo.

NDI NTSONGA IPI INAPFUNDZA IMWE KUBULUKIRA MU NSANGANI WA . . .

nyakubzwala wakuti akugona?

kokota?

mwana wakutsumbikika?

1, 2. Kodi Yezu awangisa tani anyakupfundzace pa ntsiku idalamuka iye muli akufa?

IKHALI ntsiku idalamuka Yezu muli akufa. Anyakupfundza awiri akhacita ulendo kuenda ku nzinda wakuti ukhali wa nsindzo wa makilometru 11 buluka ku Yerusalemu. Mwakukhonda dziwa kuti Yezu akhadalamuka muli akufa, iwo akhali akutsukwala kakamwe thangwi ya kufa kwace. Mwakukhonda dikhira, Yezu aonekera pana iwo mbatoma kufamba nawo pabodzi. Iye abalangaza anyakupfundza anewa. Munjira ipi? ‘Kutomera pa Mose na aprofeta onsene, iye aatcululira mafala onsene a Malemba akhalonga pya iye.’ (Luka 24:13-15, 27) Pa ndzidzi unoyu, mitima yawo yatoma kupisa thangwi iye ‘afungula’ peno ‘aafokotozera’ Malemba mwakubveka kakamwe.​—Luka 24:32.

² Na maulo mabodzi ene, anyakupfundza anewa awiri abwerera ku Yerusalemu. Mudagumana iwo apostolo, aafokotozera pidaona iwo. Pikhalonga iwo, Yezu aonekera kuna iwo onsene. Mbwenye anyakupfundzace akhagopa kakamwe mbatoma kupenula khala mwandimomwene akhali Yezu adaonekera pana iwo. Kodi Yezu aawangisa tani? Bhibhlya isalonga: “Adzamale, iye afungula manyerezero awo toera kubvesesa mabvekero a Malemba.”​—Luka 24:45, NM.

 3. Thangwi yanji midzidzi inango tinathimbana na kufewa manungo? Mphapo ninji cinafuna kutiphedza toera kukhala na maonero akulinganira thangwi ya utumiki wathu?

³ Ninga anyakupfundza anewa, midzidzi inango tinakwanisa kukhala akutsukwala. Panango tisacita pizinji m’basa ya Mbuya, mbwenye tisafewa manungo thangwi yakukhonda kuona maphindu. (1 Akor. 15:58) Panango tinaona kuti ale anapfundzisa ife Bhibhlya nee asathambaruka mwakucimbiza. Anango anaphedza ife asasiya kutumikira Yahova. Tinacitanji toera kukhala na maonero akulinganira thangwi ya utumiki wathu? Cinthu cibodzi cinafuna kutiphedza ndi kubvesesa mabvekero a misangani ya Yezu idalembwa m’Bhibhlya. Tendeni tidinge misangani mitatu toera kuona kuti tinapfundzanji.

NYAKUBZWALA WAKUTI AKUGONA

 4. Kodi nsangani wa Yezu wa nyakubzwala wakuti akugona usabvekanji?

⁴ Lerini Marko 4:26-29. Kodi nsangani wa Yezu wa nyakubzwala wakuti akugona usabvekanji? Mamuna wa mu nsangani uyu asaphiphirisa amwazi mphangwa a Umambo, m’bodzi na m’bodzi. Mbeu ndi mphangwa za Umambo zinamwazwa kwa anthu a ntima wadidi. Ninga pinacitwa mu umaso wandimomwene, nyakubzwala ‘asagona namasiku mbalamuka namacibese.’ Kukula kwa mbeu kusakwata ndzidzi kubulukira pa kubzwala mpaka pakubvuna. Mu ndzidzi unoyu, ‘mbeu zisamera mbazikula.’ Kukula kweneku ‘kusacitika kokhene’ mwapang’ono pang’ono. Munjira ibodzi ene, kukula mwauzimu kusacitikambo mwapang’ono pang’ono. Munthu angathambaruka mpaka kukulumizika toera kutumikira Mulungu, iye asabala misapo munjira yakuti asapereka umaso wace kuna Yahova mbabatizwa.

