Akutsandzaya Ndi Ale Anatumikira ‘Mulungu Wakutsandzaya’

 1. Thangwi yanji Mboni za Yahova ndi anthu akutsandzaya? (Onani cithundzithundzi cakutoma.)

MBONI ZA YAHOVA ndi anthu akutsandzaya. Konsene kwene kunagumanyikana iwo, pa misonkhano ya mpingo, peno ya cisa, asacedza mwakutsandzaya unango na ndzace. Thangwi yanji asakhala akutsandzaya kakamwe? Ndi thangwi yakuti asadziwa Yahova, ‘Mulungu wakutsandzaya.’ Iwo asatumikira iye na asayesera kuntowezera. (1 Timoti 1:11; Masalmo 16:11) Kutsandzaya kusabuluka kwa Yahova, natenepa iye asafuna kuti tikhale akutsandzaya, pontho asatipasa mathangwi mazinji toera kukhala akutsandzaya.—Deuteronomyo 12:7; Koelete 3:12, 13.

2, 3. (a) Kodi pisabvekanji kukhala wakutsandzaya? (b) Thangwi yanji midzidzi inango pisanentsa kukhala akutsandzaya?

² Ndiye tani imwe? Ndimwe wakutsandzaya? Kukhala wakutsandzaya pisabveka kukhala na mabvero adidi, kutsandzaya na umaso, peno kutsandzaya kakamwe. Bhibhlya isapangiza kuti ale adapaswa nkhombo na Yahova anakwanisa kukhala na kutsandzaya kwandimomwene. Mphapo thangwi yanji mphyakunentsa kukhala wakutsandzaya n’dziko ino?

³ Mphyakunentsa kakamwe kukhala akutsandzaya tingathimbana na makhaliro akunentsa, ninga kuferwa na nyakufunika wathu peno angabuluswa mu mpingo, kukhondana m’banja peno tingaluza basa yathu. Pinakhalambo pyakunentsa kukhala akutsandzaya tingakhonda kubverana pabanja, tingasingirirwa na andzathu akubasa peno akuxikola, tingatcingwa peno kuikhwa nkaidi thangwi yakutumikira Yahova. Peno khala nee tiri na ungumi wadidi, panango tiri na utenda wakukhonda kuwanga, peno utenda wakutsukwala. Mbwenye kumbukani kuti Yezu Kristu, ‘wakutsandzaya na m’bodzi basi Wamphambvu,’ peno Mambo, asakomerwa na kubalangaza anthu na kuacitisa kukhala akutsandzaya. (1 Timoti 6:15; Mateo 11:28-30) Mu Nkhani ya Paphiri, Yezu alonga makhaliro mangasi akuti anatiphedza toera kukhala akutsandzaya, maseze tithimbane na nyatwa zizinji thangwi yakukhala n’dziko ya Sathani.

4, 5. Tinacitanji toera kukhala akutsandzaya mbatipiriza na kutsandzaya?

⁴ Cinthu cakutoma cidalonga Yezu ndi cakufunika kakamwe. Iye alonga: ‘Anyakutsandzaya ndi ale anadzindikira pyakufuna pyawo pyauzimu, thangwi Umambo wakudzulu ndi wawo.’ (Mateo 5:3) Tingadzindikira pyakufuna pyathu pyauzimu, tinadzindikira kuti tisafuna kudziwa Mulungu, ciphedzo cace na citsogolero cace. Tinapangiza tani pyenepi? Kubulukira mu kupfundza Bhibhlya, kubvera Mulungu na kuona ulambiri wace kukhala wakufunika kakamwe mu umaso wathu. Kucita pyenepi kunatiphedza toera kukhala akutsandzaya. Cikhulupiro cathu cakuti mwakukhonda dembuka Mulungu anadzakwanirisa mapikiro ace cinakhala cakuwanga. Pontho ‘cidikhiro cakutsandzayisa’ cinagumana ife m’Bhibhlya cisatiwangisa.—Tito 2:13.

⁵ Tingafuna kukhala akutsandzaya mwakukhonda tsalakana pinathimbana na ife, tisafunika kupitiriza kuwangisa uxamwali wathu na Yahova. Mpostolo Paulu alemba: ‘Ndzidzi onsene komerwani mwa Mbuya. Ine ndinalonga pontho kuti: Komerwani!’ (Afilipi 4:4) Toera kukhala cifupi na Yahova, tisafunika kukhala na udziwisi wace. Mafala a Mulungu asalonga: ‘Nyakutsandzaya ndi munthu ule ali na udziwisi na ndzeru. Udziwisi ndi ninga muti unapasa umaso kuli ale anakhala nawo, mbutsandzayisa ale anautoweza.’—Misangani 3:13, 18.

