Yezu Apfundzisa Pya Kukhondana na Kufuna Anapiana

Yezu na anyakupfundzace abuluka ku Galileya, awambuka Nkulo wa Yordani mbaenda kunterero. Pontho apita na ku Pereya. Pikhali iye ku Pereya paulendo wakumalisa, Yezu apanga Afarisi kuti Mulungu asaona tani nkhani yakumalisa banja. (Luka 16:18) Natenepa iwo atomesa pontho nkhani ineyi toera kuyesera Yezu.

Mose alemba kuti mamuna anakwanisa kumalisa banja khala nkazace acita cinthu ‘cidakhonda kunkomera.’ (Deuteronomyo 24:1) Anthu akhali na maonero akusiyana-siyana thangwi ya kukhondana. Anango akhanyerezera kuti pyenepi pisaphataniza mathangwi mang’ono. Na thangwi ineyi, Afarisi abvundza: ‘Kodi mamuna asatawiriswa kukhondana na nkazace na mathangwi onsene?’—Mateu 19:3.

M’mbuto mwakulonga maonero a anthu, Yezu alonga mwaluso maonero a Mulungu thangwi yakumanga banja, iye alonga: “Kodi imwe nee mwaleri kuti Ule adacita anthu, pakutoma aacita mamuna na nkazi? Iye alonga: ‘Na thangwi ineyi, mamuna anadzasiya baba wace na mace mbaphatana na nkazace, pontho uwiri wawo anadzakhala manungo mabodzi basi’. Munjira ineyi, iwo si awiribve tayu, mbwenye ndi manungo mabodzi basi. Natenepa, pidagumanya Mulungu, munthu mbaleke kupimwaza.” (Mateu 19:4-6) Mu ndzidzi udacita Mulungu masasanyiro a banja kuna Adhamu na Eva, iye nee akhafuna kuti banja yawo imale.

Afarisi nee atawira pidalonga Yezu, mbalonga: “Mphapo thangwi yanji Mose alonga kuti mamuna anakhonda nkazace asafunika ampase tsamba inapangiza kuti iye akhondana naye?” (Mateu 19:7) Yezu aapanga: “Mose akutawirisani kukhonda akazanu thangwi yakuuma kwanu mitima, mbwenye pakutoma nee pikhali tenepo.” (Mateu 19:8) Pidalonga Yezu kuti “pakutoma,” nee akhalonga pya mu ndzidzi wa Mose, mbwenye akhalonga pya ndzidzi udatomesa Mulungu banja mu Edheni.

Natenepa Yezu alonga ntsonga yakufunika kakamwe, kuti: “Ine ndinakupangani kuti munthu onsene anakhonda nkazace mbasemba unango, akucita upombo, kusiyapo khala an’khonda thangwi nkazi acita ulukwali [mu Cigerego ndi por·neiʹa].” (Mateu 19:9) Malemba asatawirisa anyakumanga banja kukhondana basi ene khala m’bodzi acita ulukwali.

Pyenepi pyacitisa anyakupfundza a Yezu kulonga kuti: “Khala mamuna asafunika kukhala tenepo na nkazace, mphyadidi kukhonda kwene semba.” (Mateu 19:10) Natenepa, ale ananyerezera pyakumanga banja asafunika kudziwa kuti banja ndi ya kwenda na kwenda.

Pakulonga pya anthu akukhonda kumanga banja, Yezu alonga kuti anango nkhabe manga banja thangwi nkhabe kwanisa kupita m’mabonde. Anango nkhabe manga banja thangwi pidacitwa iwo na anthu. Anango asasankhula kutonga pifuno pyawo pyakupita m’mabonde thangwi asafuna kucita pizinji m’basa ya Umambo. Yezu apanga anyakubveserace: “Ule anakwanisa kupitiriza nee kusemba, mbacite pyenepi.”—Mateu 19:12.

Anthu akhatoma kubweresa anawo ang’ono kuna Yezu. Mbwenye anyakupfundzace akhondesa anthu anewa thangwi akhanyerezera kuti anadzudzumisa Yezu. Pidaona iye pyenepi, Yezu nee akomerwa napyo mbalonga: “Siyani anang’ono abwere kuna ine; lekani kuakhondesa, thangwi Umambo wa Mulungu ndi wa anthu ninga iwo. Mwandimomwene ndinakupangani kuti ule anakhonda kutawira Umambo wa Mulungu ninga mwanang’ono, cipo anadzapitamo.”—Marko 10:14, 15; Luka 18:15.

Ineyi ndi pfundziro yadidi kakamwe! Toera kupita mu Umambo wa Mulungu, tisafunika kukhala akucepeseka mbatitawira kupfundziswa ninga anang’ono. Natenepa Yezu apangiza kuti asafuna anang’ono mu kuathukula, kuakhumbatira na kuapasa nkhombo. Iye asapangizambo ufuni kuna ale onsene ‘anatawira Umambo wa Mulungu ninga mwanang’ono.’—Luka 18:17.