 5. Thangwi yanji Yezu aphatisira nsangani wa nyakubzwala wakuti akugona?

⁵ Thangwi yanji Yezu aphatisira nsangani unoyu? Yezu asatiphedza toera kudzindikira kuti Yahova ndiye anacitisa undimomwene kukula m’mitima ya anthu akuti ‘ali na cifuno.’ (Mach. 13:48; 1 Akor. 3:7) Ife tisabzwala mbatithirira, mbwenye nee tinakwanisa kukulisa. Ife nkhabe kwanisa kukakamiza mbeu toera ikule mwakucimbiza. Ninga mamuna wa mu nsangani uyu, ife nkhabe dziwa kuti mbeu isakula tani. Pyenepi pisacitika mwakukhonda oneka kwa ife mu ndzidzi unacita ife mabasa athu a ntsiku na ntsiku. Mbwenye mukupita kwa ndzidzi, mbeu ya Umambo inakwanisa kubala misapo. Buluka penepo, nyakupfundza mupswa asatoma kucita khundu pabodzi na ife m’basa yakubvuna, natenepa tisaphindula na ciphedzo cace.​—Jwau 4:36-38.

 6. Tisafunika kudzindikiranji thangwi ya kukula mwauzimu?

⁶ Tinapfundzanji kubulukira mu nsangani unoyu? Cakutoma tisafunika kutawira kuti ife nkhabe kwanisa kuthambarusa nyakupfundza Bhibhlya. Kukhala na maonero akulinganira, kunadzatiphedza toera kucalira kukakamiza nyakupfundza toera kubatizwa. Tisafunika kucita pyonsene pinakwanisa ife na kuphedza munthu, mbwenye mwakucepeseka tisatawira kuti cisankhulo cakuperekeka cisanyindira nyakupfundza Bhibhlya. Kuperekeka kusafunika kubulukira muntima wa munthu thangwi ya kukulumizwa na ufuni wace kwa Mulungu. Njira inango yakusiyana na ineyi nee ndi yakutawirika kwa Yahova.​—Sal. 51:12; 54:6; 110:3.

7, 8. (a) Ndi ntsonga zipi zinango zinapfundza ife mu nsangani wa Yezu wa nyakubzwala wakuti akugona? Perekani citsandzo. (b) Citsandzo ceneci cisatipfundzisanji thangwi ya Yahova na Yezu?

⁷ Caciwiri, kubvesesa ntsonga ya nsangani unoyu kunadzatiphedza toera kukhonda fewa manungo khala pakutoma nee tisaona maphindu a basa yathu. Tisafunika kukhala akupirira. (Tgo. 5:7, 8) Ngakhale kuti mbeu nee isabala misapo, tingacita khundu yathu toera kuphedza nyakupfundza, tisadzindikira kuti kukhonda thambaruka kwace nee pisapangiza kuti ndife apfundzisi akusowa maluso. Yahova asatawirisa kuti mbeu ya undimomwene ikule basi ene muntima wa anthu akucepeseka akuti asafuna kucita macinjo. (Mat. 13:23) Natenepa, nee tisafunika kuona mwakuipa utumiki wathu thangwi yakukhonda kuona maphindu adidi. M’maonero a Yahova, kuthambaruka kwa utumiki wathu nee kusanyindira kutawira kwa anthu anapfundzisa ife. Mbuto mwace, iye asapasa ntengo kuwangisira kwathu na ntima onsene mwakukhonda tsalakana maphindu.​—Lerini Luka 10:17-20, NM; 1 Akorinto 3:8.

⁸ Cacitatu, kazinji kene nee tisaona macinjo anacitika muntima wa munthu. Mwacitsandzo, banja inango ikhapfundza Bhibhlya na misionaryo yaphemba toera kukhala amwazi mphangwa akukhonda batizwa. Misionaryo akumbusa banja ineyi kuti toera kukhala akuthema, iwo akhafunika kusiya kufumali. Mwakukhonda dikhira, iwo alonga kuti akhadasiya kale kufumali mu nthanda zizinji nduli. Thangwi yanji akhadasiya? Iwo adzindikira kuti Yahova mbadakwanisa kuaona mbakafumali, pontho iye asaida umpfakafaka. Natenepa, mitima yawo yaakulumiza toera kucita cisankhulo​—kufumali pamaso pa misionaryo, peno kusiya kufumali. Ufuni wawo kwa Yahova waaphedza toera kucita cisankhulo cadidi. Iwo akhadakula mwauzimu, ngakhale kuti misionaryo nee akhadziwa macinjo akhadacita iwo.

KOKOTA

 9. Kodi nsangani wa kokota usabvekanji?

⁹ Lerini Mateo 13:47-50. Kodi nsangani wa Yezu wa kokota usabvekanji? Yezu alandanisa kumwazwa kwa mphangwa za Umambo kwa anthu onsene na kugwisirwa kwa kokota ikulu m’bara. Ninga kokota isaphata ntsama ikulu kakamwe ya “nyama” peno ntsomba zakusiyana-siyana, basa yathu yakumwaza mphangwa isatundusa pikwi na pikwi pya anthu a mitundu yonsene. (Iza. 60:5) Anthu azinji anagumanika pa misonkhano yathu ya gawo na pa Cikumbuso pyaka pyonsene ndi cipangizo ca pyenepi. Anango mwa anthu anewa anaphiphiriswa na ‘ntsomba’ zadidi asagumanyizwa m’mpingo Wacikristu. Mbwenye anango asapangizika kukhala akukhonda ‘thema’ thangwi si onsene tayu anapangiza kukhala akutawirika kuna Yahova.