 6. Tisafunika kucitanji pontho toera kupitiriza kukhala akutsandzaya?

⁶ Toera kupitiriza na kutsandzaya, ndi pyakufunika kakamwe kuphatisira pinapfundza ife m’Bhibhlya. Yezu agomezera kufunika kwa kucita pyenepi mudalonga iye kuti: ‘Khala musadziwa pyenepi, munakhala akutsandzaya mungapicita.’ (Jwau 13:17; lerini Tyago 1:25.) Pyenepi ndi pyakufunika kakamwe khala tisafuna kutsalakana pyakufuna pyathu pyauzimu na kukhala akutsandzaya. Mphapo tinakwanisa tani kukhala akutsandzaya tingathimbana na pinthu pizinji pyakutsukwalisa? Tendeni tione pinango pidalonga Yezu pa Nkhani ya Paphiri.

 7. Ale analira anakwanisa tani kukhala akutsandzaya?

⁷ ‘Anyakutsandzaya ndi ale analira, thangwi anadzabalangazwa.’ (Mateo 5:4) Panango tinabvundzika: ‘Anthu anakwanisa tani kutsandzaya khala akulira?’ Yezu nee akhalonga pya anthu onsene analira. Anthu azinji akuipa asalira, peno kutsukwala, thangwi ya nyatwa za ‘ntsiku zino zakumalisa’ zakuti ndi ‘zakunentsa kupirira.’ (2 Timoti 3:1) Mbwenye iwo asanyerezera pinthu pyawo basi, tayu pya Yahova, natenepa nee asakhala na uxamwali na iye, pontho nee asakwanisa kukhala akutsandzaya. Yezu akhalonga pya ale anadzindikira pyakufuna pyawo pyauzimu. Iwo asalira thangwi asaona kuti anthu azinji asakhonda Mulungu peno asakhala maso munjira yakukhonda tawirika kuna iye. Iwo asadzindikirambo kuti ndi anthu akudawa, pontho asaona pinthu pyakutsukwalisa pinacitika n’dziko ino. Yahova asaona ale analira, mbaabalangaza kubulukira m’Mafalace, pontho asaaphedza toera kukhala akutsandzaya.—Lerini Ezekyele 5:11; 9:4.

 8. Kodi kukhurudzika kunakuphedzani tani toera kukhala wakutsandzaya?

⁸ ‘Anyakutsandzaya ndi anthu akukhurudzika, thangwi iwo anadzatambira dziko yapantsi.’ (Mateo 5:5) Kodi kukhurudzika kunakuphedzani tani toera kukhala wakutsandzaya? Anthu azinji ndi akudzikuza na aukali, pinthu pyakuti pisabweresa nyatwa zizinji. Mbwenye angapfundza undimomwene, iwo asacinja mbabvala ‘uunthu upswa.’ Natenepa iwo asakwanisa ‘kukhala akubvera ntsisi kakamwe, akukoma ntima, akucepeseka, akupfulika na akupirira.’ (Akolose 3:9-12) Ninga maphindu, iwo asakhala antendere, asakhala na uxamwali wadidi na anango, mbakhala akutsandzaya. Pontho, Mafala a Mulungu asapikira kuti iwo ‘anadzatambira dziko yapantsi.’—Masalmo 37:8-10, 29.

 9. (a) Kodi Yezu akhafuna kulonganji pidalonga iye kuti anthu akukhurudzika ‘anadzatambira dziko yapantsi’? (b) Thangwi yanji ‘ale ananjala na nyota ya ulungami’ anakwanisa kukhala akutsandzaya?

⁹ Kodi Yezu akhafuna kulonganji pidalonga iye kuti anthu akukhurudzika ‘anadzatambira dziko yapantsi’? Anyakudzodzwa anadzatambira dziko yapantsi angadzatonga dziko ninga amambo na anyantsembe. (Apokalipse 20:6) Pikwi na pikwi pya ale akuti nee ali na cidikhiro cakuenda kudzulu anadzatambira dziko yapantsi mbakhala mwenemo kwenda na kwenda. Iwo anadzakhala aungwiro, antendere na akutsandzaya. Anthu anewa ndi ale adalonga Yezu kuti: ‘Anyakutsandzaya ndi ale ananjala na nyota ya ulungami.’ (Mateo 5:6) Kufuna kwawo ulungami kunadzakwanirisika Yahova angadzabulusa uipi onsene. (2 Pedro 3:13) Mu dziko ipswa, anthu akulungama anadzakhala akutsandzaya mbakhonda pontho kulira thangwi ya pinthu pinacita anthu akuipa.—Masalmo 37:17.