10. Thangwi yanji Yezu aphatisira nsangani wa kokota?

¹⁰ Thangwi yanji Yezu aphatisira nsangani unoyu? Kupambulwa kwakuphiphirisa nee kusaimirira kutongwa kwakumalisa nkati mwa nyatwa ikulu. Mbuto mwace, pyenepi pisagomezera pikhafuna kucitika mu ntsiku zakumalisa za makhaliro ano akuipa a pinthu. Yezu apangiza kuti si onsene tayu anatunduswa na undimomwene anadzatumikira Yahova. Azinji asasonkhana na ife pa misonkhano yathu. Anango atawira kupfundza Bhibhlya na ife mbwenye nee ali dzololo toera kucita cisankhulo toera kuperekeka kuna Yahova. (1 Am. 18:21) Anangombo asiya kusonkhana na mpingo Wacikristu. Anango mwa aphale na atsikana akuzwa na anyakubala Acikristu, mbwenye adzati kupangiza kuti asafuna midida ya Yahova. Mwakukhonda tsalakana makhaliro a munthu, Yezu agomezera kuti munthu onsene asafunika kucita cisankhulo cace paekha. Ale anacita pyenepi asaoniwa na iye ninga “mpfuma” peno pinthu ‘pyakufunika’ pakati pa ‘anthu a madzindza onsene.’​—Ageu 2:7.

11, 12. (a) Tinaphindula tani na nsangani wa kokota? (b) Kodi nsangani unoyu usatipfundzisanji thangwi ya Yahova na Yezu?

¹¹ Tinaphindula tani na nsangani wa kokota? Kubvesesa ntsonga ya nsangani unoyu kunatiphedza toera kucalira kudzudzumika kakamwe khala nyakupfundza Bhibhlya peno anathu nee asafuna kutumikira Yahova. Pyenepi pinacitika ngakhale kuti tisacita pyonsene pinakwanisa ife. Kutawira kupfundza Bhibhlya peno kukuzwa mu undimomwene nee pisabveka kuti munthu anadzakulisa uxamwali wakuwanga na Yahova. Khala iye nkhabe funa kubvera utongi wa Yahova, pakumalisa asabuluswa pakati pa atumiki a Mulungu.

¹² Kodi pyenepi pisabveka kuti ale adasiya undimomwene cipo anadzatawiriswa kubwerera m’mpingo? Khala munthu nee asafuna kupereka umaso wace kuna Yahova, pisabveka kuti iye anadzaoniwa ninga ‘wakukhonda thema’ kwenda na kwenda? Nkhabe. Mwai uciripo toera anthu anewa akwanise kukhala na uxamwali na Yahova, nyatwa ikulu mbidzati kutoma. Pyenepi ndi ninga Yahova akuacemera: “Bwererani mphapo kuna Ine, Inembo ndinadzabwererambo kuna imwe.” (Mal. 3:7) Ntsonga ineyi isabvekeswa mwadidi mu nsangani unango udalonga Yezu thangwi ya mwana wakutsumbikika.​—Lerini Luka 15:11-32.

MWANA WAKUTSUMBIKIKA

13. Kodi nsangani wa mwana wakutsumbikika usabvekanji?

¹³ Kodi nsangani wa Yezu wa mwana wakutsumbikika usabvekanji? Baba wantsisi mu nsangani unoyu asaphiphirisa Babathu wakudzulu Yahova, wakuti ndi waufuni. Mwana anaphemba mpfuma peno unthaka wace buluka penepo mbaubvunga pyace asaphiphirisa ale adabuluka m’mpingo. Kubuluka kwawo ndi ninga iwo acita ulendo ‘mbaenda kudziko yakutali kakamwe’​—mu dziko ya Sathani yakuti ndi yakuthaukirana na Yahova. (Aef. 4:18; Akol. 1:21) Mukupita kwa ndzidzi anango a iwo asadzindikira kuti acita madodo makulu mbatonga kubwerera mu gulu ya Yahova. Anthu anewa akucepeseka na akutcinyuka asatambirwa na manja mawiri na Babathu wakulekerera.​—Iza. 44:22; 1 Ped. 2:25.

14. Thangwi yanji Yezu aphatisira nsangani wa mwana wakutsumbikika?

¹⁴ Thangwi yanji Yezu aphatisira nsangani unoyu? Munjira yadidi kakamwe, Yezu apangiza kuti Yahova asafuna anthu adatayika abwerere kuna Iye. Baba wa mu nsangani uyu akhapitiriza kudikhira kuti mwanace mbadabwerera. Mudaona iye kuti mwanace akhabwerera, maseze ‘akhali kutali,’ baba acita pinthu mwakucimbiza toera kutambira mwanace. Ceneci ndi cikulumizo cikulu kakamwe toera ale adasiya undimomwene abwerere mwakucimbiza kuna Yahova! Panango iwo ali akuneta mwauzimu. Panango iwo anaona kuti kucita pyenepi ndi kwakunentsa kakamwe peno kukhala na manyadzo, mbwenye mphyadidi kakamwe kucita pyenepi. Iwo angabwerera, Yahova, Yezu na aanju anadzatsandzaya kakamwe.​—Luka 15:7.

15, 16. (a) Ndi ntsonga zipi zinapfundza ife kubulukira mu nsangani wa Yezu wa mwana wakutsumbikika? Perekani pitsandzo. (b) Kodi nsangani unoyu usatipfundzisanji thangwi ya Yahova na Yezu?

¹⁵ Tinaphindula tani na nsangani wa mwana wakutsumbikika? Tisafunika kusangizira citsandzo ca Yahova. Nee tisafunika kukhala “anyakulungama kakamwe” akuti asakhonda kutambira anyakudawa akutcinyuka. Pyenepi mbapidabweresa “kuluza [peno ngozwi]” yauzimu. (Koel. 7:16) Tinakwanisa kupfundza ntsonga inango mu nsangani unoyu. Munthu adabuluka m’mpingo asafunika kuoniwa ninga “bira yakutayika,” tayu ninga munthu wakuti nkhabe kubwererabve. (Sal. 119:176) Tingagumana munthu adathaukirana na mpingo, tisafunika kupangiza ufuni na kupereka ciphedzo cakuthema toera abwerere. Tinakwanisa kudziwisa akulu a mpingo mwakucimbiza toera akwanise kumphedza? Tingaphatisira mwadidi ntsonga ya nsangani wa mwana wakutsumbikika, tinadzacita pyenepi.

¹⁶ Onani kuti anyakutsumbikika anango a ntsiku zino apangiza tani kupereka kwawo takhuta thangwi ya ntsisi za Yahova na ciphedzo caufuni wa mpingo. M’bale unango adabuluswa m’mpingo mbamala pyaka 25 alonga: “Kukomerwa kwanga kubulukira pa ntsiku idabwerezeswa ine m’mpingo kusapitiriza kuthimizirika munapitiriza ine kutambira ‘ciwangiso’ ca Yahova. (Mach. 3:19) Munthu onsene asandiphedza na kupangiza ufuni! Cincino ndiri na acibale auzimu akutsandzayisa kakamwe.” Mulongo unango wacitsikana adasiya kutumikira Yahova mbamala pyaka pixanu alonga thangwi yakubwerera kwace: “Nee ndinakwanisa kufokotoza mabvero anga thangwi yakuona ufuni udalonga Yezu mbukapangizwa mwakukwana kwa ine. Kucita khundu ya gulu ya Yahova ndi cinthu ca ntengo ukulu kakamwe!”

17, 18. (a) Ndi ntsonga zipi zidapfundza ife m’misangani mitatu idadinga ife? (b) Tisafunika kukhala akutonga toera kucitanji?

¹⁷ Ndi ntsonga zipi zidapfundza ife m’misangani ineyi mitatu? Yakutoma, tisafunika kudzindikira kuti ife nkhabe kwanisa kukulisa munthu mwauzimu. Ineyi ndi basa ya Yahova. Yaciwiri, mwakulinganira nee tisadikhira kuti anthu onsene anasonkhana na ife na ale anapfundza Bhibhlya na ife anadzasankhula kutumikira Yahova. Yakumalisa, ngakhale kuti anango anasiya kutumikira Yahova, nee tisafunika kunyerezera kuti iwo cipo anadzabwerera pontho. Angabwerera, tendeni tiatambire munjira inapangiza ufuni wa Yahova.

¹⁸ Tendeni tonsene tipitirize kusaka cidziwiso, kubvesesa, na udziwisi. Munaleri imwe misangani ya Yezu bvundzikani kuti isabvekanji, thangwi yanji yalembwa m’Bhibhlya, tinaphatisira tani ntsonga zayo, na isatipfundzisanji thangwi ya Yahova na Yezu. Tingacita pyenepi tinadzapangiza kuti mwandimomwene ife tisabvesesa mabvekero a mafala a Yezu.