10. Kodi pisabvekanji kukhala munthu wantsisi?

¹⁰ ‘Anyakutsandzaya ndi ale anabvera ntsisi andzawo, thangwi anadzabverwambo ntsisi.’ (Mateo 5:7) Kukhala munthu wantsisi pisabveka kukhala wacitsalakano na wakukoma ntima kuna ale anathabuka. Mbwenye ntsisi zisaphataniza pizinji kupiringana kukhala na mabvero. Bhibhlya isapfundzisa kuti kukhala munthu wantsisi pisaphataniza kucita cinthu toera kuphedza anango.

11. Kodi nsangani wa Nsamariya usatipfundzisanji?

¹¹ Lerini Luka 10:30-37. Nsangani wa Yezu unalonga pya Nsamariya usatiphedza kubvesesa kuti pisabvekanji kukhala munthu wantsisi. Thangwi yakukhala na ntsisi, Nsamariya akulumizika toera kuphedza mamuna wakuti akhathabuka. Pidamala Yezu kulonga nsangani unoyu, iye alonga: ‘Ndoko kacitembo pibodzi pyene.’ Natenepa tinakwanisa kubvundzika: ‘Ndisacitambo pibodzi pyene ninga pidacita Nsamariya? Anango angathabuka, ndisacita pyonsene pinakwanisa ine toera kuaphedza? Mwacitsandzo, ndisaphedza abale na alongo akugwesera mu mpingo, azice, peno ana akuti anyakubalawo nee asatumikira Yahova? Kodi ‘ndisabalangaza ale akuti ali akutsukwala?’—1 Atesalonika 5:14; Tyago 1:27.

12. Thangwi yanji tisatsandzaya tingabvera ntsisi?

¹² Thangwi yanji tisakhala akutsandzaya tingabvera ntsisi anango? Tingabvera ntsisi anango, tikupasa, pontho Yezu alonga kuti kupasa kunatitsandzayisa. Thangwi inango ndi yakuti ife tisadziwa kuti tikukomeresa Yahova. (Machitiro 20:35; lerini Ahebere 13:16.) Mambo Dhavidhi alonga pya munthu anabvera ntsisi anango: ‘Yahova anadzantsidzikiza na kum’phedza toera kukhala maso. Iye anadzacemerwa wakutsandzaya pa dziko yapantsi.’ (Masalmo 41:1, 2) Tingabvera ntsisi anango, tinabverwambo ntsisi na Yahova mbatikhala akutsandzaya kwenda na kwenda.—Tyago 2:13.

13, 14. Thangwi yanji ndi pyakufunika kakamwe kukhala ‘akucena ntima’?

¹³ Yezu alonga: ‘Anyakutsandzaya ndi anthu akucena ntima, thangwi iwo anadzaona Mulungu.’ (Mateo 5:8) Toera kukhala akucena ntima, tisafunika kupitiriza kukhala na manyerezero na pifuno pyakucena. Pyenepi ndi pyakufunika kakamwe khala tisafuna kuti Yahova atawire ulambiri wathu.—Lerini 2 Akorinto 4:2; 1 Timoti 1:5.

¹⁴ Anthu akucena ntima anakwanisa kukhala na uxamwali wadidi na Yahova, thangwi iye alonga: “Anyakutsandzaya ndi ale anafula nguwo zawo.” (Apokalipse 22:14) Kodi mafala akuti iwo “afula nguwo zawo” asabvekanji? Kwa Akristu akudzodzwa, pisabveka kuti Yahova asaaona ninga akucena, iye anadzaapasa umaso wakukhonda kufa kudzulu, mbakhala akutsandzaya kwenda na kwenda. Kwa mwinji ukulu, unadikhira kukhala pa dziko yapantsi, pisabveka kuti Yahova asaatawirisa kukhala axamwali ace thangwi iye asaaona ninga akulungama. Bhibhlya isalonga kuti ‘iwo afula nguwo zawo mbazicenesa na ciropa ca Mwanabira.’—Apokalipse 7:9, 13, 14.

15, 16. Kodi munthu wakucena ntima anaona tani Mulungu?

¹⁵ Yahova alonga: ‘Nkhabe munthu anakwanisa kundiona mbakhala maso.’ (Eksodo 33:20) Mphapo ndi munjira ipi munthu wakucena ntima ‘anaona Mulungu’? Fala Yacigerego idathumburuzwa ‘kuona’ isabveka kunyerezera, kubvesesa peno kudziwa. Natenepa ‘kuona Mulungu’ pisabveka kubvesesa Uunthu wace na kufuna makhaliro ace. (Aefesi 1:18) Yezu atowezera mwakukwana makhaliro a Mulungu, ndi thangwi yace iye alonga: ‘Ule anandiona, aonambo Baba.’—Jwau 14:7-9.

¹⁶ Mwakuthimizira, ife ‘tinaona Mulungu’ tingadzindikira njira inatiphedza iye mu umaso wathu. (Yobe 42:5) Ife tinakwanisambo ‘kuona’ peno kunyerezera pinthu pyakudzumatirisa pidapikira Yahova kucitira anthu akucena ntima na anantumikira mwakukhulupirika. Pontho, Akristu akudzodzwa anadzaona Yahova na maso awo angalamuswa mbaenda kudzulu.—1 Jwau 3:2.

17. Thangwi yanji munthu wakukhazikisa ntendere asakhala wakutsandzaya?

¹⁷ Buluka penepo Yezu alonga: ‘Anyakutsandzaya ndi ale anakhazikisa ntendere.’ (Mateo 5:9) Tingakhala akutoma kukhazikisa ntendere kuna anango, tinakwanisa kukhala akutsandzaya. Nyakupfundza Tiyago alemba: ‘Nsapo wa ulungami usabzwalwa m’makhaliro a ntendere pakati pa anthu anakhazikisa ntendere.’ (Tyago 3:18) Natenepa, khala imwe mwaipisirana na munthu unango mu mpingo mwanu peno pabanja panu, phembani Yahova toera akuphedzeni kukhazikisa ntendere. Yahova anakupasani nzimu wace wakucena, wakuti unakuphedzani toera kupangiza makhaliro Acikristu, mbamukhala wakutsandzaya. Yezu agomezera kuti thangwi yanji ndi pyakufunika kakamwe kukhala akutoma kukhazikisa ntendere mudalonga iye kuti: ‘Iwe ungabweresa muoni wako pa guwa ya ntsembe, penepo mbukumbuka kuti watsukwalisa m’bale wako, siya muoni wako patsogolo pa guwa. Pakutoma ndoko kakhazikise ntendere na m’bale wako, ungamala, bwerera toera upereke muoni wako.’—Mateo 5:23, 24.

18, 19. Thangwi yanji Akristu asatsandzaya angatcingwa?

¹⁸ ‘Ndimwe anyakutsandzaya anthu angakutikanani, kukutcingani na kukupambizirani ntundu onsene wa pinthu pyakuipa thangwi ya ine.’ Kodi Yezu akhafuna kulonganji? Iye athimiza: ‘Komerwani, pontho sekerani kakamwe thangwi muoni wanu ndi ukulu kudzulu, thangwi munjira ibodzi ene iwo atcinga aprofeta imwe mbamudzati kubalwa.’ (Mateo 5:11, 12) Mu ndzidzi ukhamenywa apostolo na kukhondeswa kumwaza mphangwa, ‘iwo abuluka mwakutsandzaya pa Thando Ikulu Yakutongera Miseru.’ Mwandimomwene, iwo nee atsandzaya thangwi yakumenywa. Mbwenye akhatsandzaya ‘thangwi aoniwa kuti athema kuona nyatwa thangwi ya dzina ya Yezu.’—Machitiro 5:41.

¹⁹ Lero, atumiki a Yahova asapirirambo mwakutsandzaya angatcingwa thangwi ya dzina ya Yezu. (Lerini Tyago 1:2-4.) Ninga apostolo, ife nee tisatsandzaya tingathabuswa peno kutcingwa. Mbwenye tingakhala akukhulupirika kuna Yahova, iye anatipasa cipapo cinafunika ife toera kupirira. Onani pidacitikira Henryk Dornik na m’bale wace. Mwezi wa Agosto wa caka 1944, iwo atumizwa ku mazunde toera kathabuswa. Anthu akhaatcinga alonga: “Ndi pyakucimwanika kuakakamiza toera kucita cinthu. Kuphiwa thangwi ya cikhulupiro cawo kusaatsandzayisa.” Henryk afokotoza: “Maseze nee ndikhafuna kuphiwa thangwi ya cikhulupiro canga, kuthabuka mwacipapo thangwi yakukhulupirika kwa Yahova kwanditsandzayisa.” Iye athimiza: “Phembero yakuwanga yandiphedza toera kukhala cifupi na Yahova, pontho iye apangiza kukhala M’phedzi wakunyindirika.”

20. Thangwi yanji tisatsandzaya kutumikira ‘Mulungu wakutsandzaya’?

²⁰ Yahova, ‘Mulungu wakutsandzaya,’ angakomerwa na ife, tinakwanisa kukhala akutsandzaya maseze titcingwe na anthu anango peno a m’banja mwathu, peno tingaduwala peno tingakalamba. (1 Timoti 1:11) Ife tinakwanisambo kukhala akutsandzaya thangwi Mulungu wathu ‘wakuti nkhabe longa uthambi,’ atipikira pinthu pizinji pyakudzumatirisa. (Tito 1:2) Yahova angakwanirisa mapikiro ace, nee tinadzakumbukabve nyatwa zinathimbana na ife lero. Mwandimomwene, tinadzakhala na umaso wakutsandzayisa kakamwe m’Paraizu! Ife ‘tinadzakomerwa na ntendere ukulu kakamwe.’—Masalmo 37:10.